Iehova Ena Imana Lalokauna Henunai Lau Gaukara

LAMBROS ZOUMBOS ESE INAI SIVARAI IA GWAURAIA

Gaukara rua amo ta lau abia hidi be namo: Lauegu tamana maragina mai ena moni momo ena hereva do lao abia dae bona iena ruma bona tano momo naria tauna ai do lau lao​—⁠unai amo egu ruma bese ena hekwarahi moni dainai do lau haorea​—⁠eiava Iehova Dirava ena ful-taim hesiai tauna ai do lau lao. Dahaka dahaka idia vara dainai unai gaukara ta lau abia hidi ena badina be mani do lau gwauraia.

LAGANI 1919 ai, lau be Volos, Greece ai, lau vara. Egu tamana ese tatau edia dabua ia hoihoilaia, bona moni kahanai emai noho be namo. To lagani 1930 be kahirakahira neganai bisinesi momo idia dika, unai dainai Tamagu ese ia abia kohuna ena davana ia henia diba lasi bena haida ese iena sitoa idia abia. Lau ese egu tamana ena vairana ena lalohisihisi toana lau itaia negadiai lau lalohisihisi.

Nega sisina lalonai egu ruma bese idia ogogami bada. Dina ta ta iboudiai hora ta ia do noho ela bona sikuli do ia doko, lau ese sikuli lau rakatania haraga bena gavamani ese ia henia anianina abia totona laini ai lau naria noho. Ena be ai ogogami, to maino ai ai noho. Lauegu ura bada be doketa ai do lau lao, to egu mauri laganidia be 16 bamona neganai sikuli lau hadokoa bena moni gaukara lau karaia, egu ruma bese durua totona.

Bena, Tanobada Ibounai Tuarina Iharuana negana lalonai, Germany ena tuari taudia bona Italy ena tuari taudia be Greece lalonai idia vareai bona idia biagua, bona hitolo bada ia vara. Nega momo egu turadia bona egu bamodia lau itaia, hitolo dainai dala ai idia mase​—⁠unai toana be dika herea, lau laloaboio diba lasi! Nega ta, emai famili be dina 40 lalonai paraoa ai ania lasi​—⁠paraoa be Greece taudia edia aniani korikorina. Do ai mauri totona, egu kakana bona lau be kahirakahira hanuadia dekenai ai lao bena emai turadia bona emai varavara amo poteto ai abia.

Gorere be Hahenamo ai Ia Lao

Lagani 1944 ena matamana kahanai, pelurisi gorerena ese lau ia hadikaia. Hua toi hospital lalonai lau noho, bona unai nega lalonai egu kakana ta ese buklet rua be lau ia henia, ia gwau: “Inai oi duahia; lau diba do oi ura henidia.” Buklet edia ladadia be Dirava be Daika? bona Hegima, Watch Tower Bible and Tract Society ese ia halasia gaudia. Lau duahidia murinai, edia anina be hospital ai idia noho taudia ma haida lau hadibaia.

Hospital amo lau doko murinai, Volos Kongregesen ena Iehova ena Witness taudia ida lau hebou matamaia. Doketa ena hereva dainai hua tamona lalonai egu ruma lau rakatania diba lasi, to hospital sibona lau vadivadi loulou heduru abia totona, unai neganai dina ta ta iboudiai hora 6 ia lao 8 lalodiai, Gima Kohorona magasin gunadia bona Watch Tower Society ese ia printaia bukadia ma haida lau duahia. Unai dainai, lauma dalana ai lau goada lau lao haraga.

Lau Roho Mauri Loulou

Lagani 1944 ihuana ai, dina ta lau be patapata ta latanai lau helai, Volos ena loaloa gabuna ta ai. Karaharaga ami bamona oreana taudia haida, Germany ena tuari taudia ese Greece idia biagua karana idia ura henia taudia, ese unai gabu idia koua hegege bena ia lalonai idia noho taudia iboudiai idia dogoatao. Ai ibounai 24 bamona be dala ai idia hakaua lao Gestapo ena hedikwota dekenai, kuku idia haboua rumana lalonai.

