Abraham Dirava Ena Peroveta Tauna Bona Ena Turana

EAST kahana amo idia mai king 4 edia tuari oreadia iboudiai be Eufrate Sinavaina idia hanaia. Idia lao dalana be King edia Dala Badana, unai be Ioridane Sinavaina kourana ena mairiveina kahana dekenai. Idia lao neganai idia be Refaim taudia, Susim taudia, Emim taudia, bona Hori taudia idia tuari henidia bona idia kwalimu. Bena, tuari taudia idia giroa Negeb ena diho kahana ai idia noho taudia dekenai idia kwalimu danu.

Inai tuari ena badina be dahaka? Transjordan bona Negeb ena huanai be kwalimu taudia ese do idia abia tanona ta. Ia be koura namo hereana ladana Ioridane Kourana. (Genese 13:10) Unuseniai, hanua 5 dekenai idia noho taudia, Sodoma, Gomora, Adama, Seboimi bona Bela be mai edia kohu bada bona edia mauri be hekwarahi lasi bamona. (Esekiel 16:​49, 50) Guna, idia be Elam tano ena king, Kedoralaomere ena tuari taudia henunai idia noho. To idia gwau-edeede henia bona idia lulua. Hari, idia be durua taudia lasi dainai, tuari do ia vara davana idia abia totona. Unai tuari lalonai, Kedoralaomere bona iena tuari taudia idia kwalimu bona murinai gabu daudau dekenai idia raka giroa edia gabuna dekenai bona kohu bada danu idia laohaia.

Idia abia tauna ta be kara maoromaoro tauna, Lota. Ia be Abraham tadina ena natuna. Abraham be ororo gabuna Hebron dekenai ia noho. Abraham be unai sivarai dikana ia kamonai neganai, maoromaoro ia ese iena tatau 318 ia haboudia. Ia gari lasi, bona ena dekena taudia danu ese idia durua. Idia be unai king 4 idia luludia bona hanuaboi ai edia tuari taudia dekenai idia ginidae bona unai tuari taudia idia hoa bona idia heau oho. Lota bona ena ruma bese idia abidia lou, mai edia hesiai taudia bona kohu danu.

Badina be dahaka inai sivarai Genese karoa 14 dekenai ita hamomokania diba? Unai be sivarai koikoi ta idia gwauraia, a? Bese momo, Iuda taudia danu, edia sene tauna idia abia isi bada totona, a? To Abraham ena mauri dekenai idia vara gaudia ma haida be edena bamona?

Dubu Taudia edia Hereva

Lagani 1800 bamona neganai, Lutheran tomadiho ia stadilaia tauna, Peter von Bohlen, ia gwau Abraham sivaraina be gori sibona bona Kedoralaomere ena tuari be tanobada ena sivarai dekenai idia hamomokania diba lasi gauna ta. Ma tau ta, Profesa Julius Wellhausen, ia gwau: “Ita be bese badadia edia sene taudia edia sivarai ita hamomokania diba lasi.” Ia gwau: “Namona be [Abraham] ita laloa neganai ita diba ia be gori lalonai idia gwauraia kava tauna ta.”

England dekenai tomadiho idia stadilaia taudia be German tomadiho idia stadilaia taudia bamona idia hereva. Dubu tauna, Stopford Brooke, iena buka The Old Testament and Modern Life dekenai ia gwau: “Genese dekenai sene taudia edia sivarai be tanobada ena sivarai idia do hamatamaia lasi negana ena sivarai sibona, edia sivarai ita hamomokania diba lasi, ita be King Arthur ena sivarai ita hamomokania diba lasi hegeregerena.” John Colenso be Anglican Bisop, England taudia be guna idia lohiaia gabuna Natal dekenai, bona ia gwau: “Genese amo ita be bese badadia edia sivarai ita davaria namonamo diba lasi. Ita be unai sivarai ta lasi ita hamomokania diba.”

