Bapatiso Oi Abia

1. Bapatiso oi abia ena badina namodia haida be dahaka?

HARIHARI gaudia namodia bona mauri ia henia Diravana, Iehova oi lalokau henia, a? Oi ura ia dekenai emu lalokau oi hahedinaraia, a? Unai oi karaia totona dala namona be ia dekenai emu mauri oi gwauhamatalaia bona bapatiso oi abia. Unai oi karaia neganai, oi be Iehova ena ruma bese tauna ta ai do oi lao. Unai amo emu Tamana bona Turana namona ese oi do ia hakaua bona naria, badina oi be ia ena. (Sal. 73:24; Isa. 43:1, 2) Danu, Dirava dekenai emu mauri oi gwauhamatalaia bona bapatiso oi abia neganai, mauri hanaihanai helarona do oi abia.—1 Pet. 3:21.

2. Inai atikol amo dahaka do ita herevalaia?

² Gau ta ese oi ia koua oi bapatiso totona, a? Bema unai bamona, oi be sibona lasi. Taunimanima milioni be edia kara bona laloa dalana idia haidaua, unai amo idia hegeregere bapatiso idia abia totona. Unai taudia be hari mai moale bona ura ida Iehova idia hesiai henia noho. Aposetolo taudia edia nega ai idia bapatiso taudia haida amo dahaka oi dibaia? Idia ia koua gaudia haida do ita herevalaia bona edia haheitalai amo diba do ita abia.

SAMARIA TAUDIA BE BAPATISO IDIA ABIA

3. Samaria taudia be bapatiso idia abia totona dahaka senisi haida idia karaia be namo?

³ Iesu ena nega ai Samaria taudia be mai edia tomadiho oreana ta. Idia momo be Iudea ena not kahana Sekema bona Samaria ai idia noho. Samaria taudia be bapatiso idia do abia lasi neganai, namona be Dirava ena Hereva ibounai idia abia dae bona diba ma haida idia abia. Samaria taudia be Baibel ena buka ginigunadia 5, Genese ia lao Deuteronomi idia abia dae, bona reana Iosua bukana danu. To idia abia dae Mesia do ia mai, unai be Deuteronomi 18:18, 19 ai ia noho Dirava ena gwauhamata hegeregerena. (Ioa. 4:25) Bapatiso idia abia totona, namona be idia abia dae Iesu be gwauhamata Mesiana. “Samaria taudia momo” be unai bamona idia karaia. (Ioa. 4:39) Danu, haida be Samaria bona Iuda huanai ia noho inai heheni karana idia dadaraia be namo.—Luka 9:52-54.

4. Kara 8:5, 6, 14 hegeregerena, edena dala ai Samaria taudia haida be Filipo ena hereva idia abia dae?

⁴ Dahaka ese Samaria taudia ia durua bapatiso idia abia totona? Evanelia tauna Filipo be “Keriso ia harorolaia” neganai, Samaria taudia haida be “Dirava ena hereva idia abia dae.” (Kara 8:5, 6, 14 duahia.) Filipo be Iuda tauna to ena hereva idia kamonai. Reana idia be buka 5 ai idia noho siri haida idia laloatao, ia gwau Dirava be ta ena toana ia laloa lasi. (Deu. 10:17-19) Idia be Filipo ese Keriso totona ia gwauraia herevadia “idia hakala henia,” bona idia hamomokania Filipo be Dirava ese ia siaia. Danu ia ese hoa karadia momo ia karaia, hegeregere gorere taudia bona demoni ese idia biagua taudia ia hanamoa.—Kara 8:7.

5. Samaria taudia amo dahaka oi dibaia?

⁵ Unai Samaria taudia be inai heheni karana eiava edia diba be bada lasi dainai, unai ese idia ia koua diba Filipo ena hereva idia kamonai totona. To unai bamona ia vara lasi. Samaria taudia idia abia dae Filipo be idia dekenai hereva momokani ia hadibaia, unai dainai maoromaoro bapatiso idia abia. Baibel ia gwau: “Filipo ese Dirava ena Basileia ena sivarai namona bona Iesu Keriso ena ladana ia harorolaia neganai, iena hereva idia abia dae tatau bona hahine be idia bapatiso noho.” (Kara 8:12) Oi abia dae Dirava ena hereva be momokani bona Iesu ese ia gwauraia lalokau be Iehova ena Witnes taudia ese idia hahedinaraia, a? (Ioa. 13:35) Vadaeni, oi gari lasi bapatiso oi abia totona. Namona be oi diba Iehova ese oi do ia hanamoa.

