Iosua

8 Bena Iehova be Iosua dekenai ia gwau: “Namo lasi oi gari.+ Tuari tatau ibounai oi abia bona Ai siti tuari henia totona umui daekau lao. Itaia, lau ese Ai ena king, ena taunimanima, ena siti bona tano be emu imana dekenai lau atoa vadaeni.+ 2 Umui ese Ieriko bona ena king dekenai umui karaia hegeregerena, Ai bona ena king dekenai unai bamona do umui karaia danu,+ to edia kohu bona animal umui abia. Umui be hanua ena murina kahana dekenai do umui hunia bona naria.”

3 Unai dainai Iosua be tuari tatau ibounai ida Ai tuari henia totona idia daekau lao. Iosua ese tuari taudia goadadia 30,000 ia abia hidi bona hanuaboi ai idia ia siaia lao. 4 Idia dekenai inai oda hereva ia henia: “Itaia, siti ena murina kahana dekenai do umui hunia bona naria. Namo lasi siti amo umui daudau, bona umui ibounai umui noho hegaegae. 5 Lau bona tuari taudia ibounai be siti kahirakahira do ai lao bona idia be ai idia tuari henia totona do idia raka-lasi, guna bamona,+ unai neganai idia amo do ai heau siri. 6 Bona idia be emai murinai do idia mai, do idia laloa ai be idia amo ai heau siri noho, guna bamona.+ To ai be idia amo do ai heau ela bona idia be siti amo do idia siri. 7 Bena emui hunia gabuna amo umui raka-lasi bona siti umui abia. Iehova emui Dirava ese unai siti be umui dekenai do ia henia. 8 Umui ese siti umui abia neganai, namona be lahi amo umui gabua.+ Namona be Iehova ena hereva hegeregerena umui karaia. Itaia, lau ese umui dekenai oda hereva lau henia vadaeni.”

9 Bena Iosua ese idia ia siaia, bona do idia hunia gabuna dekenai idia lao. Idia be Betele bona Ai siti huanai idia kamepa, unai be Ai ena west kahana dekenai, to unai hanuaboi ai Iosua be ena tuari taudia ida ia noho.

10 Daba momokani ai Iosua ia toreisi bona tuari taudia ia haboua murinai, ia bona Israela ena tau badadia ese Ai dekenai unai tuari taudia idia hakaua lao. 11 Ia ida idia noho tuari taudia ibounai+ be siti idia lao henia bona Ai ena not kahana dekenai idia kamepa. Idia bona Ai huanai koura ta ia noho. 12 Bona ia ese guna ia abia tatau 5,000 be Betele+ bona Ai huanai idia hunia,+ unai be siti ena west kahana dekenai. 13 Bona tuari orea badana be siti ena not kahana dekenai idia kamepa,+ to idia hunia tuari taudia be siti ena west kahana dekenai idia kamepa,+ bona unai hanuaboi ai Iosua be koura ena huana dekenai ia lao.

14 Bona Ai ena king ese maoromaoro unai ia itaia neganai, ia bona siti ena tatau be daba momokani idia lao haraga, Israela taudia idia tuari henia totona, unai be tano kaukau palakana ena gabu ta dekenai. To ia diba lasi siti ena murina kahana ai ia do idia tuari henia taudia idia hunia vadaeni. 15 Ai taudia be tuari totona idia lao neganai, Iosua bona Israela taudia ibounai be taunimanima lasi gabuna ia lao henia dalana dekenai idia heau lao.+ 16 Bena siti lalonai idia noho taudia ibounai idia haboua bona idia murinai idia heau lao. Bona Iosua idia lulua lao neganai, idia be siti amo idia siri. 17 Ai bona Betele dekenai idia noho tatau ibounai be Israela taudia murinai idia heau lao. Idia ese siti ena geiti idia koua lasi bona Israela taudia murinai idia heau lao.

