Iseda Tadikaka Bona Taihu be Daidia?

NEGA ta Hadibaia Tauna Badana ese henanadai ta ia henia. Ia gwau: “Lauegu sinana bona lauegu tadina be daika?” (Mataio 12:48) Unai henanadai oi haerelaia diba, a?— Reana oi diba vadaeni Iesu ena sinana ena ladana be Maria. To iena tadikaka edia ladadia oi diba, a?— Ia be mai ena taihudia danu, a?—

Baibel ia gwau Iesu ena tadikaka edia ladadia be “Iamesi bona Iosepa, bona Simona bona Iuda.” Bona Iesu ia haroro neganai, iena taihudia idia mauri noho. Iesu be vara guna natuna dainai, idia ibounai be iena tadidia.​—Mataio 13:​55, 56; Luka 1:​34, 35.

Iesu ena tadikaka be iena hahediba taudia danu, a?— Baibel ia gwau guna ia “idia abidadama henia lasi.” (Ioane 7:5) To gabeai, Iamesi bona Iuda be iena hahediba taudia ai idia lao bona Baibel bukadia idia torea danu. Idia torea bukadia oi diba, a?— Oibe, Iamesi bona Iuda.

Ena be Baibel lalonai Iesu ena taihuna edia ladadia idia gwauraia lasi, to ita diba iena taihuna be rua. To, reana ma haida danu idia noho. Iena taihudia be ena murinai idia raka taudia ai idia lao, a?— Baibel ese unai ia gwauraia lasi, unai dainai ita diba lasi. To Iesu ese inai henanadai, “Lauegu sinana bona lauegu tadina be daika?” ia henia ena badina oi diba, a?— Mani ita tahua.

Iesu be iena hahediba taudia ia hadibaia noho lalonai ta ia mai bona ia dekenai ia gwau: “Oiemu sinana bona oiemu tadina be unai, murimuri dekenai idia gini noho, oi dekenai idia hereva gwauraia.” Unai dainai Iesu ia henanadai: “Lauegu sinana bona lauegu tadina be daika?,” unai amo ia ura mai anina bada gauna ia hadibaia. Iena hahediba taudia dekenai ena imana ia duduia bona ia gwau: “Lauegu sinana bona lauegu tadina be inai.”

Bena Iesu ese ena hereva ena anina ia gwauraia: “Lauegu Tamana, guba dekenai ia noho, ena ura idia karaia taudia, idia sibona be lauegu tadina, bona lauegu taihuna, bona lauegu sinana.” (Mataio 12:​47-​50) Unai ese ia hahedinaraia Iesu ese ena hahediba taudia ia lalokau henia bada. Ita ia hadibaia ia dekenai iena hahediba taudia be iena tadikaka, taihudia bona sinana korikoridia bamona.

Unai nega ai Iesu ena tadikaka korikoridia​—Iamesi, Iosepa, Simona bona Iuda​—idia abia dae lasi Iesu be Dirava ena Natuna. Reana aneru Gabriela ese edia sinana dekenai ia gwauraia herevana idia abia dae lasi. (Luka 1:​30-​33) Unai dainai reana Iesu idia kara auka henia. Unai bamona ia karaia tauna be tadikaka eiava taihuna korikorina lasi. Iena tadikaka eiava taihuna ia kara auka henia tauna ta oi diba, a?—

Baibel ese Esau bona Iakobo edia sivarai ia gwauraia bona edena bamona Esau ia badu dikadika dainai ia gwau: “Lauegu tadina Iakobo do lau alaia mase.” Edia sinana Rebeka ia gari bada dainai, Iakobo be gabu ta dekenai ia siaia lao unai amo Esau ese do ia alaia mase lasi. (Genese 27:​41-​46) To, lagani momo murinai Esau ese ena lalohadai ia haidaua bona Iakobo ia rosia bona ia kisi henia.​—Genese 33:4.

Gabeai, Iakobo be natudia memero 12 ia havaraia. To Iakobo ena vara guna natudia ese edia tadina Iosepa idia lalokau henia lasi. Ia idia mama henia badina edia tamana ese ia lalokau henia bada. Unai dainai Aigupito dekenai idia lao taudia dekenai ia idia hoihoilaia. Bena edia tamana idia hamaoroa Iosepa be dagedage animal ta ese ia hamasea. (Genese 37:​23-36) Unai be kara dikana, ani?—

Gabeai Iosepa ena tadikaka be idia karaia karana dainai idia sori bada. Unai dainai Iosepa ese edia kara dika ia gwauatao. Iosepa ena kara be Iesu ena bamona, ani?— Iesu be dika ia davaria neganai, iena aposetolo taudia ese ia idia heautania bona Petero ese ia gorea danu. To, Iosepa ia karaia bamona, Iesu ese idia ibounai edia dika ia gwauatao.

