‘Unai Nega Taudia Dikadia’ amo Ia Hamauridia

“Inai nega noho taudia be dahaka abidadama lasi taudia!”​—LUKA 9:41.

1. (a) Iseda nega dikana ese ia hahedinaraia dahaka do ia vara? (b) Baibel ese roho mauri taudia edena bamona ia gwauraia?

ITA be nega dikana lalonai ita noho. Tano-marere, abata, hitolo bada, daihanai goreredia, taravatu utua karadia, bomu hapoua karadia, tuari dika rohorohodia​—hari inai nega lalonai unai bona ma gau haida ese taunimanima idia hadikaia. To nega daudau lasi “hisihisi bada herea do [ia] vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” (Mataio 24:21) To, ita momo ese moale negana ita naria diba! Badina be dahaka? Badina be Dirava ena Hereva ese “hutuma bada herea” ia gwauraidia, ia gwau: “Tau ta ese ia duahidia diba lasi, bese idauidau bona iduhu idauidau bona kopina idauidau bona gado idauidau amo . . . ‘Inai be hisihisi badana lalona amo idia mai taudia . . . Do idia hitolo lasi o do idia ranu mase lasi . . . Bona Dirava ese edia matana ranu be edia matana amo do ia dahua oho.’ ”​—Apokalupo 7:​1, 9, 14-17, NW.

2. Peroveta herevadia Mataio 24, Mareko 13, bona Luka 21 edia siri ginigunadia ai, edia anina be edena negai idia vara, nega ginigunana?

² Iesu ena peroveta herevana, “tanobada dokona” herevana, be Dirava ena lauma helaga amo Mataio 24:​3-22, Mareko 13:​3-20, bona Luka 21:​7-24 ai idia torea.a Aposetolo edia negai, unai peroveta herevana ena anina be Iuda besena dikana latanai ia vara, nega ginigunana unai. Dokona ai, “hisihisi bada herea” be Iuda taudia latadiai ia vara. Edia tomadiho oreana ibounai bona edia politikol oreana ibounai, Ierusalema ena dubu ai edia hedikwota idia noho oreadia, iboudiai idia hadikaia ore, bena ta ese ia haginia lou lasi.

3. Dahaka dainai hari inai negai Iesu ena peroveta herevana ita kamonai henia haraga be namo?

³ Vadaeni, Iesu ena peroveta herevana ena anina ia vara negana ginigunana mani ita laloa. Unai ese ita do ia durua, hari inai negai ena anina ia vara dalana do ita lalo-pararalaia totona. Ita do ia hadibaia, namona be harihari do ita kara, tanobada taudia iboudiai dekenai do ia vara hisihisina bada hereana amo do ita roho mauri totona.​—Roma 10:​9-13; 15:4; 1 Korinto 10:11; 15:58.

“Dokona”​—Edena Negai?

⁴ Lagani 539 B.C.E. bamona ai, Dirava ese ena peroveta tauna Daniela be mata hanai ta ia henia, lagani edia “pura 70” negana ena “pura” ginigabena lalonai do idia vara gaudia ia hahedinaraia ia dekenai. (Daniela 9:​24-27, NW) Lagani 455 B.C.E. ai, Parasa ena King Aratasaseta ese ia haganidia Ierusalema hanuana do idia haginia lou neganai, unai “pura” idia matamaia. Gabeai, Mesia, Iesu Keriso, ia hedinarai neganai, “pura” ginigabena ia matamaia; lagani 29 C.E. ai bapatiso ia abia bona Dirava ese ia horoa negana unai.b Unai negai, Dirava idia gari henia Iuda taudia be Daniela ese ia perovetalaia negana idia diba goevagoeva. Unai hegeregerena, lagani 29 C.E. ai Ioane Bapatiso ena haroro kamonaia totona idia aru lao taudia hutuma be Luka 3:15 ese inai bamona ia gwauraidia: “Taunimanima idia laloa daradara, bona idia laloa momo, idia gwau, ‘Sedira Ioane be Keriso o?’ ”

