Kongrigeisen amo Idia Kokia Taudia Durua Dalana

1-2. (a) Iehova be idia helalo-kerehai lasi taudia dekenai dahaka ia laloa? (b) Iehova ia ura idia kerere taudia be dahaka do idia karaia?

IEHOVA be kara dika ibounai ia inai henia. (Sal. 5:4-6) Ia ura ena kara maoromaoro taravatudia ita badinaia, bona unai be Baibel ai idia noho. Momokani, Iehova ia diba ita be goevadae lasi dainai, nega haida do ita kerere. (Sal. 130:3, 4) To, Dirava be ia idia badinaia lasi taudia ia abia dae lasi, badina ‘idia laloa ena hebogahisi hereadaena dainai, idia ese gwau-edeede hemarai karadia idia karaia’ diba. (Iuda 4) Oibe, Baibel ia hahedinaraia Dirava ena Aramagedono tuarina ai ‘Dirava idia badinaia lasi taudia be do idia ore momokani.’—2 Pet. 3:7; Apok. 16:16.

² To, Iehova ia ura lasi tau ta ia mase. Inai magasin ena atikol haida amo ita diba, Baibel ia hahedinaraia Iehova “ia ura taunimanima ibounai be do idia helalo-kerehai.” (2 Pet. 3:9) Elda taudia be Iehova idia tohotohoa dainai, mai haheauka ida kara dika taudia idia durua edia kara idia haidaua totona, unai amo Iehova ena lalonamo idia abia lou diba. To, nega haida kerere taudia be idia helalo-kerehai lasi. (Isa. 6:9) Ena be elda taudia ese haida idia durua loulou edia kara dika idia rakatania totona, to edia kara idia haidaua lasi. Inai bamona negadia ai elda taudia be dahaka do idia karaia?

‘KARA DIKA TAUNA UMUI KOKIA’

3. (a) Baibel ia gwau ia helalo-kerehai lasi tauna dekenai dahaka idia karaia be namo? (b) Dahaka dainai ita gwau diba kerere tauna ena abia hidi dainai kongrigeisen amo idia kokia?

³ Kerere tauna ia helalo-kerehai lasi neganai, elda taudia ese 1 Korinto 5:13 ena hereva do idia badinaia: “Kara dika tauna be emui huana amo umui kokia.” Unai ena anina be kara dika tauna ia ura kongrigeisen amo do idia kokia, unai be ia hadoa gauna hegeregerena ia abia. (Gal. 6:7) Dahaka dainai unai bamona ita hereva? Badina ena be elda taudia ese idia durua loulou, to ena kara dika amo ia helalo-kerehai lasi. (2 Ki. 17:12-15) Iena kara ese idia hahedinaraia ia ura lasi Iehova ena taravatu ia badinaia.—Deu. 30:19, 20.

4. Ia helalo-kerehai lasi tauna idia kokia neganai, dahaka dainai kongrigeisen idia hadibaia?

⁴ Ia helalo-kerehai lasi tauna be kongrigeisen amo idia kokia neganai, kongrigeisen idia hadibaia ia be Iehova ena Witnes tauna ta lasi.a Unai hadibaia hereva be kerere tauna hahemaraia totona lasi. To, unai idia karaia tadikaka bona taihu be Baibel ena sisiba idia badinaia totona, unai be ‘ia do idia bamoa lasi bona ia ida do idia aniani lasi danu.’ (1 Kor. 5:9-11) Badina namona dainai Iehova ese unai sisiba ia henia. Aposetolo Paulo ia gwau: “Isti sisina ese paraoa ibounai ia hatubua.” (1 Kor. 5:6) Idia helalo-kerehai lasi taudia ese Iehova ena kara maoromaoro taravatudia idia badinaia taudia idia hakaua kerere diba.—Aon. 13:20; 1 Kor. 15:33.

