Ita Ia Hakaua Tauna
“Mai goada danu ia lao, do ia kwalimu totona.”—APOK. 6:2.
1, 2. (a) Baibel ese edena dala ai Keriso be 1914 amo ia karaia gaukara idauidau ia perovetalaia? (b) Keriso be king ai ia lao neganai, dahaka ia karaia?
LAGANI 1914 ai Iehova ese Keriso be King ai ia halaoa. To hari, Iesu be edena bamona ita laloa? Ia be ena terona ai ia helai kava bona nega ta ta ai kongrigeisen dekenai idia vara gaudia ia raraia sibona, a? Bema iseda lalohadai be unai bamona, ita haidaua be namo. Salamo bona Apokalupo bukadia ese idia hahedinaraia hari Keriso be hosi dekenai ia guia “mai goada danu ia lao, do ia kwalimu totona.”—Apok. 6:2; Sal. 2:6-9; 45:1-4.
2 Keriso be king ai ia lao neganai ia karaia gaukara ginigunana be “huala mai ena aneru” ia tuari henidia. Aneru badana Mikaela be ena aneru ia gunalaidia bona idia ese Satani bona ena demoni be guba amo idia negea diho tanobada dekenai. (Apok. 12:7-9) Bena, Iesu be Iehova ena “hereva gwauraia tauna” ai ia lao bona iena Tamana ida lauma dubuna idia sekea totona idia mai. (Mal. 3:1) Ia ese Kerisendom, “Babulonia badana” unai, ia hahemaoro henia badina taunimanima momo ia hamasedia bona tanobada ena politikol oreadia ida ia heudahanai.—Apok. 18:2, 3, 24.
Tanobada Ai Ena Orea Ia Hagoevaia
3, 4. (a) Iehova ena “hereva gwauraia tauna,” Keriso be dahaka gaukara ia karaia? (b) Iesu ese dubu helaga ia sekea neganai dahaka ia davaria? (c) Keriso be kongrigeisen ena Kwarana dainai, daidia ia abia hidi?
3 Iehova bona iena “hereva gwauraia tauna” be dubu helaga idia sekea neganai, idia davaria Keristani taudia momokanidia haida idia noho bona idia be Kerisendom idia dadaraia. To, unai horoa orena taudia idia hagoevaia danu be namo. Malaki ese unai ia perovetalaia, ia gwau: “Ia [Iehova] be do ia mai, taunimanima do ia kota henidia, tau ta ese lahi dekenai siliva ia hamanadaia bona hagoevaia bamona. Io, Lohiabada ena hereva gwauraia Tauna ese hahelagaia taudia do ia hagoevaia, tau ta ese golo bona siliva ia hagoevaia bamona. Unai neganai, idia ese boubou gaudia maorodia Lohiabada ena vairana dekenai do idia mailaia.” (Mal. 3:3) Iehova ese iena “hereva gwauraia tauna,” Keriso Iesu, ia gaukaralaia lauma Israela taudia ia hagoevaia totona.
4 Danu, Keriso ese ia davaria abidadama horoa Keristani taudia idia gaukara goada nega korikori ai lauma aniani idia hegaegaelaia totona. Lagani 1879 amo ema bona hari, idia ese Gima Kohorona amo Dirava ena Basileia ena hereva momokanidia idia halasia. Iesu ia peroveta ia be “tanobada dokona” ai do ia “giroa mai” neganai, hesiai tauna ta do ia davaria, ia be “biaguna ena natuna edia aniani neganai edia aniani do ia henia.” Unai hesiai tauna be ena gaukara namona dainai ia hanamoa bona tanobada ai iena “kohu ibounai naria tauna” ai do ia halaoa. (Mat. 24:3, 45-47) Keriso be Keristani kongrigeisen ena Kwarana dainai, ia ese “hesiai tauna mai ena kamonai, bona mai ena kara maoromaoro” ia abia hidi Basileia ena kohu idia naria totona. Keriso ese Hakaua Oreana amo horoa taudia bona “mamoe idaudia” ia gunalaia.—Ioa. 10:16.
Tanobada Ena Anina Utua Negana
5. Ioane ena matahanai lalonai dahaka ia itaia?
5 Aposetolo Ioane ena matahanai ta lalonai ia itaia Iesu be Dirava ena Basileia ena king ai ia lao, bona “Lohiabada ena Dina” ai gaukara ma ta ia karaia. Ioane ia gwau: “Ori kurokurona ta lau itaia, bona ta, iena toana be Taunimanima ena Natuna bamona, be ori latanai ia helai. Iena kwarana dekenai be golo kwara gauna ia noho, bona iena imana dekenai be kaia badana ta mai matana ia dogoatao.” (Apok. 1:10; 14:14) Ioane ia kamonai Iehova ena aneru ta ese Uiti Utua Tauna ia oda henia ena kaia badana do ia gaukaralaia, badina “tanobada ena anina ia mage vadaeni.”—Apok. 14:15, 16.
