“Umui be Edena Bamona Do Umui Noho?”
“Vadaeni, umui laloa: Bema inai gau ibounai unai bamona do idia boio ore, umui be edena bamona do umui noho? Umui emui kara ibounai do idia helaga be namo, bona Dirava do umui badinaia namonamo.”—2 PET. 3:11.
1. Dahaka dainai Petero ese Keristani taudia dekenai revareva ia siaia?
APOSETOLO Petero ena revareva iharuana ia do torea lasi neganai, Keristani kongrigeisen taudia be dagedage bada idia haheaukalaia, bona ia goada bona tubu haraga noho. Unai dainai Diabolo be hahetoho ma ta ia gaukaralaia, bona nega momo unai hahetoho dekenai ia kwalimu. Petero ese ia hahedinaraia, Satani be peroveta koikoi taudia amo Dirava ena taunimanima ia hakaua kerere toho—unai peroveta koikoi taudia “idia ura bada idia heudahanai” bona edia “kudouna be mataganigani karana dekenai ia manada.” (2 Pet. 2:1-3, 14, NW; Iuda 4) Unai dainai, Petero ese revareva iharuana amo Dirava badinaia karana ia herevalaia.
2. Petero Iharuana karoa 3 be dahaka ia sisibalaia, bona dahaka henanadai ita henia diba?
2 Petero ia gwau: “Lau laloa inai bamona: Lau be do lau mauri noho neganai, inai gaudia umui dekenai do lau sisiba henia, umui hagoadaia totona. Inai be maoro. Badina be lau diba, inai tauanina do lau rakatania ena nega be kahirakahira vadaeni. . . . Unai dainai, mai goada danu umui do lau sisiba henia. Vadaeni lauegu mase murinai inai gaudia do umui laloa lou.” (2 Pet. 1:13-15) Oibe, Petero ia diba ia be kahirakahira do ia mase, to ia ura lasi ena sisiba do idia boio. Unai sisiba be hari Baibel ena kahana ta bona ita duahia diba. Petero Iharuana Karoa 3 ena hereva ita laloa bada be namo, badina ia be “nega dokona” sibona lasi to guba bona tanobada hadikaia karana ia kikilaia danu. (2 Pet. 3:3, 7, 10) Petero ena sisiba ita dekenai be dahaka? Ena sisiba ita badinaia neganai, edena dala ai unai ese ita do ia durua Iehova ena lalonamo ita abia totona?
3, 4. (a) Petero be dahaka ia gwau, bona dahaka sisiba ia henia? (b) Dahaka point toi do ita herevalaia?
3 Petero be Satani ena tanobada hadikaia karana ia herevalaia murinai, ia gwau: “Bema inai gau ibounai unai bamona do idia boio ore, umui be edena bamona do umui noho? Umui emui kara ibounai do idia helaga be namo, bona Dirava do umui badinaia namonamo?” (2 Pet. 3:11, 12) Petero be unai henanadai amo ia hahedinaraia ia daradara, a? Lasi, ia ura ita sibona eda kara ita tahua namonamo. Petero ia diba Iehova ena ura bona kara namodia idia karaia taudia sibona be Dirava ena “badu dinana” lalonai do idia roho mauri. (Isa. 61:2) Ma ia gwau: “Lauegu lalokau taudia e, inai gaudia umui diba vadaeni. Unai dainai do umui naria namonamo, koikoi taudia ese umui do idia hakaua kerere garina. Oibe, umui emui gini goada gabuna dekena amo do umui moru garina, do umui naria namonamo.”—2 Pet. 3:17.