5. Kongrigeisen amo ta idia kokia neganai, ia be edena bamona do ita laloa, bona dahaka dainai?

⁵ Kongrigeisen amo ta idia kokia neganai, ia be edena bamona do ita laloa? Ena be ia do ita bamoa lasi, to namona be ita laloatao ia be boio mamoe ta. Badina mamoe orea ia rakatania mamoe ta be do ia giroa lou diba. Laloatao, unai tauna be Iehova dekenai ena mauri ia gwauhamatalaia. To madi, ia be Iehova dekenai ia karaia gwauhamata ia badinaia noho lasi, unai dainai dika ia davaria diba. (Ese. 18:31) To, nega ia do noho bona Iehova ia ura hebogahisi ia hahedinaraia, unai dainai ita ura unai tauna do ia giroa mai. Edena dala ai elda taudia ese kongrigeisen amo idia kokia tauna idia durua diba?

KONGRIGEISEN AMO IDIA KOKIA TAUNA DURUA DALANA

6. Elda taudia be kongrigeisen amo idia kokia tauna idia durua totona dahaka idia karaia?

⁶ Bema ta be kongrigeisen amo idia kokia, elda taudia ese do idia durua lou lasi, a? Lasi! Komiti ese ia helalo-kerehai lasi tauna ia hadibaia kongrigeisen amo do ia kokia neganai, ia do idia hadibaia dahaka do ia karaia ia giroa lou totona. To elda taudia be gau ma haida do idia karaia danu. Nega momo, kerere tauna do idia hamaoroa hua haida murinai ia ida do idia hebou lou bona do idia itaia bema ena kara ia haidaua vadaeni. Bema kerere tauna ia ura elda taudia ida ia hebou lou, elda taudia be unai hebou ai ia do idia hagoadaia ia helalo-kerehai bona ia giroa lou totona. Ena be unai nega ai ena lalona ia do haidaua lasi, to elda taudia be dala do idia karaia gabeai idia hebou lou totona.

7. Elda taudia be kongrigeisen amo idia kokia tauna idia durua neganai, edena dala ai Iehova ena hebogahisi karana idia tohotohoa? (Ieremia 3:12)

⁷ Elda taudia be kongrigeisen amo idia kokia tauna idia durua neganai, Iehova ena hebogahisi karana idia tohotohoa. Hegeregere, ena be Israela taudia be kara dika momo idia karaia, to Iehova be ia naria lasi do idia helalo-kerehai bona idia do ia durua. Ia ese dala ia karaia guna idia ia durua totona. Atikol 32 ai ita herevalaia bamona, Iehova ese peroveta tauna Hosea ia hamaoroa ena adavana ia abia dae lou totona, ena be ia do kara dika noho. Unai dala amo Iehova be ena hebogahisi karana ia haheitalaia. (Hos. 3:1; Mal. 3:7) Unai hegeregerena, elda taudia idia ura kerere tauna ia giroa lou dainai, dala idia karaia ia idia durua totona.—Ieremia 3:12 duahia.

8. Edena dala ai Iesu ese ia gwauraia boio natuna ena parabole be Iehova ena hebogahisi karana ia hahedinaraia? (Luka 15:7)

⁸ Atikol 32 ai, Iesu ese ia gwauraia boio natuna ena parabole ita laloa. Tamana be ena boio natuna ia itaia neganai, “ia heau lao, ia rosia bona ia kisi henia.” (Luka 15:20) Tamana be ia naria lasi ena natuna ese do ia noia ena dika ia gwauatao totona. To, ia heau lao guna badina ena natuna ia lalokau henia. Elda taudia be idia boio taudia dekenai unai bamona kara idia hahedinaraia. Idia ura Iehova dekenai “idia giroa lou.” (Luka 15:22-24, 32) Kara dika tauna ia giroa lou neganai, guba bona tanobada ai moale bada ia vara!—Luka 15:7 duahia.

