Iesu Ena Hereva ese Ita Ia Durua Ita Moale Totona
“Iesu ese . . . ororo ta dekenai ia daekau. . . . Iena diba tahua taudia ese ia dekenai idia haboua mai. Vadaeni ia hadibaia hamatamaia.”—MAT. 5:1, 2.
1, 2. (a) Edena negai Iesu ese Ororo Harorona ia henia? (b) Edena dala ai Iesu ese Ororo Harorona ia hamatamaia?
LAGANI 31 C.E. ai, Iesu ena laolao Galilea dekenai be ia hagugurua lasi, to Ierusalema dekenai ia lao badina Pasova ariana be unuseniai do idia karaia. (Ioa. 5:1) Unai murinai, Iesu be Galilea dekenai ia giroa lou. Unuseniai Iesu be aposetolo taudia 12 ia abia hidi totona, Iehova ena heduru totona ia guriguri ela bona daba ia rere. Dabai, taunimanima be idia haboua noho, bona Iesu ese gorere taudia ia hanamoa. Iesu be ena hahediba taudia bona ma haida ia itaia neganai, ororo ai ia helai bona idia ia hadibaia matamaia.—Mat. 4:23–5:2; Luka 6:12-19.
2 Ororo Harorona ai, Iesu ese ia hahedinaraia, Dirava idia tura henia bona hesiai henia noho taudia be idia moale. (Mat. 5:1-12, NW )a Iesu ese ia herevalaia “moale” 9 amo ita itaia dahaka dainai Keristani taudia idia moale, bona hari inai negai unai be mai anina bada, herevana idia be lagani 2,000 gunanai idia torea. Namona be unai moale ta ta ita itaia.
“Dirava Dibaia Totona Idia Hitolo Taudia”
3. Dirava dibaia totona idia hitolo taudia be dahaka idia ura?
3 “Dirava dibaia totona idia hitolo taudia be idia moale, badina guba basileia be idia edia.” (Mat. 5:3, NW ) “Dirava dibaia totona idia hitolo taudia” idia ura dikadika Dirava ese idia ia hakaua bona hebogahisi henia be namo.
4, 5. (a) Dahaka dainai Dirava dibaia totona idia hitolo taudia idia moale? (b) Bema ita be Dirava dibaia totona ita hitolo taudia, vadaeni dahaka ita karaia diba?
4 Iehova dibaia totona idia hitolo taudia idia moale badina be, “guba basileia be idia edia.” Iesu ena hahediba taudia ginigunadia idia abia dae Iesu be Mesia dainai, idia be Iesu ida Dirava ena guba Basileiana ai do idia lohia hebou. (Luka 22:28-30) Herevana guba ai Keriso ida do ita lohia o tanobada paradaisona ai mauri hanaihanai do ita abia, to Dirava dibaia totona ita hitolo dainai ita moale.
5 Dirava dibaia totona idia hitolo taudia be momo lasi, badina momo be Dirava idia abidadama henia lasi bona gau helagadia idia laloa bada lasi. (2 Tes. 3:1, 2; Heb. 12:16, NW ) Bema ita be Dirava dibaia totona ita hitolo taudia, vadaeni namona be Baibel ita stadilaia namonamo, hahediba taudia halaoa gaukarana ita goadalaia, bona nega ibounai Keristani heboudia dekenai ita lao.—Mat. 28:19, 20; Heb. 10:23-25.
“Idia Taitai Taudia be Idia Moale”
6. “Idia taitai taudia” be daidia, bona dahaka dainai idia “moale”?
6 “Idia taitai taudia be idia moale, badina ma haida ese do idia hagoadadia.” (Mat. 5:4, NW ) “Idia taitai taudia” be “Dirava dibaia totona idia hitolo taudia.” “Idia taitai” anina be idia maumau, edia mauri lalonai idia abia gaudia dainai, a? Lasi, idia taitai badina idia be goevadae lasi taudia, bona taunimanima be kara dikadia momo idia karaia noho. To, dahaka dainai unai taitai taudia idia “moale”? Badina Dirava bona Keriso idia abidadama henia, bona Iehova ena turana ai idia lao.—Ioa. 3:36.
