Iehova Tabekau Henia Karana Lau Dibaia

JÁN KORPA-ONDO ESE INAI SIVARAI IA GWAURAIA

Ia be lagani 1942, bona Hungary ena tuari taudia be Kursk kahirakahira, Russia ai, lau idia naria. Tanobada Ibounai ena Tuari Iharuana lalonai Axis gavamanidia ese Russia taudia idia tuari henia neganai ai be edia dibura taudia. Egu guri lau geia vadaeni, bona miniti 10 idia henia lau dekenai egu lalona do lau hadaia, lau be Iehova ena Witness tauna ta lasi ia gwauraia pepana do lau sainia eiava lasi totona. Unai murinai ia vara gauna lau do gwauraia lasi neganai, namona be unuseniai lau noho ena badina lau gwauraia guna.

LAU be lagani 1904 ai, Zahor hanua maragina dekenai lau vara, hari ia be Slovakia ena ist kahana ai. Tanobada Ibounai ena Tuari Ginigunana murinai, Zahor be tano matamatana, Czechoslovakia, ena kahana ta ai ia lao. Aiemai hanua dekenai ruma 200 bamona bona dubu rua idia noho, ta be Greek Katolik bona ma ta be Calvin tomadiho badinaia taudia edia.

Ena be Calvin tomadiho badinaia taudia edia Dubu dekenai lau lao, to egu kara be idia dika. Lau kahirakahira dekenai ia noho tauna ta ena kara be idau. Dina ta, lau ia hereva henia bona lau dekenai Baibel ia henia. Unai be nega ginigunana egu imana dekenai unai buka lau dogoatao. Lagani 1926 ai, Barbora lau adavaia, bona nega daudau lasi murinai natudia rua ai havaraia, Barbora bona Ján.

Baibel lau duahia matamaia, to ena hereva momo lau lalo-pararalaia lasi. Unai dainai egu pasto dekenai lau lao bona ena heduru lau noia. Ia gwau, “Baibel be diba bada taudia sibona totona, oi lalo-pararalaia toho lasi.” Bena lau ia boiria do ai kasi.

Unai murinai, lau dekenai Baibel ia henia tauna dekenai lau lao. Ia be Bible Student tauna ta, unai nega ai Iehova ena Witness taudia edia ladana be unai. Mai moale ida lau ia durua, bona nega sisina murinai lau lalo-parara matamaia inai be hereva momokani. Inuinu karana lau hadokoa bona kara goeva lau karaia matamaia; ma haida dekenai Iehova lau herevalaia danu. Baibel ena hereva momokani be lagani 1920 murinai ia hedinarai Zahor dekenai, bona daudau lasi murinai Bible Student taudia edia grup ta ia gaukara matamaia.

Ena be unai ia vara, to idau tomadiho taudia idia dagedage bada. Pris tauna ese egu ruma bese taudia ia hagoadaia lau idia badu henia totona, bona ia gwau lau be lau kavakava vadaeni. To, hari egu mauri be mai ena badina, bona egu lalona lau hadaia Dirava momokanina, Iehova, do lau hesiai henia. Unai dainai, lagani 1930 ai, bapatiso lau abia bona unai amo lau hahedinaraia Iehova dekenai egu mauri lau gwauhamatalaia vadaeni.

Hahetoho Dikadia Idia Matamaia

Lagani 1938 ai, aiemai provinsi be Hungary ena siahu henunai ia lao, bona ia be Tanobada Ibounai ena Tuari Iharuana ai Germany ia durua. Unai neganai aiemai hanua taudia ibounai be 1,000 bamona bona ai Witness taudia be 50 bamona. Ena be haroro gaukara dainai aiemai mauri bona ura kwalimu idia hadikaia diba, to ai karaia noho.

Lagani 1940 ai, lau idia boiria Hungary ena tuari oreana lalonai do lau vareai totona. Dahaka do lau karaia? Baibel ena peroveta herevadia lau duahia vadaeni idia gwau taunimanima ese edia tuari gaudia be maino idia havaraia gaudia ai do idia halaoa, bona lau diba, gabeai, Dirava ese tuari iboudiai tanobada dekenai do ia haorea. (Salamo 46:9; Isaia 2:⁠4) Unai dainai tuari lau inai henia, bona herevana dahaka do ia vara, egu lalona lau hadaia tuari oreana lalonai do lau vareai lasi.

