Iehova Bona Iesu ese Idia Gaukaralaia Tadikaka Laloa Bada

1. Iesu amo dahaka harihari gaudia haida ita abia?

IESU ena hariharibada karana be ta ese ia hereaia diba lasi. Tanobada ai ia noho neganai, nega momo hoa karadia amo taunimanima ia durua. (Luka 9:12-17) Ita totona ena mauri ia henia karana be harihari gauna hereadaena. (Ioa. 15:13) Ia toreisi lou negana amo, Iesu be hariharibada karana ia hahedinaraia noho. Ia gwauhamata hegeregerena, Iehova ia noia ita dekenai lauma helaga do ia henia, ita ia hadibaia bona hagoadaia totona. (Ioa. 14:16, 17, ftn.; 16:13) Iseda kongrigeisen heboudia amo Iesu be ita ia treinia, tanobada hegegemadai hahediba gaukarana ita karaia totona.—Mat. 28:18-20.

2. Efeso 4:7, 8 hegeregerena, “harihari gaudia bamona” taudia be daidia?

² Iesu ese ita dekenai harihari gauna ma ta ia henia. Aposetolo Paulo ia gwau Iesu be guba dekenai ia daekau murinai, “taunimanima be harihari gaudia bamona ia henia.” (Efeso 4:7, 8 duahia.) Paulo ese ia hahedinaraia Iesu ese unai harihari gaudia ia henia, unai amo dala idauidau ai kongrigeisen idia durua totona. (Efe. 1:22, 23; 4:11-13) Hari, unai harihari gaudia be, hesiai taudia, kongrigeisen ena elda taudia, bona sekit naria taudia.a Oibe, inai tatau be goevadae lasi taudia dainai kerere idia karaia danu. (Iam. 3:2) To iseda Lohiabada Iesu Keriso ese idia ia gaukaralaia ita idia durua totona. Idia be ita dekenai ia henia harihari gaudia.

3. Edena dala ai ita ibounai ese maduna idia huaia tadikaka ita durua diba? Haheitalai gwauraia.

³ Iesu ese inai tatau dekenai mai anina bada gaukarana ia henia, unai be kongrigeisen do idia hagoadaia. (Efe. 4:12) To ita ibounai ese idia ita durua diba, unai mai anina bada gaukarana idia karaia totona. Haheitalai ta be inai: Ita haida be Kingdom Hall haginia gaukarana lalonai, heduru ita henia. Haida be unai gaukara idia durua totona, aniani idia abia lao, edia motuka idia gaukaralaia bona gau ma haida idia karaia. Unai hegeregerena, iseda hereva bona kara amo hesiai taudia, kongrigeisen elda, bona sekit naria taudia edia gaukara namona ita durua diba. Mani edia gaukara goada karana amo namo ita abia dalana bona Iesu bona unai tatau ita laloa bada dalana do ita herevalaia.

HESIAI TAUDIA BE HEDURU IDIA HENIA

4. Aposetolo taudia edia negai, hesiai taudia be edena dala haida ai heduru idia henia?

⁴ Aposetolo edia negai, tadikaka haida idia abia hidi hesiai tauna ena maduna idia huaia totona. (1 Tim. 3:8) Toana be Paulo ese ia gwauraia “heduru idia henia taudia” be unai tatau ia herevalaia. (1 Kor. 12:28) Unai dainai, reana unai hesiai taudia be mai anina bada gaukaradia ma haida idia karaia, unai amo elda taudia be hadibaia bona mamoe vadivadi gaukarana do idia karaia. Hegeregere, unai hesiai taudia be heduru idia henia toretore helagadia edia kopi idia karaia eiava toretore kohudia idia hoia.

5. Hari hesiai taudia be dahaka heduru idia henia?

⁵ Mani emu kongrigeisen ai, hesiai taudia ese idia karaia mai anina bada gaukaradia haida oi laloa. (1 Pet. 4:10) Reana idia karaia gaukaradia haida be kongrigeisen ena akaun eiava teritori idia naria, pablikeisen idia oda bona pablisa ta ta totona idia hegaegaelaia, odio bona vidio idia naria, atendan idia duahia, eiava Kingdom Hall hanamoa gaukarana idia durua. Kongrigeisen ia heau namonamo totona, unai gaukara ta ta be mai anina bada. (1 Kor. 14:40) Danu, hesiai taudia haida be Haroro Bona Mauri Dalana ena hebou ai, kahana haida idia henia bona pablik tok idia henia. Danu, hesiai tauna ta idia abia hidi diba grup naria tauna ia durua totona. Nega haida, elda ta be hesiai tauna ia noia diba mamoe vadivadi idia karaia totona.

