Baibel ese Nega Daudau Idia Gorere Taudia ia Durua Diba, A?

Baibel ena Haere

Oibe. Dirava ese ena hesiai taudia ia laloa bada ena be idia gorere. Abidadama hesiai tauna totona, Baibel ia gwau: “Ia gorere bona bedi ai ia hekure neganai, Iehova ese ia do ia naria.” (Salamo 41:3.) Bema oi be nega daudau oi gorere, henunai idia noho dala toi ese oi ia durua diba oi haheauka totona:

1. Goada totona oi guriguri unai amo oi haheauka. “Dirava ena maino, laloparara ibounai ia hereaia gauna,” do oi abia, unai ese emu lalohekwarahi ia haorea bona oi do ia hagoadaia.​​—Filipi 4:6, 7.

2. Oi moale. Baibel ia gwau: “Ia moale kudouna be muramura namona, to lalohisihisi kudouna ese ta ena goada ia haorea.” (Aonega Herevadia 17:22, Nega Matamata Trensleisen) Oi laloa maoromaoro, unai amo nega aukadia ai oi moale bona emu helt do ia durua.

3. Dirava ena gwauhamata oi Abidadama Henia. Helaro namodia ese oi do ia durua oi moale ena be nega daudau oi gorere. (Roma 12:12) Baibel ia peroveta nega ta “tano tauna ta do ia gwau lasi: ‘Lau gorere.’” (Isaia 33:24) Dirava ese saiens taudia idia haorea diba lasi gorere badadia be vaira nega ai do ia haorea momokani. Hegeregere, Baibel ia hahedinaraia buruka taudia be do idia matamata lou bona edia helt ia namo lou, ia gwau: “Namona be unai tau ena tauanina do ia matamata lou, natuna maragina ena tauanina bamona. Namona be ia matamata negana ai ia abia goada do ia abia lou.”​​—Iobu 33:25.

Laloatao: Iehova ena Witnes taudia be Dirava ese ia henia heduru idia abia, to idia abia dae danu nega daudau idia haheaukalaia gorere totona medikol heduru idia tahua (Mareko 2:17) To, ai be ta ai doria lasi medikol heduru ma ta dekenai; Ai mamia ta ta be sibona edia abia hidi do idia karaia edia helt idia naria totona.