⁵ “Pura” namba 70 ena anina be lagani 7, idia lalodiai Iehova ese Iuda taudia ia durudia bada. Unai pura be lagani 29 C.E. ai ia matamaia; ia lalonai Iesu be bapatiso ia abia, ia haroro, bona pura “ena kahana” ena dokona ai, lagani 33 C.E. ai, boubou gauna bamona ia mase. Bena pura “ena kahana” ma ta ia hesiriu ela bona lagani 36 C.E. Unai “pura” lalonai, dala ia kehoa, Dirava idia gari henia Iuda taudia bona Iuda ai idia halaodia taudia sibodia mo be Iesu ena horoa hahediba taudia ai do idia lao diba. Bena lagani 70 C.E. ai, Roma ena tuari oreadia be Titus ese ia gunalaidia neganai, idia ese Iuda besena, Dirava ia dadaraia besena, naria oreadia be idia haorea.​—Daniela 9:​26, 27.

6. Lagani 66 C.E. ai “gau dika rohorohona” be edena bamona ia kara matamaia, bona unai dainai Keristani taudia be edena bamona idia kara?

⁶ Unai dala amo idia ese Iuda ena hahelaga oreana, Ierusalema ena dubu ia hamiroa bona Dirava ena Natuna hamasea dalana ia lailaia oreana, be idia haorea. Edia tubuna bona sene taudia edia ladadia edia lista danu idia hadikaia ore. Unai murinai, Iuda tauna ta lasi ese ia hamomokania diba ia be hahelaga iduhuna tauna o pavapava iduhuna tauna. To Iehova Dirava ese horoa lauma Iuda taudia be unai bese bogaragina amo ia abia hidi vadaeni, bona pavapava hahelaga oreana ai ia halaodia vadaeni, ‘iena hoa kara badadia do idia gwauraia hedinarai.’ (1 Petero 2:9) Lagani 66 C.E. ai, Roma ena tuari oreadia ese nega ginigunana Ierusalema idia koua hegege bona dubu ena magu henunai tano idia geia neganai, Keristani taudia edia lalona idia parara, unai orea be “peroveta tauna Daniela ese guna ia gwauraia, gau dika rohorohona, gabu ia hadikaia gauna, Dubu Helaga ena lalonai ia gini.” Keristani taudia Ierusalema bona Iudea dekenai ese Iesu ena peroveta haheganina idia badinaia; ororo gabuna dekenai idia heau lao.​—Mataio 24:​15, 16; Luka 21:​20, 21.

7, 8. Keristani taudia ese dahaka ‘toa’ idia itaia, to idia be dahaka idia diba lasi?

⁷ Unai Iuda Keristani taudia mai edia kamonai ese Daniela ena peroveta herevana ena anina ia vara be idia itaia, bona tuari, hitolo badadia, daihanai goreredia, tano-marere, bona taravatu utua karadia danu idia itaia, unai gau be Iesu ese ia perovetalaia, ia gwau idia be “tanobada dokona . . . ena toana” ena kahana. (Mataio 24:3) To Iesu ese ia hamaorodia vadaeni edena negai Iehova ese unai bese dikana do ia panisia, a? Lasi. Ia be pavapava siahuna ai do ia lou mai negana lalonai do ia vara gauna badana ia perovetalaia neganai ia gwauraia herevana be mai anina bada, lagani 70 C.E. ai ia vara ‘hisihisina bada hereana’ dekenai: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba.”​—Mataio 24:​36.

⁸ Daniela ena peroveta herevana amo, Iuda taudia ese Iesu be Mesia bamona do ia hedinarai laganina idia davaria diba. (Daniela 9:25) To, “hisihisi bada herea,” Iuda besena dikana do ia hadikaia momokani gauna, do ia vara laganina ia hadibadia guna lasi. Idia diba lasi unai lagani be 70 C.E., ela bona Roma taudia ese Ierusalema bona ena dubu idia hadikaia ore murinai. To Iesu ena peroveta herevana idia diba: “Inai nega idia noho taudia do idia mase ore lasi neganai, be inai gaudia ibounai do idia vara momokani.” (Mataio 24:34) Toana be, unai siri lalonai ‘unai nega idia noho taudia’ (unai uru) ia gwauraia neganai, “uru” ena anina ia gwauraia idau, Hadibaia Tauna 1:​4 ese ia gwauraia bamona lasi; unai siri ese uru ia gwauraidia, nega daudau lalonai murina murina amo idia vara bena idia lao boio.

