Guna Hesiai Gaukara ta Oi Karaia, A? Hari Oi Ura Karaia Lou, A?

GUNA Keristani kongrigeisen lalonai dahaka hesiai gaukara oi karaia? Reana unai neganai oi be hesiai tauna ta o elda tauna ta. Eiava ful-taim hesiai gaukara ta oi karaia. Momokani unai gaukara oi moalelaia bada, to badina haida dainai oi rakatania.

Reana unai gaukara oi rakatania badina oi buruka o oi gorere, eiava oi ura emu ruma bese taudia oi naria. Unai bamona oi karaia be kerere, a? Lasi. (1 Tim. 5:⁠8) Aposetolo taudia edia negai ia noho tauna Filipi be misinari gaukara ia karaia, to gabeai Kaisarea dekenai ia lao ena ruma bese taudia ia naria totona. (Kara 21:​8, 9) King Davida be ia buruka neganai, dala ia karaia ena natuna Solomona ese King dagina do ia abia totona. (1 Kin. 1:​1, 32-​35) To unai neganai, Iehova ese Filipi bona Davida ia lalokau henia bona ia lalodia bada. Danu, hari inai negai momo ese Filipi bona Davida idia matauraia.

Reana elda taudia ese emu maduna o hahenamo idia kokia. Kerere ta oi karaia dainai, a? Eiava emu ruma bese ena hekwakwanai ta dainai, a? (1 Tim. 3:​2, 4, 10, 12) Reana elda taudia edia abia hidi dekenai oi lalotamona lasi, bona reana oi do badu noho ema bona hari.

Oi Haboioa Gaukarana Oi Ura Henia

Oi haboioa gaukarana oi karaia lou diba, a? Oibe, haida be unai bamona idia karaia vadaeni. To unai gaukara oi karaia lou totona, oi ura henia be namo. (1 Tim. 3:​1, NW ) Dahaka dainai unai ura oi hahedinaraia be namo? Dirava dekenai emu mauri oi gwauhamatalaia ena badina bamona​​—⁠unai be Iehova bona ena hesiai taudia oi lalokau henia. Bema oi ura unai lalokau oi hahedinaraia, unai hesiai gaukara oi karaia lou be namo. Unai amo Iehova ese oi do ia gaukaralaia, badina guna unai maduna oi huaia bona oi be mai emu diba.

Israela taudia be hesiai gaukara haida idia haboioa murinai, Iehova ese idia dekenai ia karaia gwauhamatana mani oi laloa. Baibel ia gwau: “Lau be Lohiabada, bona lauegu kara lau haidaua lasi. Unai dainai umui Iakobo ena tubuna taudia be do umui mase ore lasi.” (Mal. 3:⁠6) Iehova be Israela taudia ia lalokau henia bona ia ura idia do ia gaukaralaia. Unai hegeregerena Iehova ia ura vaira neganai oi do ia gaukaralaia. Hari, dahaka oi karaia diba? Herevana emu diba be bada o maragi, to tiokratik gaukaradia oi karaia totona, Iehova oi tura henia be gau badana. Unai dainai, kongrigeisen ai maduna ta oi do huaia lasi lalonai, emu hetura karana Iehova ida oi hagoadaia guna be gau badana.

Emu abidadama dekenai oi “gini goada” totona, namona be ‘durua totona Lohiabada dekenai oi lao.’ (1 Kor. 16:13; Sal. 105:⁠4) Unai oi karaia diba dalana ta be guriguri. Ia vara gauna be Iehova dekenai oi gurigurilaia neganai, emu hemami oi gwauraia bona iena lauma helaga oi noia. Unai oi karaia neganai, Iehova kahirakahira do oi lao bona unai ese oi do ia hagoadaia. (Sal. 62:8; Fili. 4:​6, 13) Iehova ida emu hetura karana oi hagoadaia diba dalana ma ta be Baibel oi stadilaia. Bema hari, kongrigeisen ai maduna ta o rua sibona oi huaia, vadaeni oi dekenai nega ia noho sibona emu stadi bona ruma bese stadi oi karaia totona, reana guna unai oi karaia be auka.