4 Petero be “diba” idia abia vadaeni taudia huanai ia noho dainai, ia diba nega dokonai Keristani taudia idia naria namonamo be gau badana, unai amo Dirava do idia badinaia noho. Gabeai, Ioane ese ena matahanai amo unai ena badina ia herevalaia neganai, ia gwau; Satani be guba amo idia negea diho, bona “ia badu” badina abidadama taudia be “Dirava ena taravatu idia badinaia momokani. Bona Iesu ena hereva momokani idia gwauraia hedinarai.” (Apok. 12:9, 12, 17) Dirava idia badinaia horoa taudia bona mamoe idaudia be do idia kwalimu. (Ioa. 10:16) To ita ta ta be edena bamona? Iehova do ita badinaia noho, a? Iehova ese ita do ia durua bema ita hekwarahi (1) Dirava ia ura henia karadia ita karaia, (2) ‘Ita miro lasi, ita kerere lasi’ noho, bona (3) hahetoho idauidau lalonai lalohadai maorona ita abia. Mani inai point toi ita herevalaia.
Dirava ese Ia Ura Henia Karadia Ita Karaia
5, 6. Namona be ita hekwarahi dahaka kara namodia ita hahedinaraia totona, bona dahaka dainai unai bamona ita karaia be mai ena “hekwarahi”?
5 Matamanai, Petero ia gwau: “Namona be umui hekwarahi, umui abidadama sibona lasi, to kara namodia do umui karaia danu, bona kara namodia sibona lasi, to diba danu do umui abia, bona diba sibona lasi, to sibona biagua karana danu, bona sibona biagua karana sibona lasi, to haheauka danu, bona haheauka sibona lasi, to Dirava badinaia karana danu, bona Dirava badinaia karana sibona lasi, to tadikaka lalokau henia karana danu, bona tadikaka lalokau henia karana sibona lasi, to taunimanima ibounai lalokau henia karana danu. Bema unai gaudia be umui lalonai idia noho bona idia honudae, vadaeni Lohiabada Iesu Keriso amo umui abia diba maoromaorona dainai do umui noho kava lasi, to huahua do umui havaraia.”—2 Pet. 1:5-8, NW.
6 Momokani, Dirava ia ura henia karadia ita karaia be mai ena “hekwarahi.” Hegeregere, kongrigeisen ena hebou iboudiai ita lao henia, dina ta ta ai Baibel ita duahia, bona sibona eda stadi sediual namona ita badinaia be mai ena hekwarahi. Danu, hanaihanai Ruma Bese Ena Tomadiho negana ita moalelaia totona palani namona ita karaia be mai ena hekwarahi. To, sediual namona ita karaia neganai, unai kara namodia do ita karaia be auka lasi—anina namona do ita davaria danu.
7, 8. (a) Haida ese Ruma Bese Ena Tomadiho negana be edena bamona idia herevalaia? (b) Emu ruma bese ena tomadiho amo dahaka namo oi davaria?
7 Taihu ta ese ruma bese ena tomadiho be inai bamona ia herevalaia: “Unai ese lau ia durua gau momo lau dibaia totona.” Taihu ma ta ia gwau: “Buka stadi idia koua neganai, lau moale lasi. Unai hebou lau ura henia bada. To hari, Ruma Bese Ena Tomadiho ai karaia, bona lau laloparara Iehova ia diba dahaka gau dekenai ai dabu bona edena negai unai ai abia be namo.” Ruma bese kwarana ta ia gwau: “Ruma bese ena tomadiho ese ai ia durua bada. Unai hebou ai headava taudia ia durua diba gaudia ai kikilaia diba—unai be namo herea! Ai laloa unai ese ai ia durua lauma helaga ena huahua ai hahedinaraia namonamo, bona haroro gaukara ai moalelaia bada, guna be unai bamona lasi.” Ruma bese kwarana ma ta ia gwau: “Natudia be iseda buka dekenai sibona edia tahua gaukara idia karaia bona gau momo idia dibaia— unai idia moalelaia. Ruma bese ena tomadiho karana dainai, ai diba Iehova be emai lalohekwarahi gaudia ia diba bona emai guriguri ia haerelaia.” Unai bamona hereva oi duahia neganai, unai ese oi danu idia durua Iehova ena stadi program hereadaena oi laloa bada totona, a?