18 Vadaeni Iehova be Iosua dekenai ia gwau: “Oi dogoatao io be Ai siti dekenai oi poinia,+ badina unai siti be emu imana dekenai do lau atoa.”+ Unai dainai Iosua ese ia dogoatao io be unai siti dekenai ia poinia. 19 Iosua ena imana ia abia isi neganai, idia hunia tuari taudia be edia gabu amo idia toreisi haraga bona siti lalonai idia heau vareai bena siti idia abia. Maoromaoro unai siti be lahi amo idia gabua.+

20 Ai taudia idia giroa neganai, idia itaia siti amo kwalahu ia daekau noho, bona idia be goada lasi gabu ma ta dekenai idia heau lao totona. Bena taunimanima lasi gabuna dekenai idia heau lao tuari taudia idia giroa bona edia murinai idia mai Ai taudia idia lulua lao. 21 Iosua bona ia ida idia noho Israela taudia ibounai idia itaia, hunia ai idia noho tuari taudia be siti idia abia vadaeni bona siti amo kwalahu ia daekau neganai, idia giroa bona Ai taudia idia tuari henia. 22 Bona idia hunia tuari taudia be siti amo idia raka-lasi, Ai taudia idia tuari henia totona, bona Ai taudia idia heau diba lasi badina idia be huanai idia noho, Israela taudia haida be inai kahana ai bona ma haida be unai kahana ai, bona idia alaia mase, ta ia heau mauri lasi.+ 23 To Ai ena king idia abia+ mauri bona Iosua dekenai idia abia lao.

24 Israela taudia ese taunimanima lasi gabuna dekenai idia lulua lao Ai taudia ibounai be tuari kaia amo idia hamasea murinai, Israela taudia ibounai be Ai dekenai idia giroa lou bona unai siti taudia oredia be tuari kaia amo idia alaia mase. 25 Unai dina ai idia mase taudia ibounai be 12,000, tatau bona hahine, idia ibounai be Ai taudia. 26 Iosua ese ena imana amo ia dogoatao io ia atoa diho lasi+ ela bona Ai taudia ibounai idia hamasea ore.+ 27 To, Israela taudia ese unai siti ena kohu bona animal idia abia, Iehova ese Iosua dekenai ia henia oda herevadia hegeregerena.+

28 Bena Iosua ese lahi amo Ai siti ia gabua bona nadi haboua gabuna ai ia lao+ ema bona hari. 29 Ia ese Ai ena king ia alaia bona au ta dekenai ia tauadae ela bona adorahi momokani, bona dina be kahirakahira ia diho neganai, Iosua ese oda ia henia king ena mase tauanina be au amo idia abia diho totona.+ Bena siti ena geiti ena vareai gabuna dekenai idia atoa bona nadi momo herea be ia latanai idia atoa, unai nadi be unuseni idia noho ema bona hari.

30 Unai nega ai Iosua be Ebala Ororo ai+ Iehova, Israela ena Dirava totona boubou patana ia haginia, 31 Iehova ena hesiai tauna Mose ese guna Israela taudia ia oda henia hegeregerena bona Mose ena Taravatu buka lalonai idia torea hegeregerena,+ ia gwau: “Boubou patana be nadi amo umui karaia, auri tulu amo idia utua lasi nadi unai.”+ Idia ese unai pata latanai gabua bouboudia bona maino karaia bouboudia be Iehova dekenai idia henia.+

32 Bena Iosua ese unai nadi dekenai Taravatu ia torea lou,+ guna Mose ese Israela taudia edia vairanai ia torea gauna unai.+ 33 Israela taudia ibounai, edia tau badadia, ofesa taudia, bona edia hahemaoro taudia be Maua ena kahana kahana dekenai idia gini, Iehova ena Taravatu Maua idia huaia Levi hahelaga taudia edia vairanai. Idau tano taudia be Israela taudia ida unuseniai idia noho.+ Idia haboua taudia edia orea ena kahana ta be Gerisima Ororo vairanai idia gini bona kahana ma ta be Ebala Ororo vairanai idia gini,+ Israela taudia hanamoa totona, Iehova ena hesiai tauna Mose ese guna ia henia oda hegeregerena.+ 34 Unai murinai Iosua ese Taravatu ena hereva ibounai ia duahia badabada,+ hanamoa herevadia+ bona hadikaia herevadia,+ Taravatu bukana lalonai idia torea hereva ibounai hegeregerena. 35 Iosua ese Mose ia henia oda hereva ibounai be Israela taudia ibounai,+ hahine, natudia, bona idia huanai idia noho* idau tano taudia,+ edia vairanai ia duahia badabada.+