7. Satani ena tanobada be edena bamona ita laloa be namo?
7 Satani ena tanobada ai dika ia bada ia lao noho dainai ita taitai, a? Tanobada gaudia be edena bamona ita laloa? Ioane ia gwau: “Tanobada ena gaudia ibounai be inai, tauanina ena ura, matana ese idia ura gaudia bona ta ese ena kohu ia heagilaia karana, unai gaudia be Tamana amo idia mai lasi.” (1 Ioa. 2:16) Bema ita itaia “tanobada ena lauma”—Dirava idia negea taudia ia hakaua kerere siahuna—be Iehova ita tomadiho henia karana ia hadikaia matamaia, dahaka ita karaia be namo? Namona be Dirava ita guriguri henia, Baibel ita stadilaia, bona elda taudia edia heduru ita tahua. Iehova kahirakahira ita lao karana ese ita do ia “hagoadaia,” herevana metau idauidau ita davaria.—1 Kor. 2:12; Sal. 119:52; Iam. 5:14, 15.
Edena Dala ai “Manau Taudia be Idia Moale”?
8, 9. Manau tauna be manoka tauna, a? Dahaka dainai manau taudia idia moale?
8 “Manau taudia be idia moale, badina idia ese tanobada do idia abia.” (Mat. 5:5, NW ) “Manau” o “lalomanau” tauna be goada tauna, bona ia koikoi lasi. (1 Tim. 6:11) Bema ita manau, ita be Iehova ena ura do ita karaia bona ena hakaua herevadia do ita badinaia. Danu, mai manau ida eda tadikaka bona ma haida do ita kara namo henia. Unai bamona ita karaia neganai, ita be aposetolo Paulo ena sisiba ita badinaia.—Roma 12:17-19 duahia.
9 Dahaka dainai manau taudia be idia moale? Manau tauna Iesu be unai ia haerelaia ia gwau, “idia ese tanobada do idia abia.” Iesu be tanobada do ia Biagua Tauna badana. (Sal. 2:8; Mat. 11:29; Heb. 2:8, 9) To, manau taudia haida be “Keriso” ida tanobada do idia lohiaia. (Roma 8:16, 17) Iesu ena Basileia ese do ia lohiaia tanobadana ai, manau taudia hutuma be mauri hanaihanai do idia abia.—Sal. 37:10, 11.
10. Bema ita manau lasi, kongrigeisen ai maduna ita abia diba bona ma haida be ita do idia tura henia, a?
10 Iesu bamona, ita manau be namo. To bema ita be badu o dagedage tauna ta be edena bamona? Reana ta be ita do ia tura henia lasi. Danu, ia badu o dagedage tadikaka be hegeregere lasi kongrigeisen ai elda o hesiai tauna ta ai ia lao totona. (1 Tim. 3:1, 3) Paulo be Tito ia hamaoroa Kerete tadikaka do ia “hadibaia lou . . . idia heai lasi, to do idia manau. Nega ibounai taunimanima ibounai dekenai manada kara do idia karaia.” (Tito 3:1, 2) Momokani, ma haida be manau tauna ena kara dekenai idia moale.
“Kara Maoromaoro” Totona Idia Hitolo Taudia
11-13. (a) Kara maoromaoro totona ita hitolo bona ranu mase anina be dahaka? (b) Kara maoromaoro totona idia hitolo bona ranu mase taudia be edena dala ai Dirava ese edia ura gauna do ia henia?