8 Anina lasi gaudia ese ruma bese ena tomadiho negana ia hadikaia lasi be namo. Tadikaka ta bona ena adavana idia gwau, “Wiki foa lalonai, Thursday hanuaboi iboudiai emai ruma bese lalonai gau ta ia vara, bona kahirakahira unai ese stadi karana ia hadikaia, to ai ura lasi unai ese emai stadi ia hadikaia.” Oibe, nega haida reana sediual oi haidaua sibona be hegeregere. To, emu lalona oi hadaia emu Ruma Bese Ena Tomadiho—wiki ibounai—oi karaia noho totona!
9. Edena dala ai Iehova ese Ieremia ia durua, bona iena haheitalai amo dahaka ita dibaia?
9 Peroveta tauna Ieremia ena haheitalai be ita do ia durua. Ia be Iehova amo ia abia gauna ia moalelaia. Unai ese ia idia durua mai haheauka ida kamonai lasi taudia ia haroro henia totona. Ia gwau: “[Iehova ena] hereva be lahi bamona, lauegu lalona ia gabua noho, ela bona lauegu turiana dekenai.” (Ier. 20:8, 9) Danu, unai ese ia idia durua Ierusalema hadikaia negana ia kahirakahira lalonai idia vara metau momo ia haheaukalaia totona. Hari inai negai, ita dekenai Baibel ibounai ia noho vadaeni. Ita stadilaia namonamo bona Dirava ena lalohadai ita abia neganai, ita be Ieremia bamona, mai haheauka ida haroro gaukara do ita moalelaia, hahetoho lalonai Iehova do ita badinaia, bona eda kara bona tomadiho dalana do idia goeva noho.—Iam. 5:10.
‘Ita Miro Lasi, Ita Kerere Lasi’ Noho
10, 11. Dahaka dainai ita hekwarahi ‘ita miro lasi, ita kerere lasi’ noho totona, bona dahaka ita karaia be gau badana?
10 Ita, Keristani taudia ita diba ita be nega dokonai ita noho. Unai dainai, ita itaia tanobada ai mataganigani, matabodaga, bona dagedage, Iehova ese ia inai henia karadia unai, idia bada idia lao. Hari inai negai, reana Satani ia gwau: ‘Bema Dirava ena hesiai taudia hagaria dalana be auka, reana idia lau hakaudia kerere diba.’ (Apok. 2:13, 14) To, Petero ena sisiba namona ita laloa bada be namo, ia gwau: “Do umui gaukara goada bona Dirava vairanai do umui miro lasi, umui kerere lasi, bona mai maino ida umui noho.”—2 Pet. 3:14.
11 Inai hereva, “do umui gaukara goada,” be 2 Petero 1:5 ena hereva bamona, ia gwau: “Umui hekwarahi.” Oibe, Iehova—Petero amo unai sisiba ia halasia Diravana—ia diba namona be ita hekwarahi ‘ita miro lasi, ita kerere lasi’ bona Satani ena tanobada ena bodaga gaudia ita dadaraia totona. Danu, eda kudouna ita gimaia, ura dikadia ese idia biagua garina. (Aonega Herevadia 4:23; Iamesi 1:14, 15 duahia.) Ma danu, ita gini goada bona iseda Keristani mauri dalana idia gwauraia dika bona “[ita] idia hereva dika henia noho” taudia ita dadaraia totona.—1 Pet. 4:4.
12. Luka11:13 ena hagoadaia herevana be dahaka?
12 Ita be goevadae lasi dainai, kara maorona ita karaia be mai ena hekwarahi. (Roma 7:21-25) Ita kwalimu diba dalana tamona be inai: Iehova ita guriguri henia be namo—Ia ese lauma helaga be idia noinoi taudia dekenai do ia henia. (Luka 11:13) Lauma helaga ese ita do ia durua Dirava ena kara namodia ita karaia sibona lasi, to Iehova ena dina ia kahirakahira lalonai idia vara hahetoho idauidau ita haheaukalaia totona.
