Iehova Ena Moale Hesiai Taudia
“Idia diba lauma gaudia idia tahua be namo taudia idia moale.”—MATAIO 5:3, NW.
1. Moale korikorina ena anina be dahaka, bona unai ese dahaka ia hahedinaraia?
IEHOVA ena taunimanima be moale karana idia laloa bada. Salamo torea tauna Davida ia gwau: “Edia Dirava be Lohiabada [“Iehova,” NW ], ena bese taudia be idia moale noho.” (Salamo 144:15) Moale ena anina be, ta ena lalona ia namo. Moale korikorina—iseda lalona momokani amo ia vara gauna—be Iehova ese ita ia hanamoa karana ita dibaia dainai ia vara. (Aonega Herevadia 10:22) Unai bamona moale ese ia hahedinaraia ita be iseda guba Tamana ida ita hetura namonamo bona ita diba ita be ena ura ita karaia noho. (Salamo 112:1; 119:1, 2) Iesu be ita moale ena badina ibounai nain ia gwauraia. Inai bona stadi gabena lalonai, taunimanima ese idia gwauraia moale idauidau ita tahua namonamo karana ese ita do ia durua bena ita lalo-parara, bema mai kamonai ida “moale Diravana” Iehova ita hesiai henia, moale bada do ita davaria.—1 Timoteo 1:11, NW.
Ita Diba Lauma Gaudia Ita Abia be Namo
2. Iesu ese edena negai moale ia herevalaia, bona iena hamatamaia herevana be dahaka?
2 Lagani 31 C.E. ai, Iesu be haroro hereva hereadaena ta ia henia. Unai hereva idia gwauraia Ororo Harorona, badina Iesu ese Galilea Gohuna kahirakahira ia noho ororona ai unai hereva ia henia. Mataio ena Evanelia bukana ia gwau: “Iesu ese taunimanima momo ia itaia neganai, ororo ta dekenai ia daekau, unuseni ia helai diho. Iena diba tahua taudia ese ia dekenai idia haboua mai. Vadaeni ia hadibaia hamatamaia: ‘Idia diba lauma gaudia idia tahua be namo taudia idia moale, badina be guba basileiana be idia edia.’ ” Bema Iesu ena hamatamaia herevana ena anina korikori ita hahanaia, ia be inai: “Lauma dekenai idia ogogami taudia idia moale,” eiava “Lauma totona idia noinoi taudia be idia moale.” (Mataio 5:1-3; Kingdom Interlinear; futnout) Today’s English Version ia gwau: “Idia diba lauma dalanai idia ogogami taudia be idia moale.”
3. Edena bamona manau karana ese ita ia durua ita moale totona?
3 Iesu ena Ororo Harorona lalonai, ia gwau bema tau ta ia diba lauma gaudia ia abia be namo, unai tauna be ia moale. Manau Keristani taudia idia diba momokani idia be mai edia kara dika dainai, Keriso ena mauri davalaia boubouna amo Iehova idia noia edia kara dika ia gwauatao totona. (1 Ioane 1:9) Unai amo idia ese lalo-maino bona moale korikorina idia davaria. “Bema Dirava ese tau ta ena kara dika ia gwauatao neganai, unai tau be ia namo [“moale,” NW ].”—Salamo 32:1; 119:165.
4. (a) Edena dala ai do ita hahedinaraia, ita diba ita bona ma haida ese lauma gaudia ita abia be namo? (b) Ita diba lauma gaudia ita tahua be namo neganai, dahaka ese iseda moale ia habadaia?
4 Ita diba lauma gaudia ita abia be namo karana ese ita ia veria dina ta ta ai Baibel ita duahia, “hesiai tauna mai ena kamonai, bona mai ena kara maoromaoro” ese nega korikori ai idia henia lauma aniani ita abia bona hanaihanai Keristani heboudia dekenai ita lao. (Mataio 24:45; Salamo 1:1, 2; 119:111; Heberu 10:25) Dekena tauna lalokau henia karana dainai ita diba ma haida ese lauma gaudia idia abia be namo, bona unai ese ita ia hagoadaia Basileia ena sivarai namona ita harorolaia bona hadibaia goadagoada totona. (Mareko 13:10; Roma 1:14-16) Baibel ena hereva momokani be ma haida ida ita herevalaia karana ese moale ia havaraia. (Kara 20:20, 35) Basileia ena helaro hereadaena bona ia ese do ia mailaia hahenamo idauidau ita laloa dobu neganai, unai ese iseda moale ia habadaia. Horoa Keristani “orea maragi” taudia edia Basileia helarona anina be, guba dekenai mase diba lasi maurina do idia abia bona idia be Keriso ena Basileia gavamanina ena kahana taudia. (Luka 12:32; 1 Korinto 15:50, 54) “Mamoe idaudia” edia helaro be unai Basileia gavamanina henunai do ia noho tanobada paradaisona lalonai mauri hanaihanai do idia abia.—Ioane 10:16; Salamo 37:11; Mataio 25:34, 46.
