Aramagedono Ena Tuari be Dahaka?
Baibel ena haere
Aramagedono be taunimanima edia gavamani bona Dirava huanai do ia vara tuari ginigabena. Unai gavamani idauidau bona edia kahanai idia gini taudia be hari Dirava idia inai henia bona ena lohia siahuna idia dadaraia. (Salamo 2:2) Aramagedono ena tuari ese taunimanima edia lohia dalana do ia hadikaia ore.—Daniela 2:44.
Baibel lalonai Apokalupo 16:16 dekenai inai hereva “Aramagedono” be nega tamona sibona ia hedinarai. Apokalupo bukana ai, peroveta herevana ia hahedinaraia “tanobada ibounai edia king taudia” be “Heberu gado ai, unai gabu ena ladana be Aramagedono dekenai idia lao” bona “Siahu Ibounai Diravana ena dina badana ena tuari totona” idia haboua.—Apokalupo 16:14, 16.
Aramagedono ai daika do ia tuari? Iesu Keriso ese guba tuari oreana do ia gunalaia bona Dirava ena inai taudia do idia hadikaia ore. (Apokalupo 19:11-16, 19-21) Idia be Dirava ena lohia siahuna idia dadaraia bona idia matauraia lasi taudia danu.—Esekiela 39:7.
Aramagedono ena tuari be Middle East ai do ia vara, a? Lasi. Unai tuari be tanobada ibounai dekenai do ia vara.—Ieremia 25:32-34; Esekiela 39:17-20.
Aramagedono, nega haida idia gwau “Har–Magedon” (Heberu gado ai Har Meghiddohnʹ) ena anina be “Megido Ororona.” Megido be guna Israela tanona ai ia noho siti ta. Histori ia hahedinaraia tuari gunadia haida be unai gabu dekenai idia vara, bona Baibel lalonai edia sivarai haida idia torea. (Hahemaoro Taudia 5:19, 20; 2 King Taudia 9:27; 23:29) To, Aramagedono be unai idaunegai siti Megido ia herevalaia lasi. Unuseniai ororo badana be lasi, bona Ieserele Ena Koura gabuna ibounai be ia hegeregere lasi Dirava idia tuari henia taudia idia haboua totona. To Aramagedono anina be tanobada besedia do idia haboua bona Dirava ena lohia siahuna idia inai henia ena tuari ginigabena do idia karaia ia herevalaia.
Aramagedono ena tuari negana be edena bamona? Ita diba lasi edena dala ai Dirava ese ena siahu do ia gaukaralaia, to guna ia ese inai tuari gaudia—aisi nadi, tano mareremarere, medu bona abata badana, lahi bona salifa, kevau bona gorere ia gaukaralaia. Ia ese unai gaudia ia gaukaralaia lou diba. (Iobu 38:22, 23; Esekiela 38:19, 22; Habakuku 3:10, 11; Sekaraia 14:12) Dirava ena inai taudia do idia daradara bona sibodia do idia ala-ala heheni, bena do idia laloparara Dirava ese idia ia tuari henia noho.—Esekiela 38:21, 23; Sekaraia 14:13.
Aramagedono be tanobada ena dokona, a? Ia be iseda planeti ena dokona lasi, badina planeti be taunimanima edia noho gabuna ela bona hanaihanai. (Salamo 37:29; 96:10; Hadibaia Tauna 1:4) Aramagedono ese taunimanima do ia hadikaia ore lasi, to do ia hamauridia, badina Dirava ena hesiai taudia “hutuma bada” do idia roho mauri.—Apokalupo 7:9, 14; Salamo 37:34.
Nega haida Baibel lalonai inai hereva “tanobada” be Dirava idia inai henia kara dika taudia ia herevalaia danu. (1 Ioane 2:15-17) Unai dainai, Aramagedono be unai “tanobada dokona” do ia mailaia.—Mataio 24:3, King James Version.
Aramagedono be edena negai do ia vara? Iesu ese “hisihisi badana” do ia vara bona Aramagedono tuarina ia ginidae negana ia herevalaia neganai, ia gwau: “Unai dina bona hora be ta ia diba lasi, guba anerudia idia diba lasi, Natuna danu be ia diba lasi, to Tamana sibona.” (Mataio 24:21, 36) Baibel ia hahedinaraia Aramagedono do ia ginidae Iesu ena noho negana ai, unai be 1914 ai ia matamaia.—Mataio 24:37-39.