11 “Kara maoromaoro totona idia hitolo bona ranu mase taudia be idia moale, badina Dirava ese edia ura gauna do ia henia.” (Mat. 5:6, NW ) Iesu ese ia kikilaia “kara maoromaoro” ena anina be, Dirava ena ura ita karaia bona ena taravatu ita badinaia. Salamo torea tauna ia gwau, ia “ura dikadika” Dirava ena kara maoromaoro ia diba. (Sal. 119:20) Ita be kara maoromaoro totona ita hitolo bona ranu mase, a?
12 Iesu ia gwau kara maoromaoro totona idia hitolo bona ranu mase taudia idia moale badina “Dirava ese edia ura gauna do ia henia.” Unai hereva hegeregerena, Pentekoste 33 C.E. ai, Iehova be ena lauma helaga ia bubua matamaia murinai, “ia ese taunimanima ibounai dekenai . . . kara maoromaoro . . . ena anina . . . ia hahedinaraia goevagoeva.” (Ioa. 16:8, NW ) Dirava ena lauma amo tatau haida be Keristani Greek Revarevadia idia torea, unai buka be mai ena siahu “kara maoromaoro ai ita ia hakaua” totona. (2 Tim. 3:16, BHğ) Danu, lauma helaga ese ita ia durua ‘mauri matamata do ita atoa, dabua matamata ita atoa bamona. Inai mauri matamata dainai, iseda toana be Dirava ena toana bamona, ia ese ia karaia gauna. Inai mauri matamata ena kara be maoromaoro.’ (Efe. 4:24) Hagoadaia gauna be inai: Ita diba, bema ta be Iesu ena mauri davalaia boubouna ia abidadama henia dainai, iena kara dikadia amo ia helalo-kerehai bona Iehova ia noia ena dika ia gwauatao totona, vadaeni Dirava ese unai tauna ia gwauraia kara maoromaoro tauna.—Roma 3:23, 24 duahia.
13 Ita be kara maoromaoro totona ita hitolo bona ranu mase dainai, nega ta do ia mai, ita be kara maoromaoro taudia ma haida ida tanobada dekenai mauri hanaihanai do ita abia. To, unai nega ita naria noho lalonai, namona be iseda lalona ita hadaia Iehova ena taravatu ita badinaia totona. Iesu ia gwau: “Hanaihanai Dirava ena basileia bona ena kara maoromaoro do umui tahua guna.” (Mat. 6:33, NW ) Unai sisiba dainai, Dirava ena hesiai gaukara momo ita karaia bona ita moale.—1 Kor. 15:58.
Dahaka Dainai “Hebogahisi Taudia be Idia Moale”?
14, 15. Edena dala ai hebogahisi ita hahedinaraia diba, bona dahaka dainai “hebogahisi taudia” idia moale?
14 “Hebogahisi taudia be idia moale, badina ma haida ese do idia hebogahisi henidia.” (Mat. 5:7, NW ) “Hebogahisi taudia” be ma haida edia hisihisi idia lalopararalaia bona heduru idia henia. Iesu be taunimanima ia hebogahisi henia dainai, hoa dalanai hisihisi taudia momo ia durudia. (Mat. 14:14) Iehova be hebogahisi Diravana dainai helalo-kerehai taudia edia dika ia gwauatao, namona be Iena haheitalai ita tohotohoa. (Eso. 34:6, 7; Sal. 103:10) Danu, namona be iseda hereva bona kara namodia amo dabu taudia ita durua. Idia ita hebogahisi henia dala namona ta be inai: Idia dekenai hereva momokanidia ita harorolaia. Iesu be taunimanima ia hebogahisi henia dainai, “idia dekenai gau momo ia hadibaia matamaia.”—Mar. 6:34, NW.
15 Iesu ena hereva be maoro, badina ia gwau: “Hebogahisi taudia be idia moale, badina ma haida ese do idia hebogahisi henidia.” Bema haida ita hebogahisi henia, idia be ita do idia laloa bada. Bema unai bamona ita karaia, reana kota neganai Dirava be ita do ia kota henia lasi. (Iam. 2:13) Dirava be hebogahisi taudia sibona edia dika do ia gwauatao bona mauri hanaihanai do ia henia.—Mat. 6:15.