Taitai Taudia Idia Moale Diba Dalana
5. (a) Inai hereva “tai noho taudia” ena anina be dahaka? (b) Unai taitai taudia be edena dala ai lalo-goada idia abia?
5 Iesu ese moale gauna ma ta ia herevalaia neganai, toana be ia gwauraia herevadia idia hamomokania heheni lasi. Ia gwau: “Tai noho taudia be idia namo [“moale,” NW ], badina Dirava ese do ia hanamodia.” (Mataio 5:4) Edena dala ai tau ta be ia tai bona unai nega tamona ai ia moale diba? Iesu ena hereva ena anina ita lalo-pararalaia totona, namona be ita tahua ia be edena bamona taitai karana ia herevalaia. Hahediba tauna Iamesi ese ia hahedinaraia, iseda kara dika dainai ita taitai be namo. Ia gwau: “Kara dika taudia e, emui imana do umui huria. Keristani koikoi taudia e, laloa rua dekena amo umui emui kudouna do umui hagoevaia. Do umui lalohisihisi, bona umui taitai bada be namo. Emui kiri do umui hadokoa, do umui tai sibona. Emui moale do umui koua, do umui laloa metau sibona. Lohiabada ena vairanai do umui manau, vadaeni ia ese umui do ia abia isi.” (Iamesi 4:8-10) Edia kara dika dainai idia lalohisihisi taudia be Keriso ena mauri davalaia boubouna idia abidadama henia, bona Iehova ena ura idia karaia karana amo idia helalo-kerehai momokani neganai, Dirava ese edia dika do ia gwauatao. Idia be unai idia dibaia neganai, unai ese edia lalona ia hagoadaia momokani. (Ioane 3:16; 2 Korinto 7:9, 10) Unai amo Iehova ida hetura karana namona idia moalelaia diba bona ia do idia hesiai henia bona hanamoa ela bona hanaihanai. Unai ese edia lalona dekenai moale bada ia havaraia.—Roma 4:7, 8.
6. Edena dala ai haida be idia taitai, bona dahaka ese idia ia hagoadaia?
6 Iesu ena hereva ese inai tanobada ai idia vara gau dikadia dainai idia lalohisihisi taudia ia herevalaia danu. Iesu ia gwau Isaia 61:1, 2 ena peroveta herevana be ia dekenai do ia momokani, unai siri ia gwau: “Lohiabada Dirava ena Lauma be lauegu latanai ia noho. Badina be Lohiabada ese, lau ia abia hidi vadaeni, bona lau ia siaia vadaeni, ogogami taudia dekenai Sivarai Namona do lau haroro henia totona. Lohiabada ese lau ia siaia vadaeni, kudouna idia makohia taudia do lau hanamoa lou, bona . . . taitai taudia ibounai do lau durua, bona hagoadaia totona.” Unai hahegani be mai anina tanobada dekenai idia do noho horoa Keristani taudia dekenai danu, idia bona edia bamodia, “mamoe idaudia” be unai hahegani idia badinaia. Idia ese maka be kara dika rohoroho ibounai hanua—hereva momokani ia negea Ierusalema, Kerisendom ia laulaulaia hanuana—lalonai idia karaia noho karadia dainai idia taitai noho bona idia lalohisihisi noho taudia edia bagudia dekenai idia atoa. (Esekiela 9:4) Unai taitai taudia be “Basileia ena Sivarai Namona” ese ia hagoadadia. (Mataio 24:14) Kahirakahira Iehova ena kara maoromaoro tanobadana ese Satani ena tanobada dikana ena gabu do ia abia karana idia dibaia neganai, idia moale.
