‘Gau Badana Be Inai: Umui Lalokau Heheni, Mai Emui Lalona Ibounai’
“Gau ibounai edia dokona ena nega be kahirakahira. . . . To gau badana momokani be inai: Umui ta ta dekenai do umui lalokau henia, mai emui lalona ibounai.”—1 PETERO 4:7, 8.
IESU ia diba ena hora ginigabedia lalonai ena aposetolo taudia ida ia noho be mai anina bada. Ia diba dahaka do ia vara idia dekenai. Idia ese gaukara badana do idia karaia, to taunimanima ese do idia badu bona dagedage henidia, ia hegeregerena. (Ioane 15:18-20) Unai hanuaboi ginigabena lalonai, Iesu ese idia ia hadibaia loulou, idia lalokau heheni be namo.—Ioane 13:34, 35; 15:12, 13, 17.
2 Aposetolo Petero, unai hanuaboi ai ia noho tauna, be unai hereva ena anina ia lalo-pararalaia. Lagani momo murinai, Ierusalema idia do hadikaia lasi ai, Petero be ena revareva ai ia hahedinaraia lalokau be mai anina bada. Keristani taudia ia sisiba henia: “Gau ibounai edia dokona ena nega be kahirakahira. . . . To gau badana momokani be inai: Umui ta ta dekenai do umui lalokau henia, mai emui lalona ibounai.” (1 Petero 4:7, 8) Inai “nega ena dokona” ai idia noho taudia dekenai, Petero ena hereva ena anina be bada herea. (2 Timoteo 3:1) Inai hereva, “umui lalokau henia, mai emui lalona ibounai” ena anina be dahaka? Dahaka dainai ma haida dekenai unai lalokau ita hahedinaraia be gau badana? Bona edena bamona ita hahedinaraia diba ita dekenai unai lalokau ia noho?
“Umui Lalokau Henia, mai Emui Lalona Ibounai”—Ena Anina be Dahaka?
3 Momo idia laloa lalokau be hemami ta sibona bona ia vara kava be namo. To Petero be lalokau karana ta ia herevalaia kava lasi; ia be lalokau hereadaena ia herevalaia. Inai hereva “lalokau,” 1 Petero 4:8 ai, be Greek herevana a·gaʹpe amo idia hahanaia. Unai hereva ena anina be, ta be sibona ena ura ia dadaraia neganai unai lalokau ia hahedinaraia diba, bona unai kara be hakaua herevana ese ia hakaua eiava biagua. Buka ta ia gwau: “Agape lalokauna be ita biagua diba, badina unai lalokau be hemami ta sibona lasi, to ta ia ura unai kara ia hahedinaraia dainai kara ta ia karaia.” Iseda lalona ai sibona eda namo tahua urana ia noho dainai, ita lalokau heheni totona ita idia hadibaia loulou be namo, unai amo Dirava ena hakaua herevadia hegeregerena lalokau do ita hahedinaraia.—Genese 8:21; Roma 5:12.
4 Unai hereva ia gwau lasi, taravatu ta dainai ita lalokau heheni be namo. A·gaʹpe be mai ena hebogahisi bona hemami. Petero ia gwau, “ta ta dekenai do umui lalokau henia, mai emui lalona ibounai [“habadaia,” Kingdom Interlinear]” be namo.a To, unai lalokau ita hahedinaraia totona ita hekwarahi be namo. Greek herevana idia hahanaia “mai emui lalona ibounai” dekenai, diba bada tauna ta ia gwau: “Heau helulu tauna ita laloa, iena masolo ibounai bona goada orena ia gaukaralaia bona ia heau ela bona heau helulu ena dokona ia hagugurua.”
5 Vadaeni, namo lasi eda lalokau be ita dekenai ia hegeregere negadia sibona ai ita hahedinaraia eiava haida sibona dekenai ita hahedinaraia. Keristani lalokauna ita hahedinaraia ena anina be ma haida ita lalokau henia, ena be ita dekenai ia auka. (2 Korinto 6:11-13) Ia hedinarai goevagoeva, unai lalokau be ita sibona ese do ita havaraia bona hahedinaraia noho be namo, heau helulu tauna ese treinini ia abia bona ia dibaia gaudia ia gaukaralaia noho hegeregerena. Ta ta dekenai unai lalokau ita hahedinaraia be gau badana. Dahaka dainai? Badina badadia be toi.
Dahaka Dainai Ita Lalokau Heheni be Namo?
