Kerere Ia Karaia Tauna Dekenai Lalokau Bona Hebogahisi Hahedinaraia

1. Ta be kara dika badana ia karaia murinai, dahaka ia vara diba?

STADI atikol 33 ai, aposetolo Paulo ese Korinto dekenai ia noho kongrigeisen ai, kara dika badana ta ia karaia tauna ia kara henia dalana ita stadilaia. Kara dika tauna be ia helalo-kerehai lasi bona kongrigeisen amo idia kokia. To, iseda stadi ena siri badana hegeregerena kara dika badadia idia karaia taudia haida be idia helalo-kerehai diba. (Roma 2:4) Edena dala ai elda taudia ese idia durua diba idia helalo-kerehai totona?

2-3. Dahaka do ita karaia bema ita diba iseda tadikaka o taihu ta be kara dika badana ia karaia, bona dahaka dainai?

² Elda taudia ese kerere ia karaia tauna idia durua totona, ia vara gauna idia diba be namo. Bema ita diba iseda tadikaka o taihu ta be kara dika badana ta ia karaia bona kongrigeisen amo idia kokia diba, dahaka ita karaia be namo? Kerere ia karaia tauna ita hagoadaia elda taudia dekenai heduru ia tahua be namo.—Isa. 1:18; Kara 20:28; 1 Pet. 5:2.

³ To, bema kerere tauna ia ura lasi elda taudia dekenai ena kerere ia herevalaia be edena bamona? Vadaeni, ita sibona ese elda taudia do ita hadibaia, unai amo kerere ia karaia tauna be heduru do ia abia. Unai be lalokau karana badina ita ura ia ita durua. Bema kerere ia karaia tauna be ena kara dika ia rakatania lasi, ena hetura karana Iehova ida ia hadikaia noho diba. Danu kongrigeisen ena ladana namona do ia hadikaia. Iehova bona kerere tauna ita lalokau henia dainai, mai gari lasi ida unai ita karaia.—Sal. 27:14.

ELDA TAUDIA ESE KARA DIKA BADANA IA KARAIA TAUNA IDIA DURUA DALANA

4. Elda taudia be kerere tauna ida idia hebou neganai, edia tahua gauna be dahaka?

⁴ Kongrigeisen lalonai ta be kara dika badana ia karaia neganai, elda orea be idia huanai tadikaka toi idia abia hidi, komiti gaukarana idia karaia totona.a Idia be hebogahisi bona manau karana idia hahedinaraia be namo. Bema idia ura kerere tauna idia durua, namona be idia laloatao ta do idia doria lasi senisi ia karaia totona. (Deu. 30:19) King Davida be ena kara dika amo ia helalo-kerehai, to elda taudia idia diba kerere idia karaia taudia haida be do idia helalo-kerehai lasi. (2 Sam. 12:13) Idia haida be Iehova ena sisiba idia ura lasi abia dae. (Gen. 4:6-8) To, elda taudia edia tahua gauna be kerere ia karaia tauna do idia durua ia helalo-kerehai. Elda taudia be kerere tauna ida idia hebou neganai, dahaka hakaua hereva idia laloatao be namo?

5. Elda taudia be kerere tauna ida idia hebou neganai, dahaka sisiba do idia laloa? (2 Timoteo 2:24-26) (Laulau itaia danu.)

⁵ Elda taudia ese kerere ia karaia tauna idia laloa bada. (Luka 15:4, 6) Unai dainai, kerere tauna ida idia hebou neganai, edia hereva dalana bona kara amo ia idia kara auka henia lasi; danu namo lasi elda taudia idia laloa idia hebou ena badina be ia do idia henanadai henia bona ia karaia gauna idia diba totona. To, elda taudia be Timoteo Iharuana 2:24-26 ena hereva idia badinaia. (Duahia.) Elda taudia idia ura kerere tauna idia durua ena laloa dalana ia senisia totona. Unai dainai namona be manau, hebogahisi bona kara namo idia hahedinaraia.