Miniti haida murinai, lau kamonai ta ese egu ladana bona loaloa gabuna ai lau hereva henia tauna ena ladana ia hatoa. Greece ena tuari biaguna ta ese ai ia boiria unai, bona ai ia hamaoroa, tuari taudia ese ai idia hakaua lao neganai lauegu varavara ta ese unai ia itaia, bena ia ia hadibaia ai be Iehova ena Witness taudia. Bena Greece ena tuari biaguna ia gwau ai be emai ruma dekenai ai lou lao diba, bona ena dagi kadina be ai ia henia, bena bema ai idia dogoatao lou, do ai gaukaralaia diba.

Kerukeru, sivarai ai kamonai Germany taudia ese idia dogoatao taudia kahirakahira iboudiai idia alaia mase, davana karaia totona, badina be guna Greece ena tuari taudia haida ese Germany ena tuari taudia rua idia alaia mase. Unai neganai lau roho mauri, bona Keristani taudia edia gini siri karana ena namo lau dibaia danu.

Lagani 1944 ena keru matamaia negana ai, ranu lalonai bapatiso lau abia, Iehova lau gwauhamata henia ena toana. Siahu negana ia mai lou bona Witness taudia ese dala idia karaia lau be Sklithro Kongregesen taudia ida do lau hebou. Unai kongregesen be ororo kahanai bona unuseniai lauegu tauanina do ia goada lou momokani diba. Unai neganai Germany ena tuari taudia ese Greece idia rakatania vadaeni, to Greece taudia idia tuari heheni goadagoada. Lau noholaia hanuana be gavamani tuari henia taudia edia gabu ta. Unai hanua ena pris tauna bona dagedage tauna ma ta ese lau idia samania, idia gwau lau be gavamani ena tuari taudia edia hasinadoa tauna, bona dala idia karaia gavamani tuari henia taudia edia kota lalonai lauegu kara do idia nanadailaia totona.

Gavamani tuari henia taudia unai gabu ai edia gunalaia tauna danu be unai kota koikoina ai ia helai. Hanua ai lau noho ena badina lau hamaorolaia, bona lau hamaoroa lau be Keristani tauna dainai lau be taunimanima edia hepapahuahu amo lau gini siri vaitani, bena gunalaia tauna ese taunimanima oredia ia hamaoroa, ia gwau: “Bema ta ese inai tau ia hadikaia, unai tauna do lau hahemaoro henia!”

Gabeai egu hanua Volos lau lou henia, bona unai neganai egu abidadama ena goada ese egu tauanina ena goada ia hereaia.

Lauma Dalana ai Lau Goada Lau Lao

Nega daudau lasi murinai, kongregesen ena akauns naria tauna ai be lau idia halaoa. Ena be tano tamona taudia idia tuari heheni dainai hekwarahi idia vara​—⁠idia ta be nega momo ai idia dogoatao badina be tomadiho gunalaia taudia edia hereva dainai ai idia samania, idia gwau ai ese haida edia tomadiho dalana ai haidaua toho​—⁠to Keristani hesiai gaukarana karaia karana amo lau bona kongregesen taudia oredia ese moale bada ai davaria.

Bena, lagani 1947 ena matamana kahanai, Iehova ena Witness taudia edia sekit naria tauna ta ese ai ia vadivadi henia. Tanobada Ibounai Tuarina Iharuana murinai unai be nega ginigunana unai bamona vadivadi ai abia. Unai neganai aiemai kongregesen Volos ai ena taunimanima idia momo dainai idia haridia kongregesen rua, bena kongregesen ta ena gunalaia tauna ai lau idia halaoa. Unai neganai ami bamona oreadia bona bese ena ladana abia isi oreadia ese taunimanima idia hagaridia. Tomadiho gunalaia taudia be unai amo idia kwalimu toho. Idia ese sivarai koikoina idia gwauraia loaloa, idia gwau ai be Komiunis taudia eiava Komiunis bamona oreadia durua taudia, unai amo gavamani taudia edia lalona idia ania ai do idia inai henia totona.