6 Ginigunana be, “badina lalokau be Dirava dekena amo.” (1 Ioane 4:7) Iehova, unai kara hereadaena ena Badina, ese ita Ia lalokau henia guna. Aposetolo Ioane ia gwau: “Dirava ese iena lalokau ita dekenai, be inai bamona ia hedinaraia: Ia ese iena Natuna tamona tanobada dekenai ia siaia, ia dekena amo mauri do ita abia totona.” (1 Ioane 4:9) Dirava ese ena Natuna “ia siaia” bena taunimanima ta ai ia lao, ena hesiai gaukara ia karaia bona satauro ai ia mase—unai ibounai ia karaia, “mauri do ita abia totona.” Dirava ena lalokau be unai dala namona ai ia hahedinaraia dainai, dahaka ita karaia be namo? Ioane ia gwau: “Dirava ese unai bamona ita ia lalokau henia dainai, namona be ita ta ta dekenai do ita lalokau henia, ani?” (1 Ioane 4:11) Mani oi laloa, Ioane ia gwau “Dirava ese unai bamona ita ia lalokau henia”—ia gwau lasi oi, to ia gwau ita. Ia hedinarai goevagoeva: Bema Dirava ese eda tadikaka ia lalokau henia, vadaeni idia ita lalokau henia danu be namo.
7 Iharuana be, hari inai negai ita lalokau heheni be mai anina bada, unai amo idia dabu tadikakadia ita durua badina “gau ibounai edia dokona ena nega be kahirakahira.” (1 Petero 4:7) Ita be “metau dikadia momo” negana ai ita noho. (2 Timoteo 3:1) Tanobada ai idia vara gaudia, idia vara kava dika badadia bona dagedage ese ita idia hametaua. Hekwakwanai idauidau lalonai, ta ta kahirakahira ita noho be namo. Bema ta ta ita lalokau henia mai eda lalona ibounai ida, unai ese ita do ia hatamonaia momokani bona hagoadaia ‘ta ta ibounai do ita naria’ totona.—1 Korinto 12:25, 26.
8 Ihatoina be, ita lalokau heheni be namo, badina ita ura lasi ‘Satani ena dala do ita kehoa’ bena ita ia tohoa. (Efeso 4:27) Satani be tadikaka edia kara kerere—edia manoka gaudia—ia gaukaralaia haraga, ita ia tohoa totona. Bema ta ena hereva eiava kara ta ese ita ia habadua, kongregesen ita rakatania be namo, a? (Aonega Herevadia 12:18) Bema ta ta dekenai ita lalokau henia mai eda lalona ibounai, kongregesen do ita rakatania lasi! Unai bamona lalokau ese ita ia durua maino ita havaraia bona Dirava ena ‘ena hesiai gaukara be mai eda lalo-tamona ida do ita karaia hebou totona.’—Sepanaia 3:9, NW.
Edena Bamona Oi Hahedinaraia Ma Haida Oi Lalokau Henia
9 Ruma ai lalokau oi hahedinaraia guna be namo. Iesu ia gwau, ta ta lalokau henia karana be iena murinai idia raka taudia momokanidia edia toana badana. (Ioane 13:34, 35) Lalokau be kongregesen sibona ai lasi to ruma bese taudia—headava taudia, tama sina bona natudia—dekenai ita hahedinaraia danu be namo. Ruma bese taudia dekenai lalokau mamina be iseda kudouna ai ita abia sibona be hegeregere lasi; dala idauidau amo ita hahedinaraia be namo.
10 Edena dala ai headava taudia idia lalokau heheni diba? Iena hahine ia lalokau henia tauna be ena hereva bona kara—taunimanima vairanai bona hehuni gabunai—amo ena adavana ia hadibaia ia lalokau henia. Iena hahine ia matauraia bona danu hahine ena lalohadai, hereva bona hemami ia laloa bada. (1 Petero 3:7) Iena hahine ena namo ia tahua guna bona sibona ena be gabeai ia tahua, bona ia hekwarahi tauanina, lauma bona hemami dalanai ena hahine ia naria totona. (Efeso 5:25, 28) Iena tau ia lalokau henia bada hahinena ese ena tau “ia matauraia,” herevana nega haida iena ura gaudia be tau ese ia abia dae lasi. (Efeso 5:22, 33) Iena tau ia durua bona badinaia, anina lasi gaudia totona ia noinoi momo lasi, to idia gaukara hebou lauma gaudia idia laloa bada totona.—Genese 2:18; Mataio 6:33.
