Duahia Taudia Edia Henanadai

Petero Ginigunana 2:9 ai, “King James Version” Baibel ese horoa Keristani taudia ia gwauraidia “ia abia hidi uruna [generation].” Unai ese iseda lalohadai Iesu ese Mataio 24:34 (NW) ai “uru” ia gwauraia dalana dekenai be do ia haidaua be namo, eiava?

Nao gado Baibel haida ai, inai hereva “generation” (“uru”) be unai siri ruaosi ai ia hedinarai. King James Version lalonai, Aposetolo Petero ena hereva be inai: “To umui be ia abia hidi uruna [generation], pavapava hahelaga oreana, bese helagana, bese idauna. Umui ia abia hidi, dibura amo umui ia boiria bona ena diari hereadaena ai umui ia hakaua lasi tauna hanamoa herevadia do umui gwauraia hedinarai totona.” Bona Iesu ia peroveta, ia gwau: “Momokani umui lau hamaoroa, inai uru [generation] do ia ore lasi ela bona inai gau iboudiai do idia vara vaitani.”​—1 Petero 2:9; Mataio 24:34.

Siri ginigunana ai, aposetolo Petero ese Greek gado herevana geʹnos ia torea, to Iesu ena hereva lalonai, ge·ne·aʹ ita davaria. Reana unai Greek gado herevadia ruaosi edia toana be hegeregere, bona idia be ramu tamona amo; to idia be hereva idaudia, bona edia anina be idia idau. New World Translation of the Holy Scriptures​—With References ese 1 Petero 2:9 ena futnout ta lalonai ia gwau: “ ‘Bese.’ Gr., geʹnos; inai hereva be Mat 24:34 ai ia noho herevana, ge·ne·aʹ, ‘uru,’ amo ia idau.” Unai bamona futnout ma ta be Mataio 24:34 ai.

Unai futnout ese idia hahedinaraia hegeregerena, English gado Baibel momo lalodiai gado idia hahanaia hegeregerena, inai hereva “race” [“bese”] be geʹnos ida idia hahegeregerea be maoro. Petero Ginigunana 2:9 ai, Petero ia gwau Isaia 61:6 ena peroveta herevana ena anina be horoa Keristani taudia dekenai ia vara, guba helarona idia abia taudia unai. Dirava ese bese idauidau momo amo ia gogodia, to lauma Israelana besena taudia ai idia lao neganai, idia be edena bese ai idia vara be herevana. (Roma 10:12; Galatia 3:​28, 29; 6:16; Apokalupo 5:​9, 10) Petero ese ia hahedinaraia idia be lauma besena ai idia lao​—‘Dirava ese idia ia abia hidi vadaeni, idia be iena bese, idia be King ena hahelagaia taudia, bese helagana, bona Dirava ena orea korikori taudia.’

To Greek gado revarevadia ai, Mataio 24:​34 ai, Iesu ena hereva lalonai inai hereva ge·ne·aʹ ita davaria. Gabu idauidau momo ai, taunimanima momo ese idia abia dae, Iesu ese “bese” ta ia herevalaia lasi, to nega ta ai idia noho taudia ia herevalaia.

Kahirakahira lagani 100 idia lao vadaeni, Charles T. Russell, Watch Tower Society ena presiden ginigunana, ese unai ia hahedinaraia goevagoeva, ia gwau: “Ena be ita gwau diba inai hereva ‘uru’ bona ‘bese’ be ramu tamona o matamana tamona amo idia mai, to idia be hegeregere lasi; bona Baibel lalonai idia gwauraidia negadiai unai hereva edia idau ia hedinarai goevagoeva. . . . Unai peroveta herevana idia torea sivaraidia idauidau toi lalonai, idia gwau iseda Lohiabada ese hereva idau hereana ta (genea) ia gwauraia; ena anina be bese lasi, to ena anina be iseda English gado herevana generation [uru] ena hegeregerena. Inai Greek gado herevana (genea) idia gwauraia daladia ma haida ese idia hamomokania, idia gwauraia negadiai ena anina be bese lasi, to nega ta ai idia noho taudia.”​—The Day of Vengeance, rau 602-3.

A Handbook on the Gospel of Matthew, Baibel hahanaia taudia durudia totona lagani 1988 idia torea bukana, be ia gwau: “[New International Version] lalonai inai uru idia torea, to murinai, futnout ta lalonai, ‘Eiava bese’ idia torea. Bona Taravatu Matamatana dibalaia momo tauna ta ia laloa ‘Mataio ena hereva ena anina be Iesu murinai uruna ginigunana mo lasi, to ia idia dadaraia Iuda taudia edia uru iboudiai.’ To gado stadilaia karana lalonai unai lalohadai ruaosi hamomokania gauna ta be lasi, bona namona be ita dadaraidia, badina be idia be anina maorona, ia hedinarai goevagoeva gauna, hunia toho gaudia. Unai hereva ia torea neganai, ena anina be Iesu ena negai idia noho taudia sibodia mo.”