Kota ese lau ia hamaoroa hua 14 do lau dibura, bona Pécs, Hungary ena dibura rumana ai lau idia atoa. Ma Witness taudia ima be unai dibura rumana ai idia noho danu, bona ai moale bada ai hebamo heheni diba. To, nega sisina dekenai dibura daiutuna maragina lalonai lau sibona idia koua bona egu aena dekenai seini idia atoa. Tuari durua gaukarana ai dadaraia neganai, ai idia dadabaia. Danu, ai idia doria dina ibounai, ai gini maoromaoro totona, dina tubu ai hora rua lalonai ai laga-ani. Unai bamona hekwarahi be hua momo lalonai ia vara noho. To ai moale badina emai Dirava vairanai emai lalona ena mamina be ia goeva.

Egu Abidadama Do Lau Negea, Eiava?

Dina ta ai, Katolik pris taudia 15 idia mai bona ai dekenai idia hereva goadagoada, idia gwau gau badana be tuari orea lalonai ai vareai bena tuari do ai durua. Ai herevahereva neganai, ai gwau: “Bema Baibel amo umui hamomokania diba souli be ia mase diba lasi, bona bema tuari lalonai ai mase, guba dekenai do ai lao, vadaeni tuari orea lalonai do ai vareai.” Idia hamomokania diba lasi, bona idia ura lasi do idia herevahereva noho.

Lagani 1941 ai, egu dibura negana ia ore, bona lau moale bada badina egu ruma bese taudia do lau hedavari lou. To, unai ia vara lasi badina seini amo lau idia kwatua bona Sárospatak, Hungary ai ia noho ami kamepa dekenai lau idia abia lao. Ai ginidae neganai, dala ia kehoa lau idia ruhaia totona. Lau idia hamaoroa: “Inai sibona oi karaia, inai pepa oi sainia bona oi gwauhamata, hanua dekenai oi giroa lao neganai, pengö 200 do oi henia.”

Lau henanadai: “Edena bamona unai do ia vara? Dahaka dainai moni umui ura?”

Lau idia hamaoroa: “Moni oi henia neganai, medikol dalana ai oi hegeregere lasi tuari orea lalonai oi vareai totona ena pepa oi dekenai do ai henia.”

Unai lau abia hidi be auka. Lagani ta mai kahanai, kara dikadia momo lau davaria vadaeni; lau hesiku. Hari, bema moni lau henia, lau do idia ruhaia. Lau gwau: “Do lau laloa.”

Dahaka do lau abia hidi? Egu adavana bona egu natudia lau laloa be namo. Unai neganai, Keristani tauna ta amo revareva ta lau abia bona lau ia hagoadaia. Heberu 10:38 ena hereva ia torea, unai siri ai Paulo be Iehova ena hereva ia gwauraia: “Lauegu kara maoromaoro taudia, be edia abidadama dainai do idia mauri. Bona lauegu dala ia rakatania tauna, do lau moale lasi ia dekenai.” Nega daudau lasi murinai, Kamepa dekenai Hungary ena tuari opesa rua be lau idia hereva henia, bona ta ia gwau: “Baibel ena hakaua herevadia oi badinaia namonamo dainai oi ai matauraia bada! Oi haheauka noho!”

Unai dina murinai, pengö 200 totona lau do idia ruhaia taudia dekenai lau lao bona lau gwau: “Iehova Dirava ese dibura dekenai lau noho ia koua lasi dainai, lau do ia ruhaia diba. Dibura lau rakatania totona moni do lau henia lasi.” Unai dainai lau idia siaia lagani 10 dibura rumana ai do lau noho. To egu abidadama lau negea totona edia kara idia hadokoa lasi. Kota ia gwau lau do idia ruhaia bema hua rua sibona tuari oreana do lau vareai, bona ipidi do lau dogoatao lasi! Unai hereva lau dadaraia danu bona egu dibura negana ia matamaia.

Dagedage Ia Bada Ia Lao

Lau idia abia giroa lao Pécs dekenai ia noho dibura rumana dekenai. Inai nega ai edia dagedage karadia be idia dika rohoroho. Egu imana be egu doruna murinai idia kwatua, bona idia amo hora rua dekenai lau idia taua dae. Unai dainai, egu pagana ruaosi edia turia idia hadikaia. Hua 6 lalonai unai bamona dagedage karadia idia karaia loulou. Lau haheauka dainai, Iehova sibona lau tanikiu henia diba.

Lagani 1942 ai, ai haida​—politikol karadia dainai idia hadiburaia taudia, Iuda taudia, bona Iehova ena Witness taudia 26​—be Germany ese idia abia siti ta ladana be Kursk dekenai ai idia abia lao. Germany taudia dekenai ai idia henia, bona idia ese dibura taudia dekenai idia tuari noho taudia edia aniani, ala-ala gaudia, bona dabua idia huaia lao gaukarana idia henia. Ai Witness taudia be unai gaukara ai abia dae lasi badina aiemai gini siri karana ia hadikaia. Unai dainai, Hungary taudia dekenai ai idia henia lou.