“Inai Nega Noho Taudia”​—Anina be Dahaka?

⁹ Aposetolo hani Olive Ororona ai Iesu ida idia helai hebou bona ena peroveta herevana, “tanobada dokona” herevana, be idia kamonai neganai, inai hereva, “inai nega taudia,” be edena bamona idia laloa? Evanelia bukadia lalodiai inai hereva “inai nega taudia” be Greek gado herevana ge·ne·aʹ ida idia hahegeregerea. Diksenari haida idia gwau ena anina be inai: ‘Sene tauna tamona amo idia vara taudia.’ (Walter Bauer ena Greek-English Lexicon of the New Testament) “Idia havaraia taudia, famili ta; . . . bese ta taudia, uru ta ta ai murina murina amo idia vara . . . eiava bese ta . . . eiava nega ta ai idia noho taudia iboudiai, Mat. 24:34; Mareko 13:30; Luka 1:48; 21:32; Fil. 2:​15, bona Iuda bese taudia iboudiai, nega ta ai idia noho.” (W. E. Vine ena Expository Dictionary of New Testament Words) “Idia havaraia taudia, bese tamona taudia, famili ta; . . . nega ta ai idia noho taudia iboudiai; Mat. 24:34; Mar. 13:30; Luka 1:48 . . . Iuda bese taudia, nega ta ai idia noho taudia.”​—J. H. Thayer ena Greek-English Lexicon of the New Testament.

10. (a) Greek gado diba momo taudia rua mai edia ladana bada ese unai hereva ena anina Mataio 24:34 dekenai be edena dala tamona amo idia gwauraia? (b) Tomadiho ena diksenari ta bona English gado ai Baibel idia torea hanai taudia haida ese unai edena bamona idia hamomokania?

¹⁰ Unai hegeregerena, Vine bona Thayer ruaosi ese Mataio 24:34 idia gwauraia, idia gwau unai siri lalonai inai hereva he ge·ne·aʹ hauʹte edia anina be “nega ta ai idia noho taudia iboudiai.” Theological Dictionary of the New Testament (1964) ese unai ia hamomokania, ia gwau: ‘Iesu ese unai hereva ia gwauraia ese ia hahedinaraia ia ese unai bese ibounai ia herevalaia bona ia diba unai bese taudia be kara dika lalonai idia lalo-tamona.’ Momokani, Iesu be tanobada ai ia noho neganai, Iuda bese taudia idia hahedinaraia idia be “kara dika lalonai idia lalo-tamona,” tanobada taudia be hari inai negai idia kara hegeregerena.c

11. (a) Daika ese ita do ia hakaua be namo, he ge·ne·aʹ hauʹte ena anina gwauraia maoro dalana do ita davaria totona? (b) Ia ese unai hereva be edena bamona ia gwauraia?

¹¹ To, momokani, Keristani taudia ese inai Greek gado herevadia he ge·ne·aʹ hauʹte edia anina idia tahua neganai, Dirava ena lauma amo Evanelia idia torea taudia ese Iesu ena hereva idia torea negadiai idia gaukaralaia dalana idia laloa guna. Iesu ese dala tamona ai ia gwauraia, haida ia gwauraidia dika negadiai. Unai hegeregerena, Iuda ena tomadiho gunalaia taudia ia gwauraidia ‘gaigai, koria gaigai edia natuna,’ bena ia gwau Gehena ena panisi be “inai nega ena taunimanima” latadiai do ia vara. (Mataio 23:​33, 36) To, unai tomadiho gunalaia taudia mai koikoidia mo ese unai panisi do idia abia, a? Lasi vaitani. Nega haida, Iesu ena hahediba taudia be idia kamonai, “inai nega ena taunimanima” ia herevalaidia negadiai, unai hereva ena anina be dala tamona amo ia habadaia momokani. Unai be dahaka?

