Mataio Ia Boiria

Iesu ese paralais tauna ia hanamoa murinai, Kaperanauma hanuana, Galilea Gohuna badinai ia noho. Unuseniai hutuma be ia dekenai ma idia mai, bona ia hadibadia matamaia. Ia be takisi ofesi ia raka hanaia neganai, Mataio, ena ladana ma ta be Levi, ia itaia. Vadaeni ia boiria, ia gwau: “Oi mai egu murinai oi raka.”​—Mataio 9:9.

Mataio be Iesu ena hahediba herevadia bona hoa karadia edia sivarai ia kamonai, Petero, Andrea, Iamesi bona Ioane bamona. Idia 4 hegeregerena, Mataio be karaharaga Iesu murinai ia raka. Mataio ena Evanelia bukana lalonai unai ia herevalaia, ia gwau: “Vadaeni [Mataio] ia toreisi bona Iesu murinai ia raka.” (Mataio 9:9) Mataio be ena takisi gogoa gaukarana ia rakatania bona Iesu ena hahediba tauna ai ia lao.

Nega ma ta ai, reana Mataio be Iesu ena boiboi ia abia dae dainai, ena ruma ai aria badana ta ia karaia. Iesu bona ena hahediba taudia sibona lasi, to daidia ia boiria danu? Mataio ena tura gunadia, takisi gogoa taudia haida danu idia mai. Idia be Roma gavamani, Iuda taudia ese idia inai henia gavamanina, totona takisi idia gogoa. Iuda taudia ese takisi gogoa taudia be edena bamona idia laloa? Idia ura henidia lasi, badina koikoi dalanai idia amo takisi moni bada idia gogoa. Unai aria ai “kara dika” taudia danu idia noho, idia be dika idauidau idia karaia taudia.​—Luka 7:37-39.

Sibona idia gwauraia kara maoromaoro Farisea taudia idia itaia Iesu be unai taudia ida ia aniani neganai, ena hahediba taudia idia nanadaia: “Dahaka dainai emui hadibaia tauna be takisi gogoa taudia bona kara dika taudia ida ia aniani?” (Mataio 9:11) Iesu ese edia hereva ia kamonai neganai, ia gwau: “Gorere lasi taudia be doketa idia tahua lasi, to gorere taudia sibona ese idia tahua. Vadaeni umui lao bona inai hereva ena anina umui laloa dobu: ‘Lau be hebogahisi lau ura, to boubou gauna lasi.’ Badina kara maoromaoro taudia boiria totona lau mai lasi, to kara dika taudia boiria totona lau mai.” (Mataio 9:12, 13; Hosea 6:6) Farisea taudia ese Iesu idia gwauraia “hahediba tauna,” to idia be mai momokani ida unai idia gwauraia lasi, to ia amo kara maorona idia dibaia diba.

Mataio ese iena ruma ai takisi gogoa taudia bona kara dika taudia ia boiria, unai amo Iesu ena hereva do idia kamonai, “badina idia momo be Iesu murinai idia raka.” (Mareko 2:15) Iesu ia ura idia ia durua Iehova idia tura henia namonamo totona. Farisea taudia ese unai bamona taudia idia gwauraia dika, to Iesu be unai ia karaia lasi. Ia be hebogahisi tauna; doketa ese gorere tauna ia durua hegeregere, Iesu ese edia abidadama ia manoka taudia ibounai ia durua.

Iesu ese takisi gogoa taudia ia hebogahisi henia, edia kara dika ia abia dae dainai lasi, to ia hebogahisi henidia, gorere taudia ia kara henia hegeregerena. Laloatao, ia ese lepera tauna ia hebogahisi henia dainai ia dogoatao, ia gwau: “Oibe lau ura! Harihari oi namo.” (Mataio 8:3) Unai hegeregerena, abidadama manoka taudia ita hebogahisi henia bona durudia diba, edia hetura karana Dirava ida idia hagoadaia totona.