11 Tama sina e, edena dala ai emu natudia dekenai lalokau umui hahedinaraia diba? Namona be mai emui ura bada ida umui gaukara goada tauanina dalanai umui durudia totona, unai ese ia hamomokania idia umui lalokau henia. (1 Timoteo 5:8) To, natudia ese aniani, dabua bona ruma sibona idia abia be hegeregere lasi. Bema umui ura emui natudia idia bada bena Dirava momokanina idia lalokau henia bona hesiai henia, lauma dalanai umui hadibaia be gau badana. (Aonega Herevadia 22:6) Unai ena anina be nega umui atoa ruma bese ida Baibel umui stadilaia, umui haroro bona Keristani heboudia umui lao henia totona. (Deuteronomi 6:4-7) Unai bamona kara umui karaia loulou totona, umui hekwarahi be namo bona inai nega dikadia lalonai unai be mai anina bada. Emui natudia edia lauma gaudia umui laloa bada bona umui hekwarahi unai gaudia umui henia be lalokau karana, badina unai amo umui hahedinaraia umui ese emui natudia edia namo hari ela bona hanaihanai be umui laloa bada.—Ioane 17:3.
12 Tama sina ese edia natudia edia hemami idia laloa bada danu be namo, unai amo idia hahedinaraia edia natudia idia lalokau henia. Natudia idia goada lasi; emui lalokau ese edia kudouna ia hamoalea be namo. Idia umui hamaoroa umui lalokau henidia bona lalokau karadia umui hahedinaraia badabada, badina unai bamona kara bona hereva ese idia ia hadibaia, umui ese idia umui lalokau henia bona laloa bada. Mai momokani bona lalo-namo ida hanamoa herevadia umui gwauraia, badina unai ese idia ia hadibaia, umui be edia hekwarahi umui itaia bona laloa bada. Mai lalokau ida umui matahakani henia, badina unai hamaoromaoroa karana ese idia ia hamaoroa edena bamona taudia ai do idia lao be umui laloa bada. (Efeso 6:4) Unai bamona lalokau kara namodia ibounai ita hahedinaraia neganai, unai ese ruma bese ta ai hetura heheni bona moale do ia havaraia, bona unai ruma bese do ia hegaegae namonamo, inai nega dokona ena hekwakwanai idia haheaukalaia totona.
13 Lalokau dainai ma haida edia kerere ita laloa momo lasi. Mani umui laloa lou, Petero ese ena revareva idia duahia taudia ia hadibaia ‘ta ta dekenai do idia lalokau henia mai edia lalona ibounai’ be namo, to ia hahedinaraia danu dahaka dainai unai be mai anina bada: “Badina be lalokau ese kara dika momo ia koudia.” (1 Petero 4:8, NW ) Kara dika idia ‘koua’ ena anina be kara dika rohorohodia idia hunia karana lasi. Bema ta be kara dika rohorohona ta ia karaia, namona be kongregesen ai maduna idia huaia taudia ita hadibaia haraga bona idia ese unai do idia hamaoromaoroa. (Levitiko 5:1; Aonega Herevadia 29:24) Ia be lalokau karana lasi—bona Baibel ena hereva hegeregerena lasi—bema kara dika rohoroho idia karaia taudia ita rakatania dainai idia ese kerere lasi taudia idia hahisia eiava hadikaia noho.—1 Korinto 5:9-13.
14 Nega momo tadikaka haida edia kerere be maragi sibona. Ita momo be nega haida hereva eiava kara dekenai ita kerere dainai, ita habadua eiava hahisia heheni. (Iamesi 3:2) Ma haida edia kerere maragidia ita gwauraia hedinarai haraga be namo, a? Unai bamona kara ese kongregesen ai hepapahuahu ia havaraia sibona. (Efeso 4:1-3) Bema lalokau ese ita ia biagua, ita ese tadikaka do ita gwauraia dika lasi. (Salamo 50:20) Plasta bona peni ese haba dikana ta idia koua hegeregerena, lalokau ese ma haida edia kerere maragidia ia koua be namo.—Aonega Herevadia 17:9.
15 Lalokau dainai ita ura idia dabu momokani taudia ita durua. Nega dokona ai dika ia bada ia lao lalonai, nega haida eda tadikaka be kohu eiava tauanina dalanai heduru idia abia be namo. (1 Ioane 3:17, 18) Hegeregere, eda kongregesen ai tadikaka eiava taihu ta be moni ena hekwakwanai ia davaria eiava moni gaukara ia haboioa, a? Vadaeni, reana tauanina dalanai heduru sisina ita henia diba, eda noho dalana hegeregerena. (Aonega Herevadia 3:27, 28; Iamesi 2:14-17) Vabu burukana ta ena ruma ai, idia dika gaudia haida ita hanamoa diba, a? Vadaeni, reana ita ese gau haida ita hanamoa diba.—Iamesi 1:27.
