Iehova Bona Iesu Edia Laloa Dalana Oi Badinaia

1-2. Iehova ita lalokau henia ena anina be dahaka, bona edena dala ai Iesu ese unai ia hahedinaraia?

IESU ese Mose ena taravatu lalonai mai anina bada gauna ia herevalaia. Ia gwau: “Namona be Iehova emu Dirava oi lalokau henia mai emu kudouna ibounai bona mai emu mauri ibounai bona mai emu goada ibounai bona mai emu lalona ibounai ida.” (Luka 10:27) Unai dainai mai ura ida, hemami bona goada ibounai ida Iehova ita lalokau henia. Danu, iseda lalohadai amo ita hahedinaraia be namo. Oibe, Iehova ese ia laloa gaudia ibounai ita lalopararalaia diba lasi. To Dirava ena laloa dalana ita lalopararalaia totona, “Keriso ena lalohadai” ita stadilaia be namo, badina Iesu be ena Tamana ena laloa dalana ia hahedinaraia goevagoeva.—1 Kor. 2:16.

² Iesu be mai lalona ibounai ida Iehova ia lalokau henia. Ia diba Dirava ena ura be dahaka bona ena lalona ia hadaia unai ura hegeregerena gau ibounai ia karaia, ena be ia diba hisihisi do ia davaria. Iesu be ena Tamana ena ura ia laloa bada dainai, gau ta ese ia koua lasi ena tahua gauna ia hagugurua totona.

3. Aposetolo Petero be Iesu amo dahaka ia dibaia, bona Petero ese Keristani taudia ia hagoadaia dahaka do idia karaia? (1 Petero 4:1)

³ Petero bona aposetolo taudia ese nega bada lalonai Iesu idia bamoa bona ia amo diba idia abia karana be hahenamo badana. Petero be ena revareva ginigunana ia torea neganai, Keristani taudia ia hagoadaia Keriso ena laloa dalana idia badinaia totona. (1 Petero 4:1 duahia.) Inai hereva, “laloa dalana hegeregerena” be Grik gado ai Petero ese ia torea neganai, ia be tuari totona idia hegaegae herevana ta ia gaukaralaia. Unai dainai, Keristani taudia be Iesu ena laloa dalana idia dibaia bona badinaia neganai, do idia hegeregere edia ura dikadia idia tuari henia, bona Satani ese ia lohiaia tanobadana idia dadaraia diba.—2 Kor. 10:3-5; Efe. 6:12.

4. Edena dala ai inai atikol ese ita do ia durua, Petero ena sisiba ita badinaia totona?

⁴ Ita ese Iesu ena laloa dalana bona ia ita tohotohoa dalana do ita herevalaia. Do ita diba edena dala ai, (1) Iehova ena laloa dalana ita badinaia diba, (2) ita manau, bona (3) ita laloa maoromaoro totona Iehova ita guriguri henia.

IEHOVA ENA LALOA DALANA BADINAIA

5. Edena dala ai Petero be nega ta Iehova ena laloa dalana ia badinaia lasi?

⁵ Mani Petero ese Iehova ena laloa dalana ia badinaia lasi negana ta ita laloa. Iesu ese ena aposetolo taudia ia hamaoroa, ia be Ierusalema dekenai do ia lao bona dubu gunalaia taudia ese do idia hahisia bada bona do idia hamasea. (Mat. 16:21) Petero ia diba Iesu be gwauhamata Mesiana, ia ese Dirava ena taunimanima do ia hamauria, unai dainai ia abia dae lasi Iesu do idia hamasea karana be Iehova ese do ia koua lasi. (Mat. 16:16) Unai dainai Petero ese Iesu ia hakaua siri bona ia gwau: “Lohiabada e, oi sibona oi hebogahisi henia. Oi dekenai unai do ia vara lasi.” (Mat. 16:22) Iesu be Petero ena lalohadai dekenai ia lalotamona lasi, badina Petero be Iehova ena laloa dalana ia badinaia lasi.

6. Edena dala ai Iesu ia hahedinaraia ena laloa dalana be Iehova ena laloa dalana ida ia hegeregere?

⁶ Iesu ena laloa dalana be ena guba Tamana ida ia hegeregere. Iesu ese Petero ia hamaoroa: “Satani e, egu murinai oi lao! Oi be hekwakwanai gauna lau dekenai, badina emu lalohadai be Dirava ena lalohadai lasi, to taunimanima edia.” (Mat. 16:23) Iesu ia diba Iehova ena ura ia badinaia totona hisihisi do ia davaria bona do ia mase. Reana Petero be badina namodia haida dainai ia hereva, to Iesu ese ena sisiba ia dadaraia. Unai amo Petero ia dibaia gauna be, Dirava ena laloa dalana ia abia dae be namo. Ita danu be unai amo mai anina bada gauna ta ita dibaia.

