Abata ese Gabu Idia Hadikaia—Baibel be Dahaka Ia Gwau?

Tanobada ibounai ai, abata ese taunimanima edia noho ia hadikaia. Inai ripoti ese unai ia hahedinaraia:

China ena siti badana ai, dina haida lalonai ia diho medu bada herea dainai abata ia vara, unai bamona medu ena rekodi be lagani 140 lalonai ia vara lasi gauna, unai medu ena bada be . . . 744.8 milimita (29.3 inches), unai be Saturday bona Wednesday lalonai ia vara.”—AP News, August 2, 2023.
“Japan ena saut kahana ai lai gubana ladana Khanun ese medu bona lai bada herea ia havaraia. Dina iharuana, unai be Thursday ai ia vara lai gubana ese taunimanima rua bamona ia hamasea. . . . Central Taiwan ena ororo gabudia dekenai, lai gubana ese do ia havaraia medu ena bada be 0.6 mita (2 feet) bamona.”—Deutsche Welle, August 3, 2023.
“Atlantic Canada ena gabu ta ladana Nova Scotia ai, wiken lalonai medu bada herea ia diho, unai ese abata ia havaraia. Unai bamona abata ta be lagani 50 lalonai ia vara lasi.”—BBC News, July 24, 2023.

Baibel ese edena dala ai unai gaudia ia herevalaia?

“Dina gabedia” ena toa

Ita be Baibel ese ia gwauraia “dina gabedia” ai ita noho. (2 Timoteo 3:1) Iesu ia peroveta ita noho negana ai, “toa badadia” o gari do idia havaraia gaudia do ita itaia. (Luka 21:11) Weda ia senisi dainai weda dikadia do idia vara kava bona do idia vara momo.

Helaro ena badina

Baibel ese ita ia hadibaia tanobada ai hari idia vara noho gari bada gaudia ese idia hahedinaraia ita be mai iseda helaro. Dahaka dainai? Iesu ia gwau: “Unai gaudia idia vara umui itaia neganai, umui diba Dirava ena Basileia be ia kahirakahira.”—Luka 21:31; Mataio 24:3.

Hari ita itaia noho gaudia ese ia hahedinaraia Dirava ena Basileia be kahirakahira inai tanobada ena weda ese ia havaraia gaudia, ranu ena heau dalana (water cycle) danu, do ia hanamoa.—Iobu 36:27, 28; Salamo 107:29.

Dirava ena Basileia ese tanobada do ia hanamoa dalana oi diba totona, inai atikol “Daika ese Tanobada Do Ia Hamauria?” oi itaia