Lalo-Manada Taudia Idia Moale
7. Inai hereva “lalo-manada” ena anina be dahaka lasi?
7 Iesu ena Ororo Harorona lalonai, ma ia gwau: “Dagedage lasi [“lalo-manada,” NW ] taudia be idia namo [“moale,” NW ], badina tanobada do idia abia.” (Mataio 5:5) Nega haida taunimanima idia laloa, lalo-manada karana be manoka ena toana ta. To unai be momokani lasi. Baibel ia diba bada tauna ta ese inai hereva “lalo-manada” ena anina ia herevalaia neganai, ia gwau: “Ia [lalo-manada] tauna ena kara hereadaena be inai: ia sibona ena kara ia biagua namonamo. Unai be kara manokana ta lasi to ia goada.” Iesu be ia sibona dekenai inai hereva ia gwauraia: “Lau be dagedage lasi [“lalo-manada,” NW ] bona manau tauna.” (Mataio 11:29) To, Iesu be mai gari lasi ida kara maoromaoro hakaua herevadia totona ia hereva goada.—Mataio 21:12, 13; 23:13-33.
8. Lalo-manada karana be edena kara ida idia hakapua, bona dahaka dainai ma haida ida ita hetura lalonai unai kara ita hahedinaraia be namo?
8 Vadaeni, lalo-manada karana be tauanina ena ura koua karana ida idia hakapua. Aposetolo Paulo ese “lauma helaga ena huahua” ia herevalaia neganai, lalo-manada bona tauanina ena ura koua karana ia gwauraia hebou. (Galatia 5:22, 23, NW ) Lauma helaga ena heduru amo lalo-manada karana ita hahedinaraia be namo. Ia be Keristani karana ta dainai, murimuri taudia bona kongrigeisen lalonai idia noho taudia ida maino ai ita noho diba. Paulo ia gwau: “Unai dainai inai bamona karadia, dabua bamona do umui atoa: Bogahisihisi, durua, manau, manada bona haheauka. Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao.”—Kolose 3:12, 13.
9. (a) Dahaka dainai lalo-manada karana be taunimanima sibona dekenai ita hahedinaraia karana lasi? (b) Edena dala ai lalo-manada taudia be “tanobada do idia abia”?
9 To, lalo-manada karana be taunimanima sibona dekenai ita hahedinaraia karana ta lasi. Mai iseda ura ida Iehova ena lohia siahuna henunai ita noho karana amo ita hahedinaraia diba ita be lalo-manada taudia. Unai kara dekenai Iesu Keriso be haheitalai hereadaena; tanobada ai ia noho neganai, lalo-manada ia hahedinaraia bona ena Tamana ena ura ia badinaia momokani. (Ioane 5:19, 30) Iesu be tanobada ia abia tauna ginigunana, badina ia be Dirava ese ia abia hidi Lohia Tauna. (Salamo 2:6-8; Daniela 7:13, 14) Ia ese unai ahuna be ia ida ‘hanamoa gaudia do idia abia’ 144,000 taudia ida do ia haria, idia be “taunimanima ibounai edia huanai” Dirava ese ia abidia hidi “tanobada do idia gunalaia” totona. (Roma 8:17; Apokalupo 5:9, 10; 14:1, 3, 4; Daniela 7:27) Keriso bona ia ida idia lohia taudia ese mamoe bamona tatau bona hahine milioni momo herea do idia lohiaia neganai, inai Salamo ena peroveta herevana be idia dekenai do ia guguru: “Manau taudia ese noho gabuna tano do idia abia, do idia helai namonamo, mai moale bona mai maino danu.”—Salamo 37:11; Mataio 25:33, 34, 46.
Kara Maoromaoro Hitolona Idia Hitolo Taudia be Idia Moale
10. Edena dala ma ta ai kara maoromaoro totona idia hitolo bona ranu mase taudia be idia boga kunu diba?
10 Iesu ese Galilea ororo dorina ai ia herevalaia moale gauna ma ta be inai: “Kara maoromaoro hitolona idia hitolo bona ranu masena idia ranu mase taudia be idia moale, badina be edia bogana do idia kunu.” (Mataio 5:6, NW ) Iehova ese Keristani taudia totona kara maoromaoro taravatudia ia atoa. Unai dainai, kara maoromaoro totona idia hitolo bona ranu mase taudia be Dirava ena hakaua dalana totona idia hitolo bona idia ranu mase. Unai bamona taudia idia diba idia be kara dika bona goevadae lasi taudia, bona idia ura Iehova ena lalo-namo idia abia. Dirava ena Hereva amo idia dibaia gauna be inai: bema idia helalo-kerehai bona Keriso ena mauri davalaia boubouna amo gwauatao karana idia tahua, Dirava ese idia do ia lalo-namo henia diba!—Kara 2:38; 10:43; 13:38, 39; Roma 5:19.