Gabeai, Kursk ena dibura rumana lalonai ai idia atoa. Dina momo lalonai, nega toi dina tamona lalonai raba gaudia amo ai idia botaia. Egu kwarana dekenai lau idia botaia bona egu tuina dekenai lau moru diho. Lau idia botaia neganai, lau laloa, ‘Mase be ia auka lasi.’ Egu tauanina ibounai be ia mase bamona bona gau ta lau mamia diba lasi. Dina toi lalonai ai dekenai aniani idia henia lasi. Bena kota dekenai ai idia abia lao, bona idia gwau tatau 6 be do idia hamasea. Idia hamasedia murinai, ai 20 ai noho.

October 1942 ai, Kursk lalonai lauegu abidadama idia tohoa karadia edia dika be lau davaria karadia ibounai edia dika idia hanaia momokani. Aiemai lalohadai be idaunegai ia noho tauna, King Iehosapata ese ia hahedinaraia namonamo dika ia davaria neganai, ia gwau: “Inai tuari orea bada herea, ese ai idia tuari henia noho, bona ai be goada lasi idia do ai koua. Edena bamona do ai karaia be ai diba lasi, to oi dekenai aiemai matana ai negea noho, oi ese ai do oi durua totona.”​—2 Sivarai 20:⁠12.

Ai 20 idia abia lao aiemai guri badana ai geia totona, bona Hungary tuari taudia 18 ese ai idia naria. Guri ai geia ore neganai, ai idia hamaoroa miniti 10 idia henia pepa ta ai sainia totona. Ena kahana ta dekenai ia gwau: “Iehova ena Witness taudia edia hahediba herevadia be idia maoro lasi. Do lau abia dae noho lasi bona do lau durua lasi. Hungary tanona totona do lau tuari . . . Egu ladana lau torea karana amo lau hamomokania lau be Roman Katolik Oreana lalonai lau vareai.”

Miniti 10 murinai, ai idia oda henia: “Idiba kahana dekenai giroa! Guri dekenai raka lao!” Bena, idia gwau: “Dibura tauna ginigunana bona ihatoina, guri dekenai umui diho!” Idia ruaosi dekenai ma miniti 10 idia henia pepa idia sainia totona. Tuari tauna ta ia hereva goadagoada ia gwau: “Emui abidadama umui rakatania bona guri amo umui raka lasi!” Ta ia hereva lasi. Bena edia opesa badana ese idia ruaosi ia pidia.

Tuari tauna ta be edia opesa badana ia nanadaia: “Idia haida be edena bamona?”

Ia haere, ia gwau: “Idia oi kwatua. Do ita hahisihisidia noho bena 6 okoloka dabai, do ita pididia.”

Karaharaga lau gari, do lau mase dainai lasi, to edia hahisihisia karadia do lau haheaukalaia diba lasi, bena egu abidadama do lau negea garina. Unai dainai lau raka lao sisina bona lau gwau: “Tau badana e, aiemai tadikaka, umui pidia taudia hegeregerena ai kerere danu. Ai umui pidia danu be namo, ani?”

To idia karaia lasi. Emai imana be emai doruna murinai idia kwatua. Unai murinai emai imana amo ai idia taua dae. Ai maserea neganai, ranu amo ai idia dairia. Hisihisi be bada herea badina tauanina ena metau dainai emai pagana edia turia idia hadikaia. Unai hahisihisia karana be hora toi bamona lalonai idia karaia. Bena, karaharaga, oda ta ia hedinarai, ia gwau Iehova ena Witness taudia ma haida do idia pidia lasi.

Ist Kahana Dekenai Ai Lao —Bena Ai Heau Mauri

Pura toi murinai, dina haida lalonai laini dekenai ai raka ela bona Don Sinavaina ena isena dekenai ai ginidae. Ai idia biagua taudia be ai idia hamaoroa unuseniai do ai mase. Dina ai, anina lasi gaukara ai karaia, dadaira ai geidia bena ai hahonudia lou. Hanuaboi ai, ai loaloa sisina diba.

Dala rua lau laloa. Unai gabu dekenai do ai mase, eiava Germany taudia amo do ai heau mauri bona Russia taudia edia siahu henunai do ai noho. Ai toi sibona ese emai lalona ai hadaia do ai heau mauri toho bona Don Sinavaina mai ena aisi do ai hanaia. December 12, 1942 ai, Iehova ai guriguri henia bena ai heau. Russia ena hetoana dekenai ai ginidae neganai, maoromaoro dibura kamepa dekenai dibura taudia 35,000 ida ai idia atoa. Siahu negana be ia matamaia neganai, dibura taudia 2,300 bamona sibona idia mauri noho. Ma iboudiai be hitolo dainai idia mase.