Unai bamona samania herevadia be toto bamona idia bada idia lao. (2 Timoteo 2:17) Hari inai negai, dubu dekenai idia lao taudia momo be sene taudia edia sivarai idia abia dae lasi. To, Kerisendom ena tomadiho idia stadilaia taudia idia hemarai, badina Dirava idia abia dae lasi taudia idia gwau namona be Bible samania herevadia idia hadokoa. Haheitalai ta be, Bol’shaia Sovetskaia Entsiklopediia (Soviet edia Diba Buka Badana) ia gwau: “Vanegai lagani haida dekenai, Bible samania hereva haida idia tahua lou, edia diba matamata hegeregerena, bena tano idia geia neganai unai diba matamata haida be Bible ena hereva idia hamomokania. Guna idia laloa Bible sivarai haida be gori sibona, to hari idia laloa idia be mai edia momokani.” Tano idia geia gaukarana ese Abraham ena sivarai ia hahedinaraia dalana do ita laloa sisina.

Uru, Kaldea dekenai

Bible ia hereva hegeregerena, Abraham ia tubu gabuna be “Uru, Kaldea taudia edia hanua” dekenai. (Genese 11:​27-31; 15:7) Lagani daha momo lalodiai, Uru gabuna idia diba lasi. Unai sivarai idia samania taudia idia gwau bema ia be momokani guna ia noho gabuna ta, ia be taunimanima momo lasi, gabu dikana sibona. Murinai, idia hemarai badina Babulono bona Persian Gulf ena huanai gabu ta idia davaria bona idia daradara lasi unai gabu be Uru hanuana. Tano idia geia neganai, kopukopu nadidia idia davaria bona idia hahedinaraia Uru be tanobada ena maketi gabuna badana, bona taunimanima momo tano idauidau amo be unuseniai idia noho. Abraham ena negai, unai hanua dekenai sikuli idia noho bona memero idia lao toretore bona arithmetic idia diba totona.

Ma danu, Uru dekenai tano idia geia noho bona ia hahedinaraia ruma idia palani taudia ese ruma toana idauidau idia gaukaralaidia. Hegeregere, ruma haida dekenai du latadia idia gaukaralaidia, ruma haida dekenai guhi ena toana haida be kuboro, guhi haida be atai herea sitailo idauidau dekenai. Uru taudia be tauanina hahairaia gaudia hereadia idia karadia, miusik gaudia namodia idia karaia, bona kaia be golo korikori amo idia karaia. Ruma momo dekenai, tano idia geia taudia be paipa idia davaridia, idia be kopukopu aukadia amo idia karaia, taunimanima edia kukuri idia abia oho totona. Idia be mita 12 dekenai tano idia geia kukuri ena ranu idia kokia oho totona.

Inai gaudia idia davaria neganai, diba taudia momo edia lalohadai Abraham dekenai idia haidaua. Sir Leonard Woolley be iena buka Digging Up the Past lalonai ia gwau: “Ai laloa Abraham be palai dekenai ia noho tauna sibona; ai diba lasi ia be ruma namo herea dekenai hanua badana ai ia noho tauna.” Allan Millard be iena buka Treasures From Bible Times dekenai ia gwau: “Abraham be diba bona kohu momo hanua badana ia rakatania bona ena noho namo bona durua gaudia ia rakatania danu, ia be taunimanima ese idia dadaraia loaloa tauna ai ia lao totona!”

Kedoralaomere Ia Tuari Karaia

To Abraham be Elam ena king, Kedoralaomere ia kwalimu henia ena sivarai be edena bamona? Lagani 1800 bamona, taunimanima momo be Elam taudia edia sivarai idia diba momo lasi. Bible idia samania taudia idia gwau Elam taudia be siahu lasi Babulono taudia bona Palestine taudia dekenai. To hari edia lalohadai Elam taudia dekenai be idau. Sivarai gunadia idia diba totona tano idia geia taudia idia davaria idia be tuari dekenai idia goada bada taudia. Funk & Wagnalls Standard Reference Encyclopedia bukana ia gwau: “Elam taudia be Uru hanuana idia hadikaia ore lagani 1950 B.C. ai. . . . Gabeai idia be mai edia siahu bada Babulono ena lohia taudia dekediai.”