9. Iehova ia ura kara dika taudia be dahaka idia karaia?

⁹ Ita dibaia gauna be Iehova ia ura lasi helalo-kerehai lasi taudia be kongrigeisen lalonai do idia noho. To, ia ura idia ia durua. Ia ura kongrigeisen dekenai do idia giroa lou. Bona kerere taudia idia helalo-kerehai neganai, Iehova ena hemami oi laloa. Hosea 14:4 ia gwau: “Lau ese idia do lau hanamoa, bona lau idia badinaia karana amo do idia raka-siri lasi. Mai kudouna ibounai ida idia lau lalokau henia, badina egu badu be idia amo lau kokia vadaeni.” Elda taudia be Iehova ena hemami idia diba dainai, idia tahua bema ta be helalo-kerehai toana ia hahedinaraia matamaia. Bona unai ese Iehova idia rakatania taudia do ia hagoadaia idia giroa haraga totona.

10-11. Edena dala ai elda taudia ese idaunegai kongrigeisen amo idia kokia taudia idia durua diba?

¹⁰ Edena dala ai elda taudia ese idaunegai kongrigeisen amo idia kokia taudia idia durua diba? Unai bamona taudia be idia karaia kara dika dainai idia kokia, to reana hari unai kara dika idia karaia lasi. Haida be reana kongrigeisen amo idia kokia ena badina idia laloatao diba lasi. Herevana ta be nega daudau kongrigeisen murimuri ai ia noho, to elda taudia be ena noho gabuna do idia tahua bona vadivadi henia. Elda taudia idia vadivadi neganai, ia ida do idia guriguri bona idia hagoadaia kongrigeisen dekenai ia giroa lou totona. Oibe, bema ta be nega daudau kongrigeisen murimuri ai ia noho, Iehova bona Baibel ena hereva momokani ia dibaia lou be namo. Unai dainai, bema ta ia hahedinaraia ia ura kongrigeisen dekenai ia giroa lou, elda taudia ese dala do idia karaia ta be ia ida Baibel ia stadilaia totona, ena be orea lalonai ia do vareai lasi. Namona be elda taudia sibona ese dala idia karaia Baibel stadi ia abia totona.

¹¹ Elda taudia be Iehova ena hebogahisi karana idia tohotohoa dainai, Iehova idia rakatania taudia ibounai idia tahua bona idia durudia, ia dekenai idia giroa lou totona. Kara dika tauna ia hahedinaraia ia helalo-kerehai bona ena kara dika ia rakatania neganai, ia be orea lalonai idia abia vareai haraga diba.—2 Kor. 2:6-8.

12. (a) Nega haida dahaka dainai elda taudia ese ta ena kara idia tahua namonamo be namo? (b) Dahaka dainai ita gwau lasi kara dika badadia idia karaia taudia haida be Iehova ese do ia hebogahisi henia lasi? (Futnout itaia danu.)

¹² Nega haida elda taudia be ta idia do abia vareai lasi neganai, unai tauna ena kara haida idia tahua namonamo guna be namo. Hegeregere, bema ta be natu hadikaia karana (child abuse) eiava aposteit karana ia karaia, eiava koikoi dalanai headava ia hadokoa, bona unai dainai idia kokia, namona be elda taudia idia tahua namonamo bema ia helalo-kerehai momokani. (Mal. 2:14; 2 Tim. 3:6) Namona be kongrigeisen idia gimaia. Danu namona be ita laloatao Iehova be idia helalo-kerehai momokani bona edia kara dika idia rakatania taudia ibounai do ia abia dae. Unai dainai ena be elda taudia be idia ura tahua namonamo bema kara dika badana ia karaia tauna be ia helalo-kerehai momokani, to namo lasi idia gwau unai bamona tauna be Iehova ese do ia hebogahisi henia lasi.b—1 Pet. 2:10.

KONGRIGEISEN ESE IA KARAIA DIBA GAUNA

13. Sisiba aukana ia abia tadikaka be edena bamona do ita kara henia? Kongrigeisen amo idia kokia tauna be edena bamona do ita kara henia?