Dahaka Dainai “Kudouna Idia Goeva Taudia be Idia Moale”?
16. Iseda “kudouna idia goeva” anina be dahaka, bona edena dala ai kudouna ia goeva tauna be ‘Dirava do ia itaia’?
16 “Kudouna idia goeva taudia be idia moale, badina idia ese Dirava do idia itaia.” (Mat. 5:8, NW ) Bema eda “kudouna idia goeva,” ita be gau goevadia sibona do ita ura henia. Danu, ‘lalokau korikori’ do ita hahedinaraia. (1 Tim. 1:5) Ma danu, eda lalona ia goeva dainai ita be ‘Dirava do ita itaia.’ Anina be iseda matana korikori amo Iehova do ita itaia, a? Lasi, Baibel ia gwau: “Tau ta ese [Dirava] vairana ia itaia neganai, unai tau be do ia mase.” (Eso. 33:20) Iesu be Dirava ena kara ia hahedinaraia goevagoeva dainai, ia gwau diba: “Lau ia itaia tauna ese egu Tamana danu ia itaia.” (Ioa. 14:7-9) Ita be Iehova tomadiho henia taudia dainai, bema ia karaia gaudia ita stadilaia namonamo, ita be ‘Dirava do ita itaia’ bamona. (Iobu 42:5) Horoa taudia be mase amo idia toreisi lou, lauma tauanina idia abia, bona guba dekenai idia lao neganai, edia matana korikorina amo edia guba Tamana do idia itaia.—1 Ioa. 3:2.
17. Iseda kudouna idia goeva ena namo be dahaka?
17 Kudouna ia goeva tauna be kara goevadia do ia karaia, ena tomadiho karana ia goeva, bona Iehova matanai idia miro gaudia do ia lalohadailaia lasi. (1 Siv. 28:9; Isa. 52:11) Bema iseda kudouna ia goeva, kara goevadia do ita karaia, hereva goevadia do ita gwauraia, bona mai momokani ida Iehova ena hesiai gaukara do ita karaia.
“Maino Idia Karaia Taudia” be Dirava Ena Natudia
18, 19. “Maino idia karaia taudia” edia kara be edena bamona?
18 “Maino idia karaia taudia be idia moale, badina ma haida ese do idia gwauraia ‘Dirava ena natudia.’ ” (Mat. 5:9, NW ) “Maino idia karaia taudia” be idia karaia gaudia bona karaia lasi gaudia amo do ita dibaia. Bema ita be Iesu ia kikilaia “maino idia karaia taudia,” namona be inai siri ita badinaia: “Umui ta ta dekenai kara dika ena davana do umui henia lasi.” To, “nega ibounai . . . taunimanima ibounai dekenai kara namo do umui karaia.”—1 Tes. 5:15.
19 Namona be maino karaia taudia ai ita lao. “Maino idia karaia taudia” be ‘turana korikori taudia edia turana dala ia hamakohia’ lasi. (Aon. 16:28) Ita be maino karaia taudia dainai, namona be dala ita tahua ‘mai maino danu taunimanima ibounai danu do ita noho.’—Heb. 12:14.
20. Hari “Dirava ena natudia” be daidia, bona gabeai daidia danu be Dirava ena natudia ai do idia lao?
20 Maino idia karaia taudia idia moale, badina “ma haida ese do idia gwauraia ‘Dirava ena natudia.’ ” Kamonai horoa Keristani taudia be “Dirava ena natudia” ai idia lao vadaeni, bona Ia ese ia naridia, badina idia be Keriso idia abidadama henia bona mai kudouna ibounai ida “lalokau bona maino ena Dirava” idia tomadiho henia. (2 Kor. 13:11; Ioa. 1:12) Iesu ena “mamoe idaudia,” maino idia karaia taudia ma haida unai, be edena bamona? Keriso ena Lagani 1,000 Lohia Negana lalonai, Iesu be edia “Hanaihanai Noho Tamana” ai do ia lao, bena gabeai, Iesu be Iehova ena henunai ia noho neganai, idia danu be Dirava ena natudia ai do idia lao.—Ioa. 10:16; Isa. 9:6; Roma 8:21; 1 Kor. 15:27, 28.