11, 12. (a) Horoa Keristani taudia be edena dala ai kara maoromaoro taudia ai idia lao? (b) Horoa taudia edia bamodia be edena dala ai kara maoromaoro totona do idia ranu mase lou lasi?
11 Iesu ia gwau unai bamona taudia do idia moale, badina do idia “boga kunu.” (Mataio 5:6) Keriso ida guba ai do idia lohia hebou horoa Keristani taudia be ‘mauri do idia abia,’ badina Dirava ese ia gwauraidia kara maoromaoro taudia. (Roma 5:1, 9, 16-18) Iehova ese idia be ena lauma natudia ai ia halaodia. Keriso ida ena guba Basileia gavamanina lalonai, king bona hahelaga gaukarana do idia karaia.—Ioane 3:3; 1 Petero 2:9.
12 Horoa taudia edia bamodia be Dirava ese mauri do idia abia kara maoromaoro taudia ia do gwauraidia lasi. To, Keriso ia bubua rarana idia abidadama henia dainai, Iehova ena vairanai idia ese kara maoromaoro sisina idia hahedinaraia. (Iamesi 2:22-25; Apokalupo 7:9, 10) Idia be Iehova ena kara maoromaoro turadia dainai, ‘hisihisi badana’ amo do idia roho mauri. (Apokalupo 7:14) “Guba matamata” henunai, idia be “kara maoromaoro” tanobada matamatana ai idia noho neganai, kara maoromaoro totona do idia ranu mase lou lasi.—2 Petero 3:13; Salamo 37:29.
Hebogahisi Taudia Idia Moale
13, 14. Edena dala idauidau ai ita hahedinaraia diba ita be hebogahisi taudia, bona unai ese ita dekenai dahaka namo do ia mailaia?
13 Iesu be ena Ororo Harorona lalonai, ma ia gwau: “Bogahisihisi henia taudia be idia namo [“moale,” NW ], Dirava ena bogahisihisi do idia davaria.” (Mataio 5:7) Kota dekenai, diadi tauna be taravatu hegeregerena kara dika tauna ia panisia lasi neganai, anina be ia hebogahisi henia. To, Baibel lalonai, gado ginigunadia herevadia idia hahanaia “hebogahisi” ena anina be, hekwakwanai idia davaria taudia ita durua. Unai dainai, idia hebogahisi taudia be edia kara amo hebogahisi idia hahedinaraia. Iesu ese ia gwauraia Samaria tauna ena parabole lalonai, tau ta be dika ia davaria tauna ia ‘hebogahisi’ henia ena haheitalai namona ia noho.—Luka 10:29-37.
14 Hebogahisi karana amo ia vara moalena ita mamia totona, namona be heduru idia ura taudia dekenai hebogahisi karadia ita hahedinaraia. (Galatia 6:10) Iesu be ia itaia taudia ia hebogahisi henidia. “Taunimanima momo ia itaia neganai ia bogahisihisi idia dekenai, badina idia be mamoe hegeregere, bona naria tauna lasi. Vadaeni, ia ese mauri sivarai momo ia hadibaia.” (Mareko 6:34) Iesu ia lalo-parara taunimanima idia abia be namo gauna badana be, lauma gaudia. Ita danu be taunimanima ese idia abia be namo gauna—“Basileia ena Sivarai Namona” unai—ita harorolaia neganai, ita hahedinaraia ita be hebogahisi taudia. (Mataio 24:14) Danu, iseda buruka Keristani tadikaka, vabu bona tama sina lasi natudia ita durudia diba bona “lalo-metau taudia [ita] gado namo henidia.” (1 Tesalonika 5:14, NW; Aonega Herevadia 12:25; Iamesi 1:27) Unai ese ita dekenai moale do ia havaraia sibona lasi, to Iehova be ita do ia hebogahisi henia danu.—Kara 20:35; Iamesi 2:13.