Ruhaia to Hisihisi Ma Haida

Tuari ena dokona bona hua ma haida ia ore murinai, Russia ena dibura kamepa lalonai lau mauri noho. Dokonai, November 1945 ai, egu hanua, Zahor, dekenai lau ginidae. Aiemai biru gabuna be ia dika, bona gau ibounai lau hanamoa be namo. Egu adavana bona natudia be tuari negana lalonai, biru gabuna dekenai idia gaukara, to October 1944 ai, Russia taudia idia mai noho neganai, ist kahana ai idia heau lao. Aiemai kohu ibounai idia henaoa.

Hisihisi bada gauna be lau ginidae neganai, egu adavana be ia gorere dikadika. February 1946 ai, ia mase. Ena mauri lagani be 38 sibona. Hisihisi bada laganidia ima lalonai ai parara murinai, ai hedavari lou neganai, nega be bada lasi ai moale hebou totona.

Hebou dekenai lau lao bona ruma-ta-ruma-ta gaukarana lau karaia neganai, egu tadikaka amo hahegoada lau abia. Lagani 1947 ai, moni haida lau abitorehai, bona Brno ai, ena daudau be kilomita 400 bamona, hebouhebou ta dekenai lau lao. Unuseniai egu Keristani tadikakadia ida, bona Nathan H. Knorr, unai negai ia be Watch Tower Bible and Tract Society ena presiden, ia noho danu, heduru bona hahegoada bada lau abia.

Tuari murinai aiemai ura kwalimu ai moalelaia daudau lasi. Lagani 1948 ai, Komiunis taudia be ai idia hahisia matamaia. Lagani 1952 ai, pulisi ese Czechoslovakia dekenai Iehova ena Witness taudia edia hesiai gaukara idia gunalaia tadikakadia idia dogoatao, bona lau dekenai kongregesen iboudiai do lau naria ena maduna idia henia. Lagani 1954 ai, lau danu idia dogoatao bona idia gwau lagani hani dibura rumana ai do lau noho. Egu natuna, Ján, bona ena natuna Juraj danu, be edia Keristani gini siri karana dainai dibura rumana ai idia atoa. Lagani rua ai, lau be Prague dekenai Pankrác ena dibura rumana badana ai lau noho. Lagani 1956 ai, ai idia gwauatao, bona lau idia ruhaia.

Ura Kwalimu!

Bena, lagani 1989 ai, Czechoslovakia lalonai, Komiunis dalana ena siahu be ia ore, bona gavamani ese gwaumaoro idia henia Iehova ena Witness taudia be edia gaukara idia karaia totona. Unai dainai, mai gari lasi ida ai hebou bona haroro diba. Unai nega ai, Zahor dekenai idia noho Witness taudia edia namba be 100 bamona. Ena anina be unai hanua dekenai taunimanima 10 10 amo tamona tamona be Witness taudia. Lagani haida sibona gunanai, Zahor dekenai, Kingdom Hall badana mai ena hairai ai haginia, bona ia lalonai taunimanima 200 idia helai diba.

Hari, egu tauanina be ia goada lasi, bona tadikaka ese edia motuka amo Kingdom Hall dekenai lau idia abia lao. Unuseniai lau noho neganai lau moale bona Gima Kohorona stadi lalonai haere karana lau moalelaia bada. Lau ia hamoalea bada gauna be egu ruma bese ena uru toi amo, idia haida, tubudia haida danu, be Iehova idia hesiai henia noho. Idia ta be Czechoslovakia dekenai, Iehova ena Witness taudia edia sekit naria gaukarana ia karaia ela bona ruma bese naria maduna dainai ena sediual ia badinaia diba lasi.

Nega momo hahetoho lau davaria neganai, Iehova be lau ia hagoadaia dainai, ia lau tanikiu henia bada. Ia sibona lau laloa dainai​—‘ita itaia diba lasi Diravana lau itaia bamona’​—lau ia hagoadaia. (Heberu 11:27) Oibe, Iehova ese taunimanima ia hamauria karana lau mamia. Unai dainai, hari inai negai danu, lau hekwarahi kongregesen ena hebou dekenai lau noho, bona egu goada hegeregerena haroro gaukara lalonai Iehova ena ladana lau abia isi totona.

[Picture on page 25]

Kingdom Hall Zahor dekenai

[Picture on page 26]

Gima Kohorona stadi lalonai haere karana ena hahenamo lau laloa bada