Lau Idia Dogoatao Bona Dibura Rumana ai Idia Koua Loulou

Lagani 1947 lalonai, nega 10 bamona lau idia dogoatao bona nega toi lau idia kota henia. Unai nega ta ta iboudiai idia gwau lau be kerere lasi. Lagani 1948 ena siahu negana ia matamaia neganai, idia gwau lau be hua hani dibura rumana ai do lau noho, badina be lau ese taunimanima edia tomadiho dalana lau haidaua toho. Idia gwauraia negana lalonai lau be Volos ena dibura rumana ai lau noho. Unai nega lalonai Basileia harorolaia taudia aiemai kongregesen lalonai edia momo be nega rua amo ia bada ia lao, bona moale ese tadikaka edia lalodia ia hahonua.

October 1948 lalonai, lau be emai kongregesen idia hakaua taudia ma 6 ida ai hebou neganai, pulisi taudia ima be ruma ena iduara idia kehoa haraga, bona mai edia ipidi ida ai idia dogoatao. Edia kara ena badina be ai idia hamaoroa lasi, to ai idia hakaua lao pulisi steiseni dekenai bena unuseniai ai idia dadabaia. Pulisi tauna ta, guna ia be boksini gadara tauna, ese egu vairana ia botaia. Unai murinai sel lalonai ai idia negea.

Gabeai, ofesa badana ese lau ia boiria iena opesi dekenai. Iduara lau kehoa neganai, kavabu ta mai ena ink ia negea lau dekenai, to lau ia reaia bena haba ia botaia, ia makohi. Unai bamona ia karaia, lau do ia hagaria totona. Bena pepa ta bona peni ta be lau ia henia, bena lau ia hagania, ia gwau: “Volos ai idia noho Iehova ena Witness taudia iboudiai edia ladana oi torea, bena daba ai unai lista be lau oi henia. Bema oi karaia lasi, oi diba dahaka do ia vara oi dekenai!”

Lau haere lasi, to sel dekenai lau giroa lou neganai, lau bona tadikaka oredia ese Iehova ai guriguri henia. Lauegu ladana sibona be pepa ai lau torea, bena lau do idia boiria negana lau naria. To hereva ma ta be ofesa amo lau kamonai lasi. Hanuaboi ai, idia tuari henia taudia idia mai, bona unai ofesa ese ena orea taudia ia gunalaia unai taudia idia tuari henia totona. Unai tuari lalonai, ia idia haberoa dikadika, bona unai bero dainai doketa ese ena aena ta idia utua oho. Gabeai, kota idia karaia bena idia gwau aiemai kerere be gwaumaoro lasi hebouna ta ai karaia. Idia gwau ai ibounai 7 be lagani ima dibura rumana ai do idia koua.

Dibura rumana lalonai Sunday Mass dekenai lau lao lasi, unai dainai sel ta lalonai lau idia koua, lau sibona do lau noho totona. Dina ihatoina ai, lau noinoi dibura rumana ena biaguna ida do lau herevahereva. Lau hamaoroa, lau gwau: “Mai egu hemataurai ida lau hereva inai. Toana be ena abidadama dainai ena lalona be hegeregere lagani ima dibura rumana ai do ia noho tauna umui panisia be anina lasi.” Lauegu hereva ia laloa namonamo, bena ia gwau: “Kerukeru amo, oi be lau badibadinai do oi gaukara lauegu opesi ai.”

