Lalokau Dainai Ita Haroro Noho!

1. Lagani 2023 ena lagani ta ta hebouna ai dahaka ita dibaia?

LAGANI 2023 ena lagani ta ta hebouna ai,a ita abia dae gaudia dekenai diba matamata ita abia bona iseda haroro gaukara totona hadibaia hereva haida ita kamonai. Hegeregere, ita diba Babulonia Badana idia hadikaia murinai, dala ia noho haida be Iehova ena taunimanima do idia bamoa. Danu, ita kamonai November 2023 ai, haroro gaukara totona ita karaia gaudia do ita ripotilaia lasi. Unai bamona senisi idia vara dainai iseda haroro gaukara do ita laloa bada lasi, a? Lasi momokani!

2. Dahaka dainai dina ta ta ia hanaia lalonai iseda haroro gaukara be mai anina bada? (Mareko 13:10)

² Dina ta ta ia hanaia lalonai haroro gaukara be mai anina bada. Dahaka dainai? Badina nega be lasi. Mani dina gabedia ai Iesu ese haroro gaukara ia perovetalaia dalana ita laloa. (Mareko 13:10 duahia.) Mataio bukana ai Iesu ia gwau sivarai namona be tanobada ibounai dekenai idia harorolaia murinai, “dokona do ia ginidae.” (Mat. 24:14) Unai hereva ena anina be Satani ena tanobada oromana dikana be do ia ore momokani. Iehova ese “dina bona hora” ia makaia vadaeni bona kahirakahira unai gaudia do idia vara. (Mat. 24:36; 25:13; Kara 1:7) Bona dina ta ta ia hanaia lalonai, unai nega be ia mai kahirakahira noho. (Roma 13:11) To, dokona ia do ginidae lasi lalonai namona be haroro gaukara ita karaia noho.

3. Dahaka ese ita ia hagoadaia ita haroro totona?

³ Iseda haroro gaukara ita laloa neganai, namona be inai mai anina bada henanadai ita laloa: Dahaka dainai sivarai namona ita harorolaia? Ita gwau diba, lalokau ese ita ia hagoadaia unai ita karaia totona. Haroro gaukara ita karaia neganai, ita hahedinaraia sivarai namona ita ura henia, taunimanima ita lalokau henia, bona mai anina bada gauna be Iehova ita lalokau henia bona iena ladana ita laloa bada. Mani unai gaudia ta ta ita herevalaia.

SIVARAI NAMONA ITA URA HENIA DAINAI ITA HARORO

4. Sivarai namona oi kamonai neganai, dahaka oi karaia?

⁴ Sivarai namona ta oi kamonai neganai oi abia hemami oi laloatao, a? Reana emu famili lalonai beibi ta ia vara eiava oi ura henia moni gaukarana ta oi abia, bona oi moale bada dainai emu famili bona turadia dekenai unai sivarai oi gwauraia. Unai hegeregerena, Dirava ena Basileia ena sivarai namona oi kamonai neganai, unai bamona oi karaia, a?

5. Nega ginigunana Baibel amo hereva momokani oi diba neganai, emu hemami be edena bamona? (Laulau itaia danu.)

⁵ Nega ginigunana Baibel amo hereva momokani oi dibaia neganai, oi abia hemami mani oi laloa. Hegeregere oi diba, emu guba Tamana be oi ia lalokau henia, Ia ura ena ruma bese ena kahana ta ai oi lao, bona ia oi tomadiho henia. Ia gwauhamata hisihisi bona lalohisihisi do ia haorea bona tanobada matamatana ai emu lalokau taudia do idia toreisi lou. (Mar. 10:29, 30; Ioa. 5:28, 29; Roma 8:38, 39; Apok. 21:3, 4) Unai hereva momokani ese emu kudouna ia hamarerea. (Luka 24:32) Bona oi dibaia gaudia oi ura henia dainai, oi ura ma haida dekenai oi herevalaia!—Ieremia 20:9 hahegeregerea.