7. Edena dala ai Petero ese gabeai ia hahedinaraia ia be Iehova ena laloa dalana ia badinaia? (Laulau itaia.)

⁷ Gabeai Petero ia hahedinaraia, ia ura Iehova ena laloa dalana ia badinaia. Bona idau bese taudia be Dirava ena taunimanima ai do idia lao negana ia ginidae. Dirava ese Petero ia abia hidi Korenelio dekenai ia haroro totona, ia be idau bese tauna ginigunana Keristani tauna ai ia lao totona. Iuda taudia be Idau Bese Taudia idia bamoa lasi, unai dainai Petero ese ena laloa dalana ia hamaoromaoroa be namo, unai amo idau taudia ia haroro henia diba. Petero be Dirava ena lalohadai idau bese taudia dekenai ia dibaia neganai, ena laloa dalana ia haidaua. Unai dainai Korenelio ese Petero ia noia ia do ia vadivadi henia neganai, Petero ia “daradara lasi.” (Kara 10:28, 29) Ia ese Korenelio bona ena ruma bese ia haroro henia bona bapatiso idia abia.—Kara 10:21-23, 34, 35, 44-48.

8. Edena dala ai ita hahedinaraia diba Iehova ena laloa dalana ita badinaia? (1 Petero 3:8)

⁸ Lagani haida murinai, Petero ese Keristani taudia ia hagoadaia “mai lalotamona ida” do idia noho totona. (1 Petero 3:8 duahia.) Iseda tadikaka taihu ida lalotamona ai ita noho diba, bema Iehova ena laloa dalana ita badinaia, unai be Baibel amo ita dibaia gaudia. Hegeregere, Iesu ese ena murinai idia raka taudia ia hagoadaia, edia mauri ai Basileia do idia atoa guna. (Mat. 6:33) Unai dainai Kongrigeisen ai pablisa ta be do ia ura ful-taim hesiai gaukara ia karaia totona. Namo lasi ia ita hamaoroa abia hidi ma ta ia karaia totona, to namona be ita hagoadaia ena tahua gauna ia hagugurua totona.

OI MANAU

9-10. Edena dala ai Iesu be manau karana ia hahedinaraia?

⁹ Iesu do ia mase hanuaboina ai, ia ese Petero bona aposetolo taudia dekenai manau karana ia hadibaia. Dina ai Iesu ese Petero bona Ioane ia siaia edia aniani negana ginigabena idia hegaegaelaia totona. Bona idia hegaegaelaia gaudia haida be disi ta bona tauele, unai amo vadivadi taudia edia aena idia huria diba. To daika be mai manau ida idia mai taudia edia aena do ia huria?

¹⁰ Iesu be mai ura ida unai gaukara ia karaia, unai amo ia hahedinaraia ia be manau tauna. Aposetolo taudia idia hoa badina idia itaia Iesu be hesiai taudia edia gaukara ia karaia. Iesu be ena ataiai dabua ia kokia, tauele be ena gabana ai ia kwatua, disi ai ranu ia bubua bona edia aena ia huria. (Ioa. 13:4, 5) Iesu be nega sisina daudau lalonai aposetolo taudia 12 edia aena ia huria. Bona ia do ia samania tauna, Iuda ena aena ia huria danu. Iesu be mai manau ida unai gaukara ia hagugurua. Bena ia gwau: “Umui dekenai lau karaia karana umui lalopararalaia, a? Lau umui gwauraia, ‘Hadibaia Tauna’ bona ‘Lohiabada,’ bona unai bamona umui hereva be maoro. Unai dainai, bema lau, Lohiabada bona Hadibaia Tauna, ese emui aena lau huria, umui ta ta ese emui aena umui huria danu be namo.”—Ioa. 13:12-14.

11. Edena dala ai Petero ia hahedinaraia ia be manau karana ia dibaia? (1 Petero 5:5) (Laulau itaia danu.)

¹¹ Petero be Iesu amo manau karana ia dibaia. Iesu be guba dekenai ia giroa lou murinai, Petero be hoa karana ta ia karaia. Ia ese ia vara negana amo ena aena ia dika tauna ia hanamoa. (Kara 1:8, 9; 3:2, 6-8) Unai hoa karana dainai, taunimanima momo idia haboua. (Kara 3:11) Petero be unai nega ai sibona ena ladana do ia hanamoa, a? Do ia hahedinaraia ia be lada bada bona dagi bada bese amo ia mai, a? Lasi, Petero ia manau dainai, Iehova bona Iesu dekenai hanamoa ia henia. Ia gwau: “Iesu ena ladana amo, bona unai ladana ai abidadama henia dainai, hari umui itaia bona diba tauna ena aena idia goada.” (Kara 3:12-16) Petero ese Keristani taudia ia tore henia neganai, manau karana hahedinaraia totona ia gaukaralaia herevadia amo ita itaia, Iesu ese tauele be ena gabana ai ia atoa bona ena aposetolo taudia edia aena ia huria negana ita laloa lou.—1 Petero 5:5 duahia.

