Hari Inai Mauri Eiava Mauri Hanaihanai Totona Oi Hekwarahi, A?
“Dirava ese ita ia hamauria, badina be ia dekenai ita naria, mai laloa abidadama danu.”—ROMA 8:24.
1. Epikuro orea taudia edia hahediba herevana be dahaka, bona unai bamona lalohadai ena anina Keristani taudia haida dekenai be dahaka?
APOSETOLO Paulo be Korinto Keristani taudia dekenai ia torea: “Edena bamona umui haida umui gwau mase taudia do idia toreisi lou lasi?” (1 Korinto 15:12) Toana be, Keristani taudia ginigunadia haida ese Greek aonega tauna Epikuro ena lalohadai, taunimanima ia hakaua kerere lalohadaina, idia abia dae. Unai dainai Paulo ese Epikuro orea taudia edia hahediba herevana ia gwauraia: “Ita aniani bona ita inuinu, badina be kerukeru do ita mase.” (1 Korinto 15:32) Unai aonega tauna ena orea taudia ese mase murinai do ita mauri lou ena helaro idia kirikirilaia bona idia laloa tauanina hamoalea gaudia sibona be mauri ena anina badana. (Kara 17:18, 32) Epikuro lalohadaina ese taunimanima ia doria sibona edia namo idia tahua bona ma haida idia abidadama henia lasi, bona edia mauri ia hadikaia momokani.
2. (a) Dahaka dainai toreisi lou dadaraia karana be dika? (b) Paulo ese Korinto Keristani taudia edia abidadama be edena bamona ia hagoadaia?
2 Toreisi lou idia dadaraia dainai edia mauri ia idau momokani. Paulo ia gwau: “Mase taudia bema idia toreisi lou lasi neganai, Keriso danu ia toreisi lou lasi. Bona bema Dirava ese Keriso ia hatorea isi lou lasi, aiemai haroro be anina lasi, umui emui abidadama danu be anina lasi. . . . Bema inai tanobada mauri sibona lalonai Keriso ena namo ita naria noho neganai, madi ita be taunimanima ibounai edia huanai ogogami herea.” (1 Korinto 15:13-19) Oibe, bema mauri hanaihanai helarona be lasi, Keristani tomadihona be “anina lasi.” Ena badina be lasi. Unai dainai ita hoa lasi, Keristani lasi lalohadaina idia abia dae dainai, Korinto kongregesen dekenai hekwakwanai badadia idia vara. (1 Korinto 1:11; 5:1; 6:1; 11:20-22) Unai dainai, Paulo ia ura edia abidadama toreisi lou dekenai do ia hagoadaia. Ia ese lalohadai goadadia, Baibel siridia, bona haheitalai ia gaukaralaidia karana amo, ia hamomokania goevagoeva toreisi lou helarona be gori lasi to do ia vara momokani gauna. Unai dainai, abidadama tamona taudia ia hagoadaia diba: “Do umui gini goada, do umui marere lasi. Nega ibounai Lohiabada ena gaukara do umui karaia goadagoada. Badina be umui diba Lohiabada ena gaukara lalonai, emui hekwarahi be hekwarahi kava lasi momokani.”—1 Korinto 15:20-58.
“Do Umui Naria Namonamo Noho”
3, 4. (a) Petero ena hereva hegeregerena, nega dokona ai haida ese edena bamona lalohadai dikana idia abia dae? (b) Edena sisiba do ita laloa loulou be namo?
3 Hari inai negai, taunimanima momo be helaro lasi, bona hari inai mauri sibona idia laloa bada. (Efeso 2:2) Unai be aposetolo Petero ese ia hereva do ia vara hegeregerena. Ia ese “Dirava badinaia kara do idia kirikirilaia” taudia ia herevalaia, “do idia gwau, ‘Iesu ia gwauhamata, do ia giroa mai, a? Edeseni ia noho? Do ia mai lasi. Badina be iseda tubuna idia mase vadaeni, to tanobada ia karaia negana ia mai bona harihari gau ta be idau lasi.’ ” (2 Petero 3:3, 4) Bema tomadiho momokani taudia be unai bamona lalohadai idia abia dae, reana do idia “noho kava” bona edia kara be “mai anina” lasi. (2 Petero 1:8) To ita moale diba, badina hari Dirava ena taunimanima momo be unai bamona lasi.