6. Dahaka badina haida dainai, iseda hesiai taudia edia gaukara namona ita laloa bada?

⁶ Edena dala ai hesiai taudia edia gaukara ese kongrigeisen ia durua? Bolivia ai taihu ta, Beberly,b ia gwau: “Hesiai taudia lau tanikiu henia, badina kongrigeisen heboudia lau moalelaia bada. Edia gaukara dainai, ane lau abia diba, haere lau henia, tok lau kamonai bona danu vidio bona laulau amo diba lau abia. Hebou totona idia mai taudia edia seifti idia laloa bada, bona zoom amo idia konek taudia idia durua. Hebou murinai hagoevaia gaukarana idia durua, kontribiusen idia duahia bona iseda pablikeisen idia henia. Idia dekenai lau moale bada!” Colombia ai, elda ta ena adavana, ena ladana be Leslie, ia gwau: “Egu adavana be asainmen haida ia karaia neganai, hesiai taudia edia heduru ia tahua. Bema unai tadikaka be lasi, ia be do ia bisi momokani. Idia gaukara goada bona mai ura ida heduru idia henia dainai, idia lau tanikiu henia.” Ita ibounai be hesiai taudia edia gaukara namona ita moalelaia bada.—1 Tim. 3:13.

7. Edena dala ai ita hahedinaraia hesiai taudia ita laloa bada? (Laulau itaia danu.)

⁷ Ena be hesiai taudia dainai ita moale bada, to Baibel ese ita ia hagoadaia, ‘tanikiu karana ita hahedinaraia’ totona. (Kol. 3:15) Finland ai, elda ta, Kristofa ena tanikiu karana be inai bamona ia hahedinaraia: “Hesiai tauna ta dekenai, kadi eiava teks meseij amo siri namona ta lau torea bona lau ia hagoadaia eiava ena gaukarana namona lau moalelaia karana lau torea.” New Caledonia ai, headava tau bona hahine Pascal bona Jael, be nega momo hesiai taudia totona idia guriguri. Pascal ia gwau: “Ai be hesiai taudia totona nega momo ai guriguri noho, idia dainai Iehova ai tanikiu henia, bona ia ai noia idia do ia durua bona naria.” Iehova ese unai bamona guriguri ia kamonai bona unai ese kongrigeisen taudia ibounai ia durua.—2 Kor. 1:11.

“UMUI HUANAI IDIA GAUKARA GOADA” ELDA TAUDIA

8. Dahaka dainai Paulo ia gwau ena elda turadia be idia “gaukara goada”? (1 Tesalonika 5:12, 13)

⁸ Aposetolo edia negai, elda taudia be kongrigeisen totona idia gaukara goada. (1 Tesalonika 5:12, 13 duahia; 1 Tim. 5:17) Idia ese kongrigeisen idia “naria,” hegeregere iseda hebou idia hakaua bona elda oreana ta bamona abia hidi idia karaia. Idia ese tadikaka taihu idia “sisiba henia,” to mai lalokau ida unai idia karaia kongrigeisen idia gimaia totona. (1 Tes. 2:11, 12; 2 Tim. 4:2) Danu, unai tadikaka idia gaukara goada edia ruma bese idia naria, bona sibona edia hetura karana Iehova ida idia hagoadaia.—1 Tim. 3:2, 4; Tito 1:6-9.

9. Hari elda taudia ese dahaka gaukara ma haida idia naria?

⁹ Hari, elda taudia be gaukara momo idia karaia. Idia be evanelia taudia. (2 Tim. 4:5) Idia ese haroro gaukara idia gunalaia, iseda haroro teritori idia hegaegaelaia, bona ita idia treinia haroro bona hadibaia gaukarana ita karaia namonamo totona. Idia be mai hebogahisi ida hahemaoro idia henia bona maka tamona ai taunimanima idia kara henia. Kongrigeisen ai ta be kerere badana ia karaia neganai, elda taudia ese unai tauna idia durua, Iehova ida ena hetura karana ia hanamoa lou totona. Danu, kongrigeisen ia goeva totona idia gaukara goada. (1 Kor. 5:12, 13; Gal. 6:1) To elda be mamoe naria taudia, unai be edia maduna badana. (1 Pet. 5:1-3) Idia ese Baibel amo tok namodia idia henia, idia gaukara goada kongrigeisen taudia ibounai idia dibaia totona bona mamoe vadivadi idia karaia. Danu elda taudia haida be gaukara ma haida dekenai heduru idia henia, hegeregere Kingdom Hall idia haginia bona hanamoa, hebouhebou idia hakaua, bona Hospital Liesen Komiti bona Gorere Taudia Vadivadi Henia Grup idia durua. Elda taudia be ita totona idia gaukara goada!