¹³ Atikol 34 ai ita herevalaia bamona, nega haida hadibaia herevana ta ai idia gwau ta be sisiba aukana ia abia. Unai tadikaka ita bamoa diba, badina ita diba ia helalo-kerehai bona ena kara dika ia rakatania. (1 Tim. 5:20) Ia be kongrigeisen ai ia do noho bona tadikaka taihu ese do idia hagoadaia noho kara namodia ia karaia totona. (Heb. 10:24, 25) To, kongrigeisen amo idia kokia tauna be idau. Ia ‘do ita bamoa lasi bona ia ida do ita aniani lasi danu.’—1 Kor. 5:11.

14. Edena dala ai Keristani taudia ta ta be edia lalomamina hegeregerena, kongrigeisen amo idia kokia tauna idia kara henia diba? (Laulau itaia danu.)

¹⁴ Ataiai ita herevalaia gaudia ese idia hahedinaraia kongrigeisen amo idia kokia taudia do ita dadaraia momokani, a? Lasi. Momokani, idia do ita bamoa lasi. To bema ta be kongrigeisen amo idia kokia bona ia be Keristani tauna ta ena varavara ta eiava guna ena turana namona ta, Baibel amo ia hadibaia lalomamina hegeregerena abia hidi ia karaia diba bema unai tauna do ia boiria hebou dekenai ia mai totona. Bema hebou dekenai ia mai be edena bamona? Guna, ia ita hereva henia lasi. To hari Keristani taudia ta ta be edia Baibel amo idia hadibaia lalomamina hegeregerena do idia kara. Haida be unai tauna idia hanamoa eiava hebou dekenai idia welkam henia diba. To, namo lasi ia ida ita hereva daudau eiava ia ita bamoa.

15. Ioane Iharuana 9-11 be edena kara dika taudia ia herevalaia? (Inai maua itaia, “Ioane Bona Paulo ese Idia Herevalaia Kara Dika be Tamona, A?”)

¹⁵ Reana haida idia laloa, ‘To Baibel ia gwau bema Keristani tauna be unai bamona tauna ta dekenai hanamoa hereva ia gwauraia, ia be ena kara dika ia durua.’ (2 Ioane 9-11 duahia.) To, 2 Ioane 9-11 be aposteit taudia bona haida idia doria Baibel ese ia taravatua gaudia idia karaia taudia ia herevalaia. (Apok. 2:20) Unai dainai, bema ta be haida ia doria aposteit lalohadai idia abia dae eiava kara dika idia karaia totona, elda taudia be dala do idia karaia lasi ia idia vadivadi henia totona. Oibe, reana nega ta ena kara amo do ia helalo-kerehai. To unai ia do vara lasi neganai, unai tauna do ita hanamoa lasi eiava do ita boiria lasi hebou dekenai ia mai totona.

IEHOVA ENA HEBOGAHISI KARANA TOHOTOHOA

16-17. (a) Iehova ia ura kara dika taudia be dahaka do idia karaia? (Esekiela 18:32) (b) Edena dala ai elda taudia be Iehova ida idia gaukara hebou kerere taudia idia durua totona?

¹⁶ Inai magasin ena stadi atikol ibounai 5 amo dahaka ita diba? Iehova ia ura lasi ta ia mase! (Esekiela 18:32 duahia.) Ia ura kara dika taudia be ia ida maino idia karaia. (2 Kor. 5:20) Unai dainai idaunega amo ema bona hari, Iehova be ena taunimanima, ia idia rakatania taudia unai, ia hagoadaia loulou idia helalo-kerehai bona ia dekenai idia giroa lou totona. Elda taudia edia hahenamo badana be Iehova ida idia gaukara, kara dika idia karaia taudia idia durua idia helalo-kerehai totona.—Roma 2:4; 1 Kor. 3:9.

¹⁷ Kara dika taudia idia helalo-kerehai neganai, guba dekenai ia vara moale mani oi laloa! Iseda guba Tamana Iehova be do ia moale bada bema ia boio mamoe ta be kongrigeisen dekenai ia giroa lou. Iehova ena hebogahisi hereadaena ita laloa dobu neganai, iseda lalokau Iehova dekenai ia bada ia lao.—Luka 1:78.