Oibe, oi be Iehova ena Witnes tauna ta. (Isa. 43:​10-​12) Bona ‘Dirava ida oi gaukara hebou’ be hahenamo badana. (1 Kor. 3:​9, NW ) Emu haroro gaukara oi habadaia be dala namona ta, oi bona emu bamoa taudia edia hetura karana Iehova ida ia goada totona.

Emu Hemami Oi Haheaukalaia

Hesiai gaukara ta oi haboioa neganai, oi hemarai o lalohisihisi diba. Reana do oi ura emu kara ena maoro oi gwauraia hedinarai. Bema elda taudia be oiemu hereva idia kamonai, to oi idia hamaoroa unai hesiai gaukara ena maduna do oi huaia lasi be edena bamona? Reana unai neganai lalohadai kereredia oi abia diba, bona unai ese emu gaukara goada karana do ia hadikaia o oi ia koua oi karaia kererena amo gau ta oi dibaia lasi totona. Mani Iobu, Manase bona Iosepa edia haheitalai ita laloa. Unai ese ita do ia durua lalohadai kereredia ita haheaukalaia totona.

Iobu be ma haida totona Iehova vairanai ia gini, bona ia noho gabunai ia be dagi bada tauna bona hahemaoro gaukara ia karaia. (Iobu 1:5; 29:​7-​17, 21-​25) To, gabeai ena mauri lalonai ena kohu bona ena natudia ia haboioa, bona ena tauanina ai toto dikadia idia vara. Danu, Iobu ese ma haida vairanai ena ladana namona ia haboioa. Ia gwau: “Egu mauri lagani henunai taudia, ese lau dekenai idia hevaseha noho.”​​—⁠Iobu 30:⁠1.

Iobu ia mamia ia be kerere lasi dainai, ia ura Dirava vairanai ena maoro do ia gwauraia hedinarai. (Iobu 13:15) To ia haheauka bona Iehova ia naria dainai, gabeai Iehova ese ia hanamoa. Danu, ia laloparara Iehova ese ia sisiba henia be maoro, badina guna hahetoho ia davaria neganai, ia be Iehova dekenai ia maumau. (Iobu 40:​6-8; 42:​3, 6) Iobu ena manau karana dainai, guna ia haboioa gaudia be gabeai Iehova ese ia henia lou, bona ia habadaia danu.​​—⁠Iobu 42:​10-​13.

Bema oi ese kara kererena ta oi karaia dainai emu hesiai gaukara oi haboioa, reana do oi laloa Iehova bona emu Keristani tadikaka ese oiemu dika do idia gwauatao lasi. To mani Iuda ena King, Manase oi laloa. Ia be “Lohiabada ena vairanai ia kara dika bada, bona ia ese Lohiabada ia habadua.” (2 Kin. 21:⁠6) To, King Manase ia mase neganai, ia be abidadama tauna ta. Edena dala ai unai ia vara?

Manase be gabeai matahakani ia abia dae. Guna Manase be sisiba ia badinaia lasi dainai, Iehova ese Asuria taudia ia gaukaralaia ia be seini amo idia lokaia bona Babulonia ena gabu daudauna dekenai idia abia lao totona. Unuseniai Manase “be ia manau lao, bona ia ese Lohiabada, iena Dirava ia tahua, bona durua totona ia noinoi henia.” Manase be mai ena kudouna ibounai ida ia helalo-kerehai bona unai be ena kara amo ia hahedinaraia dainai, Iehova ese ena dika ia gwauatao.​​—⁠2 Siv. 33:​12, 13.

Oi haboioa hesiai gaukaradia be nega tamona oi abidia lou haraga be auka. Nega ia heau lalonai, unai maduna ta ta oi abia lou diba. Bema unai maduna oi abidia dae bona oi gaukara goada, vadaeni oi dekenai maduna ma haida do idia henia. To nega momo nega kwadogi lalonai oi goada lou be ia auka. Hekwakwanai haida idia vara diba. To bema mai emu ura ida oi haheauka, anina namona do ia vara.

