Gau Ibounai Edia Davana ia Bada Noho​—Baibel be Dahaka Ia Gwau?

June 2022 ena ripoti ai, World Bank Group ena presiden ia gwau: “Tanobada ena bisinesi oreadia dekenai hekwakwanai badana ma do ia vara lou. Gaudia ibounai edia davana idia bada daekau noho bona taunimanima idia hoihoi totona moni be hegeregere lasi.”

International Monetary Fund ia gwau: Fuel bona aniani edia davana idia bada daekau haraga dainai, ogogami tanodia ai idia noho taudia dekenai metau bada havaraia.”

Baibel ena hereva ese ita ia durua unai bamona metau idia vara ena badina, ita goada diba dalana, bona hekwakwanai ibounai do idia ore momokani dalana ita diba totona.

“Dina gabedia ai” gaudia edia davana ia bada noho

• Baibel ia gwau ita be “dina gabedia ai” ita noho.​—2 Timoteo 3:1.

• Iesu ia gwauraia “toa badadia,” o gari havaraia gaudia ese do ia hahedinaraia ita be unai nega ai ita noho. (Luka 21:11) Taunimanima idia gari badina idia itaia gaudia edia davana idia bada daekau noho. Edia vaira negana idia lalohekwarahilaia bona idia laloa bema do idia hegeregere edia famili idia durua noho totona.

• Apokalupo bukana ese hari inai negai, aniani edia davana idia bada noho karana ia perovetalaia. “Gado regena ta bamona lau kamonai. . . . Ia gwau, ‘Witi ena kwat ta o bali ena kwat toi be dina tamona ena pei.’”​—Apokalupo 6:6, Easy-to-Read Version.

“Dina gabedia” bona Apokalupo bukana ena peroveta herevadia dekenai diba ma haida abia totona, vidio ladana Lagani 1914 amo Gau Momo Idia Idau oi itaia bona atikol ladana “Hosi Guia Taudia Foa​—Idia be Daidia?” oi duahia.

Moni dainai idia vara problem ibounai do ia ore dalana

• “Ruma do idia haginia bona do idia noholaia, bona vain umadia do idia karaia bona edia huahua do idia ania. Ruma do idia haginia lasi, ma ta ese ia noholaia totona, eiava do idia hadohado lasi, ma ta ese ia ania totona.”​—Isaia 65:21, 22.

• “Tanobada ai aniani be do ia momo herea, ororo latanai witi be do idia momo herea.”​—Salamo 72:16.

• “Iehova ia gwau: ‘Haida ese idia hahisia taudia bona idia taitai noho ogogami taudia dainai, lau ese kara ta do lau karaia.’”​—Salamo 12:5.a

Daudau lasi, moni dainai idia vara hekwakwanai tanobada ibounai lalonai be Dirava ese do ia haorea momokani. Unai oi diba totona, inai atikol “Is a Fair Economic System Possible?” oi duahia.

To hari inai negai danu Baibel ese oi ia durua diba, gaudia edia davana idia bada noho karana oi haheaukalaia totona. Edena dala ai? Baibel lalonai moni do oi gaukaralaia namonamo ena heduru herevadia idia noho. (Aonega Herevadia 23:4, 5; Hadibaia Tauna 7:12) Diba ma haida abia totona, inai atikol “Protect Your Livelihood” bona “How to Live on Less” oi duahia.