Lalona Goevagoeva Bona Maino Idia Karaia Taudia
15. Edena dala ai lalona goevagoeva bona maino idia karaia taudia ai ita lao diba?
15 Iesu ese moale ia havaraia gauna namba 6 bona 7 ia gwauraia: “Edia lalona goevagoeva taudia be idia namo [“moale,” NW ], badina idia ese Dirava do idia itaia. Taunimanima huanai maino idia karaia taudia be idia namo [“moale,” NW ], badina be Dirava ese do ia gwauraia idia be iena natuna.” (Mataio 5:8, 9) Lalona goevagoeva tauna be kara goeva ia badinaia sibona lasi, to lauma dalanai ia goeva bona Iehova ia badinaia momokani. (1 Sivarai 28:9; Salamo 86:11) Greek gado herevana idia hahanaia “maino” ena anina be “maino karaia taudia.” Maino taudia be edia Keristani tadikaka ida bona edia dekena taudia ida maino ai idia noho. (Roma 12:17-21) Idia ese ‘maino idia tahua bona maino ena dala idia badinaia noho.’—1 Petero 3:11.
16, 17. (a) Dahaka dainai horoa taudia idia gwauraia ‘Dirava ena natudia’ bona edena dala ai ‘Dirava idia itaia’? (b) Mamoe idaudia be edena dala ai ‘Dirava idia itaia’? (c) Edena bamona bona edena negai, “mamoe idaudia” be ‘Dirava ena natudia’ ai do idia lao momokani?
16 Lalona goevagoeva bona maino ai idia noho taudia dekenai, gwauhamata be inai: “Dirava ese do ia gwauraia idia be iena natuna” bona “Dirava do idia itaia.” Horoa Keristani taudia be Dirava ena lauma ese ia havaraia bona tanobada ai idia do noho neganai, Dirava ese ena ‘natudia’ bamona ia abidia dae. (Roma 8:14-17) Idia toreisi lou bona Keriso ida guba ai idia noho neganai, idia be Iehova ena vairanai hesiai gaukara idia karaia bona Ia do idia itaia momokani.—1 Ioane 3:1, 2; Apokalupo 4:9-11.
17 Maino ai idia noho “mamoe idaudia” be Mamoe Naria Tauna Namona, Keriso Iesu, “Hanaihanai Noho Tamana” ai ia lao tauna henunai Iehova idia hesiai henia. (Ioane 10:14, 16; Isaia 9:6) Keriso ena Lagani 1,000 lohia negana ena dokonai, hahetoho ginigabena idia hanaia taudia be Iehova ese ena tanobada natudia ai do ia halaodia bona “Dirava ena natuna edia hairaina bamona do idia abia.” (Roma 8:21; Apokalupo 20:7, 9) Unai idia naria noho lalonai, idia ese Iehova idia gwauraia edia Tamana, badina Ia dekenai edia mauri idia gwauhamatalaia, bona idia abia dae ia be edia Mauri Henia Tauna. (Isaia 64:8) Iobu bona Mose hegeregerena, edia abidadama ena matana amo ‘Dirava idia itaia’ diba. (Iobu 42:5; Heberu 11:27) Edia “lalona ena matana” bona Dirava ena diba maoromaoro amo Iehova ena kara hereadaedia idia itaia bona idia hekwarahi ena ura idia karaia totona, unai amo ia idia tohotohoa diba.—Efeso 1:18, Buka Helağa; Roma 1:19, 20; 3 Ioane 11.
18. Iesu ese ia gwauraia moale gaudia seven hegeregerena, hari inai negai daidia ese moale korikorina idia davaria?
18 Inai stadi lalonai ita itaia vadaeni, idia diba lauma gaudia idia abia be namo taudia, idia taitai taudia, lalo-manada taudia, kara maoromaoro totona idia hitolo bona ranu mase taudia, hebogahisi taudia, lalona goevagoeva bona maino taudia be Iehova idia hesiai henia karana amo moale korikorina idia davaria. To, unai bamona taudia ese hanaihanai dagedage bona hisihisi idia davaria. Unai ese edia moale ia kokia, a? Unai henanadai be stadi hereva gabena ai do ita herevalaia.
Riviu
• Idia diba lauma gaudia idia tahua be namo taudia ese dahaka moale idia davaria?
• Idia taitai taudia be edena dala ai lalo-goada idia abia?
• Edena dala ai lalo-manada ita hahedinaraia diba?
• Dahaka dainai ita hebogahisi, iseda lalona ia goeva bona maino be namo?
[Picture on page 22]
“Idia diba lauma gaudia idia tahua be namo taudia idia moale”
[Pictures on page 22]
“Bogahisihisi henia taudia be idia moale”
[Picture on page 22]
“Kara maoromaoro hitolona idia hitolo bona ranu masena idia ranu mase taudia be idia moale”