Duahia Taudia Edia Henanadai
Edena negai Anglo-America Basileia Badana be basileia badana namba 7 ai ia lao?
▪ King Nebukanesa ena nihi ai ia itaia kaivakuku badana be basileia badadia ibounai ia laulaulaia lasi. (Dan. 2:31-45) To, unai kaivakuku ese Daniela ena nega bona hari Dirava ena taunimanima idia inai henia basileia badadia 5 sibona ia laulaulaia.
Daniela ese kaivakuku ia herevalaia dalana amo ita diba Anglo-America Basileia Badana be Roma amo do ia mai, to Roma do ia hadarerea lasi. Daniela ia gwau kaivakuku ena aena be auri amo idia karaia. (To, ena aena palapala bona aena kwakikwakidia be auri bona raro idia mikisi.)a Anina be Roma, kaivakuku ena auri aena amo Anglo-America Basileia Badana do ia mai. Bona unai ia vara momokani. Britain be Roma Basileiana ena kahana maragina ta sibona, to lagani 1700 lalodiai ia be basileia goadana ai ia lao. Gabeai, United States of America be basileia goadana ai ia lao. To, Britain bona United States be Baibel ese ia perovetalaia basileia badana namba 7 lasi. Dahaka dainai? Badina unai neganai idia ruaosi be tura namodia bamona idia do gaukara hebou lasi. To, Tanobada Tuari Ginigunana ai unai ia vara.
Unai negai, United States ai “basileia ena natudia” be haroro gaukara idia goadalaia, bona Brooklyn, New York amo unai idia gunalaia. (Mat. 13:36-43) Britain ese ia lohiaia tanodia ai, horoa taudia be haroro gaukara idia goadalaia danu. Tanobada Tuari Ginigunana ai, Britain bona United States be tura namodia ai idia lao, bona idia gaukara hebou idia inai henia politikol oreadia idia tuari henidiatotona. Tuari dainai Britain bona United States be sibodia edia bese idia abia isi. Danu, idia ese “hahine” ena garana taudia idia tuari henia. Idia ese hahine ena garana taudia edia buka bona magasin hariharilaia gaukarana idia taravatua, bona haroro gaukara idia gunalaia taudia be dibura ai idia atodia.—Apok. 12:17.
Unai peroveta herevana amo ita diba, Britain be lagani 1700 ai basileia goadana ai ia lao to unai negai, basileia badana namba 7 be ia do hedinarai lasi. Ia be Lohiabada ena dina ia matamaia negana ai ia hedinarai.b
[Footnotes]
a Auri ida idia mikisi raro be Anglo-America Basileia Badana lalonai idia noho taunimanima ia laulaulaia. Unai raro dainai, lagani momo lalonai Anglo-America Basileia Badana be guna bamona ia goada lasi.
b Inai be diba matamata. Bona inai diba matamata ese Daniela Ena Peroveta Herevana bukana rau 57, paragraf 24 ena hereva, bona rau 56 bona 139 ai idia noho laulau edia hereva idia haidaua.
[Picture on page 19]
June 1918 ai, Watchtower hedikwota amo tadikaka 8 be dibura ruma ai idia atoa