6. Iesu ena parabole ese dahaka ia hahedinaraia?
6 “Tanobada ena anina ia mage vadaeni” ita herevalaia neganai, Iesu ese ia gwauraia uiti bona ava dikadia ena parabole ita laloa. Iesu ia gwau ia be unai uiti uhe namodia ia hadoa tauna. Uiti namodia be “Basileia ena taunimanima,” Iesu ida ena Basileia ai do idia lohia horoa Keristani taudia unai. To, hanuaboi ai, inai tauna “Satani” ese ava dikadia ia hadoa. Unai ava dikadia ese “Satani ena taunimanima” idia laulaulaia. Uma biaguna ese ena gaukara taudia ia hamaorodia uiti bona ava dikadia be do idia tubu hebou ela bona uiti utua negana, unai be “tanobada ena dokona neganai.” Unai nega ia ginidae neganai, Keriso ese ena aneru do ia siaidia uiti bona ava dikadia do idia hapararaia totona.—Mat. 13:24-30, 36-41.
7. Keriso ese “tanobada ena anina” gogoa gaukarana be edena bamona ia karaia?
7 Ioane ese ena matahanai ai ia itaia bamona, hari inai negai Iesu be tanobada hegegemadai uma ena anina ia utua noho. “Tanobada ena anina” gogoa gaukarana ena kahana ginigunana be horoa taudia oredia idia abia hidi neganai ia hamatamaia. Parabole ia hahedinaraia idia be “uiti namodia,” “Basileia ena taunimanima,” eiava ita gwau diba 144,000 horoa taudia. Tanobada Tuarina Ginigunana murinai, Keristani taudia momokanidia bona Keristani taudia koikoidia edia idau ia hedinarai. Taunimanima be unai idia lalopararalaia neganai, “tanobada ena anina” gogoa gaukarana ena kahana iharuana ia matamaia. Unai kahana iharuana dekenai Iesu ese mamoe idaudia ia gogoa. Unai mamoe idaudia be “Basileia ena taunimanima” lasi, to idia be Mesia ena Basileia henunai do idia noho “hutuma bada” taudia. Iesu ese “bese ibounai, iduhu ibounai, kopina bona gado idauidau amo” idia ia gogoa. Guba Basileia lalonai idia lohia taudia be Keriso Iesu bona 144,000 “helaga taudia,” to hutuma bada be Mesia ena Basileia henunai do idia noho.—Apok. 7:9, 10; Dan. 7:13, 14, 18.
Kongrigeisen Ia Gunalaia Tauna
8, 9. (a) Dahaka ese ia hahedinaraia Keriso be Keristani taudia ta ta edia mauri dalana ia diba danu? (b) Rau 26 ai ia noho laulau bamona, dahaka gaudia ita dadaraia be namo?
8 Wiki gunana ena stadi ai ita dibaia, Keriso be idaunegai idia noho kongrigeisen ta ta edia goada gaudia bona manoka gaudia ia diba namonamo. Hari inai negai danu, Keriso be tanobada hegegemadai idia noho kongrigeisen bona elda taudia ia gunalaia noho, badina Iehova ese ‘siahu ibounai guba bona tanobada dekenai be ia dekenai ia henia vadaeni.’ (Mat. 28:18; Kol. 1:18) Iehova ese Iesu be horoa taudia edia kongrigeisen ena kwarana ai ia halaoa. (Efe. 1:22) Unai dainai, Iesu be Iehova ena Witnes taudia edia kongrigeisen 100,000 mai kahana lalonai idia vara gaudia ia diba.
9 Idaunegai ia noho Tuatira kongrigeisen dekenai, Iesu be inai bamona ia gwau: “Dirava ena Natuna, iena matana be lahi ena hururuhururu bamona, . . . iena hadibaia hereva be inai: “Oiemu kara . . . ibounai lau diba.” (Apok. 2:18, 19) Iesu ese unai kongrigeisen ia sisiba henia badina idia ese matabodaga karadia idia karaia bona sibona edia ura idia atoa guna. Idia dekenai ia gwau: “Lau be taunimanima ibounai edia laloa bona edia ura lau diba. Bona umui danu ta ta emui davana do lau henia, emui kara, emui kara hegeregerena.” (Apok. 2:23) Unai siri ese ia hahedinaraia Iesu be kongrigeisen lalonai idia vara gaudia ia diba sibona lasi, to kongrigeisen taudia ta ta edia mauri dalana ia diba danu. Iesu ese Tuatira Keristani taudia haida ia hanamoa, badina ‘Satani ena hunia momokani gaudia idia diba lasi.’ (Apok. 2:24) Hari, “Satani ena hunia momokani gaudia” hegeregere, Internet, dagedage karadia idia hahedinaraia vidio gadara idauidau, bona tanobada ena lalohadai kereredia idia dadaraia matamata bona buruka taudia be Iesu ese ia lalonamo henidia. Keriso ia itaia Keristani taudia momo be idia hekwarahi edia mauri lalonai iena hakaua dalana idia badinaia neganai, ia moale bada!