Iakobo ena natuna Iosepa ena haheitalai mani oi laloa. Ena mauri lagani be 17 neganai ena kakana ese igui hesiai tauna ta bamona idia hoihoilaia. (Gen. 37:​2, 26-​28) Momokani, Iosepa ia laloa lasi iena kakana korikoridia be unai bamona do idia karaia. To Iosepa be ia dekenai ia vara gauna ia abia dae sibona bona Iehova ese ia hanamoa dainai, “ia ese iena biaguna Aigupito tauna ena ruma dekenai ia noho.” (Gen. 39:⁠2) Gabeai, Iosepa be dibura ruma ai idia atoa. To Iehova ia abidadama henia bona Iehova be ia ida Ia noho dainai, gabeai dibura ruma ena gaukara ibounai be Iosepa ese ia naria.​​—⁠Gen. 39:​21-​23.

Iosepa ia diba lasi dibura ruma ai ia noho be mai ena badina. To ia karaia diba gauna ia badinaia sibona. Iehova ese Iosepa ia gaukaralaia gwauhamata Garana do ia mai besena ia gimaia totona. (Gen. 3:​15; 45:​5-8) Herevana ita ta be Iosepa ia karaia bamona ita karaia diba lasi, to iena sivarai ese ia hahedinaraia Iehova ena hesiai taudia ese idia abia hahenamo be Iehova ena imana amo idia mai danu. Unai dainai Iosepa oi tohotohoa be namo, bona dala do oi karaia Iehova amo hahenamo oi abia totona.

Idia Vara Hekwakwanai amo Diba Ita Abia

Iobu, Manase bona Iosepa be hekwakwanai badadia idia davaria. To herevana idia toiosi be hekwakwanai idia davaria bona Iehova ese ia koua lasi, to unai idia abia dae bona unai amo idia ta ta be diba idia abia. Unai amo dahaka oi dibaia?

Iehova ia ura oi ia hadibaia gauna oi tahua. Iobu be hekwakwanai ia davaria neganai, sibona ena namo ia laloa bada bona mai anina bada gaudia ia laloa bada lasi. To Iehova ese mai lalokau ida ia matahakani henia dainai, lalohadai maorona ia abia bona ia gwau, “Lau herevalaia gaudia, be lau diba namonamo lasi.” (Iobu 42:⁠3) Bema emu hesiai gaukara ta oi haboioa dainai oi lalohisihisi, namona be sibona ‘do oi laloa lasi oi be bada momokani. To emu diba ena maka do oi laloa maoromaoro.’ (Roma 12:⁠3) Reana Iehova ia ura oi ia durua dalana be hari oi lalopararalaia lasi.

Matahakani abia dae. Reana matamanai Manase ia laloa Iehova ese ia henia matahakani aukana be maoro lasi. To ia ese unai ia abia dae, ia helalo-kerehai, bona ena dala dikana ia rakatania. Herevana oi abia matahakani dekenai dahaka oi laloa, to namona be ‘Lohiabada ena vairanai oi manau, vadaeni ia ese oi do ia abia isi.’​​—⁠Iam. 4:​10; 1 Pet. 5:⁠6.

Oi haheauka bona oi ura bada Iehova ese oi ia hadibaia totona. Iosepa dekenai ia vara gauna dainai, ia be iena kakadia ia inai henia bona edia kara ena davana ia karaia diba. To ia ese idia dekenai laloparara ia hahedinaraia bona ia hebogahisi henidia. (Gen. 50:​15-​21) Bema oi lalohisihisi noho, namona be oi haheauka. Namona be oi ura bada Iehova ese oi do ia hadibaia totona.

Guna Keristani kongrigeisen lalonai hesiai gaukara haida oi karaia, a? Namona be dala oi karaia nega vairai Iehova ese hesiai gaukara haida be oi dekenai ia henia totona. Emu hetura karana ia ida oi hagoadaia. Namona be oi haheauka bona oi manau. Mai emu ura bada ida idia henia gaukara oi abia dae bona karaia. Namona be oi laloatao ‘kara maoromaoro oi karaia neganai, Iehova ese gau namona ta oi dekena amo do ia koua lasi.’​​—⁠Sal. 84:⁠11.

[Blurb on page 30]

Emu abidadama dekenai oi “gini goada” totona, mai emu kudouna ibounai ida oi guriguri

[Picture on page 31]

Emu haroro gaukara oi habadaia be dala namona ta emu hetura karana Iehova ida ia goada totona

[Picture on page 32]

Namona be dala oi karaia nega vairai Iehova ese hesiai gaukara haida be oi dekenai ia henia totona