Gabeai, dibura rumana lalonai doketa durua gaukarana lau karaia. Unai dainai, helt naria dalana lau dibaia bada, bena lagani momo murinai unai diba lau gaukaralaia diba. Dibura rumana ai lau noho neganai, nega momo lau be mai egu dala do lau haroro, bona taunimanima toi ese hereva idia abia dae bona Iehova ena Witness taudia ai idia lao.

Kahirakahira lagani hani dibura rumana ai lau noho, bena lagani 1952 ai lau idia ruhaia haraga bona taravatu haida lau idia henia. Gabeai, tuari amo lau gini siri dainai, idia gwau Corinth ena kota rumana ai do lau hedinarai. (Isaia 2:⁠4) Unuseniai, ami ena dibura rumana ai lau idia koua nega kwadogi lalonai, bona haida ese lau idia hadikaia lou. Ofesa taudia haida be mai edia hagaria hereva matamatadia, idia gwau: “Kaia maragina amo emu kudouna do lau utua maragimaragi bona do lau kokia,” eiava, “Oi laloa lasi buleti 6 sibona amo do oi mase haraga.”

Hahetoho Idauna Ta

To, daudau lasi bena lau be egu ruma ai lau noho lou, Volos Kongregesen lalonai lau gaukara lou bona pat-taim moni gaukarana danu lau karaia. Dina ta, revareva ta be Watch Tower Society ena Athens brens opesi amo lau davaria. Idia ura sekit naria gaukarana be pura rua ai lau do idia hadibaia bena sekit naria tauna ai do lau lao, Iehova ena Witness taudia edia kongregesen vadivadi henidia totona. Unai neganai danu, egu tamana maragina ta, mai ena natuna lasi tauna, be mai ena ruma bona tano momo bona lau ia noia unai gau do lau naridia. Lauegu ruma bese be do ogogami, bona unai gaukara ese edia ogogami ia haorea diba.

Egu tamana maragina ese unai gaukara be lau ia henia gwauraia dainai, lau vadivadi henia do lau tanikiu henia totona, to lau hamaoroa danu egu lalona lau hadaia vadaeni Keristani hesiai gaukarana idauna ta do lau karaia. Unai neganai ia gini toreisi, lau ia itaia, bena ia raka lasi haraga. Ia giroa neganai harihari monina be lau ia henia; unai moni be hegeregere egu ruma bese be hua momo lalodiai do ia durua. Ia gwau: “Inai oi abia, emu ura hegeregerena oi gaukaralaia.” Unai neganai egu lalona ena mamina lau gwauraia hedinarai diba lasi, bona lau do gwauraia hedinarai diba lasi. Ia be hegeregere Iehova ena gadona lau kamonai, lau ia hamaoroa, ia gwau, ‘Gau namona oi abia hidi. Lau be oi ida.’

Egu ruma bese ese gwaumaoro be lau idia henia, bena December 1953 ai lau lao Athens. Ena be egu sinana sibona be Witness hahinena ta ai ia lao, to egu ruma bese taudia oredia ese egu Keristani gaukarana idia badulaia lasi. Athens ai brens opesi dekenai lau ginidae neganai, ma hoa gauna ta ese lau ia naria. Gauna be telegram revarevana, egu taihuna ese ia siaia gauna. Ia lalonai ia gwau Tamagu be lagani rua lalodiai ia tahua gauna, welfea pensen monina, be unai dina ai ia abia vadaeni. Ma dahaka do lau noia diba? Egu mamina be lau be mai egu apena, lau hegaegae ataiai do lau roho lao Iehova ena hesiai gaukara lalonai!

Lau Naria Namonamo

Sekit naria gaukarana lau karaia lagani ginigunadia ai lau naria namonamo, badina be tomadiho bona politikol gunalaia taudia ese Iehova ena Witness taudia idia dagedage henia dikadika. Iseda Keristani tadikaka vadivadi henidia totona, lau be hora momo dibura lalonai lau raka, ta ese lau do ia itaia garina, bona taoni maragidia bona hanua maragidia dekenai lau lao neganai unai be mai anina bada. Tadikaka, ena be reana haida ese do idia dogoatao, to ruma ta lalonai idia hebou bona idia naria ela bona lau ginidae. Unai vadivadi negadia ai, ai ibounai be mai emai dala ai hagoadaia heheni totona!​—⁠Roma 1:​11, 12.