10. Baibel ese edena dala ai Keriso be kongrigeisen ena elda taudia ia gunalaia karana ia herevalaia? To elda taudia ese dahaka idia abia dae be namo?
10 Keriso be elda taudia ia gaukaralaia tanobada ai idia noho kongrigeisen ia naria totona. (Efe. 4:8, 11, 12) Aposetolo taudia edia negai, elda taudia ibounai be horoa taudia. Bona Apokalupo bukana ese ia hahedinaraia idia be hisiu bamona Iesu ena imana idibana lalonai. (Apok. 1:16, 20) To, hari inai negai, kongrigeisen ena elda taudia momo be mamoe idaudia taudia. Elda ta idia abia hidi gwauraia neganai, idia guriguri bona lauma helaga ena hakaua hegeregerena abia hidi idia karaia. Unai dainai, ita gwau diba elda taudia be Keriso ese ia gunalaidia. (Kara 20:28) Elda taudia idia abia dae Keriso be Hakaua Oreana ia gaukaralaia iena taunimanima tanobada ai ia gunalaia bona hakaua totona.—Kara 15:6, 28-30 duahia.
“Lohiabada Iesu E, Oi Mai”
11. Dahaka dainai ita ura iseda Gunalaia Tauna ia mai haraga?
11 Iesu be matahanai amo Ioane ia hereva henia neganai, nega momo ia gwau ia be do ia mai haraga. (Apok. 2:16; 3:11; 22:7, 20) Iesu ia mai neganai ia ese Babulonia Badana do ia hahemaoro henia bona Satani ena tanobada dikana do ia haorea. (2 Tes. 1:7, 8) Ia buruka vadaeni aposetolo Ioane ia ura dikadika matahanai edia guguru ia itaia, ia gwau: “Amen. Lohiabada Iesu e, oi mai.” Inai tanobada dokona ai ita noho taudia be ita ura danu iseda Gunalaia Tauna bona King be Basileia ena siahu ida do ia mai haraga, iena Tamana ena ladana ia hahelagaia bona Iena lohia siahuna ia abia isi totona.
12. Lai 4 ese Satani ena tanobada ia do hadikaia lasi neganai, Keriso be dahaka gaukara do ia karaia?
12 Iesu ese Satani ena tanobada oreadia ia do hadikaia lasi neganai, 144,000 taudia oredia be Iehova idia badinaia ela bona dokona dainai, maka do idia abia. Baibel ese ia hahedinaraia aneru be tanobada ena lai 4 do idia dogoatao ela bona 144,000 taudia oredia be edia baguna dekenai maka idia abia. Unai murinai, lai 4 ese Satani ena tanobada do ia hadikaia ore.—Apok. 7:1-4.
13. “Hisihisi badana” ena kahana ginigunana ai, Iesu be edena dala ai do ia hahedinaraia ia lohia noho?
13 Tanobada taudia momo be lagani 1914 ai Keriso ia mai bona ia lohia noho ema bona hari idia diba lasi. (2 Pet. 3:3, 4) To, kahirakahira Iesu ese Satani ena tanobada ena orea idauidau ia hahemaoro henidia neganai, do idia diba ia be ia lohia noho. Iesu ese Kerisendom ena gunalaia taudia o Baibel ese ia gwauraia “Tau Dika Rohorohona” ia hadikaia neganai, momo do idia diba ia be ia lohia noho. (2 Tesalonika 2:3, 8, duahia.) Unai ese do ia hamomokania Keriso be Iehova ese ia abia hidi Hahemaoro Tauna. (2 Timoteo 4:1 duahia.) Kerisendom be Babulonia Badana ena kahana ta. Iesu ese unai orea dika rohorohona do ia hadikaia ore guna, bena gabeai tomadiho koikoi ma haida danu do ia hadikaia. Iehova ese politikol taudia edia lalona ai ariara hahine hadikaia lalohadaina do ia atoa. (Apok. 17:15-18) Unai be “hisihisi badana” ena kahana ginigunana.—Mat. 24:21, NW.
14. (a) Dahaka dainai Dirava ese hisihisi badana ena kahana ginigunana do ia hakwadogia? (b) Horoa taudia bona mamoe idaudia be “Taunimanima ena Natuna” idia itaia neganai, dahaka do idia karaia?
