Dahaka Dainai Baibel ese Haida Edia Ladana ia Gwauraia Lasi?

Baibel bukana Ruta lalonai, Mose ena Taravatu ese ia gwauraia maduna ia huaia lasi tauna idia gwauraia “turagu.” (Ruta 4:1-12) Ia bona ma haida edia ladana be Baibel ese ia gwauraia lasi badina idia be anina lasi o dika taudia, a?

Lasi. Haheitalai ma ta oi laloa. Iesu ese ena aposetolo taudia ia hamaoroa ‘taoni dekenai idia lao bona tau ta do idia davaria’ bona iena ruma ai Iesu ena Pasova aniani ginigabena do idia hegaegaelaia. (Mataio 26:18) Ita gwau diba inai siri ese ia gwauraia “tau” be anina lasi o tau dikana, a? Lasi, reana ia be Iesu ena hahediba tauna, to iena ladana idia torea hedinarai be gau badana lasi.

Danu, Dirava idia abidadama henia taudia momo edia ladana be Baibel ai idia noho lasi. To danu, kerere taudia momo edia ladana be Baibel ai idia noho. Hegeregere, ita diba hahine ginigunana ena ladana be Heva. Ia be sibona ena namo ia tahua bona ia gwau-edeede dainai, Adamu bona ita ibounai be kara dika taudia ai ita lao. (Roma 5:12) Baibel ai Noa ena adavana ena ladana ia noho lasi, to ita diba, ia be sibona ena namo ia tahua lasi, ia kamonai, bona Noa ena gaukara ia durua. Momokani, Iehova ese Noa ena adavana ia laloa bada bona hanamoa.

Iehova ena ura idia karaia bona idia gari lasi taudia haida edia ladana be Baibel ai idia noho lasi. Suria edia tuari biaguna, Namana, ena ruma ai hesiai gaukara ia karaia Israela kekenina ita laloa. Ia ese Namana ena adavana vairanai, Iehova ena peroveta tauna Israela ai ia noho ena sivarai ia gwauraia. Unai murinai hoa karana ta ia vara. (2 King Taudia 5:1-14) Israela edia diadi tauna Iepeta ena natuna kekeni be abidadama karana ia hahedinaraia. Ia ese headava bona natuna havaraia karana ia dadaraia, ena tamana ena gwauhamata ia hagugurua totona. (Gunalaia Taudia 11:30-40) Unai hegeregerena, salamo 40 mai kahana idia torea taudia bona maduna badadia idia huaia peroveta taudia haida edia ladana be Baibel ai idia noho lasi.​—1 King Taudia 20:37-43.

Abidadama anerudia edia haheitalai ita laloa danu. Idia be milioni momo, to Baibel ese aneru rua sibona edia ladana ia gwauraia​—Gabriela bona Mikaela. (Daniela 7:10; Luka 1:19; Iuda 9) Aneru ma haida edia ladana be Baibel ese ia gwauraia lasi. Hegeregere, Samson ena tamana, Manoa ese aneru ia nanadaia: “Oiemu ladana be daika?” Aneru ia gwau: “Badina dahaka lauegu ladana umui ura diba?” Unai aneru ia manau, badina ia ura taunimanima ese Dirava sibona idia hanamoa.​—Gunalaia Taudia 13:17, 18.

Herevana Baibel ai ladana haida idia noho o lasi ena badina ita diba lasi, to Dirava idia hesiai taudia ibounai amo gau momo ita dibaia, hegeregere idia momo be dagi o ladana bada idia tahua lasi.