MATAMATA TAUDIA EDIA HENANADAI
Egu Toana be Edena Bamona?
Dahaka dainai oi karaia dabua oi laloa be namo? Badina emu dabua ese taunimanima dekenai lalohadai idauidau ia havaraia diba. Dahaka lalohadai ia havaraia diba?
Fasen dekenai taunimanima ese idia abia lalohadai kereredia toi bona oi hanaia diba daladia
Lalohadai kerere namba 1: Social media ai idia advatais dabua sitaelo oi badinaia.
Kekeni matamata ladana Theresa ia gwau: “Nega haida, dabua matamata ta idia advatais momo dainai, lau ura unai dabua lau karaia. Bema emu lalohadai be unai dabua idia karaia taudia amo ia honu, do ia auka lasi idia oi badinaia totona.”
Dabua ena advatais be kekeni edia lalona sibona ia veria lasi. Buka ta, The Everything Guide to Raising Adolescent Boys ia gwau, “Memero be dabua sitaelo idia badinaia. Fasen kampani danu be memero matamata edia dabua idia advatais danu, unai amo edia lalona idia veria diba.”
Dala namona: Baibel ia gwau: “Diba bada lasi tauna ese hereva ibounai ia abia dae, to aonega tauna be do ia karaia gaudia ia laloa namonamo guna.” (Aonega Herevadia 14:15) Unai hakaua hereva hegeregerena, idia advatais gaudia oi lalohadailaia namonamo. Hegeregere, bema idia tait dabua o tauanina idia hahedinaraia dabua ena advatais oi itaia, sibona oi nanadaia:
‘Bema inai sitaelo lau badinaia, daika lau durua noho?’
‘Bema inai dabua lau karaia, edena bamona taudia ida do lau hegeregere?’
‘Unai ese egu kara korikorina bona egu abidadama ia hahedinaraia, a?’
Point namona: Wiki tamona lalonai, dabua ena advatais bona bisinesi oreadia oi stadilaia. Edena bamona mauri dalana idia herevalaia momo? Unai advataismen ese oi ia doria unai sitaelo matamata oi badinaia totona, a? Kekeni ta ladana Karen ia gwau: “Presa bada ia noho emai dabua amo emai toana ai hahairaia eiava emai tauanina ai hahedinaraia totona. Bema fasen kampani be unai idia diba, do ia auka lasi matamata taudia edia lalona idia veria totona.”
Lalohadai kerere namba 2: Dabua sitaelo matamata oi karaia, emu turadia edia lalonamo abia totona.
Mero ta ladana Manuel ia gwau: “Bema dabua sitaelo ta ia popiula, vadaeni taunimanima momo ese do idia karaia. Bema oi karaia lasi, taunimanima ese oi do idia hahemaoro henia.” Kekeni matamata ladana Anna be unai hereva dekenai ia lalotamona, ia gwau: “Unai be fasen dabua karaia karana sibona lasi, to emu turadia edia lalonamo oi abia be mai anina bada.”
Dala namona: Baibel ia gwau: “Inai nega oromana ai idia noho taudia do umui tohotohoa lasi.” (Roma 12:2) Unai sisiba hegeregerena, emu kabodi oi sekea bona sibona oi nanadaia:
‘Dahaka ese egu lalona ia veria dabua lau abia hidi totona?’
‘Dabua sitaelo matamata lau abia hidi be mai anina bada, a?’
‘Lau ura egu dabua amo taunimanima lau hamoalea, a?’
Point namona: Namo lasi inai gau rua sibona oi laloa: Momo ese idia ura henia dabua sitaelo matamata eiava idia ura henia lasi sitaelo gunana. To inai gau ihatoina oi laloa danu: Namona be oi karaia dabua dainai oi hemarai lasi bona oi lalogoada.
Lalohadai kerere namba 3: Ia tait sisina eiava tauanina ia hahedinaraia dabua be namo
Kekeni ladana Jennifer ia gwau: “Lau ia tohoa gauna be, nega haida lau ura dabua idia tait, idia kwadogi eiava egu tauanina idia hahedinaraia.”
Dala namona: Baibel ia gwau: “Namo lasi emui hairai be murimuri sibona . . . To namona be emui hairai be emui kudouna ai ia noho gauna.” (1 Petero 3:3, 4) Unai sisiba hegeregerena, namona be oi laloa, edena be mai anina bada, matana veria dabua eiava emu kara namodia.
Point namona: Bema mai hemataurai ida emu dabua oi karaia, unai ese emu toana do ia hahairaia momokani. Oibe, hari momo idia ura lasi hemataurai dalanai edia dabua idia karaia, to mani inai oi laloa:
Ia sibona ia herevalaia momo tauna ta ida oi herevahereva vadaeni, a? Madi, ia diba lasi gauna be, ena kara ese emu lalona ia hahisia!
Bema oi sibona oi herevalaia momo, taunimanima do idia moale lasi, unai hegeregerena, bema emu dabua amo oi hahedinaraia sibona oi laloa bada, haida do idia moale lasi
Bema mai hemataurai lasi ida emu dabua oi karaia, oi be unai herevahereva momo tauna bamona. Emu dabua amo inai be hegeregere oi gwau: “Lau umui itaia.” Danu, emu dabua amo oi hahedinaraia oi be sibona emu toana dekenai oi moale lasi eiava sibona oi laloa bada. Eiava oi ura haida, matabodaga taudia danu, edia lalona oi veria oi sibona idia laloa totona.
Bema dabua ta oi hoihoilaia lasi, namo lasi unai dabua oi advatais. To hemataurai dabua oi karaia. Kekeni ta ladana Monica ia gwau: “Bema hemataurai dabua oi karaia, unai ese ia hahedinaraia lasi oi be emu tubuna hahine bamona dabua oi karaia. To, anina be oi sibona bona ma haida dekenai hemataurai karana oi hahedinaraia.”