Lau Ura Haheitalai Namodia Lau Tohotohoa

LAU be December 10, 1936 ai lau vara, Wichita, Kansas, U.S.A. ai. Ai natudia ibounai be 4 bona lau be ginigunana. Lauegu tama sina, William bona Jean, be Iehova idia hesiai henia. Unai nega ai, egu tamana be kongrigeisen ia naria. Egu sinana be iena sinana, Emma Wagner, amo hereva momokani ia diba. Emma ese hereva momokani be taunimanima momo dekenai ia hadibaia, hegeregere Gertrude Steele, ia be lagani momo Puerto Rico ai misinari gaukara ia karaia.a Unai dainai lau tohotohoa haheitalai namodia be momo.

HAHEITALAI NAMODIA LAU LALOA

Saturday adorahi ta ai, lau bona egu tamana be dala dekenai ai gini bona idia hanai taudia dekenai Gima Kohorona bona Consolation (hari Awake!) magasin ai hariharilaia, unai nega ai egu mauri lagani be 5. Bona unai be Tanobada Tuarina Iharuana ena nega. Vadaeni ia kekero doketa ta ia mai bona egu tamana ena Keristani gini siri karana dainai ia gwauraia dika, ia gwau tamagu be ia gari dainai, tuari dekenai ia lao lasi. Iena vairana be tamagu ena vairana kahirakahira ia atoa bona ia gwau, “Lau oi botaia, lau diba do oi karaia lasi, badina oi be gari tauna!” Lau gari, to tamagu dekenai lau moale. Ena be unai ia vara, to idia haboua hutuma dekenai magasin ia do hariharilaia. Bena soldia tauna ta ia mai, bona doketa be ia dekenai ia boiboi, “Inai gari tauna dekenai gau ta oi karaia!” Soldia ia itaia unai tauna ia kekero dainai, ia dekenai ia gwau, “Oi lao ruma bona oi mahuta!” Vadaeni idia ruaosi idia lao. Lau moale badina unai nega ai Iehova ese egu tamana dekenai lalogoada ia henia. Wichita ai, tamagu be mai ena huina utua stoa rua, bona unai doketa be hanaihanai unuseni ia lao!

Lauegu mauri lagani be 8 neganai, egu tama sina ese edia ruma bona stoa idia hoihoilaia, motuka mai ena ruma maragina ta idia hoia, bona Colorado dekenai idia lao, pablisa momo lasi gabuna dekenai idia haroro totona. Bena gabu ta ladana Grand Junction dekenai ai noho, egu tama sina be unuseniai idia painia bona uma gabu badana ta bona animal naria gabunai pat-taim moni gaukara idia karaia. Iehova ena hahenamo bona edia gaukara goadagoada karana dainai, kongrigeisen ta idia hamatamaia. Unuseniai, June 20, 1948 ai, ororo amo ia diho ranu ai tamagu ese lau ia bapatisoa, Baibel ena hereva momokani idia abia dae taudia ma haida danu, idia ta be Billie Nichols bona ena adavana. Idia be gabeai sekit gaukara idia karaia​—edia natuna mero bona ena adavana danu.

Basileia gaukara idia karaia taudia momo ai bamodia bona ta ta ai hagoadaia. Idia haida be Gertrude Steele ena ruma bese​—Don bona Earlene, Dave bona Julia, bona Si bona Martha​—idia ese lau idia durua bada. Idia amo inai lau dibaia, bema Basileia lau atoa guna, egu mauri do lau moalelaia.

GABU MA TA DEKENAI AI LAO

Lauegu mauri lagani be 19 neganai, emai turana ta, Bud Hasty, ese lau ia noia ia ida United States ena saut kahanai painia gaukara ai karaia totona. Sekit tauna ese ai ia noia Ruston, Louisiana, dekenai do ai lao, unuseniai idia manoka Witnes taudia momo idia noho. Ai idia hamaoroa, ena be momo do idia mai lasi, to wiki ta ta ai hebou ai karaia be namo. Hebou gabuna namona ta ai davaria bona ai hanamoa. Bona hebou ibounai ai karaia, nega sisina daudau lalonai ai ruaosi sibona ai hebou. Ai ese hebou ena kahana ibounai ai karaia, bona ia helai tauna ese henanadai ibounai ia haerelaia. Bema kahana ta be mai ena haheitalai, ai ruaosi ese ai karaia, ena be helai taudia ta be lasi! Bena taihu buruka ta ia mai matamaia. Daudau lasi, Baibel stadi taudia haida, manoka taudia haida danu, be hebou dekenai idia mai matamaia, bona metairametaira kongrigeisen ia bada ia lao.