Ma danu, tano lalonai idia davaria toretore gaudia dekenai, Elam taudia edia king ladadia idia torea. Idia haida edia ladadia idia matamaia “Kedora,” eiava “Chedor” bamona. Elam ena dirava hahine badana ta be Lagamar, unai be “laomere” bamona. Unai dainai, tanobada diba taudia haida idia gwau Kedoralaomere be guna ia noho momokani lohia tauna ta, bona reana iena ladana anina be “Lagamar ena Hesiai Tauna.” Babulono ena toretore haida dekenai ladadia haida be tuari idia karaia king edia ladadia bamona​—Tudhula (Tidala), Eri-aku (Ariok), bona Kudur-lahmil (Kedoralaomere). (Genese 14:1) Doketa A. Custance be Hidden Things of God’s Revelation bukana dekenai ia gwau: “Inai ladadia sibodia lasi, to ma hereva haida danu be Babulono dekenai idia vara gaudia, hegeregere Elam taudia be unai gabu dekenai idia lohia neganai idia gwauraia. Inai toretore ese Bible ena hereva idia hamomokania, unai dainai Bible Idia Samania Taudia Badadia ese edia siahu ibounai idia gaukaralaia edia hereva bona edia anina idia hunia totona.”

To king 4 be unai tano dekenai idia vareai idia tuari karaia totona be edena bamona? Transjordan bona Negeb dekenai gau haida ese unai sivarai idia hamomokania diba. Oibe. Iena buka The Archaeology of the Land of Israel dekenai, Profesa Yohanan Aharoni ese Israel taudia ia herevalaidia. Ia gwau idia be Transjordan bona Negeb dekenai idia noho, ma taunimanima haida idia do noholaia lasi neganai, hanua “badadia” lalodiai, “lagani 2000 B.C.E. bamona.” Tano idia geia taudia ma haida idia gwau inai bamona ia vara lagani 1900 B.C.E. bamona. Doketa Harold Stigers be iena buka Commentary on Genesis lalonai, ia gwau: “Negeb bona Transjordan dekenai idia davaria urodia be gau tamona idia hahedinaraia: taunimanima edia noho be haraga herea ia doko.” Bible idia samania taudia, idia ta be John Van Seters danu, ese inai hereva ia abia dae. Iena buka Abraham in History and Tradition lalonai ia gwau: “Ita diba lasi gauna be inai nega ia doko neganai, idia be edeseniai idia lao.”

Genese karoa 14 be inai gau dekenai ita ia hadibaia reana. Bible ese ia herevalaidia gaudia edia nega ita stadilaia neganai, ita diba, Abraham be lagani 1943 B.C.E. ai, Kanana dekenai ia ginidae. Unai nega sisina murinai, Kedoralaomere be ia mai tuari ia karaia totona. Lagani 100 ia do hanai lasi lalonai, Dirava ese lebulebu hanuadia Sodoma bona Gomora, lahi amo ia hadikadia ore. Inai ese Ioridane Kourana, guna tubutubu gaudia idia tubutubu namo gabuna, ena diho kahana ena tano ia hadikaia ema bona hari. (Genese 13:​10-13; 19:​24, 25) Hari tuari totona idau tano amo idia mai taudia idia ura lasi unai gabu.

Haheitalai momo amo ita itaia tano idia geia taudia edia stadi ese Bible ena hereva ia hamomokania, Abraham ena mauri dekenai idia vara gaudia be momokani. To tano idia geia taudia be gau haida idia diba lasi. Idia hamomokania herevadia haida be idia hamomokania momokani diba lasi, bona idia kerere diba taudia sibodia ese unai hereva edia anina idia gwauraia idauidau.