6. Ernest bona Rose edia haheitalai amo dahaka ita dibaia?

⁶ Mani haheitalai ta ita herevalaia. Tadikaka ta ladana Ernest ena mauri lagani be 10 neganai, ena tamana ia mase. Ernest ia gwau: “Lau laloa ‘egu tamana be guba dekenai ia daekau, a? Eiava do ia mase hanaihanai, a?’ Natudia haida be edia tamadia ida lau itaia neganai lau mama.” Ernest be nega momo ena tamana ena gara gabuna dekenai do ia lao, do ia tui diho bona ia guriguri: “Dirava e, lau ura diba egu tamana be edeseniai?” Ernest ena tamana ia mase bona lagani 17 murinai, Baibel stadi ia abia dae. Ia hoa badina ia diba mase taudia be gau ta idia diba lasi, unai be hegeregere idia mahuta boio, bona Baibel ia gwauhamata mase taudia be do idia toreisi lou. (Had. 9:5, 10; Kara 24:15) Dokonai, lagani momo lalonai ia ura dibaia henanadai edia haere ia abia! Ernest be Baibel amo ia dibaia hereva momokanidia dainai ia moale bada. Iena adavana Rose danu be Baibel stadi ia abia dae bona ia dibaia gaudia ia ura henia bada. Bona 1978 ai idia ruaosi idia bapatiso. Idia abia dae gaudia be mai ura ida edia famili, turadia bona ma haida dekenai idia herevalaia. Unai dainai, Ernest bona Rose be taunimanima 70 idia durua Iehova idia dibaia bona bapatiso idia abia.

7. Baibel ena hereva momokani ita ura henia neganai, dahaka do ita karaia? (Luka 6:45)

⁷ Baibel amo ita dibaia hereva momokanidia ita ura henia neganai, do ita ura ma haida dekenai ita herevalaia. (Luka 6:45 duahia.) Bona Iesu ena hahediba taudia bamona do ita mamia, idia gwau: “Ai itaia bona kamonai gaudia herevalaia karana do ai hadokoa lasi.” (Kara 4:20) Hereva momokani ita ura henia bada dainai, ita ura taunimanima ibounai dekenai ita harorolaia.

TAUNIMANIMA ITA LALOKAU HENIA DAINAI ITA HARORO

8. Dahaka dainai ita ura ma haida dekenai sivarai namona ita harorolaia? (Maua ladana,“Taunimanima Lalokau Henia—Hahediba Taudia ai Halaoa” itaia.) (Laulau itaia danu.)

⁸ Iehova bona ena Natuna bamona taunimanima ita lalokau henia. (Aon. 8:31; Ioa. 3:16) Idia ita hebogahisi henia badina idia be ‘Dirava idia diba lasi’ bona idia be “helaro lasi.” (Efe. 2:12) Idia davaria hekwakwanai dainai reana do idia mamia idia be guri dobuna lalonai idia noho bamona, to ita dekenai varo ia noho idia ita veria daekau totona, unai be Dirava ena Basileia ena sivarai namona. Idia ita lalokau henia bona hebogahisi henia dainai, ita gaukara goada idia dekenai sivarai namona ita harorolaia totona. Unai sivarai idia kamonai neganai, helaro ia henia, idia ia durua hari idia moale totona, bona dala ia kehoa tanobada matamatana ai “mauri korikorina,” unai be mauri hanaihanai idia moalelaia totona.—1 Tim. 6:19.