4 Ia mai noho tanobada dikana ena dokona ita laloa be kerere lasi. Oi laloatao Iesu ena aposetolo taudia be unai idia laloa bada, idia gwau: “Lohiabada e, inai negana be, basileia do oi henia lou Israela taudia dekenai, a?” Iesu ia haere: “Egu Tamana sibona ena siahu dekenai ia laloa dina bona nega, umui be diba lasi.” (Kara 1:6, 7) Unai hereva be Olive Ororona ai ia gwauraia herevana hegeregerena, unuseniai ia gwau: “Emui Lohiabada do ia mai negana be umui diba lasi. . . . Taunimanima ena Natuna do ia mai ena hora be umui diba lasi.” (Mataio 24:42, 44) Namona be unai sisiba do ita laloa loulou! Reana haida edia lalona ia veria lalohadaina be inai, ‘Reana do lau gaukara goadagoada lasi bona lau laga-ani sisina be namo.’ Unai be lalohadai kererena momokani! Mani Iamesi bona Ioane, “Guba boiboi natudia,” oi lalodia.—Mareko 3:17.
5, 6. Iamesi bona Ioane edia haheitalai amo dahaka ita dibaia?
5 Ita diba Iamesi be ia gaukara goadagoada aposetolo tauna ta. (Luka 9:51-55) Keristani ekalesia matamatana idia haginia neganai, reana ia be orea lalonai ia gaukara goadagoada. To Iamesi be do tau matamata neganai, Herod Agrippa Ginigunana ese ia hamasea. (Kara 12:1-3) Ita laloa ena mauri be do ia ore haraga ia itaia neganai, Iamesi ia lalohisihisi, badina guna ia gaukara goadagoada bona haroro gaukara lalonai ia hekwarahi bada dainai, a? Lasi! Ita diba ia moale, badina ena mauri kwadogina ena lagani namodia be Iehova ena hesiai gaukara lalonai ia gaukaralaia. Hari, ita ta ta ita diba lasi bema do ita mase haraga. (Hadibaia Tauna 9:11; Luka 12:20, 21 itaia.) Unai dainai aonega dalana be Iehova ena hesiai gaukara ita karaia goadagoada noho mai eda lalo-goada ida. Unai dala ai iseda ladana ia namo Iehova vairanai bona do ita noho mai iseda mauri hanaihanai totona ita hekwarahi noho.—Hadibaia Tauna 7:1.
6 Iesu ese ena hahediba taudia ia hagoadaia “do umui naria namonamo noho” neganai, aposetolo Ioane be idia huanai ia noho bona ia ese haheitalai namona ia henia danu. (Mataio 25:13; Mareko 13:37; Luka 21:34-36) Ioane ese unai sisiba ia abia dae bona lagani 10 momo lalonai mai ena goada ida hesiai gaukara ia karaia. Momokani, toana be aposetolo ma ibounai idia mase murinai ia do mauri noho. Ioane ia buruka bona lagani 10 momo lalonai, mai ena kamonai ida ia karaia gaukarana ia laloa neganai, ia laloa unai be kerere, ia laloa ena mauri be dala maorona ai ia gaukaralaia lasi eiava ena mauri ia negea kava, a? Lasi, momokani! Mai ena ura bada ida vaira negana ia naria noho. Ia toreisi lou Iesu be inai hereva: “Oibe, momokani, lau be kahirakahira do lau mai” ia gwauraia neganai, karaharaga Ioane ia haere, “Amen. Lohiabada Iesu e, oi mai.” (Apokalupo 22:20) Ioane be hari mauri totona ia hekwarahi lasi, ia laloa lasi hekwarahi lasi mauri namona ia abia be namo. Iena lalona ia hadaia ena mauri bona goada ibounai ida hesiai gaukara do ia karaia, ela bona Lohiabada do ia mai. Ita be edena bamona?
Mauri Hanaihanai Oi Abidadama Henia Diba Ena Badina
7. (a) “Tanobada ia do karaia lasi neganai” Dirava ese mauri hanaihanai be edena bamona ia gwauhamatalaia? (b) Iesu ese mauri hanaihanai helarona be edena bamona ia gwauraia hedinarai?
