Pioneer Taudia—Hahenamo Idia Henia Bona Idia Abia

“PIONEER gaukarana ese moni gaukarana namona ia hereaia momokani. Taunimanima be Iehova bona ena hereva momokani do idia dibaia totona durudia be mai moalena bada.” Keristen hahinena ta be unai bamona ia hereva. Ia ese pioneer gaukarana, Basileia sivaraina nega ibounai harorolaia gaukarana, ia abia hidi, iena gaukara korikorina.

Pioneer gaukarana be ta ese ia tahua gauna namo hereana bona dagi namona. Ta ese ia abia hidi bena ia karaia ela bona iena amo hahenamo do ia abidia, dalana be dahaka?

Gau rua be mai anina bada. Ginigunana be, namona be ena noho dalana be hegeregere. Madi, haida edia noho daladia be hegeregere lasi pioneer gaukarana do idia karaia. Gau iharuana be, namona be lauma dalanai ia hegeregere bona ena lalohadai be maoro. To, herevana ta ese pioneer gaukarana hari ia karaia diba o lasi, Keristen karadia do ia goadalaidia toho diba.

Haida ese Pioneer Gaukarana Idia Karaia Ena Badina

Ta be pioneer gaukarana ai do ia kwalimu totona, gau badana be haroro gaukarana ia manadalaia momokani. Sivarai namona be ia diba lasi taudia dekediai gwauraia daladia, kamonai taudia lou henidia daladia, bona Baibel stadi karaia daladia ia diba be namo. Bema unai ia diba lasi, ena lalona do ia manoka. To, ma gau haida danu be mai anina bada.

Ta ese ena tomadiho karadia iboudiai, pioneer gaukarana danu, be ia karadia, Iehova bona iena orea ia badinadia dainai. Pioneer tauhauna ta ladana Rado ia gwau: “Tauhau ta ena dala namo hereana be inai: Iehova do ia laloatao bona hereva momokani dalana ai do ia raka.” Oibe, memero kekeni ese Iehova idia lalokau henia bona idia tura henia karadia hahedinaraidia dalana namona be inai: pioneer gaukarana do idia karaia.​—Kohelete 12:1.

Diba bona lalo-parara danu be mai anina bada. (Filipi 1:​9-11) Ita idia durua, lauma dalanai do ita goada noho totona. Ita sibona eda stadi ita karaia be gau badana, lauma dalanai do ita manoka bena eda moale bona eda abidadama do ita haboiodia garina. Momokani, namona be ita stadi, diba do ita abia totona sibona lasi, to ita abia dibana ese iseda lalona do ia hamarerea totona danu. (Hereva Lada-isidia 2:2) Unai dainai, namona be nega ita atoa, ita guriguri bona ita stadilaia gaudia ita haerodia totona. Bena, bema ita be mai eda dala, do ita ura pioneer gaukarana do ita karaia.​—Esera 7:10 itaia.

Ta ese pioneer gaukarana do ia karaia totona, namona be ena lalona be hegeregere sibona ena ura haida do ia dadaraidia. Tauhau ta ladana Ron ese ena lalona ia hadaia pioneer gaukarana do ia karaia. Gau tamona, ia ura moni gaukarana namona do ia davaria, unai gaukara dainai pioneer gaukarana do ia karaia diba bona dava bada gaudia do ia hoidia diba danu. Taihu goadana ta ia hamaoroa neganai, ena haere ese ia hahoaia; ia gwau: “Iehova ese kara ia hanamodia, gwauhamata ia hanamodia lasi.” Vadaeni, moni gaukarana ia davaria; ena pei be bada lasi, to ia dainai pioneer gaukarana ia karaia diba. Bema ta ese Mataio 6:​25-34 ena hereva ia badinaia, ena be ena pei be bada lasi to do ia hegeregere.

Bema iseda lalona be hegeregere heduru herevadia do ita badinadia mai eda lalo-manau ida, reana unai dainai pioneer gaukarana lalonai do ita vareai. Hanna be Keristen hahinena ai ia lao neganai, ia ura pioneer gaukarana do ia karaia. To ena natuna be idia maragi neganai ia karaia lasi, bena gabeai moni gaukarana ia karaia. Elda taudia edia sisiba namona ia abia dae, bena ena moni gaukarana ia rakatania bona pioneer gaukarana ia karaia. Hari, haida ia hahegaegaedia bapatiso totona bona manoka taudia ia durudia danu, unai amo moale bada ia davaria.