Nega haida lau ese egu oromana lau haidaua, bena pulisi taudia idia diba lasi lau be daika. Nega ta lau ese mamoe naria tauna ena dabua lau atoa, unai amo lau ese pulisi idia koua dalana lau hanaia diba, tadikaka haida, lauma dalanai heduru bada idia abia be namo taudia, do lau vadivadi henia totona. Ma nega ta, lagani 1955 ai, lau bona ma Witness tauna ta be galiki hoihoilaia taudia bamona ai kara, bena pulisi idia laloa lasi ai be Witness taudia. Unai neganai emai gaukara be Keristani tadikakadia haida hanua maragina Árgos Orestikón ai do ai vadivadi henia, badina be haroro gaukarana idia hadokoa vadaeni.

Unai taoni ena maketi dekenai ai lao bena galiki ai atoa hedinarai, taunimanima do idia hoia totona. To, pulisi tauna matamatana ta, unai gabu ai ia raka loaloa tauna, ese ai ia daradaralaia, bona ai ia hanaia negadia iboudiai, ai ia raraia mai ena daradara ida. Dokonai, lau ia hereva henia, ia gwau: “Oiemu oromana be galiki hoihoilaia tauna ena oromana bamona lasi.” Unai neganai, hahine matamatadia toi idia raka mai bona idia gwau idia ura galiki do idia hoia. Lauegu galiki lau poinia, bena lau gwau: “Inai pulisi tauna matamatana ese inai bamona galiki ia ania, bona umui itaia, ena tauanina ia goada bona ia be mai hairai!” Hahine ese pulisi tauna idia itaia bona idia kiri. Ia danu ia kiri bena ia raka oho.

Ia raka oho neganai sitoa ta lau lao, unuseniai iseda lauma tadikakadia ese dabua turia gaukarana idia karaia. Idia ta lau noia egu kouti ena pitopito ta, lau darea oho gauna, do ia turia lou. Unai ia karaia lalonai, ia kahirakahira dekenai lau lao bena lau hereva maragi, lau gwau: “Lau be brens opesi amo lau mai, umui do lau itaia totona.” Matamana ai tadikaka idia gari, badina be lagani momo lalodiai Witness taudia ma haida idia itaia lasi. Lauegu diba hegeregerena lau hagoadadia, bona nega ai gwauraia hidi unai taoni ena gara gabuna ai do ai hebou, herevahereva lou totona. Ai moale, badina be emai vadivadi ese ia hagoadadia bena Keristani haroro gaukarana idia goadalaia lou.

Bamona Namona Lau Abia

Lagani 1956 ai, sekit naria gaukarana be lagani toi lau karaia vadaeni neganai, Keristani hahinena matamatana ta ladana Niki lau hedavari henia. Ia be haroro gaukarana ia ura henia bada bona ia ura ena mauri orena lalonai ful-taim hesiai gaukarana do ia karaia. Ai ura heheni bena June 1957 lalonai ai headava. Lau laloa gauna be Niki do ia hegeregere eiava lasi lau do ia bamoa sekit naria gaukarana lau karaia neganai, badina be unai neganai Greece lalonai idia ese Iehova ena Witness taudia idia inai henidia. Iehova ena heduru amo ia hegeregere, unai dainai Greece lalonai ia be hahine ginigunana ena adavana be sekit naria gaukarana ai ia bamoa.