9. Vaira nega totona dahaka hadibaia hereva ita gwauraia, bona dahaka dainai? (Esekiela 33:7, 8)

⁹ Danu taunimanima ita lalokau henia dainai, idia ita hamaoroa inai tanobada ena dokona be ia kahirakahira. (Esekiela 33:7, 8 duahia.) Taunimanima ibounai ita hebogahisi henia, iseda dekena taudia bona iseda Witnes lasi varavara danu. Idia momo be edia dina ta ta maurina dekenai idia bisi, unai dainai idia diba lasi hisihisi badana do ia vara, “tanobada ena matamaia negana amo ema bona hari, unai bamona hisihisi ta ia vara lasi, bona do ia vara lou lasi.” (Mat. 24:21) Ita ura hahemaoro negana ai do ia vara gauna idia diba be namo, ginigunana be tomadiho koikoi do idia hadikaia ore bena Aramagedono tuarina ai, inai tanobada oromana dikana do idia hadikaia ore. (Apok. 16:14, 16; 17:16, 17; 19:11, 19, 20) Ita guriguri, taunimanima ese ita gwauraia herevana do idia kamonai bona abia hidi idia karaia ita ida Iehova idia tomadiho henia totona. To iseda hereva idia kamonai lasi taudia, hegeregere iseda varavara be edena bamona?

10. Dahaka dainai hadibaia hereva ita gwauraia noho be mai anina bada?

¹⁰ Atikol 19 ai ita herevalaia bamona, Babulonia Badana do idia hadikaia karana idia itaia taudia haida be Iehova do idia abidadama henia bona idia do ia hamauria. Unai dainai, hari taunimanima dekenai unai hadibaia herevana ita gwauraia noho be mai anina bada. Mani inai ita laloa: Hari idia dekenai ita gwauraia hadibaia herevana be reana gabeai do idia laloatao. (Esekiela 33:33 hahegeregerea.) Reana idia kamonai hadibaia herevana do idia laloa lou bona unai ese idia do ia durua, nega ia noho lalonai ita ida Iehova idia tomadiho henia totona. “Tano mareremarere bada ia vara” murinai, Filipi ai dibura naria tauna be ena lalona ia haidaua hegeregerena, reana hari hadibaia hereva idia kamonai, to kara ta idia karaia lasi taudia be Babulonia Badana idia hadikaia murinai, edia lalona do idia haidaua.—Kara 16:25-34.

IEHOVA ITA LALOKAU HENIA BONA ENA LADANA ITA LALOA BADA DAINAI ITA HARORO

11. Edena dala ai Iehova dekenai hairai, hemataurai bona siahu ita henia? (Apokalupo 4:11) (Laulau itaia danu.)

¹¹ Sivarai namona ita harorolaia ena badina badana be Iehova ita lalokau henia bona ena ladana helagana ita laloa bada. Danu haroro gaukara ita karaia neganai, ita lalokau henia Diravana ita hanamoa. (Apokalupo 4:11 duahia.) Mai kudouna ibounai ida ita abia dae Iehova be mai ena maoro ia idia tomadiho henia taudia ese hairai, hemataurai bona siahu idia henia totona. Ma haida dekenai ita hahedinaraia ia ese ‘gau ibounai ia havaraia’ bona ia dainai ita mauri. Unai ita karaia neganai ia dekenai hairai bona hemataurai ita henia. Iseda nega, goada bona kohu ita gaukaralaia bona iseda noho dalana hegeregerena haroro gaukara ita karaia neganai, Iehova dekenai siahu ita henia. (Mat. 6:33; Luka 13:24; Kol. 3:23) Bona ita ura bada ita lalokau henia Diravana ita herevalaia. Danu, ita ura ma haida dekenai ena ladana bona ena kara namodia ita herevalaia. Dahaka dainai?