Hereva momokani ese ita ia durua vadaeni dalana bema ita moalelaia, unai ese ita ia ha-uraia diba pioneer gaukarana do ita karaia totona. Hahine ta ena lalona ia metau bada, ena headava ia dika dainai, to Dirava ena hereva momokani ia dibaia bena ia badinaia neganai, ena lalo-metau ia doko. Hereva momokani ese ia durua dalana ia moalelaia bada dainai, ena lalona ia hadaia, Dirava do ia tanikiu henia dalana namona be pioneer gaukarana do ia karaia bena ma haida do ia durudia diba. Unai bamona ia karaia, bona hari ia ese hahenamo momo ia abidia; Baibel stadi momo ia karadia bona ena ruma bese idia moale.

Ma Haida Idia Heduru Diba

Pioneer taudia momo ese ma haida idia durudia pioneer taudia ai do idia lao. Rado, ai gwauraia vadaeni tauhauna, ena lagani be 6 neganai, ena tamana sinana be pioneer taudia rua ida Baibel idia stadilaia. Ia do maragi neganai, unai pioneer taudia ia bamodia momo, ruma ta ruma ta ai idia haroro negadiai. Ena lagani be 17 neganai, ia be pioneer tauna ai ia lao. Tauhau ma ta ladana Arno be Keristen besena ai ia tubu daekau, to lauma dalanai ia manoka ia lao. Gabeai, dala ia tahua lauma dalanai do ia goada lou totona, bona hari ia gwau: “Pioneer taudia ese lau idia hagoadaia bada. Sikuli holide negadiai lau bamodia, bona nega haida hua tamona ai hora 60 lalodiai lau haroro. Unai murinai, regular pioneer gaukarana [hua ta ta ai hora 90 lalodiai haroro] lau karaia matamaia be auka lasi.” Tanobada ena gau abidia badabada lasi sisibana 1 Korinto 7:​29-31 ai laloa namonamo karana ese unai bamona uhaudia ia durudia bada.

Bema edia tamadia sinadia ese lauma gaudia idia tahudia guna bona idia ha-uradia pioneer gaukarana do idia karaia totona, pioneer gaukarana ura henia urana be idia lalodiai do ia tubu haraga diba. Mero ta ladana Philo be unai bamona besena lalonai ia tubu daekau; ia gwau: “Taunimanima momo ese lau idia hamaoroa, namona be edukeisini bada do lau abia bena moni gaukarana namona do lau davaria diba. To egu tamana sinana ese lau idia durua, unai ia hereaia gauna do lau tahua totona. Lau idia hamaoroa, bema lau ura egu vaira negana do ia namo, namona be Iehova tura henia dalana do lau tahua guna.”

Haneulato ta ladana Thamar ia gwau ena tamana sinana edia haheitalai bona edia heduru dainai pioneer gaukarana ia karaia. Ia gwau: “Lau diba lasi edena negai lauma gaudia lau lalodia matamaia, to . . . egu tamana sinana edia kara​—nega ibounai haroro gaukarana idia karaia, hebou iboudiai idia lao henidia, bona hereva momokani idia ura henia bada​—ese lau idia durua bada, lauma gaudia do lau lalodia totona.”

Emu Lalohadai Oi Goadalaia Noho

Bema ta ese ena lalona ia hadaia pioneer gaukarana do ia karaia, bena ia hamatamaia murinai bema ia goadalaia, unai ese do ia durua, ena lalohadai ena anina namona do ia abia guguru totona. Namona be ena nega haria namonamo dalana ia dibaia, bena ia gaukaralaia anina bada havaraia totona. To, gau badana be Iehova bona Iena orea ia badinadia.