Hahetoho Idauidau ese Oi Idia Hagoadaia
13. Hahetoho ita davaria neganai, dahaka ese ita do ia durua ita haheauka totona?
13 Inai tanobada dikana lalonai, hanaihanai hahetoho idauidau do ita davaria. To ita lalometau lasi, badina hahetoho idauidau ita davaria neganai, unai be nega namona Dirava lalokau henia karana ita hahedinaraia bona Ia bona ena Hereva abidadama henia karana ita habadaia totona. Iamesi ia gwau: “Lauegu tadikaka e, hahetoho idauidau umui davaria neganai, umui moale. Badina umui diba, emui abidadama, idia tohoa vadaeni gauna ese haheauka ia havaraia. To namona be haheauka ese ena gaukara ia hagugurua, unai amo do umui hegeregere momokani, bona gau ibounai do umui karaia namonamo, gau ta dekenai do umui dabu lasi.” (Iam. 1:2-4, NW ) Ita laloatao danu, “Iehova ese ia idia badinaia taudia be hahetoho amo ia hamauridia dalana ia diba.”—2 Pet. 2:9, NW.
14. Edena dala ai Iosepa ena haheitalai ese oi ia hagoadaia?
14 Iakobo ena natuna, Iosepa, ena sivarai ita laloa: Ia be ena kakana ese hesiai tauna ta bamona, haida dekenai idia hoihoilaia. (Gen. 37:23-28; 42:21) Unai dagedage karana dainai, Iosepa ia manoka, a? Dirava dekenai ia badu henia badina unai hisihisi ia koua lasi, a? Baibel ia gwau, lasi! Danu, Iosepa be hahetoho ma haida ia davaria. Dina ta ai, Farao ena adavana ese Iosepa ia samania koikoi, ia gwau ia ia reipia dainai dibura ruma ai idia atoa. To unai hahetoho lalonai, Iosepa be Dirava ia badinaia. (Gen. 39:9-21) Oibe, unai ese ia idia hagoadaia, bona gabeai ahuna namona ia abia.
15. Naomi ena sivarai amo dahaka ita dibaia?
15 Hahetoho be lalometau idia havaraia diba. Reana Iosepa bona Dirava ena hesiai taudia haida be unai bamona idia mamia danu. Naomi ita laloa—adavana bona natuna ruaosi idia mase. Ia gwau: “Lauegu ladana umui atoa lasi, Naomi, to Mara do umui atoa, badina be Siahu Bada Diravana ena kara lau dekenai be auka.” (Ruta 1:20, 21.) Naomi ena hemami ita lalopararalaia. Iosepa bamona, Naomi ia manoka lasi bona Iehova ia badinaia noho. Unai dainai, Iehova be unai hahine namona dekenai ahuna namona ia henia. (Ruta 4:13-17, 22) Oibe, tanobada Paradaisona lalonai, Iehova ese Satani bona ena tanobada dikana ese idia havaraia gau dikadia ibounai do ia haorea. Baibel ia gwau: “Kara gunadia be do idia laloa lou lasi, do idia laloaboio momokani.”—Isa. 65:17.
16. Iseda guriguri karana dekenai dahaka lalohadai ita abia be namo, bona dahaka dainai?
16 Herevana hahetoho idia vara, to Dirava ena lalokau ese ita do ia hagoadaia. (Roma 8:35-39 duahia.) Ena be Satani ese lalometau do ia havaraia noho ita dekenai, to do ia kwalimu lasi bema ita “laloa maoromaoro” noho bona “ita guriguri noho, nega ibounai.” (1 Pet. 4:7) Iesu ia gwau: “Do umui naria, bona nega ibounai do umui guriguri, vadaeni inai dika ibounai dekena amo do umui heau mauri, vadaeni Taunimanima ena Natuna ena vairana dekenai do umui gini.” (Luka 21:36) Iesu ena hereva, “nega ibounai do umui guriguri,” ese ia hahedinaraia, hari inai negai Iesu bona ena Tamana vairanai ita karaia karadia ita laloa namonamo be gau badana. Oibe, Iesu bona ena Tamana ese idia lalonamo henia taudia sibona be Iehova ena dina lalonai do idia roho mauri.
