Idia Divos Tadikaka Taihu Hagoadaia Edena Dala Ai?

Reana oi be idia divos taudia haida oi diba. Idia oi diba badina divos karana be tanobada hegegemadai ia vara. Hegeregere, Poland ai tahua gaukarana ta ese ia hahedinaraia, mauri lagani 30 headava taudia be lagani toi ia lao siks murinai idia divos. To, mauri lagani idauidau taudia idia divos danu.

Unai be momokani badina Spain ai, Institute for Family Policy ena ripoti ia gwau: “Europe ai idia headava taudia 10 10 amo 5 5 be do idia divos.” Kohu momo tanodia dekenai unai bamona ia vara danu.

LALOHISIHISI BADA

Dahaka dainai momo idia divos? Eastern Europe ai, headava ia sisibalaia hahinena ta ia gwau: “Divos karana ese ia hahedinaraia tau bona hahine edia hetura karana be ia dika vadaeni, unai dainai idia parara, bona unai ese lalohisihisi bada ia havaraia diba.” Ma ia gwau: “Ia divos tauna be gabeai badu, lalohekwarahi, lalohisihisi bona hemarai do ia mamia.” Bona nega haida sibona hamasea lalohadaina do ia abia danu. Unai hahine ma ia gwau: “Kota ese divos ena gwaumaoro ia henia murinai, hekwakwanai ma haida idia vara. Ia divos tauna be sibona ia noho dainai do ia lalohisihisi bona ia mamia ta ese ia ura henia lasi. Reana do ia laloa: ‘Hari lau divos dainai, lau be edena bamona? Egu mauri ena anina be dahaka?’”

Lagani haida gunanai taihu ta ladana Ewa be unai bamona ia mamia, bona ia gwau: “Lau hemarai bada, badina kota ese ai dekenai divos ena gwaumaoro ia henia murinai, egu neiba taudia bona gaukara turadia ese lau idia gwauraia ‘divos hahinena.’ Lau badu dikadika. Lau bona egu natudia rua sibona ai noho dainai, lau ese sina bona tama ena maduna lau huaia.”a Lagani 12 elda gaukara ia karaia bona momo ese idia matauraia tauna, Adam, ia gwau: “Lau mamia lau be anina lasi, bona nega haida lau badu bona lau ura lasi ma haida do lau bamoa.”

LALOHADAI KEREREDIA

Haida be idia divos murinai vaira negana totona idia lalohekwarahi momo bona ena be lagani momo idia hanaia vadaeni, to lalohadai maorona idia abia be auka. Danu idia laloa ma haida ese idia ura henidia lasi. Nius torea hahine ta ia gwau: “Hari edia kara do idia haidaua, bona idia sibona ese hekwakwanai hanaia dalana do idia dibaia.”

Tadikaka ta ladana Stanisław, ia gwau: “Ai divos murinai, egu adavana gunana ia ura lasi egu natudia kekeni rua lau itaia. Unai dainai, lau mamia haida ese lau idia laloa bada lasi bona reana Iehova ese lau ia rakatania. Lau ura do lau mase. To gabeai, lau laloparara egu lalohadai be kerere.” Ia divos taihu ta ladana, Wanda be vaira negana ia lalohekwarahilaia bada. Ia gwau: “Lau laloa tadikaka taihu bona ma haida ese lau bona egu natudia do idia laloa lasi. To, hari lau itaia tadikaka taihu be ai idia laloa bada, bona lau idia durua egu natudia lau hagoadaia Iehova idia tomadiho henia totona.”

Momokani, unai sivarai amo ita diba divos taudia be lalohadai kereredia idia abia diba. Do idia laloa idia be anina lasi, bona ma haida ese idia lalodia bada lasi neganai, idia laloa unai be maoro. Unai sibona lasi, to, reana edia dekena taudia do idia gwauraia dika. Unai dainai, do idia laloa tadikaka taihu be lalokau bona hebogahisi lasi taudia. To, Stanisław bona Wanda edia sivarai ese ia hahedinaraia, divos taudia momo be gabeai idia laloparara edia tadikaka bona taihu ese idia lalodia bada. Momokani, tadikaka taihu be heduru bada idia henia, herevana heduru ia abia tauna ese unai ia laloa bada eiava lasi.

SIBONA IA NOHO LALOHISIHISINA BONA IA MAMIA HAIDA ESE IDIA LALOA BADA LASI

Namona be ita laloatao, ena be ita hekwarahi ia divos tadikaka o taihu ta ita durua totona, to nega ta ta do ia mamia ia be sibona ia noho dainai do ia lalohisihisi. Hegeregere, idia divos taihu haida do idia mamia haida ese idia ura henidia lasi. Taihu ta, Alicja ia gwau: “Lau divos negana amo lagani eit idia hanaia vadaeni. To, nega haida lau mamia lau be anina lasi. Unai bamona negadiai, lau ura lasi haida lau bamoa, sibona dekenai lau hebogahisi bona lau taitai.”

Divos taudia momo be unai bamona idia mamia, to Baibel ena sisiba ia gwau namo lasi ta be sibona ia noho. Bema ta ese unai sisiba ia dadaraia, ia ese taunimanima haida edia “laloa namodia” do ia abia lasi. (Aon. 18:1) To, namona be divos taudia idia naria namonamo. Namo lasi tau o hahine tamona sibona amo heduru o sisiba ia tahua loulou. Unai bamona idia karaia neganai, idia huanai hemami kererena ia vara diba.

Idia divos tadikaka o taihu be lalometau gaudia momo idia davaria. Hegeregere, vaira negana dainai idia lalohekwarahi, sibona idia noho dainai idia lalohisihisi o idia mamia haida ese idia ura henidia lasi. Namona be ita laloparara, vaia unai hemami do idia abia, bona do idia hanaia be auka. Unai dainai, namona be Iehova ita tohotohoa bona idia ita durua. (Sal. 55:22; 1 Pet. 5:6, 7) Namona be ita abia dae idia ese eda heduru do idia moalelaia. Oibe, kongrigeisen lalonai idia ese heduru be tura korikoridia amo idia abia diba!​—Aon. 17:17; 18:24.