6. Edena dala ai Ruben ena haheitalai ese oi ia durua diba?

⁶ Ruben be Germany amo, bona Witnes ruma besena lalonai ia tubu daekau. To ia mero matamata neganai, ia daradara Dirava ia noho ia eiava lasi. Dahaka ia karaia? Ia laloparara unai topik dekenai ena diba ia habadaia be namo. Unai dainai ia gwau: “Sibona egu stadi lalonai, namona be lau tahua dahaka be momokani bona dahaka be koikoi. Lau ese evolusen ena topik be nega momo lau stadilaia.” Ia ese inai buka ia duahia Is There a Creator Who Cares About You? Unai ese Ruben ia durua bada. Bena sibona dekenai ia gwau: ‘Momokani! Iehova be ia noho.’ Nega ta Ruben be iseda hedikwota ia vadivadi henia neganai, tanobada hegegemadai tadikaka bona taihu edia lalotamona karana ia laloa bada. Bona Ruben be Germany dekenai ia giroa neganai bapatiso ia abia, ena mauri lagani be 17 sibona. Bema oi dibaia gaudia dekenai oi daradara noho, iseda pablikeisen lalonai tahua gaukara oi karaia. “Diba maoromaoro” oi abia neganai, do oi daradara lasi. (Efe. 4:13, 14) Bona tanobada ena kahana ma haida ai, Iehova ena taunimanima edia lalokau bona lalotamona karana ena ekspiriens oi kamonai bona emu kongrigeisen ai unai kara oi itaia neganai, tanobada ibounai dekenai iseda tadikaka oreana do oi lalokau henia bada.

TASO TAUNA SAULO BE BAPATISO IA ABIA

7. Edena dala ai Saulo be ena lalohadai ia haidaua be namo?

⁷ Taso tauna Saulo ena haheitalai ita laloa. Ia be Iuda tomadiho ia goadalaia bona Iuda taudia ese ia idia laloa bada. (Gal. 1:13, 14; Fili. 3:5) Unai nega ai, Iuda taudia momo idia abia dae Keristani taudia be aposteit taudia, unai dainai Saulo ese idia ia dagedage henia. Ia laloa ia be Dirava ena ura ia karaia noho. (Kara 8:3; 9:1, 2; 26:9-11) Saulo be Iesu ia abidadama henia bona bapatiso ia abia totona, namona be ia diba dagedage do ia davaria.

8. (a) Dahaka ese Saulo ia durua ia bapatiso totona? (b) Kara 22:12-16 hegeregerena, edena dala ai Anania ese Saulo ia durua? (Laulau itaia danu.)

⁸ Dahaka ese Saulo ia durua ia bapatiso totona? Iesu be guba amo Saulo ia hereva henia neganai, diari ta ese Saulo ena matana ia hakepulua. (Kara 9:3-9) Bena dina toi lalonai ia aniani lasi bona ia dekenai ia vara gauna ia laloa dobu. Oibe, Saulo ia abia dae Iesu be Mesia bona ia murinai idia raka taudia be tomadiho momokani idia badinaia. Reana Saulo ia lalohisihisi bada, badina ia ese guna gwaumaoro ia henia Stefano idia hamasea totona! (Kara 22:20) Dina toi murinai, hahediba tauna Anania be Saulo dekenai ia lao, ena matana ia hanamoa bona ia hagoadaia maoromaoro bapatiso ia abia totona. (Kara 22:12-16 duahia.) Saulo be mai manau ida Anania ena hereva ia abia dae bona bapatiso ia abia.—Kara 9:17, 18.

9. Saulo amo dahaka gaudia oi dibaia?

⁹ Saulo amo gau haida ita dibaia. Ia hekokoroku bona taunimanima gari henia karana ese ia koua diba bapatiso ia abia totona. To ia be unai bamona ia karaia lasi. Saulo be Keriso ia badinaia totona, ia manau bona ena mauri ia haidaua. (Kara 26:14, 19) Saulo ia ura Keristani tauna ai do ia lao ena be ia diba dagedage do ia davaria. (Kara 9:15, 16; 20:22, 23) Ia bapatiso murinai, hahetoho idauidau ia haheaukalaia totona hanaihanai Iehova ena heduru dekenai ia tabekau. (2 Kor. 4:7-10) Oi bapatiso bona Iehova ena Witnes ta ai oi lao neganai, hahetoho eiava dagedage do oi davaria, to heduru do oi abia. Namona be oi diba momokani, Dirava bona Keriso be hanaihanai oi do idia durua.—Fili. 4:13.