Ita Abia Dae Diba Momokani Herevadia

Abraham be guna ia noho momokani ena hamomokania hereva badana be taunimanima Ia Karadia Tauna amo, Iehova Dirava. Salamo 105:​9-15 dekenai, Dirava ese Abraham, Isako, bona Iakobo ia gwauraidia namo, iena “peroveta” taudia bamona. Abraham ia mase lagani 300 murinai, Iehova Dirava ese peroveta taudia toi amo Abraham ia herevalaia bona ia gwauraia iena “turana.” (Isaia 41:8; 51:2; Ieremia 33:26; Esekiel 33:24) Unai hegeregerena, Iesu Keriso ese Abraham ia gwauraia haheitalai namona tauna ta. Guba dekenai ia noho, ia be tanobada dekenai ia do mai lasi neganai, Dirava ena Natuna be iena Tamana ena kara unai sene tauna dekenai ia itaia. Unai dainai, Iuda taudia dekenai ia hereva diba:

“ ‘Bema umui be [Abraham] ena natuna, umui ese [Abraham] ena kara do umui karaia. Lau be Driava dekena amo lau kamonai herevana sibona lau gwauraia umui dekenai. To hari umui ura lau do umui alaia mase. [Abraham] be unai bamona ia karaia lasi. Emui tamana [Abraham] be ia ura dikadika lauegu nega ia itaia, vadaeni ia itaia, mai moale danu.’ Iuda taudia idia gwau, ‘Oiemu lagani be 50 do ia abia lasi, oi be [Abraham] oi itaia, a?’ Iesu ia haere idia dekenai, ia gwau, ‘Momokani, momokani umui lau hamaoroa. [Abraham] do ia vara lasi, lau be lau noho.’ ”​—Ioane 8:​39, 40, 56-58.

Tanobada bona guba dekenai idia noho Taunimanima Badadia rua ese unai hereva idia hamomokania bona ita idia hagoadaia ita abia dae totona dainai, Bible ena hereva ibounai Abraham dekenai ita abia dae momokani diba. (Ioane 17:​5, 17) Ena be Bible ese Abraham ia gwauraia haheitalai namona tauna ta, to bese ta ena tau goadana ta hegeregerena idia gwauraia lasi. Inai ita itaia diba ia be king 4 dekenai ia kwalimu henidia murinai ia vara gauna amo. Abraham be tuari amo ia giroa neganai, Salem ena king, Melkisedek, ia gwau: “Atai Momokani Dirava lau hanamoa inai. Ia ese kwalimu oi dekenai ia henia oiemu inai taudia dekenai.” Ia ese Iehova ia hanamoa Abraham be tuari dekenai ia kwalimu dainai.​—Genese 14:​18-20.

To, kwalimu negana badana momokanina be kahirakahira do ia mai! Nega sisina murinai, inai hairai Diravana ese “tanobada edia king ibounai” do ia tuari henidia bona do ia kwalimu tanobada ibounai tuarina Aramagedono dekenai. (Apokalupo 16:​14, 16) Bena, Dirava ena gwauhamata, iena peroveta tauna bona turana Abraham dekenai, be do ia guguru momokani: “Oiemu garana dainai, tanobada bese iboudiai be sibodia idia hanamoa.” Taunimanima milion momo be hari unai hahenamo idia mamia. Oi danu be idia bamona oi lao diba, inai magasin ena sivarai rau XX dekenai ese idia hahedinaraia hegeregerena.​—Genese 22:​18, NW.

[Maps/Pictures on page 7]

(For fully formatted text, see publication)

Davara Badana

NEGEB

Damaseko

Harana

Eufrate Sinavaina

Tigiris Sinavaina

Uru

ELAM

Parasa Davara

[Map]

Damaseko

Dan

REFAIM

SUSIM

Sekema

Betele

Ioridane Kourana

Tadi Gohuna

Heberona

NEGEB

King edia Dala Badana

EMIM

Gomorah

Sodom

HORI

[Pictures]

Abaraham ia kamonai, Uru, kohu bada hanuana, ia rakatania

Uru edia karaia gaudia haida:

1. Golo kaia bona ena puse

2. Uru hanua ena ‘Maka’

3. Miusik gauna ena hahairaia gauna be boromakau ena kwarana ta

4. Hairai gaudia

5. Kwarana ena hahairaia gauna

[Credit Line]

British Museum ese gwaumaoro idia henia foto ai printaia totona