10. Dahaka badina haida dainai iseda elda taudia edia gaukara namona ita laloa bada?

¹⁰ Iehova ia gwauhamata mamoe naria taudia ese ita do idia naria namo herea bona do ita “gari lasi.” (Ier. 23:4) Finland ai taihu ta, Johanna, be ena sinana ese gorere badana ta ia abia neganai, unai siri ena hereva ia mamia momokani. Ia gwau: “Ia auka ma haida dekenai egu hemami lau gwauraia totona, to lau diba namonamo lasi elda ta be mai haheauka ida egu hereva ia kamonai, lau ida ia guriguri bona lau ia hamaoroa, Iehova be lau ia lalokau henia. Lau dekenai ia gwauraia herevadia ibounai lau laloatao lasi, to unai nega ai egu gari mamina ia ore. Lau abia dae Iehova ese nega maorona ai unai elda ia siaia lau ia durua totona.” Emu kongrigeisen ai elda taudia be edena dala ai oi idia durua?

11. Edena dala ai ita hahedinaraia elda taudia ita laloa bada? (Laulau itaia danu.)

¹¹ Iehova ia ura elda taudia “edia gaukara dainai” idia ita laloa bada. (1 Tes. 5:12, 13) Finland ai ia noho taihu ta, Henrietta, ia gwau: “Elda taudia be mai ura ida heduru idia henia, to laloatao edia nega bona goada be mai ena hetoana bona hekwakwanai idia davaria danu. Nega haida idia dekenai lau gwau: ‘Oi diba dahaka? Oi be elda namona ta bona lau ura unai oi diba.’” Türkiyec ai, taihu ta, Sera ia gwau: “Elda taudia idia ura idia ita hagoadaia danu, unai amo edia gaukara do idia karaia noho. Unai dainai, idia dekenai kadi ita torea diba, idia ida ita aniani hebou, eiava haroro gaukara ai idia ita bamoa diba.” Kongrigeisen ai elda ta ena gaukara goada karana oi moalelaia, a? Dala oi tahua ia dekenai emu tanikiu karana oi hahedinaraia totona.—1 Kor. 16:18.

SEKIT NARIA TAUDIA BE ITA IDIA HAGOADAIA

12. Iesu ese daidia ia abia hidi kongrigeisen idia hagoadaia totona? (1 Tesalonika 2:7, 8)

¹² Danu, Iesu ese tatau haida ia abia hidi, dala ma haida ai kongrigeisen idia durua totona. Ena hakaua henunai, Ierusalema ai idia noho elda taudia ese Paulo, Banaba, bona ma haida idia siaia, loaloa gaukarana idia karaia totona. (Kara 11:22) Dahaka dainai? Badina idia danu be kongrigeisen idia hagoadaia, hesiai taudia bona elda taudia bamona. (Kara 15:40, 41) Inai tatau be gau momo idia dadaraia, unai gaukara idia karaia totona. Nega haida, ma haida hadibaia bona hagoadaia totona kahirakahira edia mauri idia haboioa.—1 Tesalonika 2:7, 8 duahia.

13. Sekit naria taudia edia maduna haida be dahaka?

¹³ Sekit naria taudia be nega momo idia loaloa, haida be gabu daudau idia lao kongrigeisen ma haida idia vadivadi henia totona. Wiki ta ta ai, sekit naria tauna be tok haida ia henia, mamoe vadivadi ia karaia, painia taudia, elda taudia bona haroro gaukara edia hebou ia hakaua. Ia ese tok ia hegaegaelaia bona sekit bona rijinol hebouhebou ia naria. Ia ese painia sikuli taudia ia hadibaia, bona painia taudia totona spesel hebouna ta ia hegaegaelaia. Danu, nega haida brens ese idia henia mai anina bada gaukaradia ia karaia.