12. Edena dala ai iseda haroro gaukara lalonai Iehova ena ladana ita hahelagaia?

¹² Iehova ita lalokau henia dainai iena ladana ita hahelagaia. (Mat. 6:9) Unai ena anina be ita ura ma haida ita hadibaia Satani ese Iehova totona ia gwauraia herevadia be koikoi. (Gen. 3:1-5; Iobu 2:4; Ioa. 8:44) Haroro gaukara ai, kamonai taudia dekenai iseda Dirava totona hereva momokani ita gwauraia. Ita ura taunimanima ibounai idia diba Iehova ena kara badana be lalokau, iena lohia dalana be maoromaoro bona momokani, bona ena Basileia ese kahirakahira hisihisi ibounai do ia haorea, bona taunimanima dekenai maino bona moale korikori do ia havaraia. (Sal. 37:10, 11, 29; 1 Ioa. 4:8) Taunimanima dekenai unai gaudia ita gwauraia neganai, Iehova ena ladana ita hahelagaia. Danu ita moale badina unai bamona ita karaia neganai, ita hahedinaraia ita be Iehova ena Witnes taudia. Edena dala ai?

13. Dahaka dainai Iehova ena Witnes taudia ai ita lao be hahenamo badana? (Isaia 43:10-12)

¹³ Iehova ese ita ia abia hidi iena “hereva hamomokania taudia” ai ita lao totona. (Isaia 43:10-12 duahia.) Lagani haida gunanai, Hakaua Oreana ena revareva ta ia gwau: “Ita moalelaia hahenamo badana be taunimanima ese ita idia gwauraia Iehova ena Witnes taudia.”b Dahaka dainai unai be momokani? Mani oi laloa haida idia gwau, oi be kerere ta oi karaia. Unai dainai ta do oi abia hidi unai taudia ia hamaoroa, oi totona idia gwauraia herevadia be koikoi, oi be taunimanima namona bona unai bamona do oi karaia lasi. Daika do oi abia hidi? Momokani, oi trast bona ladana namona tauna ta do oi abia hidi, unai amo haida ese ena hereva do idia abia dae. Unai hegeregerena Iehova be ita ia trast bona diba namonamo dainai ita ia abia hidi iena Witnes taudia ai ita lao totona, bona ia diba taunimanima dekenai do ita hahedinaraia ia be Dirava momokanina. Iena Witnes taudia ai ita lao be hahenamo badana bona dala idauidau ai iena ladana ita gwauraia hedinarai bona ma haida ita hamaoroa ia totona idia gwauraia herevadia be koikoi. Unai ita karaia neganai, ita hahedinaraia ita be Iehova ena Witnes taudia!—Sal. 83:18; Roma 10:13-15.

DO ITA HARORO NOHO ELA BONA DOKONA

14. Vaira negai dahaka gau namodia do idia vara?

¹⁴ Ita moale bada vaira negai do idia vara gaudia ita itaia totona! Hisihisi badana ia do hamatamaia lasi neganai, ita ura Iehova ena heduru amo momo be hereva momokani do idia abia dae. Danu, ita moale badina hisihisi badana lalonai taunimanima be Satani ena tanobada do idia dadaraia bona ita ida Iehova do idia hanamoa!—Kara 13:48.

15-16. Dahaka do ita karaia noho, bona edena negai do ita hadokoa?

¹⁵ To ita be mai anina bada gaukarana ita karaia noho, unai gaukara be gabeai do ita karaia lou lasi. Unai be tanobada ibounai dekenai Dirava ena Basileia sivarai namona harorolaia gaukarana. Danu, taunimanima ita hadibaia kahirakahira gau ta do ia vara. Namona be taunimanima idia diba inai nega oromana ena dokona be ia mai haraga noho. Bena hahemaoro dinana ia ginidae neganai, taunimanima do idia diba ita harorolaia sivaraina be Iehova Dirava amo ia mai.—Ese. 38:23.

¹⁶ Iseda lalona ita hadaia dahaka ita karaia totona? Lalokau karana ese ita ia hagoadaia sivarai namona ita ura henia, taunimanima ita lalokau henia, bona mai anina bada gauna be Iehova ita lalokau henia bona ena ladana ita laloa bada. Unai dainai ita gaukara goada mai ura bada ida sivarai namona ita harorolaia noho ela bona Iehova ia gwau: “Inai gaukara be ia ore!”