21. Edena bamona do ita kara bema “lauma helaga ena hakaua dalana hegeregerena ita noho”?
21 Bema “lauma helaga ena hakaua dalana hegeregerena ita noho,” ma haida do idia itaia ita be maino karaia taudia. Bona ta ta do “ita habadua lasi.” (Gal. 5:22-26; NW ) Momokani, namona be ita hekwarahi ‘maino karaia taudia’ ai ita lao totona.—Roma 12:18.
“Dagedage Idia Davaria Taudia be Idia Moale”!
22-24. (a) Dahaka dainai kara maoromaoro dainai dagedage idia davaria taudia idia moale? (b) Dahaka gau ma haida be stadi gabedia rua ai do ita kikilaia?
22 “Kara maoromaoro dainai dagedage idia davaria taudia be idia moale, badina guba basileia be idia edia.” (Mat. 5:10, NW ) Iesu ma ia gwau: “Lau dainai taunimanima ese umui idia gwauraia dika, idia dagedage henia bona mai koikoi ida hereva dikadia idauidau idia gwauraia neganai, do umui moale. Do umui moale bada badina emui davana guba dekenai be ia bada. Guna idia noho peroveta taudia be unai bamona idia dagedage henidia danu.”—Mat. 5:11, 12, NW.
23 Dirava ena peroveta taudia gunadia bamona, hari inai negai idia noho Keristani taudia danu be edia “kara maoromaoro dainai” ma haida ese idia kirikirilaia, dagedage henia, bona samania koikoi. To mai abidadama ida unai hahetoho ita haheaukalaia bona ita moale, badina Iehova ena ladana ita abia isi bona Ia ita hamoalea. (1 Pet. 2:19-21) Hari eiava gabeai Iehova ena hesiai gaukara amo ita abia moalena be hisihisi ta ese do ia hadikaia lasi. Danu, ita moale badina Keriso ida guba Basileiana ai do ita lohia o tanobada dekenai mauri hanaihanai do ita abia—unai moale be hisihisi ta ese do ia kokia lasi. Unai ese idia hamomokania Iehova be ita ia lalonamo henia bona Ia be hariharibada Diravana.
24 Ororo Harorona amo gau ma haida do ita dibaia. Stadi gabedia rua be unai gau haida idia kikilaia. Namona be Iesu Keriso ena hereva ita badinaia daladia ma haida do ita itaia.
[Footnote]
a Mataio 5:3-11 ai idia gaukaralaia Greek herevana ma·kaʹri·oi be Hiri Motu gado Buka Helaga ai idia hahanaia “namo,” to New World Translation ai idia hahanaia hereva maorona be “moale.” Unai dainai inai stadi bona stadi gabedia dekenai, ai be New World Translation Baibel ena siri ai toredia hanai.
Edena Bamona Do Oi Haere?
• Dahaka dainai “Dirava dibaia totona idia hitolo taudia be idia moale”?
• Dahaka dainai “manau taudia” be idia moale?
• Dahaka dainai Keristani taudia be dagedage lalonai idia moale?
• Iesu ese ia gwauraia moale 9 amo, edena oi ura henia bada?
[Picture on page 7]
Iesu ese ia gwauraia moale 9 be mai anina bada hari inai negai, guna bamona
[Picture on page 8]
Hebogahisi dalana ta be, ma haida dekenai hereva momokani ita hadibaia