14. Dahaka badina haida dainai sekit naria taudia edia gaukara namona ita laloa bada?

¹⁴ Edena dala ai sekit taudia edia gaukara namona ese kongrigeisen ia durua? Türkiye ai tadikaka be sekit naria taudia edia vadivadi karana dainai ia gwau: “Idia ta ta edia vadivadi karana ese lau ia hagoadaia, nega lau atoa egu tadikaka taihu lau durua totona. Sekit naria taudia momo lau hedavari henia, bona lau itaia, idia ibounai ese nega idia atoa lau idia hereva henia totona.” Matamanai ita herevalaia taihu, Johanna, be haroro gaukara ai sekit naria tauna ia bamoa, bona ruma ai ta idia davaria lasi. To ia gwau: “Hanaihanai unai dina do lau laloatao. Egu sista rua be gabu ma ta dekenai idia lao dainai, idia lau reaia bada. Sekit naria tauna ese lau ia hagoadaia bona ia hahedinaraia, hari iseda ruma bese bona turadia kahirakahira ita noho lasi, to tanobada matamatana ai, do ita noho hebou ela bona hanaihanai.” Ita momo be sekit naria taudia amo unai bamona hagoadaia herevadia ita abia, bona unai ita laloatao noho.—Kara 20:37–21:1.

15. (a) Ioane ihatoina 5-8 hegeregerena, edena dala ai ita hahedinaraia sekit naria taudia ita laloa bada? (Laulau itaia danu.) (b) Dahaka dainai kongrigeisen ai idia gaukara goada tadikaka edia adavana ita laloa bada be namo, bona edena dala ai unai ita karaia diba? (Maua itaia, “Idia Abia Hidi Tadikakadia Edia Adavadia Oi Laloatao.”)

¹⁵ Aposetolo Ioane ese Gaio ia hagoadaia, namona be idia vadivadi tadikaka dekenai heabidae karana ia hahedinaraia, bona “Dirava ia hamoalea dalana ai idia do ia siaia lao.” (3 Ioane 5-8 duahia.) Ita ese unai ita badinaia dalana ta be sekit naria tauna ita boiria ita ida idia aniani totona. Dala ma ta be ena vadivadi lalonai haroro gaukara totona ia hegaegaelaia daladia ita durua. Matamanai ita herevalaia taihu, Leslie, be dala ma haida ai ena tanikiu karana ia hahedinaraia. Ia gwau: “Lau guriguri Iehova ese edia dabu gaudia ia henia totona. Danu lau bona egu adavana ese idia dekenai revareva ai torea, bona idia ai hamaoroa, edia vadivadi karana ese ai ia durua bada.” Laloatao, sekit naria taudia be ita bamona, idia hesiku danu. Nega haida idia gorere, gau haida dainai idia lalohekwarahi bona idia lalomanoka. Reana emu hereva namodia eiava harihari gauna ta be sekit naria tauna ena guriguri ia haerelaia!—Aon. 12:25.

IEHOVA BONA IESU ESE IDIA HENIA TAUDIA EDIA HEDURU ITA URA

16. Aonega Herevadia 3:27 hegeregerena, tadikaka be sibona dekenai dahaka henanadai idia henia diba?

¹⁶ Tanobada hegegemadai, namona be tadikaka momo ese “harihari gaudia bamona” maduna idauidau idia huaia. Bema oi be bapatiso tadikaka ta, “heduru oi henia” diba, a? (Aonega Herevadia 3:27 duahia.) Oi gaukara goada noho hesiai tauna ai oi lao totona, a? Bema oi be hesiai tauna ai oi lao vadaeni, oi gaukara goada noho elda tauna ai oi lao totona, a?d Oi hegeregere emu noho dalana do oi haidaua bona Basileia Evanelia Sikuli do oi lao, a? Unai sikuli ese oi do ia hegaegaelaia, Iesu ese oi ia gaukaralaia totona. Bema oi mamia oi hegeregere lasi, unai gaudia oi karaia totona, Iehova oi guriguri henia. Iena lauma helaga ena heduru totona oi noinoi, unai amo oi abia asainmen oi karaia namonamo diba.—Luka 11:13; Kara 20:28.

17. Edena dala ai “harihari gaudia bamona” tadikaka ese idia hamomokania, King, Keriso Iesu be ita ia hakaua noho?

¹⁷ Iesu ese harihari gaudia bamona ia henia tadikaka be idia gaukara goada noho, unai ese ia hamomokania, inai dina gabedia ai Iesu be ita ia hakaua noho. (Mat. 28:20) Ita moale bada, badina iseda King be lalokau bona hariharibada tauna. Ia ese ita dekenai tadikaka ia henia ita idia durua totona. Namona be dala ita tahua, idia gaukara goada noho tadikaka dekenai, tanikiu karana ita hahedinaraia totona. Bona hanaihanai Iehova ita tanikiu henia, badina ia ese “harihari gaudia namodia ibounai bona harihari gaudia goevadia ibounai” ia henia.—Iam. 1:17.