‘Inai Nega Noho Taudia Dika Momokani’

¹² Lagani 31 C.E. ai, Iesu be haroro gaukarana badana Galilea dekenai ia karaia noho lalonai, nega sisina Pasova murinai, ena hahediba taudia idia kamonai, “taunimanima momo” ia hereva henia, ia gwau: “Inai nega taudia be daika danu idia hegeregere, do lau gwauraia? Idia be memero maragimaragi bamona, hanua lalonai idia helai, edia turadia dekenai idia boiboi. Idia gwau, ‘Ai be gita ai gadaralaia, to umui be umui mavaru lasi. Ai be mase guria ane ai abia, to umui be umui taitai lasi.’ Badina be Ioane Bapatiso ia mai, ia aniani lasi, ia inuinu lasi. To idia gwau, ‘Ia be kavakava.’ To Taunimanima ena Natuna be ia mai vadaeni. Ia aniani bona ia inuinu. Vadaeni idia gwau, ‘Inai be aniani momo bona uaina ia inua momo tauna. Ia be takisi gogoa taudia bona kara dika taudia edia turana.’ ” Unai “taunimanima momo,” laloa maoromaoro lasi taudia, hamoaledia dalana be lasi!​—Mataio 11:​7, 16-19.

13. Ena hahediba taudia vairadiai, Iesu ese daidia be “inai nega noho Dirava laloa lasi taudia” ia gwauraidia?

¹³ Unai murinai lagani 31 C.E. ai, Iesu bona ena hahediba taudia be Galilea dekenai idia haroro loaloa matamaia lou, nega iharuana unai. Unai neganai “taravatu hadibaia taudia bona Farisea taudia haida” ese Iesu idia noia toa ta do ia hahedinaraia idia dekenai. Ia ese idia bona ma “taunimanima” momo ia hamaorodia, ia gwau: “Inai nega noho Dirava laloa lasi taudia be dika momokani! Umui ese toa ta umui tahua, a? Lasi, toa ta do lau hedinaraia lasi umui dekenai. Toa be tamona sibona, Iona, peroveta tauna ena toa. Badina be Iona bamona, dina toi hanuaboi toi gwarume badana ena bogana lalonai ia noho, unai bamona Taunimanima ena Natuna danu dina toi hanuaboi toi tano lalonai do ia noho.” (Mataio 12:​38-46) Momokani, iena hereva “inai nega noho Dirava laloa lasi taudia be dika momokani” ena anina be, tomadiho gunalaia taudia bona unai “taunimanima” danu, gabeai Iesu ena mase bona ena toreisi lou amo ia guguru toana be idia lalo-pararalaia lasi taudia unai.d

14. Iesu ena hahediba taudia idia kamonai ia ese Sadukea taudia bona Farisea taudia edena bamona ia gwauraia dika?

¹⁴ Lagani 32 C.E. ena Pasova murinai, Iesu bona ena hahediba taudia be Galilea ena kahana ta ladana Magadana dekenai idia vareai neganai, Sadukea taudia bona Farisea taudia ese Iesu idia noia lou toa ta do ia hahedinaraia. Ia hamaorodia lou, ia gwau: “Umui be orea dikana, ma Dirava umui laloa lasi danu. Toa umui noinoi lau dekenai, to toa ta do lau hedinaraia lasi umui dekenai. Iona, peroveta tauna ena toa sibona do umui itaia.” (Mataio 16:​1-4) Unai tomadiho koikoi taudia edia kerere be bada, badina be idia ese unai “taunimanima” mai edia kamonai lasi, Iesu ese “orea dikana” ia gwauraidia taudia, be idia gunalaidia dainai.

15. Iesu ena toana ia idau negana vairanai bona murinai, ia bona ena hahediba taudia be ‘unai nega taudia’ ida edena bamona idia hedavari?

¹⁵ Ena haroro gaukarana Galilea dekenai ena dokona be kahirakahira neganai, Iesu ese aru taudia ia boiridia, bona ena hahediba taudia danu, bena ia gwau: “Bema tau ta lau dainai ia hemarai, o lauegu hereva dainai ia hemarai, inai Dirava ura lasi bona kara dika taunimanima edia vairanai, Taunimanima ena Natuna danu be unai tau dekenai do ia hemarai.” (Mareko 8:​34, 38) Ia hahedinaraia goevagoeva, unai Iuda taudia hutuma, helalo-kerehai lasi taudia, be “Dirava ura lasi bona kara dika taunimanima.” Bena dina haida murinai, Iesu ena toana be hoa dalana ai ia idau murinai, ia bona ena hahediba taudia “be idia giroa lou unai taunimanima momo dekenai,” bena tau ta ese ia noia ena natuna do ia hanamoa. Iesu ia gwau: “Abidadama lasi bona lalona auka taudia e! Lau be umui dekenai do lau noho ela bona edena negai? Do lau haheauka henia umui dekenai ia lao bona edena negai?”​—Mataio 17:​14-17; Luka 9:​37-41.