Dina ta, lau bona Bud be Church of Christ tomadihona ia lao henia tauna ta ai hedavari henia, bona ia ese lau diba lasi siri haida ia gaukaralaia. Lau hoa sisina, to unai ese egu lalona ia veria lau abia dae gaudia lau laloa dobu totona. Wiki ta lalonai, malokihi ai lamepa lau gabua bona unai tauna ia henia henanadai edia haere lau tahua. Unai ese lau ia durua hereva momokani lau abia dae momokani totona, bona lau ura bada dubu tauna ma ta lau haroro henia.

Daudau lasi murinai, sekit naria tauna ese lau ia noia El Dorado, Arkansas, dekenai do lau lao, unai kongrigeisen durua totona. Unuseni lau noho neganai, nega haida Colorado dekenai lau lao, soldia taudia vairanai lau gini totona. Dina ta, painia taudia haida be lau ida egu motuka amo ai lao, bona Texas ai aksiden ta ai davaria, bona egu motuka ia dika. Vadaeni tadikaka ta ai rini henia bona ia mai bona ena ruma dekenai ai ia abia lao, gabeai kongrigeisen hebouna dekenai ai lao hebou. Unuseniai kongrigeisen idia hadibaia ai be aksiden ta ai davaria, bona tadikaka ese ai dekenai heduru moni sisina idia henia. Tadikaka ese danu egu motuka be dola 25 dekenai ia hoihoilaia.

Bena Wichita dekenai ai lao, unuseniai emai turana ta, Tadikaka McCartney ia noho. Ia be painia tadikakana. Iena hekapa natuna memero, Frank bona Francis, be egu tura namodia. Idia ese edia motuka gunana be lau dekenai dola 25 amo idia hoihoilaia, unai be egu motuka dikana amo lau abia davana. Unai nega ai lau itaia Iehova ese egu dabu gauna ia henia, badina lau be Basileia lau atoa guna. Bona unai nega ai danu, Frank bona Francis edia heduru amo taihu, Bethel Crane, lau hedavari henia. Wellington, Kansas ai, iena sinana, Ruth, be Witnes taihu goadana, bona ia painia ela bona ena mauri lagani be 90 bamona. Hua haida murinai, lagani 1958 ai, lau bona Bethel ai headava, bona El Dorado dekenai painia gaukara ai karaia hebou.

MOALE GAUNA

Emai turadia edia haheitalai namodia ai laloa lou murinai, sibona ai henia Iehova ena orea ese do ia henia gaukara idauidau ai karaia totona. Ai idia siaia Walnut Ridge, Arkansas dekenai spesel painia gaukara do ai karaia. Bena lagani 1962 ai, Gilead ena klas 37 dekenai ai idia boiria. Ai moale badina Don Steele be unai klas dekenai danu. Sikuli ia ore murinai, lau bona Bethel be Nairobi, Kenya, dekenai idia siaia. New York ai rakatania neganai, ai lalohisihisi, to Nairobi ena airport ai iseda tadikaka taihu ai itadia neganai, ai moale bada!

Kenya ai ura henia matamaia bona haroro gaukara danu ai moalelaia. Ai stadi henia taudia ginigunadia be Chris bona Mary Kanaiya. Idia be Kenya ai ful-taim hesiai gaukara idia do karaia noho. Murina laganina ai, ai idia noia Kampala, Uganda, dekenai ai lao totona, unai tano dekenai ai be misinari ginigunadia. Unai be moale negadia, badina momo be Baibel ena hereva momokani idia dibaia, bona Witnes taudia ai idia lao. To lagani toi mai kahana Africa dekenai ai noho murinai, egu adavana ia rogorogo dainai unai gabu ai rakatania. Unai dainai United States dekenai ai giroa lou. Africa ai rakatania dinana ai, ai lalohisihisi bada, unai ese New York ai rakatania neganai ai mamia hisihisina ia hereaia. Africa ai idia noho taudia ai lalokau henia bona ai ura nega ta unuseni ai giroa lou.

