Dahaka Dainai Ala-ala Dikana o Holocaust Ia Vara? Dahaka Dainai Dirava Ia Koua Lasi?

Unai henanadai idia gwauraia taudia momo be idia ura ena haere idia davaria sibona lasi to idia ura lalomaino idia abia badina sibona edia mauri lalonai hishisi badana idia mamia. Haida idia laloa inai Ala-ala dikana o Holocaust ia vara be taunimanima edia dika ena davana Dirava amo, unai dainai ia auka Dirava idia abidadama henia totona.

Dirava bona Ala-ala dikana o Holocaust dekenai idia vara lalohadai kereredia

Lalohadai kererena: Ala-ala dikana o Holocaust ia vara dainai Dirava ita nanadaia karana be kerere.

Lalohadai maorona: Abidadama goada taudia be idia henanadai danu, dahaka dainai Dirava ese kara dika ia haorea lasi. Hegeregere, peroveta tauna Habakuku ese Dirava ia nanadaia, ia gwau: “Dahaka dainai oi ura lau ese kara dika do lau itaia noho?” (Habakuku 1:3) Dirava be Habakuku ia gwau henia lasi, to dala ia karaia Habakuku ia gwauraia henanadai be Baibel lalonai idia torea ita ibounai ita duhaia totona.

Lalohadai maorona: Dirava ese kara dika bona kara dika ia havaraia hisihisi ia inai henia. (Aonega Herevadia 6:16-19) Noa ena negai, Dirava “ena kudouna ia metau” badina tanobada ai kara dika be ia bada ia lao. (Genese 6:5, 6) Unai ese ia hahedinaraia, Ala-ala dikana o Holocaust ia vara neganai, Dirava ena lalona be ia hisihisi danu​—⁠Malaki 3:6.

Lalohadai kererena: Iuda taudia dekenai ia vara Ala-ala dikana o Holocaust be Dirava ena panisia karana.

Lalohadai maorona: Keristani ginigunadia edia negai, Dirava ese dala ia karaia Roma taudia ese Ierusalema idia hadikaia totona. (Mataio 23:37–24:2) Unai nega amo, Dirava ese bese ta sibona ia laloa bada eiava panisia lasi to ibounai ia laloa bada. Dirava ena vairanai, “Iuda taudia bona Grik taudia ibounai be hegeregere.”​—⁠Roma 10:12.

Lalohadai kererena: Lalokau bona siahu ibounai Diravana ta ia noho, to Ala-ala dikana o Holocaust ia koua diba lasi.

Lalohadai maorona: Dirava ese hishisi ia havaraia diba lasi, to nega haida ia koua lasi nega sisina lalonai idia vara totona.​—⁠Iamesi 1:13; 5:11.

Dahaka dainai Dirava ese Ala-ala dikana o Holocaust ia koua lasi?

Dirava ese taunimanima ibounai edia hisihisi ia koua lasi hegeregerena Ala-ala dikana o Holocaust ia koua lasi: unai amo idaunegai ia vara hepapahuahu ia hamaoromaoroa diba. Baibel ese ia hahedinaraia goevagoeva hari Diabolo be inai tanobada ia lohiaia, Dirava lasi. (Luka 4:1, 2, 6; Ioane 12:31) Dirava be Ala-ala dikana o Holocaust ia koua lasi edia badina rua be Baibel ese ia hahedinaraia.

1. Dirava ese Taunimanima ia karaia be mai edia ura kwalimu. Dirava ese taunimanima ginigunana, Adamu bona Heva dekenai ena ura ia hadibaia, to idia ia doria lasi idia badinaia totona. Idia sibona ese dahaka be maoro bona kerere ena abia hidi idia karaia, bona idia ese abia hidi kererena idia karaia​—⁠bona taunimanima ibounai danu be unai abia hidi tamona idia karaia dainai dika bada idia davaria. (Genese 2:17; 3:6; Roma 5:12) Unai be buka ladana Statement of Principles of Conservative Judaism ena hereva bamona, ia gwau: “Ita dekenai ia noho ura kwalimu ita gaukaralaia kerere dainai, tanobada ai hisihisi momo idia vara.” Dirava ese iseda ura kwalimu ia kokia lasi, to taunimanima dekenai nega ia henia namona be idia hekwarahi edia hetura karana Dirava ida idia hanamoa totona.

2. Dirava ese Aa-ala dikana o Hholocaust ia havaraia dika do ia hamaoromaoroa lou. Dirava ia gwauhamata mase taudia milioni momo do ia hatorea isi lou, Ala-ala dikana o Holocaust amo idia mase taudia danu. Unai sibona lasi to Ala-ala dikana o Holocaust amo idia roho mauri taudia dekenai hisihisi idia mamia noho badina idia laloa loulou dainai, unai danu Dirava do ia koki momokani. (Genese 2:17; 3:6; Roma 5:12) Dirava ese taunimanima ia lalokau henia dainai ia gwauhamata unai gaudia do ia karaia.​—⁠Ioane 3:16.

Holocaust idia mamia taudia bona idia roho mauri be Dirava ese dika ia koua lasi ena badina bona edena dala ai dika do ia haorea dalana idia lalopararalaia karana ese edia abidadama ia hagoadaia bona mauri ena badina idia dibaia.