Tadikaka rua Kaino bona Abela mani oi laloa. Idia amo gau ta ita dibaia diba danu. Dirava be Kaino ena kudouna ia itaia, ia ese ena tadikaka ia lalokau henia momokani lasi. Unai dainai Dirava ese Kaino ia hamaoroa ena kara do ia haidaua. Bema Kaino ese Dirava ia lalokau henia momokani, ena hereva do ia kamonai henia. To Dirava ia lalokau henia lasi. Dina ta ai Kaino ese Abela ia hamaoroa: “Uma gabu dekenai ita raka namo.” Abela be Kaino ida ia lao. Idia sibona be uma dekenai idia noho neganai, Kaino ese ena tadina ia botaia auka dainai, ia hamasea.​—Genese 4:​2-8.

Baibel ia gwau unai kara amo gau badana ta ita dibaia be namo. Unai gauna oi diba, a?— ‘Hamatamaia negana amo umui kamonai hadibaia hereva be inai: Ita lalokau heheni be namo. Kaino ena kara bamona do ita karaia lasi, ia be Satani ena tau.’ Unai dainai tadikaka bona taihu ese ta ta idia lalokau heheni be namo. Kaino ena kara idia tohotohoa lasi be namo.​—1 Ioane 3:​11, 12.

Dahaka dainai Kaino ena kara ita tohotohoa lasi be namo?— Badina Baibel ia gwau “ia be Satani ena tau.” Kaino be Diabolo bamona ia kara dainai, unai be hegeregere Diabolo be iena tamana.

Emu tadikaka bona taihu oi lalokau henia ena badina badana oi itaia, a?— Bema idia oi lalokau henia lasi, oi be daika ena natudia oi tohotohoa noho?— Diabolo ena natudia. Oi ura lasi Diabolo ena natudia oi tohotohoa, ani?— Unai dainai edena bamona oi hahedinaraia diba oi ura Dirava ena natuna ai oi lao?— Oibe, emu tadikaka bona taihu oi lalokau henidia.

To lalokau be dahaka?— Lalokau be ita lalonai ia noho hemami goadana, unai ese ita ia doria taunimanima ma haida dekenai kara namodia ita karaia totona. Bema ma haida ita lalo-namo henia bona idia dekenai kara namodia ita karaia neganai, ita hahedinaraia idia ita lalokau henia. Bona daidia be iseda tadikaka bona taihu, bona idia dekenai lalokau ita hahedinaraia be namo?— Laloatao, Iesu ia gwau idia be Keristani ruma bese badana lalonai idia noho taudia.

Unai Keristani tadikaka bona taihu ita lalokau henia be mai anina bada, a?— Baibel ia gwau: “Iena tadikakana, ia itaia diba tauna, bema ia ura henia lasi, edena bamona ia itaia diba lasi Diravana do ia ura henia diba?” (1 Ioane 4:​20) Unai dainai namo lasi Keristani ruma besena lalonai idia noho taudia haida sibona ita lalokau henia. Namona be idia ibounai ita lalokau henia. Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Tadikaka bona taihu ibounai oi lalokau henia, a?— Laloatao, bema unai bamona oi karaia lasi, Dirava oi lalokau henia lasi.

Edena bamona ita hahedinaraia diba iseda tadikaka bona taihu ita lalokau henia momokani?— Bema idia ita lalokau henia, idia amo do ita raka siri lasi to do ita hereva henidia. Idia ibounai do ita tura henia. Nega ibounai idia dekenai kara namodia ita karaia bona mai iseda ura ida gau ita haria. Bona bema hekwakwanai idia davaria, idia do ita durua badina ita be ruma bese badana ta.

Iseda tadikaka bona taihu ibounai ita lalokau henia neganai, unai ese dahaka ia hamomokania?— Ia hamomokania ita be Iesu, Hadibaia Tauna Badana ena hahediba taudia. Bona ita ura unai bamona ita karaia, ani?—