Iehova Ena Tanobada Oreana Oi Laloa Bada, A?

IDIA utua bona idia hagoevaia namo herea diamond ta oi itaia neganai, dahaka oi itaia? Ia hairai momokani gauna. Unai diamond be maikroskop dekenai oi itaia, bona dahaka oi itaia? Reana gabu haida dekenai idia kakasia, eiava idia utua sisina, eiava miro maragidia haida idia noho, eiava ma kerere haida idia noho.

Maikroskop dekenai unai toa dikadia haida oi itaia neganai unai diamond namona do oi negea, a? Lasi momokani! Maikroskop oi rakatania, bona nadi hairaidia iboudiai amo unai nadi ena hairai bona ena namo oi moalelaia noho diba.

Diamond ta bamona, Iehova ena tanobada oreana be dala momo dekenai ia idau momokani. Tanobada dekenai, ma orea ta lasi be Havaraia Tauna ida ia gaukara hebou diba. Keristen horoa taudia ginigunadia edia nega lalonai, guba helarona idia naria horoa Keristen taudia dekenai, aposetolo Petro be unai gaukara hebou turana karana ia herevalaia. Ia gwau: “Dirava ese umui ia abia hidi vadaeni, umui be iena bese, umui be King ena boubou helaga karaia taudia, bese helagana, bona Dirava ena orea korikori taudia.” (1 Petero 2:9) Hari inai negai, “mamoe idaudia haida” edia hutuma bada herea, tanobada dekenai mauri hanaihanai helarona idia abia taudia, be “bese helagana” danu idia gaukara bona Dirava idia tomadiho henia hebou. (Ioane 10:16) Unai orea rua be orea tamona lalonai idia noho bona unai orea be idau momokani hairai herea nadina ta bamona ia noho.

Ma Haida Edia Kerere Ia Tahua Momo Matana amo Ma Haida Oi Raraia Lasi

To namona be ita diba unai tanobada oreana lalonai be goevadae lasi tanobada taudia. Unai dainai dahaka do ia vara bema laulau dalana dekenai unai orea be maikroskop amo ita raraia? Oibe, ita be kerere do ita itaia bona idia noho taudia edia kara kerere do ita itaia.​—Roma 3:23.

Aposetolo Paulo ia gwau ia be mai ena kerere. Ia gwau: “Lau ura be kara namona lau karaia, to kara dika sibona lau karaia diba.” (Roma 7:21) Keristen taudia iboudiai be unai hekwarahi idia abia. Idia iboudiai idia kerere. Ma danu, hari eiava gabeai, ma haida edia kerere dainai, taunimanima momo idia hisihisi. Namona be ita manoka eiava gau namona ta ita laloa lasi, ma Keristen taudia edia kara kerere idia hedinarai neganai, a? Ia namo bema unai ese Iehova ena orea ita moalelaia karana ia hadikaia, a? Lasi momokani! Namona be unai maikroskop ita rakatania bamona bona taunimanima tamona tamona edia kerere ita laloa momo lasi.

Bible ese lauma helaga ia hahonua taudia edia kara ia gwauraia. Idia haida be “lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana.” (Galatia 5:​22, 23) To kara idauna be hari tanobada ena tomadiho, politikol, bona bisinesi oreadia be nega momo Bible ese ia gwauraidia tauanina karadia idia hahedinaraia: “badu, sibona ena ura tahua kara, hepapahuahu, orea hapararaia kara, laloa dikadia, kekero, lebulebu, bona unai bamona kara ibounai.” (Galatia 5:​20, 21) Unai dainai, nadi iboudiai amo ia hairai momokani diamond bamona, lauma dalana ai, Iehova ena taunimanima be ia miro tanobadana amo idia idau momokani.​—Mataio 5:​14-16.

“Do Umui Gaukara Hebou Mai Laloa Tamona Danu”

Diamond ena toana badana ta be ena kahana ibounai idia kamokau hebou namonamo. Unai hegeregerena, Iehova ena tanobada oreana be hahediba herevadia bona tadikaka karadia dekenai idia noho tamona, ma orea ta ese ia karaia bamona lasi. Unai orea taudia be Bible lalonai, 1 Korinto 1:10 dekenai ia gwauraia sisibana idia badinaia, ia gwau: “Lauegu varavara taudia e, iseda Lohiabada Iesu Keriso ena ladana dainai umui lau noia, umui parara lasi. Hereva tamona do umui gwauraia, bona do umui gaukara hebou mai laloa tamona danu.”