16. (a) Iudea ai, Iesu ese “taunimanima” edena bamona ia gwauraidia dika lou? (b) Edena dala amo ‘unai nega taudia’ ese kara dika rohorohona idia karaia?

¹⁶ Lagani 32 C.E. ai, Au Raurau Ruma Maragidia Ariana murinai, “taunimanima momo ma Iesu dekenai idia haboua”​—toana be unai be Iudea ai. Unai neganai ia gwauraidia dika lou, ia gwau: “Inai nega taunimanima be dikadia, toa idia tahua, to toa ta idia dekenai do ia hedinaraia lasi, Iona, peroveta tauna, ena toana sibona.” (Luka 11:29) Dokona ai, tomadiho gunalaia taudia ese Iesu be kota totona idia hakaua lao neganai, Pilato ia gwau do ia ruhaia. “To dubu biagudia bona hanua tau badadia ese taunimanima dekenai idia hereva, Baraba do ia ruhaia, bona Iesu do ia alaia mase herevana do idia gwauraia totona. . . . Vadaeni Pilato ese ma ia nanadaia idia dekenai, ia gwau, ‘To Iesu, idia gwauraia Keriso dekenai be dahaka do lau karaia?’ Idia ibounai idia haere nega tamona, idia gwau, ‘Do oi hasatauroa!’ Pilato ia gwau, ‘Be, iena dika be dahaka?’ To idia boiboi momo mai goada danu, idia gwau, ‘Do oi hasatauroa.’ ” ‘Unai nega taudia dikadia’ ese Iesu hamasea karana idia gwauraia goadagoada unai!​—Mataio 27:​20-25.

17. Petero be Pentekoste ai ia haroro dainai, ‘unai nega noho gagevagageva taudia’ haida be edena bamona idia kara?

¹⁷ Unai dala amo, unai “abidadama lasi bona lalona auka taudia” be edia tomadiho gunalaia taudia ese edia lalona idia ania dainai, Lohiabada Iesu Keriso hamasea dalana idia lailaia. Bena dina 50 murinai, Pentekoste dinana ai, lagani 33 C.E. lalonai, ena hahediba taudia ese lauma helaga idia abia bona gado idauidau ai idia hereva matamaia. Unai idia kamonai neganai, “taunimanima momo idia haboua,” bena aposetolo Petero ese ia haroro henidia, ia gwau: “Iudea taudia, bona Ierusalema dekenai umui noho taudia e, . . . umui ese taravatu laloa lasi taudia edia imana dekena amo Iesu umui hasatauroa, bona umui hamasea.” Unai idia kamonai neganai, idia haida edia mamina be edena bamona? “Idia gari momo.” Bena Petero ese ia noidia do idia helalo-kerehai. “Idia ia sisiba henia, bona ia hereva goadagoada, ia gwau, ‘Inai nega noho gagevagageva taudia dekena amo umui heau mauri.’ ” Unai dainai, 3,000 bamona ese “iena hereva idia abia dae [bona] bapatiso idia abia.”​—Kara 2:​6, 14, 23, 37, 40, 41.

“Inai Nega Idia Noho Taudia”

¹⁸ Vadaeni, Iesu ese ena hahediba taudia vairadiai ia gwauraia loulou uruna be dahaka? Iena hereva, “inai nega idia noho taudia do idia mase ore lasi neganai, be inai gaudia ibounai do idia vara momokani,” be idia ese edena bamona idia laloa? Momokani, Iesu ese unai negai idia noho taudia ia herevalaidia unai, guna ia herevalaidia hegeregerena; idia, mai edia hakaua taudia, “matakepulu taudia” ida, be Iuda besena. (Mataio 15:14) Iesu ese ia perovetalaia hisihisidia iboudiai be ‘unai nega idia noho taudia’ dekenai idia vara, bena “hisihisi bada herea,” hisihisi gunadia bona gabedia iboudiai ia hereaia gauna, be Ierusalema latanai ia vara neganai, idia ore.​—Mataio 24:​21, 34.