10. Edena dala ai Anna ena haheitalai ese oi ia durua diba?

¹⁰ Anna be Eastern Europe ai ia bada. Anna ena sinana ia bapatiso murinai, ena tamana ese maoro ia henia Baibel stadi ia matamaia totona, ena mauri lagani be 9 sibona. To ena varavara haida idia itaia Anna be Baibel ia stadilaia neganai, idia moale lasi. Unai taudia idia laloa sene taudia edia tomadiho rakatania karana ese bese dekenai hemarai ia havaraia. Anna ena mauri lagani be 12 neganai, ena tamana ia noia maoro do ia henia ia bapatiso totona. To ena tamana ia ura diba ia sibona ese abia hidi ia karaia eiava haida ese idia doria. Bona Anna ia gwau, “Iehova lau lalokau henia.” Bona ena tamana ese maoro ia henia bapatiso ia abia totona. Anna ia bapatiso murinai, ena varavara ese ia idia kara namo henia lasi. Ena varavara ta ese ia hamaoroa: “Do oi moale bema kara dikadia oi karaia bona kuku oi ania.” Edena dala ai Anna ia haheauka? Ia gwau, “Iehova ese lau ia durua lau goada totona, bona tama sina ese lau idia durua bada.” Anna be ena mauri lalonai Iehova ese ia durua negadia be buka ta ai ia torea. Nega haida unai lista ia itaia, unai amo Iehova ese ia durua negadia do ia laloaboio lasi. Bema dagedage karadia dainai oi gari, laloatao Iehova ese oi do ia durua danu.—Heb. 13:6.

KORENELIO IA BAPATISO

11. Dahaka ese Korenelio ia koua diba bapatiso ia abia totona?

¹¹ Baibel ese Korenelio ena haheitalai ia hahedinaraia danu. Roma tuari oreana lalonai ia be “tuari taudia 100 ia biagua tauna.” (Kara 10:1, ftn.) Ia be ladana bada tauna. Bona “hebogahisi dainai ia ese ogogami taudia ia durua.” (Kara 10:2) Iehova ese aposetolo Petero ia siaia ia dekenai sivarai namona ia harorolaia totona. Korenelio be lada bada tauna dainai unai ese ia koua bapatiso ia abia totona, a?

12. Dahaka ese Korenelio ia durua bapatiso ia abia totona?

¹² Dahaka ese Korenelio ia durua ia bapatiso totona? Baibel ia gwau, ia bona “iena ruma taudia ibounai be Dirava idia gari henia.” Bona Korenelio be hanaihanai Dirava ia guriguri henia. (Kara 10:2) Petero ese sivarai namona be Korenelio dekenai ia harorolaia neganai, ia bona ena ruma bese be Keriso idia abia dae bona bapatiso idia abia. (Kara 10:47, 48) Momokani, Korenelio be mai ura ida ena mauri ai gau haida ia haidaua, unai amo ena ruma bese ida Iehova idia tomadiho henia diba.—Ios. 24:15; Kara 10:24, 33.

13. Korenelio amo dahaka gaudia oi dibaia?

¹³ Saulo bamona, Korenelio be ena dagi bada ese ia koua diba, Keristani tauna ai ia lao totona. To Korenelio be unai bamona ia karaia lasi. Oi bapatiso totona emu mauri ai senisi badadia do oi karaia, a? Bema unai bamona, Iehova be emu Durua Tauna. Ena hakaua herevadia oi badinaia bona ia oi hesiai henia neganai, ia ese oi do ia hanamoa.

14. Edena dala ai Tsuyosi ena haheitalai ese oi ia durua?

¹⁴ Tsuyoshi, be Japan amo, ia be bapatiso ia abia totona, ena moni gaukara ia haidaua be namo. Ia be flaoaflaoa idia hegaegaelaia sikuli ta ena hedmasta ena durua tauna. Hedmasta be fineral edia flaoaflaoa do ia hegaegaelaia bona Budis ena tomadiho karadia ia karaia. Bona hedmasta ia noho lasi neganai, Tsuyoshi ese unai gaukara do ia karaia. To, Tsuyoshi be Baibel ese mase ia herevalaia karana ia dibaia neganai, ia laloparara bapatiso do ia abia lasi, bema unai gaukara ia karaia noho. Ia ese abia hidi ia karaia, Budis edia tomadiho karadia ia karaia lasi totona. (2 Kor. 6:15, 16) Tsuyoshi be hedmasta dekenai unai ia herevalaia. Dahaka ia vara? Tsuyosi be maoro ia abia ena gaukara do ia karaia noho, to tomadiho karadia lalonai do ia vareai lasi. Baibel ia stadilaia matamaia bona lagani ta murinai ia bapatiso.a Bema oi itaia Iehova oi hamoalea totona emu gaukara oi haidaua, laloatao ia ese oi bona emu ruma bese do ia durua.—Sal. 127:2; Mat. 6:33.

