Taravatu Hegeregerena Sivarai Namona Ita Gimaia

TAUNIMANIMA ese hanua badadia idia haginia negana ibounai lalonai, magu idia haginidia danu. Gunaguna unai magu edia anina be bada taunimanima gimaia totona. Unai koua gauna latanai idia gini tuari taudia ese magu idia hadikaia toho taudia eiava magu henunai tano idia geia toho taudia edia gaukara idia koua diba. Hanua badana lalonai idia noho taudia sibona ese hahemauri idia davaria lasi, to nega momo kahirakahira idia noho hanuadia idia noholaia taudia danu be unai magu lalodiai idia heau mauri.​—2 Samuela 11:20-​24; Isaia 25:12.

Unai hegeregerena, Iehova ena Witness taudia ese gimaia maguna​—taravatu maguna unai​—idia haginia. Unai magu be taunimanima bona Witness taudia ia hapararaia totona idia haginia lasi, badina Iehova ena Witness taudia idia ura dikadika taunimanima idia bamodia bona idia hereva henidia. To, ia ese kota edia taravatu taunimanima iboudiai edia ura kwalimu idauidau totona ia hagoadaia. Bona nega tamona ai, ia ese taravatu dalana ai, Witness taudia edia maoro idauidau edia tomadiho idia badinaia totona ia gimaia. (Mataio 5:​14-​16 itaia.) Unai magu ese edia tomadiho dalana bona Dirava ena Basileia sivaraina namona harorolaia ena maoro ia gimaia. Unai magu be dahaka, bona edena dala ai idia haginia?

Gimaia Totona Taravatu Maguna Idia Haginia

Ena be tano momo dekenai Iehova ena Witness taudia ese tomadiho ena ura kwalimu idia moalelaia, to tano haida dekenai taunimanima ese maoro lasi dalanai idia dagedage henidia. Hebou karana eiava ruma-ta-ruma-ta haroro gaukarana amo edia tomadiho idia badinaia, to taunimanima ese unai ura kwalimu idia koua toho neganai, kota dekenai idia lao. Tanobada hegegemadai Witness taudia idia karaia kota karadia be tausen momo.a Kota karadia iboudiai dekenai idia kwalimu lasi. To bema kota maragina dekenai idia kwalimu lasi, nega momo kota badana dekenai apil idia karaia. Bena dahaka ia vara?

Vanegai laganidia momo lalonai, tano momo ai kota dekenai idia kwalimu neganai, kota ena hakaua hereva namodia idia torea bena gabeai unai bamona gaudia idia vara lou neganai, Iehova ena Witness taudia ese unai hereva idia gaukaralaia diba. Nadi eiava biriki amo magu idia haginia hegeregerena, kota dekenai idia kwalimu neganai, edia gaukara ia gimaia taravatu maguna idia haginia. Unai magu latanai idia gini Witness taudia ese tomadiho ena ura kwalimu idia abia totona idia tuari noho.

Haheitalai ta, Murdock v. Commonwealth of Pennsylvania kota karana mani oi laloa. May 3, 1943 ai, United States Supreme Court dekenai ena kota herevana idia gwauraia. Unai kota karana lalonai idia laloa gauna be inai: Iehova ena Witness taudia ese edia tomadiho buka bona magasin hariharilaia totona laiseni idia hoia be maoro eiava lasi? Iehova ena Witness taudia idia laloa gavamani ese ia doridia laiseni idia abia totona be maoro lasi. Edia haroro gaukarana hari​—bona guna danu​—be hoihoi gaukarana lasi. Idia tahua gauna be moni haboua karana lasi, to idia ura sivarai namona idia harorolaia. (Mataio 10:8; 2 Korinto 2:​17) Murdock kota herevana lalonai, Court ese Witness taudia edia kahana ia abia, ia gwau haida ese idia doria, tomadiho buka bona magasin hariharilaia ena laiseni takisi henia totona, ese tano ena taravatu ia utua.b Unai kota herevana be mai anina bada, bona unai nega amo ema bona hari kota karana momo dekenai Witness taudia ese idia gaukaralaia. Unai Murdock kota herevana be biriki goadana, edia gaukara ia gimaia taravatu maguna dekenai.