14 Iesu ia gwau tanobada ai idia do noho horoa Keristani taudia o “ia abia hidi taudia” ia laloa dainai, hisihisi badana ena nega do ia hakwadogia. (Mat. 24:22) Tomadiho koikoi ibounai ia hadikaia ore neganai, Iehova ese horoa Keristani taudia bona mamoe idaudia do ia gimaia. Iesu ia gwau: “Unai nega dikana do ia ore, vadaeni maoromaoro dina be do ia dibura, hua danu do ia diari lasi, hisiu guba dekena amo do idia moru, . . . Vadaeni Taunimanima ena Natuna ena toana guba dekenai do ia hedinarai. Unai neganai tanobada ena bese ibounai do idia tai.” To, horoa taudia, guba helarona idia abia taudia bona edia turadia, tanobada ai mauri hanaihanai do idia abia taudia be do idia moale. Edia ‘kwarana do idia abia isi badina edia hahemauri be kahirakahira vadaeni.’—Mat. 24:29, 30; Luka 21:25-28.
15. Keriso ia mai neganai dahaka gaukara ma ta do ia karaia?
15 Iesu be gaukara ma ta do ia karaia danu. Baibel ia gwau: “Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai be iena vairana dekenai do idia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona. Mamoe be iena idiba kahana dekenai do ia atoa, nanigosi be iena lauri kahana dekenai do ia atoa.” (Mat. 25:31-33) Unai siri ese ia hahedinaraia Keriso be Hahemaoro Tauna bamona do ia mai bona taunimanima be orea rua ai do ia hapararaia: (1) “Mamoe,” idia be Iesu ena horoa tadikaka idia durua taudia, bona (2) “nanigosi,” idia be “Lohiabada ena sivarai namona idia abia dae lasi taudia.” (2 Tes. 1:7, 8) Mamoe be “kara maoromaoro taudia” bona idia be tanobada ai “mauri hanaihanai” do idia abia, to nanigosi be “davana ia dika hanaihanai gabuna dekenai do idia lao.”—Mat. 25:34, 40, 41, 45, 46.
Iesu ese Ena Gaukara Ibounai Do Ia Hagugurua
16. Edena dala ai Keriso ese ena gaukara ibounai do ia hagugurua bona ia kwalimu?
16 Keriso ida do idia lohia taudia ibounai edia maka idia abia bona mamoe be ena imana idibana kahana ia atoa murinai, Keriso be “mai goada danu do ia lao ia kwalimu totona.” (Apok. 5:9, 10; 6:2) Iesu, ena aneru goadadia bona idia toreisi lou horoa tadikakadia ese Satani ena politikol, tuari bona bisinesi oreadia ibounai do idia hadikaia ore. (Apok. 2:26, 27; 19:11-21) Keriso ese Satani ena tanobada dikana ia haorea neganai, ena gaukara ibounai ia hagugurua unai bona ia kwalimu. Unai murinai, Satani bona ena demoni be guri dobu masemase lalonai do idia lokaia ela bona lagani 1,000 idia ore.—Apok. 20:1-3.
17. Keriso ena Lagani 1,000 Lohia Negana ai mamoe idaudia be edeseniai do ia hakaudia lao? Bona iseda lalona ita hadaia dahaka ita karaia totona?
17 Aposetolo Ioane ese “hutuma bada” be hisihisi badana amo do idia roho mauri karana ia perovetalaia neganai, ia gwau “Mamoe ena Natuna, helai gabuna badana ena huanai ia noho, ese idia do ia naria. Ia ese mauri ranuna, ia lohilohi gauna, dekenai do ia hakaudia lao.” (Apok. 7:9, 17) Oibe, Keriso ena Lagani 1,000 Lohia Negana ai iena gadona idia kamonai bona iena murinai idia raka taudia be mauri hanaihanai dekenai do ia hakaudia lao. (Ioane 10:16, 26-28 duahia.) Namona be hari iseda Gunalaia Tauna do ita badinaia noho ela bona Iehova ese ia gwauhamatalaia tanobada matamatana dekenai ita vareai!
Riviu
• Lagani 1914 ai Keriso be King ai ia lao neganai, dahaka ia karaia?
• Keriso ese edena orea ia gaukaralaia kongrigeisen ia gunalaidia totona?
• Iseda Hakaua Tauna Keriso be nega vaira ai dahaka gaukara ma haida do ia karaia?
• Tanobada matamatana ai Keriso be edena dala ai ita do ia hakaua noho?
[Picture on page 29]
Keriso ese Satani ena tanobada dikana ia hadikaia neganai, do ia hahedinaraia ia lohia noho