Rau 10 ela bona 15 dekenai ai herevalaia bamona, Iesu ese iena negai idia noho Iuda taudia, ia idia dadaraia taudia, be ia gwauraidia dika. (Luka 9:41; 11:32; 17:25) Nega momo inai bamona herevadia amo ia gwauraidia: “Inai nega noho Dirava laloa lasi taudia,” “abidadama lasi bona lalona auka taudia,” “Dirava ura lasi bona kara dika taunimanima.” (Mataio 12:39; 17:17; Mareko 8:38) Iesu ese inai hereva “inai nega idia noho taudia” ia gwauraia negana ginigabena ai, ia be aposetolo hani ida Olive Ororona ai idia noho. (Mareko 13:3) Unai tatau, lauma helaga amo ia do horodia lasi bona Keristani ekalesiana ta taudia ai idia do lao lasi taudia, be momokani ‘uru’ (“generation”) ta lasi eiava bese ta lasi. To Iesu ese iena negai idia noho taudia ia gwauraidia “inai nega idia noho taudia” be idia kamonaia loulou vadaeni. Unai dainai, ia ese “inai nega idia noho taudia” be nega ginigabena ia gwauraia neganai, ena hereva ena anina idia lalo-pararalaia.a Unai neganai ia dekenai ia noho tauna ta, aposetolo Petero, ese gabeai Iuda taudia ia sisiba henidia, ia gwau: “Inai nega noho gagevagageva taudia dekena amo umui heau mauri.”​—Kara 2:40.

Nega momo hereva ai halasidia vadaeni, idia hahedinaraia Iesu ese unai hereva lalonai ia perovetalaia gaudia (tuari, tano-marere, hitolo bada, bona ma gau haida) be idia vara, unai peroveta herevana ia gwauraia negana bona Ierusalema be lagani 70 C.E. ai idia hadikaia ore negana padadiai. Idia momo idia vara, to iboudiai lasi. Hegeregere, gau ta lasi ese ia hahedinaraia, Roma taudia ese Ierusalema idia tuari henia (lagani 66-70 C.E.) murinai “Taunimanima ena Natuna ena toana” ia hedinarai bena unai dainai “tanobada ena bese ibounai” idia tai. (Mataio 24:30) Unai dainai, unai hereva ena anina be lagani 33 C.E. bona 70 C.E. padadiai ia vara neganai, unai be ena vara negana ginigunana mo, dala badana ai ia vara negana lasi, unai nega danu be Iesu ese ia perovetalaia unai.

Josephus ena buka ladana The Jewish War be English gado ai ia hahanaia tauna ta ladana G. A. Williamson ese buka ena matamana ai ia torea herevana be inai: “Mataio ese ita ia hamaoroa, hahediba taudia ese [Iesu] be henanadai ta mai ena kahana rua​—dubu hadikaia ore bona Ia ena mai ginigabena dekenai​—idia henia, bena Ia ese haere ta mai ena kahana rua ia henidia; kahana ginigunana lalonai, Josephus ese gabeai ia sivarailaia momo gaudia be ia perovetalaia goevagoeva.”

Oibe, unai hereva ena anina ia vara negana ginigunana ai, toana be inai hereva, “inai nega idia noho taudia,” ena anina be Iesu ese ia gwauraia negadia idaudia ai hegeregerena​—anina be unai negai idia noho kamonai lasi Iuda taudia. Unai “negai idia noho taudia’ do idia mase ore lasi neganai, Iesu ese ia perovetalaia gaudia iboudiai be idia dekenai do idia vara. Williamson ese ia herevalaia bamona, lagani 30 bamona lalonai unai gau idia vara, ela bona Ierusalema idia hadikaia ore; Josephus ese ena matana amo ia itadia bena edia sivarai ia torea.

Unai hegeregerena, unai hereva ena anina be nega iharuana bona dala badana ai ia vara neganai, inai hereva “inai nega idia noho taudia” ena anina be inai negai idia noho taudia. Rau 16 ai ia matamaia herevana ese ia hahedinaraia hegeregerena, namo lasi ita laloa Iesu ese ‘uru’ ta ena nega ena lagani edia momo ia gwauraia unai.

Lasi, to inai hereva, ‘nega ta ai idia noho taudia,’ ena anina be inai hereva badadia ruaosi amo ita gwauraia diba: (1) Nega ta ai idia noho taudia edia nega ena lagani edia momo ita gwauraia diba lasi. (2) Nega ta ai idia noho taudia edia nega be daudau herea lasi.

Unai dainai, aposetolo ese Iesu idia kamonai “inai nega idia noho taudia” ia gwauraia neganai, dahaka idia laloa? Hari ita diba lagani 37 murinai Ierusalema be “hisihisi bada herea” lalonai idia hadikaia ore, to aposetolo be Iesu ena hereva idia kamonai neganai, unai idia diba lasi. “Inai nega idia noho taudia” ia herevalaia neganai, idia ese nega daudau hereana idia laloa lasi, to nega kwadogina lalonai idia noho taudia idia laloa. Unai be momokani ita dekenai danu. Unai dainai Iesu ena hereva gabedia be maoro: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba. . . . Unai dainai, do umui hegaegae, badina be Taunimanima ena Natuna do ia mai ena hora be umui diba lasi.”​—Mataio 24:​36, 44.

[Footnotes]