12. Petero bamona edena dala ai manau karana ita hahedinaraia noho diba?

¹² Manau karana ita hahedinaraia totona, Petero ena haheitalai ita badinaia diba. Laloatao, manau korikorina be iseda hereva sibona amo ita hahedinaraia lasi. Petero ese “manau karana” totona ia gaukaralaia herevana be ita sibona bona ma haida ita laloa dalana ia herevalaia danu. Ita be ma haida totona kara namodia ita karaia badina Iehova bona taunimanima ita lalokau henia, to sibona ita hanamoa totona lasi.—Mat. 6:1-4.

“LALOA MAOROMAORO”

13. “Laloa maoromaoro” ena anina be dahaka?

¹³ “Laloa maoromaoro” ena anina be dahaka? (1 Pet. 4:7) Ia laloa maoromaoro Keristani tauna be abia hidi ia karaia neganai, ia hahedinaraia ia be Iehova ena laloa dalana ia badinaia. Unai bamona Keristani tauna ia diba, ena mauri lalonai Iehova ida ena hetura karana be mai anina bada. Danu sibona dekenai lalohadai maorona ia abia bona ia laloparara gau haida ia diba lasi. Bona hanaihanai Iehova ena hakaua dalana totona ia guriguri.a

14. Edena dala ai Petero be Iehova dekenai ia tabekau lasi?

¹⁴ Iesu ena hanuaboi ginigabena ai, ena hahediba taudia ia hamaoroa: “Inai hanuaboi ai, lau dekenai do ia vara gauna dainai umui ibounai do umui moru.” Petero ia laloa ia be goada tauna dainai ia haere: “Ena be oi dekenai ia vara gauna dainai idia ibounai do idia moru, to lau be do lau moru diba lasi!” Unai hanuaboi ai Iesu ese ena hahediba taudia haida ia hagoadaia: “Umui gima noho bona umui guriguri noho.” (Mat. 26:31, 33, 41) Matamanai bema Petero ese unai sisiba herevana ia badinaia, reana mai gari lasi ida ia gwauraia hedinarai diba ia be Iesu ena hahediba tauna. To Petero be iena Biaguna dekenai unai bamona ia karaia lasi. Unai dainai gabeai ia lalohisihisi.—Mat. 26:69-75.

15. Iesu ena hanuaboi ginigabena ai edena dala ai laloa maoromaoro karana ia hahedinaraia?

¹⁵ Iesu be mai kudouna ibounai ida Iehova dekenai ia tabekau. Ena be Iesu be goevadae tauna, to Iehova dekenai ia guriguri loulou. Unai dainai goada ia abia Iehova ena ura hegeregerena gau ibounai ia karaia totona. (Mat. 26:39, 42, 44; Ioa. 18:4, 5) Petero ia itaia Iesu be guriguri karana ia laloa bada, reana unai ese Petero ia hagoadaia.

16. Edena dala ai Petero be laloa maoromaoro karana ia hahedinaraia? (1 Petero 4:7)

¹⁶ Gabeai, Petero be guriguri karana amo ia hahedinaraia Iehova dekenai ia tabekau. Iesu ia toreisi lou murinai, Petero bona aposetolo taudia ia hamaoroa, idia be lauma helaga do idia abia, unai amo edia haroro gaukara ena hahegani idia hagugurua diba. To Iesu ese idia ia noia, Ierusalema dekenai do idia noho ela bona unai ia vara. (Luka 24:49; Kara 1:4, 5) Idia naria noho lalonai Petero be dahaka ia karaia? Petero bona Keristani taudia be “idia guriguri noho.” (Kara 1:13, 14) Gabeai, Petero ena revareva ginigunana ai Keristani taudia ia hagoadaia idia laloa maoromaoro bona guriguri karana amo Iehova dekenai idia tabekau totona. (1 Petero 4:7 duahia.) Petero ia dibaia gauna be Iehova dekenai ia tabekau be namo. Bona ia laloa maoromaoro, bona ena tadikaka taihu ia durua bona hagoadaia.—Gal. 2:9.

17. Ena be ita laloa gau momo ita diba, to dahaka ita karaia noho be namo? (Laulau itaia danu.)

¹⁷ Laloa maoromaoro karana ita hahedinaraia totona, namona be nega ibounai Iehova dekenai ita guriguri. Namona be hanaihanai Iehova ena heduru totona ita guriguri, ena be ita laloa ita be gau momo ita diba. Unai dainai iseda mauri lalonai abia hidi badana ta ita karaia neganai, Iehova ena hakaua dalana totona ita guriguri, badina ita abia dae ia be iseda namo gaudia ia diba.

18. Edena dala ai Iehova ena laloa dalana oi badinaia diba?

¹⁸ Ita moale badina Iehova ese ita ia karaia dalana amo iena kara namodia ita hahedinaraia diba. (Gen. 1:26) Momokani Iehova ita tohotohoa goevagoeva diba lasi. (Isa. 55:9) To Petero hegeregerena, ita ura Iehova ena laloa dalana ita dibaia noho, unai amo manau karana ita hahedinaraia bona ita laloa maoromaoro diba.