Iehova ena Witness taudia be bese dadaraia karana bona bese tamona abia isi bada karana idia rakatania. “Dirava dekena amo aonega” idia abia dainai, idia be taunimanima ‘edia toana amo idia kara henidia’ lasi. (Iakobo 3:17) Iehova ita hanamoa badina ena be iena orea lalonai ita goevadae lasi tanobada taudia ita noho, to unai kara namona ia havaraia.

To idau, The Christian Century magasin ese lagani 1990 ia herevalaia neganai ia gwau “tanobada ia parara momo tomadiho oreadia dainai bona iduhu bona bese lalohadailaia karana be tomadiho ena lalohadai danu idia hakapua dainai. India ia lao Europe bona Middle East ia lao Pacific dekenai, tomadiho be iduhu bona bese abia isi karadia danu idia hatamonaia​—nega momo politikol kara idaudia idia havaraia.” Ia hedinarai namonamo, idia ura Dirava idia hesiai henia taudia edia dala tamona be Iehova ese ia hanamoa bona lauma ia henia orea tamona dekenai idia lao.

‘Diamond Bamona Oiemu Vairana Lau Ha-Aukaia’

Diamond be taunimanima idia diba gaudia ibounai amo ia auka herea gauna. Bible ia gwau taunimanima be diamond idia gaukaralaia kopina auka gaudia idia kakasia totona. (Ieremia 17:1) Iehova ena hereva Esekiel dekenai oi laloa danu: “Itaia! Oiemu vairana lau ha-aukaia, edia vairana idia auka hegeregerena. Nadi aukana ia hereaia gauna bamona, diamond bamona, oiemu vairana lau karaia.” (Esekiel 3:​8, 9) Iehova be Esekiel dekenai diamond ia auka bamona lalohadai ia henia, ia be kwarana auka taudia ia peroveta henidia totona.​—Esekiel 2:6.

Unai hegeregerena, hari inai negai Iehova be dagedage bada negana ai, iena taunimanima dekenai diamond ia auka bamona vairana ia henidia. Iehova ena Witness taudia be gavamani ese edia gaukara idia koua taravatudia amo, taunimanima idia heiriheiri karana amo, varo be edia aiona dekenai idia kwatua bona idia hamasedia karana amo, botaia karadia amo, hadiburaia kerere karadia amo, hahisidia karadia amo, bona hamasedia karadia amo idia haheauka. Oibe, idia hahedinaraia edia abidadama ia doko diba lasi.

“Lau Sibona Egu Hesiai Taudia Do Idia Moale”

Bible be taunimanima ese “Dirava badinaia kara be toana sibona” idia karaia to “anina momokani do idia negea” ena nega ta ia perovetalaia. (2 Timoteo 3:​1, 5) Niuspepa ta lalonai ia gwau “Protestant, Roman Katolik bona Iuda taudia idia lalohisihisi” edia dubu lalonai bona synagogue lalonai idia noho taudia edia “namba idia diho noho dainai.” To, Iehova ena Witness taudia be Bible idia stadilaia namonamo taudia. Idia iboudiai, matamata bona burukadia, tatau bona hahine, edia namba be ia bada ia lao, bona wiki tamona tamona iboudiai lalonai hebou idia lao henidia. Niuspepa ta dekenai revareva ta lalonai ia gwau “idia dekenai edia tomadiho be gau hereadaena, bona idia ura bada gauna be ma haida dekenai danu idia herevalaia.”

Unai bamona lalohadai dainai Iehova ena orea be ia hairai momokani, diamond bamona. Bona iena lauma helaga amo goevadae lasi taudia Ia hagoadaia bona Ia hakaua Tauna ita hanamoa be namo.

Peroveta tauna Isaia ia peroveta, ia gwau: “Atai Herea Lohiana Iehova be inai bamona ia gwau, ‘Itaia! Lau sibona egu hesiai taudia be do idia aniani . . . Itaia! Lau sibona egu hesiai taudia do idia inuinu . . . Itaia! Lau sibona egu hesiai taudia do idia moale . . . Itaia! Lau sibona egu hesiai taudia be moale dekenai do idia boiboi edia kudou ia namo dainai.”​—Isaia 65:​13, 14.

Hari inai negai unai peroveta hereva ia guguru dalana ita itaia. Dirava be idau dalana dekenai iena taunimanima ia naridia! Unai dainai, bema oi bamodia, namo lasi idia vara hisihisidia oi laloa momo dainai oiemu moale ia boio. Namona be laulau kahana ibounai oi itaia bona oi laloatao: Dirava be ma tanobada oreana ta lasi ia lalodia bona ia naridia. Namona be oi laloaboio lasi gauna be oi be unai orea lalonai oi noho dainai oiemu namo be bada herea.