16 Ma haida lalokau henia karana be eda gabu taudia sibona dekenai ita hahedinaraia lasi. Nega haida sivarai ita kamonai, tano ma haida ai lai gubana, tano mareremarere eiava tuari ese Dirava ena hesiai taudia edia noho dalana ia hadikaia. Bona reana aniani, dabua eiava gau ma haida idia abia be namo. Idia be bese eiava iduhu idauna amo be herevana. ‘Keristani taudia ibounai do ita lalokau henia’ be namo. (1 Petero 2:17) Unai dainai, ita ura bada kongregesen ginigunadia bamona, heduru henia totona idia haginia oreadia ita durua. (Kara 11:27-30; Roma 15:26) Unai dala idauidau amo lalokau ita hahedinaraia neganai, inai nega dokona ai ita ia hatamonaia dalana ita hagoadaia unai.—Kolose 3:14.
17 Lalokau dainai Dirava ena Basileia ena sivarai namona be ma haida dekenai ita harorolaia. Iesu ena haheitalai ita laloa. Dahaka dainai ia ese haroro bona hadibaia gaukarana ia karaia? Ia ese “taunimanima momo ia itaia neganai ia bogahisihisi idia dekenai,” badina lauma dalanai idia ogogami. (Mareko 6:34) Tomadiho koikoi ena mamoe naria taudia ese unai taudia dekenai lauma dalanai hereva momokani idia hadibaia bona helaro idia henia be namo, to idia ese unai taudia idia naria lasi bona idia hakaua kerere. To, Iesu be lalokau bona hebogahisi bada karana ese ia hagoadaia dainai, “Dirava ena Basileia ena Sivarai Namona” amo taunimanima edia lalona ia hagoadaia.—Luka 4:16-21, 43.
18 Hari, taunimanima momo danu be lauma dalanai idia naridia lasi, idia hakaua kerere bona helaro idia henia lasi. Bema, Iesu bamona, ita diba haida be lauma dalanai heduru idia abia be namo bona Dirava momokanina idia do diba lasi, vadaeni lalokau bona hebogahisi karana ese ita do ia hagoadaia Dirava ena Basileia ena sivarai namona be idia dekenai ita harorolaia totona. (Mataio 6:9, 10; 24:14) Ita diba nega be ia kwadogi dainai, inai hahemauri sivaraina ita harorolaia haraga be gau badana.—1 Timoteo 4:16.
“Gau Ibounai Edia Dokona Ena Nega be Kahirakahira”
19 Laloaboio lasi, Petero ese ita lalokau heheni sisibana ia do henia lasi neganai, ia gwau: “Gau ibounai edia dokona ena nega be kahirakahira.” (1 Petero 4:7) Kahirakahira, Dirava ena kara maoromaoro tanobadana ese inai tanobada dikana ena gabu do ia abia. (2 Petero 3:13) Unai dainai, hari be noho kava negana lasi. Iesu ia gwau: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina, vadaeni Lohiabada ena Dina do ia mai haraga, umui hegaegae lasi garina.”—Luka 21:34, 35.
20 Unai dainai, namona be ita “gima noho,” bona ita diba ita be dokona negana ai ita noho. (Mataio 24:42, NW ) Namona be ita naria namonamo, Satani ena hedibagani idauidau ese ita idia koia diba garina. Namo lasi inai lalokau lasi tanobadana ese ma haida dekenai ita hahedinaraia lalokauna ia koua. Unai ibounai ia hereaia gauna be inai: namona be Dirava momokanina, Iehova, Mesia Basileiana ese kahirakahira ena ura namona inai tanobada ai do ia hagugurua Diravana kahirakahira ita lao.—Apokalupo 21:4, 5.
[Footnote]
a Petero Ginigunana 4:8 ai, idia hahanaia Baibel ma haida idia gwau, namona be ta ta ita lalokau henia “mai momokani ida” eiava “mai ura bada.”
STADI ENA HENANADAI
• Iesu be ena hahediba taudia dekenai dahaka bamahuta sisibana ia henia, bona dahaka ese ia hahedinaraia Petero ese unai hereva ena anina ia lalo-pararalaia? (Par. 1-2)
• Inai hereva “umui lalokau henia, mai emui lalona ibounai” ena anina be dahaka? (Par. 3-5)
• Dahaka dainai ita lalokau heheni be namo? (Par. 6-8)
• Edena bamona oi hahedinaraia ma haida oi lalokau henia? (Par. 9-18)
• Dahaka dainai hari be noho kava negana lasi, bona namona be iseda lalona ita hadaia dahaka ita karaia totona? (Par. 19-20)
[Picture on page 29]
Idia hetura heheni ruma bese taudia be idia hegaegae namonamo dainai, inai nega dokona ena hekwakwanai idauidau idia haheaukalaia diba
[Picture on page 30]
Lalokau dainai ita ura idia dabu momokani taudia ita durua
[Picture on page 31]
Ma haida dekenai Dirava ena Basileia ena sivarai namona ita harorolaia be lalokau karana