19. Iuda besena ena “guba bona tanobada” be edena negai bona edena bamona idia ore?

¹⁹ Unai neganai Iehova ese Iuda taudia ia hahemaoro henidia noho. Idia helalo-kerehai bona Iehova ese mai ena hebogahisi ida Keriso ena amo ia karaia karana idia abidadama henia taudia, be ia ese unai “hisihisi bada herea” amo ia hamauridia. Iesu ena hereva hegeregerena, ia perovetalaia gaudia iboudiai idia vara, bena Iuda besena ena “guba bona tanobada”​—unai bese ibounai, ena tomadiho gunalaia taudia bona ena taunimanima dikadia danu unai​—be ia ore. Iehova ese ia panisia vadaeni!​—Mataio 24:35; ma 2 Petero 3:7 itaia danu.

20. Dahaka sisiba herevana be Keristani taudia iboudiai ese idia kamonai henia haraga be namo?

²⁰ Iuda taudia haida, Iesu ena peroveta herevadia idia kamonai henia vadaeni taudia, be idia diba hahemauri do idia abia, uru ta edia nega ena daudau do idia laloa davari toho dainai lasi eiava “dina bona nega” do idia duahia toho dainai lasi, to badina be unai negai idia noho taudia amo idia noho siri bona Dirava ena ura idia karaia goadagoada dainai do idia abia. Ena be Iesu be ena peroveta herevana ena dokona ai ia gwauraia gaudia be iseda nega lalonai idia vara gaudia, to unai idaunegai Iuda Keristani taudia danu ese ena sisiba idia badinaia be namo: “Unai dainai, do umui naria, bona nega ibounai do umui guriguri, vadaeni inai dika ibounai dekena amo do umui heau mauri, vadaeni Taunimanima ena Natuna ena vairana dekenai do umui gini.”​—Luka 21:​32-36; Kara 1:​6-8.

21. Dahaka ita naria, ia be kahirakahira do ia vara?

²¹ Hari inai negai, “Lohiabada ena dina badana be ia kahirakahira vadaeni inai. Ia be ia mai noho haraga.” (Sepanaia 1:​14-18; Isaia 13:​9, 13) Iehova sibona ese ia abia hidi vadaeni ‘dinana’ bona ‘horana’ ai, iena badu be tanobada ena tomadiho oreadia, iena politikol oreadia, bona iena bisinesi oreadia latadiai do ia halasia, bona “inai nega noho Dirava laloa lasi taudia” latadiai danu. (Mataio 12:39; 24:36; Apokalupo 7:​1-3, 9, 14) Unai “hisihisi bada herea” amo edena bamona do oi roho mauri diba? Emai hereva gabena ese haere do ia henia, bona helaro namona, nega vaira ena, be do ia gwauraia.

[Footnotes]

Edena Bamona Oi Haere?

◻ Daniela 9:​24-27 ena anina ia vara amo dahaka ita diba?

◻ Greek gado herevana ge·ne·aʹ ena anina Baibel lalonai be diksenari haida ese edena bamona idia gwauraia?

◻ Iesu ese unai hereva be dala tamona amo edena bamona ia gwauraia?

◻ Aposetolo edia nega lalonai, Mataio 24:​34, 35 ena anina be edena bamona ia vara?

4, 5. (a) Dahaka dainai Dirava gari henia Iuda taudia Iesu ena negai ese Daniela 9:​24-27 ena peroveta herevana idia laloa momo? (b) Unai peroveta herevana ena anina be edena bamona ia vara?

9. Diksenari haida ese Greek gado herevana ge·ne·aʹ ena anina edena bamona idia gwauraia?

12. Ena hahediba taudia idia kamonai noho lalonai, Iesu ese edena bamona ia hahedinaraia “taunimanima momo” be “inai nega taudia”?

18. Iesu ese inai hereva, “inai nega idia noho taudia,” ia gwauraia negadiai iboudiai, ena anina be dahaka?

[Picture on page 12]

Iesu ia gwau ‘unai nega taudia’ be kamonai lasi memerodia bona kekenidia bamona

[Picture on page 15]

Iehova sibona mo ia diba guna edena hora ai Iuda besena dikana do ia panisia