6. Edena dala ai elda taudia be kerere tauna ida idia do hebou lasi neganai, edia kudouna idia hegaegaelaia? (Roma 2:4)

⁶ Elda taudia be edia kudouna idia hegaegaelaia. Kara dika tauna ida idia hebou neganai, idia ura Iehova ena haheitalai idia tohotohoa, Paulo ena hereva idia laloatao: “Dirava be ena hebogahisi amo oi ia durua toho, oi helalo-kerehai totona.” (Roma 2:4 duahia.) Namona be elda taudia idia laloatao idia be Keriso ena hakaua henunai mamoe naria. (Isa. 11:3, 4; Mat. 18:18-20) Komiti be kerere karaia tauna ida ia do hebou lasi neganai, mai guriguri ida edia tahua gauna idia laloa; unai be kerere tauna idia durua ia helalo-kerehai totona. Baibel bona pablikeisen idia stadilaia bona laloparara totona idia guriguri. Kerere ia karaia tauna ena noho dalana do idia laloa, unai amo do idia diba dahaka dainai unai lalohadai ia abia bona kara dika ia karaia.—Aon. 20:5.

7-8. Elda taudia be kerere tauna ida idia hebou neganai, edena dala ai Iehova ena haheauka karana idia tohotohoa diba?

⁷ Elda taudia be Iehova ena haheauka karana idia tohotohoa. Idia be idaunegai Iehova ese kerere taudia ia kara henia dalana idia laloa. Hegeregere, Iehova ese mai haheauka ida Kaino ia kara henia. Bona ia dekenai kerere ia karaia ena dika bona ena kara ia senisia ena namo ia herevalaia. (Gen. 4:6, 7) Iehova ese peroveta tauna Natana ia siaia Davida ia sisiba henia totona. Bona Natana be haheitalai ta ia gaukaralaia, unai ese king ia durua ia helalo-kerehai totona. (2 Sam. 12:1-7) Bona Iehova ese ia idia kamonai henia lasi Israela besena dekenai ena peroveta taudia ia “siaia loulou.” (Ier. 7:24, 25) Iena taunimanima idia helalo-kerehai totona ia naria lasi, to heduru ia henia. Idia ia hadibaia edia kara dika idia rakatania totona.

⁸ Elda taudia ese kara dika badadia idia karaia taudia idia durua totona, Iehova ena haheitalai idia badinaia. Timoteo Iharuana 4:2 ena hereva hegeregerena, ia kerere tadikaka o taihu be “mai haheauka ida” idia hereva henia. Unai dainai elda tauna be hanaihanai sibona ia biagua bona ia haheauka, unai amo kara dika tauna ia durua kara maorona ia karaia totona. Bema elda ia badu matamaia, kara dika tauna be sisiba do ia kamonai henia lasi eiava do ia helalo-kerehai lasi.

9-10. Edena dala ai elda taudia ese ta idia durua diba ia kara dika ena badina ia laloa totona?

⁹ Elda taudia do idia tahua dahaka dainai ta be kara dika ia karaia. Hegeregere, Keristani tauna be sibona ena stadi bona haroro gaukara ia karaia lasi dainai metairametaira ia manoka ia lao, a? Iehova guriguri henia karana ia hadokoa, a? Lalohadai kereredia ia dadaraia lasi, a? Hebamo bona moale karadia dekenai abia hidi kereredia ia karaia, a? Unai bamona abia hidi ese edena dala ai iena lalohadai bona ura ia biagua? Ia karaia abia hidi bona kara ese iena Tamana, Iehova ena lalona ia hahisia karana ia lalopararalaia, a?

¹⁰ Elda taudia ese henanadai maorodia amo kerere tauna idia nanadaia, unai amo ia idia durua ena lalohadai ia gwauraia bona kara dika ia karaia ena badina ia laloa totona. (Aon. 20:5) Danu, idia ese haheitalai haida idia gaukaralaia diba ia karaia kerere ia laloa totona bona do ia laloparara ia be kerere ia karaia. Natana ese Davida dekenai ia karaia bamona. Reana edia hebou ginigunana ai, tadikaka be ia karaia kerere dainai do ia lalohisihisi bada matamaia. Bona ia helalo-kerehai diba.

