Tanobada Ibounai ai Dina Ena Siahu ia Bada Herea​—Baibel be Dahaka Ia Gwau?

July 2022 tanobada ibounai ai, dina ena siahu ia bada herea ena ripoti ese guna ena rekodi ia hanaia:

• “China ai nega iharuana taunimanima idia hadibaia lou, kahirakahira siti ibounai 70 dekenai weda be do ia siahu momokani.”​—July 25, 2022, CNN Wire Service.

• “Europe ena gabu momo dekenai dina ena siahu ia bada herea dainai, uda badadia dekenai lahi bada ia havaraia.”​—July 17, 2022, The Guardian.

• “Sunday ai United States ena siti momo dekenai dina ena siahu (heat wave) ia bada herea, bona ia hanaia lao East Coast, South bona Midwest ena kahana haida ia abia danu.”​—July 24, 2022, The New York Times.

Unai ena anina be dahaka? Oi laloa do ita hegeregere lasi tanobada ai ita mauri totona, a? Baibel be dahaka ia gwau?

Dina ena siahu ia bada herea karana be Baibel ese ia perovetalaia danu, a?

Oibe. Iseda nega lalonai tanobada hegegemadai dina ena siahu do ia bada herea be, Baibel ese ia perovetalaia danu. Hegeregere, Iesu ia peroveta, “gari bada gaudia,” eiava “toa idauna bona hagaria gaudia” do ita itaia. (Luka 21:11; Good News Translation) Tanobada ibounai ai dina ena siahu ia bada herea dainai momo idia gari, badina idia laloa taunimanima idia karaia noho gaudia ese tanobada do ia hadikaia.

Tanobada be ita noholaia diba lasi gabuna ai do ia lao, a?

Lasi. Dirava ese tanobada ia havaraia taunimanima idia noholaia hanaihanai totona. (Salamo 115:16; Hadibaia Tauna 1:4) Unai dainai, kara ta do ia karaia, Ia gwauhamata vadaeni “tanobada idia hadikaia taudia do [ia] hadikaia ore.”​—Apokalupo 11:18.

Dirava ese peroveta herevadia rua amo gau ma ta gwauhamatalaia:

• “Taunimanima lasi gabuna bona ranu lasi tanona do idia moale, bona tano kaukau palakana do ia moale bona flaoaflaoa amo do ia honu.” (Isaia 35:1) Dirava ese tanobada do ia rakatania lasi, noho kava gabuna ai ia lao totona, to dika gabudia do ia hanamoa lou.

• “Oi ese tanobada oi naria namonamo, huahua momo oi havaraia bona tano oi hanamoa.” (Salamo 65:9) Dirava ese tanobada be paradaiso ai do ia halaoa.

Weda ia senisi karana ese peroveta herevana ia hagugurua noho dalana oi diba totona inai atikol, “Climate Change and Our Future​—What the Bible Says” oi duahia.

Baibel ena gwauhamata tanobada ena gabu ibounai do ia namo lou karana oi diba totona, inai atikol, “Who Will Save the Earth?” oi duahia.