Tanobada Tuarina Do Ia Vara, A?—Baibel be Dahaka Ia Gwau?

Idia hanaia lagani 30 lalonai, taunimanima momo idia laloa hetura namonamo karana be tanobada ta ta huanai ia noho bona do ia namo ia lao. To hari idia vara noho gaudia ese idia hahedinaraia reana unai be do ia vara lasi.

“Taunimanima idia laloa momo badina Gaza dekenai ia vara tuari ese tano ma haida dekenai tuari do ia havaraia, hegeregere Lebanon ena boda ai Israel bona Hezbollah idia tuari matamaia.”—Reuters, January 6, 2024.
“Iran tanona ese ia lohiaia oreadia be tano idauidau idia tuari henia noho, bona Iran ese niuklia tuari kohu ia karaia matamaia lou. Danu hari Russia bona China be Iran ida idia gaukara hebou noho. Unai ibounai ese West tanodia dekenai hekwakwanai matamata ia havaraia.—The New York Times, January 7, 2024.
“Russia ese Ukraine idia tuari henia noho dainai dika badadia idia havaraia noho.”—UN News, January 11, 2024.
“China ena bisinesi ia bada noho bona tuari kohudia momo idia karaia, Taiwan be bese abia isi karana idia hagoadaia noho, bona China bona U.S edia huanai ia vara hepapahuahu karana ese dika ia havaraia diba.”—The Japan Times, January 9, 2024.

Hari ita itaia tanobada ai idia vara noho heiriheiri karana be Baibel ese ia herevalaia, a? Unai ese tanobada tuarina do ia havaraia, a?

Baibel ese hari idia vara noho gaudia ia perovetalaia

Baibel ese edena bamona tuari o edena gabu ai tuari ia vara be ia perovetalaia lasi. To, Baibel ia peroveta hari iseda nega ai tuari be tano idauidau ai idia vara bona unai ese “tanobada amo maino ia kokia.”—Apokalupo 6:4.

Daniela bukana ia peroveta “nega dokona ai” tanobada ena basileia badadia be do idia “doria lao mai” eiava edia lohia siahuna idia habadaia totona do idia hekwarahi. Danu idia ese tuari kohu goadadia do idia karaia bona unai gaudia totona “edia dava bada gaudia” o moni momo do idia negea.—Daniela 11:40, 42, 43.

Ia mai noho tuarina

Baibel ia gwau tanobada ena toana be do ia dika ia lao guna, unai murinai do ia namo. Iesu ia peroveta “hisihisi badana do ia vara, tanobada ena matamaia negana amo ema bona hari, unai bamona hisihisi ta ia vara lasi.” (Mataio 24:21) Unai “hisihisi badana” ese tuari ta ladana Aramagedono do ia havaraia. Baibel ese ia gwauraia “Siahu Ibounai Diravana ena dina badana ena tuari.”—Apokalupo 16:14, 16.

To, Aramagedono tuarina ese taunimanima do ia hamauria, to do ia hadikaia lasi. Unai tuari amo Dirava ese taunimanima edia lohia karana do ia haorea, badina edia tuari ese dika bada ia havaraia. Aramagedono tuarina ese maino hanaihanai do ia havaraia dalana dibaia totona, inai atikol duahia:

“Aramagedono Ena Tuari be Dahaka?”
“Aramagedono be Sivarai Namona!”