Iehova Ena Hesiai Gaukara Karaia Noho
17. Emu teritori ai haroro gaukara be ia auka neganai, edena dala ai idaunegai peroveta taudia edia haheitalai namona oi tohotohoa diba?
17 Dirava tomadiho henia karadia ita durua neganai goada ita abia. Petero ia gwau: “Umui be edena bamona do umui noho? Umui emui kara ibounai do idia helaga be namo, bona Dirava do umui badinaia namonamo.” (2 Pet. 3:11) Unai kara badana ta be, sivarai namona harorolaia gaukarana. (Mat. 24:14) Oibe, teritori haida ai haroro gaukara ita karaia be ia auka, badina be taunimanima idia kamonai lasi, o idia dagedage o sibona edia mauri durua gaudia idia laloa bada. Idaunegai, Iehova ena hesiai taudia be unai bamona hekwakwanai idia davaria. To, Dirava ena hereva idia harorolaia loulou, idia hesiku lasi. (2 Sivarai 36:15, 16 duahia; Ier. 7:24-26, NW ) Dahaka ese idia ia durua idia haheauka totona? Badina edia hesiai gaukara idia karaia neganai, Iehova ena lalohadai idia abia bona tanobada idia dadaraia. Danu, idia laloa Dirava ena ladana idia harorolaia be gaukara hereadaena.—Ier. 15:16.
18. Edena dala ai Basileia harorolaia gaukarana ese gabeai Dirava ena ladana do ia hanamoa?
18 Hari inai negai, ita ese Iehova ena ladana bona ura ita harorolaia be gaukara hereadaena danu. Mani inai oi laloa: Iseda haroro gaukara dainai, dina badana lalonai, Dirava ia inai henia tauna ta do ia gwau diba lasi: ‘Ta ese lau dekenai Iehova ena ladana bona ura ia hadibaia lasi.’ To idaunegai Farao hegeregerena, do idia laloparara Iehova be idia ia tuari henia. (Eso. 8:1, 20; 14:25) Unai negai danu, Iehova ese do ia hahedinaraia ena hesiai taudia be ena gwaukau taudia.—Esekiela 2:5; 33:33 duahia.
19. Edena dala ai ita hahedinaraia ita ura Iehova ia haheauka noho lalonai kara namodia ita karaia noho?
19 Petero ese revareva ena dokona amo ena tadikaka ia hamaoroa: “Do umui laloaboio lasi, Lohiabada ese umui ia naria noho, mai haheauka danu.” (2 Pet. 3:15) Oibe, Iehova ia haheauka noho lalonai kara namodia ita karaia noho be namo. Edena dala ai? Gau badana be Dirava ese ia ura henia karadia ita karaia, ‘ita miro lasi, ita kerere lasi’ noho, hahetoho idauidau lalonai lalohadai maorona ita abia, bona Basileia ena hesiai gaukara ita karaia noho. Unai bamona ita karaia neganai, “guba matamata bona tanobada matamata” edia hahenamo do ita moalelaia.—2 Pet. 3:13.
Oi Laloatao, A?
• Edena dala ai Dirava ia ura henia karadia ita karaia diba?
• Edena dala ai ‘ita miro lasi, ita kerere lasi’ noho?
• Iosepa bona Naomi amo dahaka ita dibaia?
• Dahaka dainai haroro gaukara ita karaia be gaukara hereadaena?
[Picture on page 9]
Dahaka ese oi, tau, bona emu ruma bese do ia durua Dirava ese ia ura henia karadia umui karaia totona?
[Picture on page 10]
Iosepa ese hahetoho ia haheaukalaia karana amo dahaka ita diba?