Unai bamona karana ma ta be guriguri. Mero ta ladana Cor ia gwau: “Hereva momokani ai lau vareai neganai, lau ura dikadika pioneer gaukarana do lau karaia.” To, ena tamana ese ia hagania iena kosi iunivesiti ai do ia haorea guna. Ia haorea murinai, pioneer gaukarana ia karaia matamaia. Gabeai, ia headava bena ena adavana be ia ida pioneer gaukarana idia karaia hebou. Ena adavana ia rogorogo neganai, ia laloa reana pioneer gaukarana amo do ia doko. Cor ia gwau: “Iehova lau guriguri henia loulou, egu ura korikorina, pioneer gaukarana do lau karaia noho urana, be lau hamaorolaia.” Gabeai moni gaukarana ta ia davaria, bena ia be mai ena dala, pioneer gaukarana do ia karaia bona ena ruma bese do ia naria danu.

Bema ta be mai ena aniani bona dabua bona ena lalona ese unai ia moalelaidia, vadaeni unai ese do ia durua, pioneer gaukarana do ia karaia noho totona. Paulo ia gwau: “Moni do umui ura henia dikadika lasi. To . . . inai bamona do umui laloalaia, ‘Lau dekenai noho gauna be namo, ia hegeregere vadaeni.’ Badina be Dirava . . . ia gwau, ‘Lau ese umui do lau negea lasi, bona umui do lau rakatania lasi.’ ” (Heberu 13:5) Harry bona Irene idia laloa idia dekenai idia noho gaudia be hegeregere; unai lalohadai ese ia durudia pioneer gaukarana do idia karaia noho totona. Irene, matakepulu hahinena, be lagani 8 ai pioneer gaukarana ia karaia. Ia gwau: “Moni be nega ta ai lalo-hekwarahilaia lasi. Ai naria namonamo, moni dalanai ai be sibona do ai hametaua kava garina. Kohu momo bona dava bada gaudia ai tahudia lasi, to emai noho be namo herea, bona hahenamo momo ai davaridia.”

Moale Bona Hahenamo Momo

Thamar be ena pioneer gaukarana laganidia 9 ia lalodia, ia gwau: “Lau be Iehova kahirakahira dekenai lau noho; mamina be ia ese egu imana ia dogoatao.” (Salamo 73:23) Bona hetoho haida ia lalodia danu, ia gwau: ‘Nega momo sibogu egu manoka bona ma haida edia ese lau idia hahekwarahia. Bona, tadikaka bona taihu haida lau itadia, edia noho dalana be idau, idia be mai edia kohu momo, bena medu ai bona keru ai lau haroro loaloa neganai, edia noho lau mama henia. To egu lalona momokani ai, lau ura lasi idia noho hegeregerena do lau noho. Lau diba pioneer gaukarana ese moale bada bona hahenamo momo ia havaradia bona egu lalona ena ura lauma dalanai ia hahegeregerea.’ Oi ese unai bamona moale bona hahenamo oi lalodia bada a?

Pioneer taudia be hora momo lalodiai Keristen hesiai gaukarana idia karaia dainai, idia be mai edia dala, taunimanima momo be Baibel ena hereva do idia hadibalaidia. Harry bona Irene idia gwau: “Iehova ena orea lalonai hahenamo momo ita abidia diba, to kamonai matamata taudia do idia goada idia lao bona Iehova ena hesiai taudia ai do idia lao totona ita durudia be hahenamo hereadaena.”

Pioneer tauna ma ta ia gwau: “Lau ese Hereva Lada-isidia 10:22 ena hereva lau hamomokania: ‘Iehova ena hahenamo ese taga ia habadaia, bona hisihisi sisina ia atoa kau lasi.’ Nega momo inai siri ena anina be lau dekenai ia vara, Iehova ena hesiai lau lao henia laganidia ai.”

Tama sina e, emui natudia be pioneer gaukarana do idia ura henia totona umui ha-uradia noho a? Pioneer taudia e, umui ese inai ura be ma haida lalodiai umui havaraia toho a? Elda taudia e, pioneer taudia emui kongregesen ai umui imudadia, bona kongregesen taudia oredia umui durudia pioneer gaukarana do idia laloa bada totona, a? Iehova ena orea taudia ma momo ese unai bamona hahenamo do idia tahudia be namo, pioneer gaukarana do idia karaia lalonai.