7 Oi abia dae momokani diba, mauri hanaihanai helarona be taunimanima edia nihi eiava gori sibona lasi. Tito 1:2 ia gwau bamona, Dirava ita badinaia ena badina be ‘tanobada ia do karaia lasi neganai, Dirava ese mauri hanaihanai ia gwauhamatalaia, bona Dirava be ia koikoi diba lasi.’ Dirava ena ura be kamonai taudia ibounai be mauri hanaihanai do idia abia. (Genese 1:28) Gau ta lasi, Adamu bona Heva edia gwau-edeede karana danu, be unai ia koua diba lasi. Genese 3:15 (NW) ia gwau bamona, Dirava ese taunimanima edia dika ibounai do ia kokia “garana” ia gwauhamatalaia. Unai “garana” eiava Mesia, Iesu, ia mai neganai, mauri hanaihanai helarona be ena hahediba herevana badana. (Ioane 3:16; 6:47, 51; 10:28; 17:3) Ena mauri goevadaena be dika ena davana totona ia henia neganai, Keriso ese taravatu ena gwaumaoro ia abia, taunimanima dekenai mauri hanaihanai do ia henia diba. (Mataio 20:28) Ena hahediba taudia haida, idia ibounai be 144,000, be mauri hanaihanai guba dekenai do idia abia. (Apokalupo 14:1-4) Unai dala ai guna idia mase diba taudia haida be ‘mase diba lasi taudia ai idia lao’!—1 Korinto 15:53.
8 Mase diba lasi maurina ena anina be mauri hanaihanai sibona lasi. Anina be mase diba lasi mauri siahuna idia abia. (Heberu 7:16; Apokalupo 20:6 itaia.) To, Dirava ese unai bamona harihari gauna hereana ia henia ena badina be dahaka? Satani ena hepapahuahu herevana oi laloa, ia gwau Dirava ese ia havaraia taudia ta ia abidadama henia diba lasi. (Iobu 1:9-11; 2:4, 5) Unai 144,000 taudia dekenai mase diba lasi maurina ia henia amo, Dirava ia hahedinaraia ia ese unai taudia, Satani ena hepapahuahu herevana ena haere namona idia henia taudia, ia abidadama henia momokani. To taunimanima oredia be edena bamona? Iesu ese unai Basileia do idia abia taudia edia “orea maragi” dekenai ia gwau, “terona ena latanai do umui helai, vadaeni Israela iduhu 12 dekenai do umui kota henia.” (Luka 12:32; 22:30) Unai ena anina be ma haida ese ena Basileia henunai, tanobada ai, mauri hanaihanai do idia abia. Ena be unai “mamoe idaudia” dekenai mase diba lasi maurina ia henia lasi, to “mauri hanaihanai” do idia abia. (Ioane 10:16; Mataio 25:46) Unai dainai mauri hanaihanai be Keristani taudia ibounai edia helaro. Ia be nihi sibona lasi to ia “koikoi diba lasi” Diravana ese ia gwauhamatalaia momokani gauna, bona unai mauri ena davana be Iesu ena rara hereadaena amo ia karaia.—Tito 1:2.
Nega Daudau Murinai, A?
9, 10. Edena gaudia ese idia hahedinaraia goevagoeva ita be dokona negana momokani ai ita noho?
9 Aposetolo Paulo ia peroveta “metau dikadia momo” ese do idia hahedinaraia ita be “nega ena dokona dekenai” ita noho. Inai tanobada ai, ita idia hagegea taudia, be idia lalokau lasi, idia mataganigani, sibona edia ura idia tahua, bona Dirava idia negea neganai, ita lalo-parara Iehova ena dina, inai tanobada dikana ena davana do ia henia dinana, be ia kahirakahira momokani, ani? Dagedage karadia bona inai henia karadia idia bada idia lao neganai, ita itaia Paulo ena hereva ma ta ia guguru, ia gwau: “Kara dika taudia bona koikoi taudia ese edia kara dika bona edia koikoi do idia habadaia.” (2 Timoteo 3:1-5, 13) Haida be mai edia lalo-goada ida idia boiboi “Maino bona gari lasi,” to edia maino helarona do ia boio momokani, badina “karaharaga hisihisi dika momokani bona mase do ia ginidae! Rogorogo hahine ese mara ena hisihisi ia davaria haraga bamona unai hisihisi be do ia ginidae.” To ita be dibura dekenai ita noho lasi, iseda nega ena anina ita lalo-pararalaia. Unai dainai, namona be “ita noga noho, ita laloa goada noho.”—1 Tesalonika 5:1-6.