ASAINMEN MATAMATA AI ABIA

Ai be Colorado ena west kahanai ai noho, emai tama sina idia noho gabuna unai. Daudau lasi murinai, emai natuna kekeni ginigunana, Kimberly, ia vara, bona hua 17 murinai, Stephany, ia vara. Ai be tama sina dainai, unai maduna ai laloa bada, ai dekenai unai be asainmen matamata, bona ai gaukara goada emai natuna kekeni rua edia kudouna ai hereva momokani ai atoa totona. Ai ura haheitalai namodia idia hahedinaraia taudia edia haheitalai ai tohotohoa. Momokani, ena be ita laloa haheitalai namodia hahedinaraia karana ese iseda natudia do ia durua, to unai ese ia hamomokania lasi idia tubu daekau neganai, Iehova do idia hesiai henia. Lauegu tadina mero bona kekeni be hereva momokani idia rakatania. Reana nega ta, haheitalai namodia idia hahedinaraia taudia do idia tohotohoa lou.

Aiemai natudia kekeni naria gaukarana ai moalelaia bona gau ibounai ai karaia hebou. Ai be Aspen, Colorado, kahirakahira ai noho dainai, ai ibounai be aisi ai gadara karana (skiing) ai dibaia, unai amo ai ibounai ai gadara hebou diba. Unai moale negadia be nega namona emai natudia kekeni ida ai herevahereva totona. Idia ida kamepa totona ai lao danu bona hanuaboi ai lahi badinai ai helai bona mai moale ida ai herevahereva. Ena be idia be do matamata, to nega momo idia henanadai: “Lau bada neganai, dahaka do lau karaia?” bona “Daika do lau adavaia?” Ai hekwarahi emai natudia kekeni edia lalona bona kudouna ai, Dirava ena hesiai gaukara idauidau ena ura ai atoa totona. Idia ai hagoadaia ful-taim hesiai gaukara do idia laloa, bona unai hesiai gaukara ia ura karaia tadikakana idia adavaia. Idia ai durua, unai amo do idia naria ela bona idia bada sisina bona do idia headava. Idia ai hamaoroa, “emui singul maurina umui moalelaia ela bona emui mauri lagani be 23.”

Emai tama sina idia karaia bamona, ai hekwarahi emai ruma bese ida hebou ibounai dekenai ai lao bona ai haroro totona. Dala ai karaia, unai amo ful-taim hesiai gaukara idia karaia taudia be ai ida idia noho diba. Danu, mai moale ida aiemai misinari gaukara ai herevalaia. Ai ura nega ta ai foa be Africa dekenai do ai lao. Emai natudia kekeni be idia ura bada unai idia karaia.

GAU HAIDA AI HAIDAUA

Emai natudia be idia bada dainai, ai mamia ai be maduna lasi. Dirava ese ena orea amo ia henia heduru bona hakaua herevadia ai gaukaralaia emai natudia edia kudouna ai Iehova lalokau henia urana ai atoa totona. Ai moale bada, badina emai natudia kekeni be haisikuli idia haorea murinai, maoromaoro painia gaukara idia matamaia, bona gaukara ma haida idia karaia danu, sibodia idia naria totona. Idia bona taihu ma rua be Cleveland, Tennessee dekenai idia lao, badina unuseniai pablisa be momo lasi. Ena be idia ai reaia bada, to ai moale, badina idia be ful-taim hesiai gaukara idia karaia. Lau bona Bethel be painia gaukara ai karaia matamaia lou, bona hahenamo ma haida ai abia​​—sekit gaukara bona hebouhebou ena gaukara ma haida ai durua.