11. Iesu be kara dika taudia dekenai dahaka ia karaia?

¹¹ Elda taudia idia gaukara goada Iesu ena haheitalai idia tohotohoa. Ia toreisi lou tauna Iesu be Taso tauna Saulo ia kara henia neganai, Iesu ese henanadai namona ia gaukaralaia, ia gwau: “Saulo e, Saulo e, dahaka dainai lau oi dagedage henia noho?” (Kara 9:3-6) Bona “inai hahine Iesebele” totona Iesu ia gwau: “Ia dekenai nega lau henia ia helalo-kerehai totona.”—Apok. 2:20, 21.

12-13. Edena dala ai elda taudia ese kerere tauna dekenai nega idia henia ia helalo-kerehai totona? (Laulau itaia danu.)

¹² Elda taudia be Iesu idia tohotohoa dainai, namo lasi idia gwau kerere tauna be do ia helalo-kerehai lasi. Haida be nega ginigunana ai komiti ida idia hebou neganai idia helalo-kerehai. To ma haida be unai bamona lasi unai dainai elda taudia be dala idia karaia kara dika tauna ida dina ma haida idia hebou lou totona. Reana hebou ginigunana idia abia murinai, kerere tauna be elda taudia ese idia gwauraia gaudia do ia laloa bada matamaia. Reana manau karana do ia hahedinaraia bona Iehova do ia noia ena kara dika ia gwauatao totona. (Sal 32:5; 38:18) Unai dainai ia ida idia hebou loulou neganai, reana kara dika tauna ena kara do ia haidaua.

¹³ Elda taudia be kara dika tauna idia durua ia helalo-kerehai totona, hebogahisi bona kara namo idia hahedinaraia. Iehova idia guriguri henia bona idia ura edia hekwarahi ia hanamoa, unai amo ia kerere Keristani tauna be ena kara dika do ia lalopararalaia bona ia helalo-kerehai.—2Ti 2:25, 26.

14. Kara dika tauna ia helalo-kerehai neganai, daika ese hanamoa ia abia be namo, bona dahaka dainai?

¹⁴ Bema kara dika tauna ia helalo-kerehai, unai be moale bada negana! (Luka 15:7, 10) Daika ese hanamoa ia abia be namo? Elda taudia, a? Paulo ese kara dika taudia ia herevalaia karana ita laloa, ia gwau: “Reana Dirava ese dala do ia kehoa idia helalo-kerehai totona.” (2Ti 2:25) Unai dainai Iehova ese Keristani tauna ia durua ena kara ia haidaua totona, to taunimanima lasi. Keristani tauna ia helalo-kerehai murinai ia dekenai ia vara namo be Paulo ese ia herevalaia. Unai tauna be hereva momokani ena diba maorona bona lalohadai maorona ia abia, bona unai dainai Satani ena tarapu amo ia heau mauri diba.—2Ti 2:26.

15. Edena dala ai elda taudia ese ia helalo-kerehai tauna idia durua noho diba?

¹⁵ Kerere tauna ia helalo-kerehai neganai, komiti be dala idia karaia ia dekenai mamoe vadivadi idia karaia totona, unai amo heduru do ia abia noho Satani ena hahetoho ia dadaraia bona kara maorona do ia karaia. (Heb. 12:12, 13) Oibe, elda taudia be kara dika tauna ese ia karaia karana be taunimanima dekenai do idia herevalaia lasi. To kongrigeisen taudia be dahaka idia diba be namo?

“IBOUNAI VAIRANAI IDIA DO OI SISIBA HENIA”

16. Timoteo Ginigunana 5:20 ai Paulo ena hereva ena anina be dahaka?

¹⁶ Timoteo Ginigunana 5:20 duahia. Paulo ese elda tauna Timoteo dekenai, “kara dika idia karaia noho taudia” sisiba henia dalana ia herevalaia. Paulo ena hereva anina be dahaka? Ia be kongrigeisen taudia ibounai ia herevalaia lasi. To haida sibona ia herevalaia, unai taudia be kara dika tauna ese ia karaia kerere idia diba vadaeni. Badina idia ese ia karaia kerere idia itaia, eiava idia dekenai ena kerere ia gwauraia. Elda taudia be mai aonega ida unai taudia do idia hamaoroa kara dika tauna idia sisiba henia vadaeni.