10 Danu, Baibel ia hahedinaraia dina gabedia edia “nega be ia kwadogi sibona.” (Apokalupo 12:12; 17:10 itaia.) Unai ‘nega kwadogina’ ena kahana badana be ia ore vadaeni. Hegeregere, Daniela ena peroveta herevana ese “not kahana ena king” bona “saut kahana ena king” edia hepapahuahu ia perovetalaia namonamo bona unai ia vara ela bona iseda negai. (Daniela 11:5, 6, NW) Daniela 11:44, 45 ai ia hedinarai “not kahana ena king” ena dagedage karana ginigabena sibona ita do naria noho.—Unai peroveta herevana idia herevalaia The Watchtower, July 1, 1987, bona Gima Kohorona, November 1, 1993, itaia.
11. (a) Mataio 24:14 be edena bamona ia guguru? (b) Iesu ena hereva Mataio 10:23 ai ena anina be dahaka?
11 Iesu be inai ia perovetalaia danu, “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Hari inai negai, Iehova ena Witness taudia be tano, motumotu, bona teritori 233 ai idia gaukara. Momokani, idia do haroro lasi teritori haida idia noho, bona reana Iehova ia abia hidi negana ai, gaukara badana ena iduara do ia kehoa. (1 Korinto 16:9) To, Iesu ena hereva Mataio 10:23 ai, ita laloa be namo, ia gwau: “Israela edia hanua ibounai dekenai emui gaukara do umui haorea lasi neganai, Taunimanima ena Natuna do ia giroa mai.” Ena be tanobada hegegemadai sivarai namona ita halasia, to tanobada ena kahana iboudiai taunimanima ta ta ibounai ita do haroro henia lasi neganai, Iesu be Davana Henia Tauna bamona do ia “mai.”
12. (a) Apokalupo 7:3 ese ia gwauraia “maka” be dahaka? (b) Horoa taudia edia namba tanobada dekenai ia maragi ia lao ena anina be dahaka?
12 Mani Apokalupo 7:1, 3 ena hereva oi laloa, ia gwau dika bada do idia havaraia “lai 4 edia toa dalana” idia koua ela bona Dirava “ena hesiai taudia edia baguna dekenai Dirava ena maka” do idia atoa. Unai be guba maurina totona idia abia hidi neganai idia abia maka ginigunana ia herevalaia lasi. (Efeso 1:13) Unai be do idia abia maka ginigabena, unai maka amo ia hedinarai goevagoeva idia be “iseda Dirava ena hesiai taudia,” bona mai edia kamonai ida hahetoho lalonai idia gini goada momokani. Dirava ena horoa natuna korikoridia edia namba tanobada dekenai be ia maragi ia lao. Danu, Baibel ia hahedinaraia goevagoeva hisihisi badana ena matamana negana be Iehova ese “abia hidi taudia” dainai do “ia hakwadogia.” (Mataio 24:21, 22) Idia gwau idia be horoa taudia momo be idia buruka momokani vadaeni. Unai ese ia hahedinaraia lou dokona be kahirakahira, ani?
Gima Tauna mai Ena Kamonai
13, 14. Gima tauna oreana edia maduna be dahaka?
13 Dokona ita naria noho lalonai, namona be ‘kamonai hesiai tauna’ ena sisiba ita badinaia. (Mataio 24:45) Lagani handred ma haida lalonai, hari inai nega ena “hesiai tauna” ese “gima tauna” mai ena kamonai ena gaukara ia karaia. (Esekiela 3:17-21, NW) Gima Kohorona, June 1, 1984, ia gwau: “Inai gima tauna ese ia itaia tanobada dekenai idia vara gaudia be Bible ena peroveta hereva edena bamona idia hamomokania, ia hahedinaraia nega sisina murinai “hisihisi bada herea” do ia vara, bona “gau namona ta ena sivarai namo” ia harorolaia.”—Mataio 24:21; Isaia 52:7.