Tennessee dekenai ai do lao lasi neganai, emai natudia be London, England, dekenai idia lao, brens ofesi idia itaia totona. Unuseniai, Stephany, unai neganai iena mauri lagani be 19, be Paul Norton ia hedavari henia, ia be Betele ai ia gaukara tadikakana. Edia loaloa ma ta ai, Kimberly, be tadikaka ena gaukara turana ta, Brian Llewellyn, ia hedavari henia. Stephany ena mauri lagani be 23 neganai, Paul ia adavaia. Bona murina laganina ai, Kimberly ena mauri lagani be 25 neganai, Brian ia adavaia. Idia ruaosi ese edia singul maurina idia moalelaia, ela bona edia mauri lagani be 23 eiava ia hanaia. Ai moale bada badina tadikaka namodia idia adavaia.

Emai natudia kekeni idia gwau, ai bona edia tubudia ese idia hahedinaraia haheitalai ese idia ia durua Iesu ena hahegani idia badinaia totona, unai be “nega ibounai Dirava ena Basileia . . . do [idia] tahua guna,” herevana edia moni be hegeregere lasi. (Mataio 6:33) April 1998 ai, Paul bona Stephany be Gilead ena klas 105 dekenai idia boiria, unai murinai Malawi, Africa, dekenai idia siaidia. Unai nega ai danu, Brian bona Kimberly idia boiria London Betele ai idia gaukara totona, bona gabeai Malawi Betele dekenai idia siaidia. Ai moale bada, badina matamata taudia ese unai dala ai edia mauri idia gaukaralaia.

MOALE GAUNA MA TA

January 2001 ai, matamanai ita herevalaia tadikakana ese lau ia rini henia. Tadikaka Marais be Trensleisen Dipatmen ena ovasia, bona lau ia hamaoroa tadikaka be tanobada hegegemadai idia noho gado hahanaia taudia durua kosina ta idia hegaegaelaia, bona ena be egu mauri lagani be 64, to idia ura treinini lau abia, unai amo gado hahanaia taudia lau hadibaia diba. Lau bona Bethel be unai ai gurigurilaia bona emai buruka sinadia ida unai ai herevalaia. Idia rua idia ura ai lao, ena be emai heduru do idia abia lasi. Unai dainai tadikaka lau rini henia lou bona lau hamaoroa unai hahenamo ai abia dae.

Bena egu sinana be kensa gorerena ia abia. Ia lau hamaoroa do ai noho bona ia naria totona egu taihuna do ai durua. To sinagu ia gwau, “Umui be unai do umui karaia lasi. Bema umui lao lasi, do lau lalohisihisi bada.” Linda danu be unai ia mamia. Edia kara ai laloa bada, badina idia be sibona idia henia, bona unuseni idia noho turadia ese idia durudia danu! Patterson ai ia noho Watchtower Educational Center dekenai ai lao dinana ai, Linda ia rini bona ai ia hamaoroa egu sinana ia mase. Iena hagoadaia hereva hegeregerena, mai kudouna ibounai ida emai gaukara matamata ai karaia.

Emai asainmen ginigunana be Malawi brens, ai moale badina emai natudia kekeni bona edia adavana be unuseniai idia noho. Ai hedavari neganai, ai moale bada! Gabeai Zimbabwe bena Zambia dekenai ai lao, unai kosi ai hahedibalaia totona. Lagani toi mai kahana unai kosi ai hahedibalaia murinai, ai idia noia Malawi dekenai do ai giroa, bona unuseniai edia Keristani gini siri karana dainai dagedage idia davaria Witnes taudia edia ekspiriens do ai torea.b

Lagani 2005 ai, Basalt Colorado, dekenai ai giroa lou neganai, ai lalohisihisi bada, to emai painia gaukara ai rakatania lasi. Lagani 2006 ai, Brian bona Kimberly idia mai bona ai kahirakahira idia noho, edia natuna kekeni rua, Mackenzie bona Elizabeth, idia naria totona. Paul bona Stephany be Malawi ai idia do noho, bona tadikaka Paul be unai brens ena komiti ta. Lauegu mauri lagani be kahirakahira 80, bona lau moale bada badina tadikaka matamata momo be guna lau abia maduna idia huaia. Hari ai moale badina haida be ai dekenai haheitalai namona idia hahedinaraia, bona ai gaukara goada edia haheitalai ai tohotohoa totona, unai amo emai natudia bona tubudia ese idia tohotohoa diba.