17. Bema ta ena kara dika badana be kongrigeisen taudia ibounai idia diba eiava gabeai do idia diba, dahaka hadibaia hereva do idia henia, bona dahaka dainai?

¹⁷ Nega haida, ta ese ia karaia kerere be kongrigeisen taudia momo idia diba eiava gabeai unai do idia diba. Unai bamona negadiai, “ibounai vairanai” ena anina be kongrigeisen taudia ibounai. Unai dainai, elda ta ese kongrigeisen taudia do ia hadibaia unai tadikaka o taihu be sisiba aukana ia abia. Dahaka dainai? Paulo ia haere: “Unai amo ma haida danu” be unai kara dika ena tarapu lalonai do idia moru lasi.

18. Bapatiso matamata tauna ena mauri lagani be 18 ia do abia lasi bona kara dika badana ia karaia neganai, elda taudia be dahaka do idia karaia? (Laulau itaia danu.)

¹⁸ Bapatiso matamata tauna ena mauri lagani be 18 ia do abia lasi bona kara dika badana ia karaia neganai, elda taudia be dahaka do idia karaia? Elda oreana be elda taudia rua do idia abia hidi unai matamata tauna, ena Keristani tama sina ida idia hebou totona.b Elda taudia be natuna ena tama sina do idia nanadaia dahaka gaudia idia karaia vadaeni natuna idia durua ena kara ia senisia bona ia helalo-kerehai totona. Bema natuna ese tama sina ena sisiba ia kamonai bona ena lalohadai bona kara ia senisia, elda taudia rua be tama sina do idia hamaoroa edia natuna do idia durua noho diba. Badina Dirava ese tama sina dekenai maduna ia henia mai lalokau ida edia natudia idia sisiba henia totona. (Deu. 6:6, 7; Aon. 6:20; 22:6; Efe. 6:2-4) Elda taudia be nega ta ta ai tama sina do idia nanadaia unai amo natuna be heduru maorona do ia abia noho. To bema ia bapatiso natuna be kara dika ia do karaia noho be edena bamona? Komiti be unai matamata tauna, ena Keristani tama sina ida do idia hebou.

“IEHOVA BE LALOKAU BONA HEBOGAHISI BADA DIRAVANA”

19. Elda taudia be kerere tauna ida idia hebou neganai, edena dala ai Iehova idia tohotohoa?

¹⁹ Iehova vairanai komiti gaukara idia karaia elda taudia edia maduna be kongrigeisen do idia gimaia ia goeva noho totona. (1 Kor. 5:7) Danu idia gaukara goada kerere tauna idia durua totona, unai amo do ia helalo-kerehai bema hegeregere. Bona ia idia durua noho lalonai, idia laloa bada gauna be kerere tauna be ena kara do ia senisia. Dahaka dainai? Badina idia ura Iehova idia tohotohoa, ia be “lalokau bona hebogahisi bada Diravana.” (Iam. 5:11) Aposetolo Ioane be unai bamona ia karaia. Ia gwau: “Egu natudia e, umui lau tore henia, unai amo kara dika ta do umui karaia lasi. To bema ta ese kara dika ta ia karaia, ita be mai iseda durua tauna, ia be Tamana ida ia noho, Iesu Keriso, kara maoromaoro tauna unai.”—1 Ioa. 2:1.

20. Atikol 35 ai dahaka do ita stadilaia?

²⁰ To madi, nega haida Keristani tauna be ia ura lasi ia helalo-kerehai. Bema unai bamona, kongrigeisen amo idia kokia be namo. Unai ia vara neganai, elda taudia be dahaka idia karaia? Atikol 35 ai unai do ita stadilaia.