14 Laloaboio lasi: Gima tauna ena gaukara be “ia itaia gaudia be do ia gwauraia hedinaraia.” (Isaia 21:6-8) Baibel negadia lalonai, ena be dika ia havaraia diba gauna be daudau bona gima tauna ese ia itaia goevagoeva lasi, to taunimanima ia hadibaia. (2 King Taudia 9:17, 18) Reana nega haida ia hadibaia gauna ia vara lasi. To gima tauna namona ese gabeai do ia hemarai garina ena hereva ia koua lasi. Bema lahi ese oiemu ruma ia gabua bona lahi habodoa taudia be idia mai lasi, badina idia laloa reana idia oi boiria kava neganai, oiemu mamina be edena bamona? Unai be maoro lasi, ita ura unai taudia ese dika ena toana idia itaia neganai idia mai haraga! Unai hegeregerena, gima tauna oreana ese idia itaia idia vara gaudia be mai anina bada neganai, ita idia hadibaia.
15 To, gau idauidau idia vara noho lalonai, peroveta herevadia ita lalo-pararalaia dalana ia diari ia lao. Histori ese ia hahedinaraia, nega momo Dirava ena peroveta herevadia be idia do guguru lasi neganai, edia anina idia lalo-pararalaia maoromaoro lasi. Dirava ese Aberamo ena tubuna be “idau tano dekenai dohore idia noho” ena nega ia hahedinaraia goevagoeva, ia gwau lagani 400 lalonai unuseniai do idia noho. (Genese 15:13) To, Mose ese unai nega ia do ore lasi neganai idia ia hamauria toho.—Kara 7:23-30.
15, 16. (a) Dahaka dainai peroveta herevadia ita lalo-pararalaia dalana ita hamaoromaoroa? (b) Dirava ena abidadama hesiai taudia, peroveta herevadia haida idia lalo-pararalaia kerere taudia, amo dahaka ita dibaia?
16 Mesia peroveta herevadia mani oi laloa danu. Idia vara gaudia ita laloa neganai, ita itaia Mesia ena mase bona toreisi lou be idia perovetalaia goevagoeva. (Isaia 53:8-10) To, Iesu ena hahediba taudia ese unai gauna idia lalo-pararalaia lasi. (Mataio 16:21-23) Idia lalo-parara lasi Daniela 7:13, 14 be Keriso ena pa·rou·siʹa, eiava ena “giroa mai” negana lalonai, do ia guguru. (Mataio 24:3) Unai dainai lagani 2,000 bamona amo idia kerere, badina Iesu idia nanadaia: “Lohiabada e, inai negana be, basileia do oi henia lou Israela taudia dekenai, a?” (Kara 1:6) Keristani ekalesia be ia gini goada vadaeni negana lalonai danu, lalohadai bona ura kereredia be nega haida idia vara. (2 Tesalonika 2:1, 2) Ena be nega haida taunimanima haida edia lalohadai be idia kerere, to Iehova ese aposetolo edia negai idia noho abidadama taudia edia gaukara ia hanamoa!
17. Baibel ita lalo-pararalaia dalana hamaoromaoroa karana be edena bamona ita laloa be namo?
17 Hari inai negai danu gima tauna oreana ese nega haida edia lalohadai idia hamaoromaoroa. To, Iehova ese ‘kamonai hesiai tauna’ ia hanamoa eiava lasi, be ta ese ia daradaralaia diba, a? Ma danu, peroveta herevadia ibounai ita itaia neganai, idia hamaoromaoroa gaudia be gau maragidia sibona, ani? Baibel ita lalo-pararalaia dalana badana ia idau lasi. Hari, nega dokona ai ita noho lalohadaina be ia goada momokani!