Unai kota karadia be mai anina bada taunimanima iboudiai edia tomadiho ena ura kwalimu gimaia totona. University of Cincinnati Law Review ese Witness taudia edia kara, United States dekenai taunimanima edia maoro idauidau idia gimaia karana, ia herevalaia ia gwau: “Iehova ena Witness taudia ese gaukara badana idia karaia tano ena taravatu haginia lalonai, hereva bona tomadiho idia gimaia taravatudia edia hetoana idia habadaia.”

Magu Idia Hagoadaia

Kota dekenai idia kwalimu negadia ta ta iboudiai ese magu idia hagoadaia noho. Lagani 1990 murinai, tanobada hegegemadai Iehova ena Witness taudia bona ura kwalimu idia ura henia taudia ma haida idia durua kota herevadia mani oi laloa.

Greece. May 25, 1993 ai, European Court of Human Rights ese Greece taudia edia maoro, edia tomadiho be ma haida dekenai idia hadibaia ena maoro, ia hamomokania. Unai be Minos Kokkinakis ena kota karana, bona unai neganai ena mauri lagani be 84. Kokkinakis be Iehova ena Witness tauna ta bona lagani 1938 amo nega 60 bona ma haida idia hadiburaia, Greece ena kota dekenai nega 18 idia samania, bona lagani 6 ia hanaia negana be dibura dekenai ia noho. Lagani 1930 murinai Greece dekenai idia karaia taravatu, ta ena tomadiho dalana haidaua toho taravatuna, dainai idia gwau ia kerere​—unai taravatu dainai, lagani 1938 ia lao 1992 ai, Iehova ena Witness taudia kahirakahira 20,000 idia dogoatao. European Court ia gwau Greece ena gavamani ese Kokkinakis ena tomadiho ena ura kwalimu ia hadikaia bona $14,400 (U.S.) ena kompensesen monina ia henia. Ena hereva lalonai, Court ia gwau Iehova ena Witness taudia be “taunimanima momo idia diba tomadihona.”​—Gima Kohorona, September 1, 1993, rau 27-​31 itaia.

Mexico. July 16, 1992 ai, tomadiho ena ura kwalimu ia durua karana badana idia karaia Mexico dekenai. Unai dina ai, idia ese Tomadiho Oreadia bona Tomadiho Karadia edia Taravatu idia karaia. Unai taravatu hegeregerena, tomadiho tamona taudia be gavamani ia abia dae tomadiho oreana ai ia lao diba, bema rejista pepana idia abia. Guna, Iehova ena Witness taudia, unai tano ai idia noho tomadiho ma haida hegeregerena, idia noho to gavamani ena gwaumaoro pepana idia abia lasi. April 13, 1993 ai, Witness taudia ese unai rejista pepana abia totona aplikesen idia henia. May 7, 1993 ai, idia moale bada badina gavamani ese idia ia rejista, edia tomadiho oreadia rua be La Torre del Vigía, A. R. bona Los Testigos de Jehová en México, A. R.​—Awake!, July 22, 1994, rau 12-​14 itaia.

Brazil. November 1990 ai, Brazil ena National Institute of Social Security (INSS) ese Watch Tower Society ena brens opesi ia hadibaia, idia abia dae lasi Betele (Iehova ena Witness taudia edia brens rumana ena ladana) dekenai idia gaukara volantia taudia be tomadiho hesiai taudia bona unai dainai idia be Brazil dekenai moni gaukara taudia edia taravatu henunai do idia noho. Unai dainai Witness taudia ese apil pepana idia siaia. June 7, 1996 ai, Judicial Advisory of the Office of the Attorney General Brasília dekenai ese kota herevana ia gwauraia, ia hamomokania Betele dekenai hesiai gaukara idia karaia taudia be gavamani ese ia abia dae tomadiho oreana ena gaukara taudia, idia be moni gaukara karaia taudia lasi.