Lagani 10 lalodiai Niki ese lau ia bamoa sekit naria gaukarana ai, bona unai nega lalonai Greece ena kongregesen kahirakahira iboudiai ai vadivadi henia. Nega momo emai oromana ai haidaua, emai sutkeisi ai abia, bena hora momo dibura lalonai ai raka lao kongregesen ta dekenai. Ena be nega momo haida ese ai idia inai henia bada, to Witness taudia be hoa dalanai idia momo idia lao negana ai itaia diba dainai ai moale bada.

Betele Gaukarana

January 1967 ai, Society ese lau bona Niki idia boiria Betele lalonai do ai gaukara totona, unai be Iehova ena Witness taudia edia brens opesi. Edia hereva ai hoalaia, to ai abia dae, badina be ai diba momokani Iehova ese unai ia biagua. Gabeai, ai lalo-parara, unuseniai, tiokratik gaukarana idia gunalaia gabuna dekenai ai gaukara be hahenamo badana.

Betele gaukarana ai karaia matamaia bena hua toi murinai, ami ese siahu ia abia bena ia ese gavamani ia biagua, unai dainai Iehova ena Witness taudia ese edia gaukara idia karaia hehuni bamona. Grup maragidia lalonai ai hebou, emai sekit hebouheboudia be uda lalonai ai karaia, aonega dalanai ai haroro, bona Baibel gwauraia bukadia be hehuni dalanai ai printaia bona ai hariharilaia. Unai bamona ai karaia be auka lasi, badina be guna lagani momo lalodiai ai gaukara dalana be unai neganai ai karaia lou. Ena be emai gaukara momo idia taravatua, to Witness taudia edia momo ia bada daekau. Lagani 1967 ai edia momo be kahirakahira 11,000, to lagani 1974 ai ia be 17,000 bamona.

Niki bona lau be kahirakahira lagani 30 Betele gaukarana ai karaia, bona ena be emai goada be mai hetoana bona ai buruka, to lauma dalanai ai abia hahenamodia ai do moalelaia noho. Lagani 10 mai kahana lalonai, brens rumana Kartali Street, Athens, lalonai ai noho. Lagani 1979 ai, brens rumana matamatana ta Marousi, Athens kahanai, idia hahelagaia. To lagani 1991 amo ema bona hari, ai be brens rumana matamatana badana ta ai noholaia bona ai moalelaia, Eleona dekenai, Athens ena not kahanai. Eleona bona Athens edia padana be kilomita 60. Iniseniai lau ese Betele ena gorere taudia naria gaukarana lau karaia, bona guna dibura rumana ena doketa lau durua neganai lau abia dibana, be hari lau gaukaralaia diba.

Lagani 40 mai kahana lalodiai ful-taim hesiai gaukarana lau karaia vadaeni, bona unai nega lalonai, Ieremia hegeregerena, lau ese Iehova ena gwauhamata lau hamomokania: “Inai taudia ibounai ese oi do idia heai henia, to idia ta ese oi do ia halusia lasi. Badina be, lau be oi dekenai lau noho, bona oi do lau durua. Lau Lohiabada lau hereva inai.” (Ieremia 1:19) Oibe, Niki bona lau be hahenamo momo herea Iehova ena amo ai moalelaia. Iena lalokau bada bona ena hariharibada ai moalelaia hanaihanai.

Lauegu hagoadaia herevana Iehova ena orea lalonai idia noho memero bona kekeni dekenai be ful-taim hesiai gaukarana do idia tahua be namo. Unai dala amo Iehova ena hereva idia tohoa diba, ia ese ena gwauhamata do ia hamomokania eiava lasi. Ia gwau: “Lau ese guba ena uindo do lau kehoa, bona gau namodia momo herea umui dekenai do lau bubua diho.” (Malaki 3:10) Lau dekenai idia vara gaudia dainai, lau hamomokania diba, Iehova ese umui memero kekeni, ia umui abidadama henia vaitani taudia, iboudiai do ia hanamoa.

[Picture on page 26]

Lambros Zoumbos bona ena adavana, Niki