UMUI GIMA NOHO!

Tanobada Ibounai ai Ipidi amo Taunimanima Dagedage Henia Karana ia Bada—Baibel be Dahaka Ia Gwau?

RIPOTI MATAMATA: April 27, 2023

Tanobada ibounai ai, ipidi amo taunimanima dagedage henia karana ese dika bada ia havaraia noho. Sivarai haida be inai.

“Lagani ta ta ai, US ena ripoti ese ia hahedinaraia hutuma hamasea karana be ia bada ia lao haraga. Unai kara be wiki ta ta lalonai idia vara noho.”—April 21, 2023, The Guardian.
“South Africa ai, famili ta lalonai ibounai be 10, idia amo 7 be hahine bona mero tamona ena mauri lagani be 13, ruma lalonai idia pidia mase.”—April 21, 2023, AP News.
“Hamburg, Germany ai, Iehova ena Witnes taudia edia tomadiho gabuna ta dekenai, tau ta ese taunimanima 6 ia pidia mase murinai ia sibona ia hamasea danu.”—March 10, 2023, Reuters.

Unai bamona karadia dainai hisihisi idia davaria taudia be Baibel ena hereva ese ia hagoadaia diba. Ia vara momokani sivarai ta be inai vidio ai do oi itaia DeJanerio Brown: Broken but Not Destroyed.

Danu Baibel ese ita ia durua unai bamona dika idia vara ena badina do ita lalopararalaia. Topik idauidau oi dibaia totona inai vidio oi itaia. Dahaka Dainai Dirava ese Hisihisi Ia Koua Lasi?

July 2022 ai, ipidi amo taunimanima dagedage henia karana ia bada ia lao tanobada ibounai dekenai:

“Japan ena ladana bada tauna, [Praiminista gunana, Shinzo Abe] idia alaia mase karana dekenai, unai tano ai idia noho taudia idia lalohisihisi bada. Bona tanobada ibounai ai taunimanima idia hoa bona daradara, badina Japan ai taravatu utua dagedage karadia ena namba be ia maragi bona ipidi gaukaralaia be mai ena taravatu.”—July 10, 2022, The Japan Times.
“Denmark taudia idia hoa badina haida ese ipidi amo Copenhagen ena sitoa badana lalonai taunimanima toi idia pidia mase.”—July 4, 2022, Reuters.
“South Africa: Tatau haida ese ipidi amo Soweto taoni ena bar ta idia pidia bona taunimanima 15 idia hamasea.”—July 10, 2022, The Guardian.
“United States dekenai, July 4 ena nesenel holidei wikeni ai, ipidi amo dagedage karadia idia havaraia bona taunimanima 220 mai kahana idia hamasea.”—July 5, 2022, CBS News.

Unai bamona dagedage karadia idia ore totona, helaro ia noho, a? Baibel be dahaka ia gwau?

Dagedage Lasi Negana

Baibel ese iseda nega ia gwauraia, “dina gabedia” unai bamona negana ai taunimanima be edia kara amo dagedage, hebogahisi lasi, bona taravatu utua karadia do idia havaraia. (2 Timoteo 3:1, 3) Unai karadia dainai taunimanima be mai gari ida idia noho. (Luka 21:11) To, Baibel ese nega namona ia gwauhamatalaia, dagedage be do ia ore bona “taunimanima be maino gabuna ta dekenai do idia noho, bona dika do idia davaria lasi bona gabu namona ai do idia noho.” (Isaia 32:18) Dagedage be edena dala ai do ia ore?

Dirava ese kara dikadia taudia do ia kokia bona tuari gaudia ibounai do ia hadikaia ore.

“Tanobada dekenai kara dika taudia do ia hadikaia ore.”—Aonega Herevadia 2:22.
“[Dirava] ese tanobada ibounai lalonai tuari ia haorea. Ia ese peva ia hamakohia bona io ia hakwaidua, Ia ese tuari kariota be lahi dekenai ia gabudia.”—Salamo 46:9.

Dirava ese taunimanima do ia hadibaia idia maino totona bona ia ese dagedage karadia ibounai do ia hadokoa.

“Egu ororo helagana ai ta do idia hadikaia lasi eiava dika ta do ia vara lasi, badina tanobada be Iehova dibaia karana dekenai do ia honu, ranu ese davara ia koua bamona.”—Isaia 11:9.
Hari danu, Dirava ese tanobada ibounai ai, taunimanima ia hadibaia noho dagedage karadia idia hadokoa bona edia tuari gaudia hegeregere, “edia io be au rigidia utua kaia ai do idia halaoa.”—Mika 4:3.

Baibel ena gwauhamata tanobada ai gari be lasi, oi diba totona inai atikol, “Freedom From Fear—Is It Possible?” oi duahia.

Dagedage karadia do idia ore momokani oi diba totona, inai atikol “Peace on Earth at Last!” oi duahia.