KORINTO TAUDIA IDIA BAPATISO

15. Dahaka gaudia ese Korinto taudia ia koua diba bapatiso idia abia totona?

¹⁵ Korinto ena siti ai idia noho taudia be kohu idia ura henia bada bona matabodaga maurina idia noholaia. Idia momo be Dirava ese ia inai henia mauri dalana idia badinaia. Unai dainai, idia momo dekenai ia auka sivarai namona idia abia dae totona. To aposetolo Paulo be unai siti dekenai ia mai bona Keriso ena sivarai namona ia harorolaia neganai, unai “sivarai namona idia kamonai Korinto taudia momo be abidadama taudia ai idia lao bona idia bapatiso.” (Kara 18:7-11) Bona Lohiabada Iesu Keriso be matahanai lalonai Paulo dekenai ia hedinarai bona ia gwau: “Inai siti ai egu taunimanima be momo.” Unai dainai Paulo be lagani ta mai kahana lalonai, unai siti dekenai ia haroro.

16. Korinto taudia be bapatiso idia abia totona dahaka koua gaudia idia hanaia? (2 Korinto 10:4, 5)

¹⁶ Dahaka ese Korinto taudia ia durua idia bapatiso totona? (2 Korinto 10:4, 5 duahia.) Dirava ena Hereva bona ena lauma helaga ese idia ia durua, edia mauri lalonai senisi badadia idia karaia totona. (Heb. 4:12) Korinto ai Keriso ena sivarai namona idia abia dae taudia be gau haida idia dadaraia, hegeregere inuinu kekero, henaohenao, tatau be tatau ida bona hahine be hahine ida idia mahuta hebou karadia.—1 Kor. 6:9-11.b

17. Korinto taudia amo dahaka oi dibaia?

¹⁷ Ena be Korinto taudia haida idia hekwarahi edia kara dikadia idia haidaua totona, to idia laloa lasi ia auka Keristani taudia ai idia lao totona. Idia gaukara goada mauri hanaihanai ia lao henia dala maragina idia badinaia totona. (Mat. 7:13, 14) Oi bapatiso totona oi hekwarahi noho senisi badadia oi karaia totona, a? Iehova oi noia ena lauma helaga amo oi ia durua, kara dika karaia urana oi dadaraia totona.

18. Edena dala ai Monika ena haheitalai ese oi ia durua?

¹⁸ Monika be Georgia ai ia noho, ia be bapatiso ia abia totona, ia gaukara goada hereva mirodia gwauraia karana, miusiki bona vidio dikadia ia dadaraia totona. Ia gwau: “Lau matamata neganai, guriguri karana ese lau ia durua bada. Iehova ia diba lau ura kara maorona do lau karaia bona hanaihanai lau ia durua bona ia hakaua.” Monika ena mauri lagani be 16 neganai bapatiso ia abia. Dala maorona ai Iehova oi hesiai henia totona emu mauri ai kara haida oi haidaua be namo, a? Iehova oi noia noho, emu mauri ai senisi oi karaia totona. Iehova be mai hariharibada ida ena lauma helaga ia henia.—Ioa. 3:34.

EMU ABIDADAMA DAINAI ORORO BAMONA KOUA GAUDIA OI HANAIA DIBA

19. Dahaka ese oi ia durua diba ororo bamona koua gaudia oi hanaia totona? (Laulau itaia danu.)

¹⁹ Namona be oi diba Iehova ese oi ia lalokau henia bona ia ura iena ruma bese tauna ta ai oi lao. Unai be momokani, oi bapatiso totona gau haida ese oi do idia koua. Iesu be ena hahediba taudia ginigunadia dekenai ia gwau: “Bema emui abidadama be mastadi uhe maragina bamona, inai ororo dekenai do umui gwau, ‘Inai gabu amo oi lao unuseniai,’ bona do ia lao, bona do umui hegeregere gau ibounai umui karaia totona.” (Mat. 17:20) Unai hereva idia kamonai taudia haida be lagani haida sibona lalonai Iesu ida idia gaukara, unai dainai edia abidadama idia hagoadaia noho be namo. To Iesu ese idia ia hamaoroa bema edia abidadama idia hagoadaia noho, Iehova ese idia do ia durua ororo bamona koua gaudia idia hanaia totona. Oibe, Iehova ese oi do ia durua danu, unai bamona oi karaia totona!

20. Edena dala ai inai atikol ai ita herevalaia idaunegai bona hari idia noho Keristani taudia edia haheitalai ese oi ia hagoadaia?

²⁰ Bema oi ura bapatiso, to oi itaia gau haida ese oi idia koua, namona be gau ta oi karaia haraga unai koua gaudia oi kokia totona. Idaunegai bona hari idia noho Keristani taudia edia haheitalai amo goada oi abia. Namona be edia sivarai ese oi ia hagoadaia, Iehova dekenai emu mauri oi gwauhamatalaia bona bapatiso oi abia totona. Unai be abia hidi namo hereana do oi karaia!