Japan. March 8, 1996 ai, Supreme Court of Japan ese kota herevana ia gwauraia edukeisen bona tomadiho ena ura kwalimu dekenai​—unai ese Japan taudia ibounai do ia durua. Kota diadi iboudiai idia abia dae Kobe Municipal Industrial Technical College ese taravatu ia hadikaia, badina sikuli amo Kunihito Kobayashi idia atoa siri, ia be heatu gadara lalonai ia vareai lasi dainai. Unai be nega ginigunana Supreme Court ese Japan ena Konstitusen dekenai, tomadiho ena ura kwalimu taravatuna hegeregerena, kota herevana ia gwauraia. Unai Witness mero matamatana ese ena lalona, Baibel amo ia hadibaia lalona unai, ia badinaia bona ia laloa unai heatu gadara be Isaia 2:4 dekenai ia noho Baibel hakaua herevana hegeregerena lasi, ia gwau: ‘Idia ese edia tuari kaia be hama dekenai do idia makohia, tano geia auri do idia karaia. Bona idia edia io ena auri danu do idia botaia palaka, au rigi utua kaia do idia halaoa. Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.’ Unai Court ia gwauraia herevana be namo herea gabeai do idia gaukaralaia totona.​—Gima Kohorona, November 1, 1996, rau 19-​21 itaia.

February 9, 1998 ai, Tokyo High Court ese kota herevana mai anina bada ma ta ia gwauraia. Ia gwau Witness ta ladana Misae Takeda be mai ena maoro, medikol heduruna ia dadaraia bema unai heduru ese Baibel ena sisiba, ‘rara dadaraia’ sisibana, ia utua. (Kara 15:28, 29) Unai kota herevana be Supreme Court dekenai do idia herevalaia bona do ita itaia High Court ena hereva ia hamomokania, eiava lasi.

Philippines. March 1, 1993 ai, Philippine Supreme Court dekenai Witness taudia matamatadia ese mai edia hemataurai ida pepe idia hanamoa lasi karana idia herevalaia. Unai kara dainai matamata taudia momo be sikuli amo idia atoa siri, to diadi taudia ibounai ese Iehova ena Witness taudia edia kara idia abia dae.

Kota dekenai idia kwalimu negadia ta ta iboudiai be nadi eiava biriki bamona, Iehova ena Witness taudia edia maoro sibona lasi to taunimanima ibounai edia maoro idauidau ia gimaia taravatu maguna dekenai idia atoa bona ia idia hagoadaia.

Magu Ita Naria Namonamo

Iehova ena Witness taudia be tano 153 ai edia taravatu hegeregerena idia rejista vadaeni, bona idia ese ura kwalimu idia moalelaia, ma tomadiho momo ese idia moalelaia hegeregerena. Lagani momo lalodiai, Eastern Europe bona guna idia gwauraia Soviet Union dekenai dagedage idia davaria bona edia gaukara idia taravatua, to hari edia gavamani ese Iehova ena Witness taudia idia abia dae tanodia be Albania, Belarus, Czech Republic, Georgia, Hungary, Kazakstan, Kyrgyzstan, Romania, bona Slovakia. To, hari inai negai tano haida dekenai, nega daudau kota dalana maorona idia badinaia vadaeni Western Europe ena tano haida dekenai danu, Iehova ena Witness taudia edia maoro idauidau idia hepapahuahulaia eiava idia kokia. Dagedage taudia idia hekwarahi bada taravatu amo dika idia havaraia totona, badina idia ura Witness taudia edia gaukara idia koua. (Salamo 94:20) Unai dainai Witness taudia be dahaka idia karaia?c