Mauri Hanaihanai Totona Ita Hekwarahi Noho
18. Dahaka dainai hari inai mauri totona ita hekwarahi be namo lasi?
18 Tanobada taudia idia gwau diba, ‘Ita inuinu bona ita aniani, badina kerukeru do ita mase,’ to unai be iseda lalohadai lasi. Dahaka dainai hari mauri ena moale gaudia totona oi hekwarahi kava, bema oi be mauri hanaihanai totona oi hekwarahi diba? Unai helaro, mase diba lasi maurina guba dekenai eiava mauri hanaihanai tanobada dekenai, be nihi sibona lasi, ia be gori sibona lasi. Ia be ia “koikoi diba lasi” Diravana ese ia gwauhamatalaia gauna korikorina. (Tito 1:2) Badina momo dainai ita diba iseda helaro ia guguru negana be kahirakahira momokani! “Nega be kwadogi.”—1 Korinto 7:29.
19, 20. (a) Basileia dainai sibona eda ura gaudia ita dadaraia karana be Iehova ese edena bamona ia laloa? (b) Dahaka dainai mauri hanaihanai totona ita hekwarahi be namo?
19 Momokani, inai tanobada ia noho negana ena daudau ese momo idia laloa negana ena daudau ia hanaia vadaeni. Haida idia laloa, bema unai be guna idia diba, reana edia ura gaudia haida idia dadaraia lasi. To namo lasi oi lalohisihisi badina unai oi karaia. Ita laloaboio lasi, sibona ena ura dadaraia karana be Keristani taudia edia kara badana. Keristani taudia be ‘sibona edia ura idia laloa lasi.’ (Mataio 16:24) Ita laloa lasi iseda hekwarahi Dirava hamoalea totona be anina lasi. Iesu ia gwauhamata: “Bema tau ta ese iena ruma ia rakatania, o iena tadikakana, o taihuna, o sinana, o tamana, o natuna, o tano, bema lau dainai bona Sivarai Namona dainai inai gaudia ia rakatania, hari inai mauri neganai, iena gau do ia habadaia nega 100 bamona, . . . to gabeai, vaira neganai, mauri hanaihanai do ia abia.” (Mareko 10:29, 30) Lagani tausen murinai, oiemu gaukara, ruma, eiava banika dekenai ia noho moni hari be do mai anina, a? To, Iehova hamoalea totona sibona ena ura gaudia oi dadaraia karana be mai anina ela bona lagani milioni momo—lagani bilioni momo lalonai! “Dirava ena kara be . . . maoromaoro momokani. Unai dainai ia ese emui kara namodia do ia laloaboio lasi.”—Heberu 6:10.
20 Unai dainai, namona be mauri hanaihanai totona ita hekwarahi, bona “matana dekenai ita itaia gaudia be do ita laloa lasi, to matana dekenai ita itaia lasi gaudia do ita laloa. Matana dekenai ita itaia gaudia be idia noho nega daudau lasi, to matana dekenai ita itaia lasi gaudia be nega hanaihanai do idia noho.” (2 Korinto 4:18) Peroveta tauna Habakuku ia gwau: “To inai lau palania kara be harihari do ia vara lasi. Unai dainai ena anina do oi torea, ia noho. To ia be nega daudau lasi lalonai do ia vara. Lau koikoi lasi. Sedira oi laloa iena mai be haraga lasi, to do oi naria noho, ia be do ia vara momokani.” (Habakuku 2:3) Dokona ita “naria noho” lalonai, iseda maduna sibona eda mauri bona ruma bese maurina lalonai be edena bamona ita huaia? Hereva gabena ese unai gaudia ia herevalaia.
Hereva Badadia Ita Riviulaia
◻ Toana be tanobada ena dokona ia mai haraga lasi dainai, hari inai negai idia noho taudia haida edia lalohadai be dahaka?
◻ Iseda mauri hanaihanai helarona ena badina be dahaka?
◻ Basileia dainai sibona eda ura ita dadaraia karana be edena bamona ita laloa be namo?
8. (a) Mase diba lasi maurina ena anina be dahaka, bona dahaka dainai Iehova ese 144,000 taudia dekenai ia henia? (b) Iesu ese edena helaro be “mamoe idaudia” dekenai ia henia?
[Picture on page 15]
Tanobada hegegemadai haroro gaukarana ita haorea guna, murinai dokona do ia mai