Iehova ena Witness taudia idia ura gavamani iboudiai idia badinaia, to danu, idia ura taravatu hegeregerena ura kwalimu idia abia edia tomadiho idia badinaia totona. Idia abia dae momokani, Dirava ena taravatu​—sivarai namona harorolaia taravatuna danu​—idia badinaia karana idia koua toho taravatu ibounai be maoro lasi. (Mareko 13:10) Bema maino dalanai unai ura kwalimu idia abia diba lasi, Iehova ena Witness taudia be kota karadia do idia karaia bona dala iboudiai do idia gaukaralaia, Dirava ia henia tomadiho ena maoro be gavamani ena taravatu ese ia hamomokania totona. Iehova ena Witness taudia ese Dirava ena gwauhamata idia abia dae momokani. Iehova ia gwau: “Tuari gauna ta ese oi do ia hadikaia diba lasi.”​—Isaia 54:17.

[Footnotes]

[Box on page 21]

Iehova Ena Witness Taudia Edia Maoro Idauidau Idia Hamomokania

Taunimanima ese Iehova ena Witness taudia idia dagedage henia neganai, tanobada hegegemadai diadi bona gavamani taudia vairanai idia hakaua. (Luka 21:12, 13) Iehova ena Witness taudia idia hekwarahi bada taravatu hegeregerena edia maoro idauidau idia hamomokania totona. Tano momo dekenai kota dekenai idia kwalimu karadia ese Iehova ena Witness taudia dekenai taravatu ia henia ura kwalimu bona edia maoro idauidau idia naria. Vadaeni, idia be:

◻ ruma ta ruma ta dekenai idia haroro diba bona hoihoi taudia totona idia atoa taravatudia ese idia koudia lasi​—Murdock v. Commonwealth of Pennsylvania, U.S. Supreme Court (1943); Kokkinakis v. Greece, European Court of Human Rights (ECHR) (1993).

◻ tomadiho totona idia hebou diba​—Manoussakis and Others v. Greece, ECHR (1996).

◻ edia lalona ia hadikaia lasi dalana idia abia hidi diba, gavamani ena pepe o toa ta dekenai edia hemataurai idia hahedinaraia totona​—West Virginia State Board of Education v. Barnette, U.S. Supreme Court (1943); Supreme Court of the Philippines (1993); Supreme Court of India (1986).

◻ edia Keristani lalona ia hadikaia ami gaukarana idia dadaraia diba​—Georgiadis v. Greece, ECHR (1997).

◻ edia lalona idia hadikaia lasi medikol heduruna bona muramurana idia abia hidi diba​—Malette v. Shulman, Ontario, Canada, Appeal Court (1990); Watch Tower v. E.L.A., Superior Court, San Juan, Puerto Rico (1995); Fosmire v. Nicoleau, New York, U.S.A., Court of Appeals (1990).

◻ idia abia dae Baibel herevadia be edia natudia dekenai idia hadibaia diba, herevana kota dekenai natuna do ia naria tauna idia abia hidi neganai unai hahediba herevadia idia hepapahuahulaia​—St-Laurent v. Soucy, Supreme Court of Canada (1997); Hoffmann v. Austria, ECHR (1993).

◻ gaukara oreadia idia haginia bona idia gaukaralaia diba, bona gavamani ese idia abia dae tomadiho ma haida ese idia gaukaralaia gaukara oreadia hegeregerena, takisi monina idia henia lasi​—People v. Haring, New York, U.S.A., Court of Appeals (1960).

◻ spesel ful-taim gaukarana idia karaia taudia ese gavamani ena takisi taravatu namona idia badinaia diba, tomadiho ma haida edia ful-taim dubu gaukarana idia karaia taudia hegeregerena—Brazil ena National Institute of Social Security, Brasília ai, (1996).

[Picture on page 19]

The Complete Encyclopedia of Illustration/J. G. Heck

[Picture on page 20]

Minos Kokkinakis bona ena adavana

[Picture Credit Line on page 19]

Kunihito Kobayashi