Iehova Dekenai Ita Henia Ena Badina be Dahaka?

DINA be Sidono ena taoni maragina Sarepata dekenai ia hururuhururu neganai, vabu ta ia igo diho bona au maragi haida ia haboua. Ia ura lahi ia karaia aniani sisina ia nadua totona​—reana unai be ia bona ena natuna mero maragina edia aniani ginigabena. Ia bona ena natuna mero be medu lasi bona aniani lasi ena nega daudauna lalonai idia mauri noho totona ia hekwarahi bada, to hari inai dika momokani negana idia davaria. Idia hitolo bada.

Tau ta ia mai kahirakahira. Ena ladana be Elia, bona unai vabu be haraga ia itaia ia be Iehova ena peroveta tauna. Toana be ia be unai Dirava ena sivarai ia kamonai vadaeni. Unai vabu ena gabu Sidono be Bala ena dagedage bona gageva tomadihona amo ia honu, bona Bala amo Iehova ia idau vaitani. Unai dainai Elia ese ia amo ranu ia noia neganai, mai ena ura ida ia durua. Reana ia laloa unai kara amo Iehova ena lalo-namo do ia abia. (Mataio 10:41, 42) To Elia ese gau ma ta ia noia​—aniani sisina. Ia gwau ena aniani be hegeregere nega tamona sibona ia ania totona. To, Elia be ia noinoi bona ia hamaoroa Iehova ese hoa karana amo aniani do ia henia ela bona medu lasi negana do ia ore. Vabu be dahaka ia karaia? Baibel ia gwau: “Vabu be ia lao, Elia ena hereva hegeregere ia karaia.” (1 King 17:10-​15) Unai hereva ese abidadama karana badana idia hahedinaraia​—oibe, ia bada herea dainai Iesu Keriso ese lagani tausen murinai unai vabu ia hanamoa!​—Luka 4:​25, 26.

Reana ita hoa, badina Iehova ese ogogami hahinena amo gau momo ia noia. Unai be momokani bema nega ta tau badana ta ese ia gwauraia gurigurina ita laloa. King Davida ese ena natuna mero Solomona be Dubu Helaga haginia totona do ia gaukaralaia gaudia ia haboua neganai, harihari bada karana ia habadaia. Hari, unai neganai idia henia harihari gaudia edia davana be kina bilioni momo! To, Davida ese Iehova ia guriguri henia, ia gwau: “To lau be daika, bona egu orea taudia be daika, vadaeni ai ese inai harihari gaudia bada herea ai henia diba? Badina be gau ibounai be oi dekena amo idia mai noho, bona oi sibona oiemu gau, be ma ai henia lou vadaeni oi dekenai.” (1 Sivarai 29:14) Davida ia hereva bamona, gau iboudiai be Iehova ena. Unai dainai, tomadiho goevana ita durua totona harihari gauna ita henia neganai, ita ese Iehova ena gau ita henia lou ia dekenai. (Salamo 50:10) Unai dainai, ita nanadaia diba, Dahaka dainai Iehova ia ura harihari gauna ita henia?

Tomadiho Momokani Ena Kahana Badana Ta

Haere kwadogina be, idaunegai amo Iehova ese henia karana be tomadiho momokani ena kahana badana ta ai ia halaoa. Abidadama tauna Abela ese iena animal namo hereadia haida ia bouboulaia Iehova dekenai. Bese kwaradia Noa, Aberahamo, Isako, Iakobo, bona Iobu ese unai bamona boubou gaudia idia henia danu.​—Genese 4:4; 8:​20; 12:7; 26:25; 31:54; Iobu 1:5.

Mose ena Taravatu ese oda ia henia bona taravatu ia atoa Iehova dekenai harihari gaudia do idia henia. Hegeregere, Israela taudia ibounai ia hagania karoa 10 amo karoa ta idia henia, eiava edia tano ena aniani bona edia animal matamata edia karoa 10 amo karoa ta do idia henia harihari gauna bamona. (Numera 18:25-​28) Harihari gauna ma haida edia taravatu be unai bamona idia auka lasi. Hegeregere, taravatu ia gwau Israela taudia ta ta ese ena animal edia natudia bona uma gaudia edia anina ginigunadia be Iehova dekenai ia henia be namo. (Esodo 22:29, 30; 23:19) To, unai gau ginigunadia edia bada be ta ena ura hegeregerena, to gau hereadae ia henidia be namo. Taravatu lalonai tanikiu henia bouboudia bona gwauhamata bouboudia danu idia henia diba, unai boubou be edia ura hegeregerena idia henia. (Levitiko 7:​15, 16) Iehova ese ena taunimanima ia hagoadaia ia ese ia hanamodia hegeregerena do idia henia. (Deuteronomi 16:17) Palai Dubu idia haginia neganai bona gabeai Dubu Helaga idia haginia neganai, ta ta ese ena kudouna ia veria hegeregerena ia henia. (Esodo 35:21; 1 Sivarai 29:​9) Iehova ese edia ura hegeregerena idia henia harihari gaudia ia moalelaia bada!

“Keriso ena taravatu” henunai henia gaudia ibounai be ta ena ura hegeregerena. (Galatia 6:2; 2 Korinto 9:7) Unai ena anina be inai lasi, Keriso murinai idia raka taudia be henia karana idia hadokoa eiava sisina sibona idia henia. Lasi! Iesu bona ena aposetolo taudia be Israela dekenai idia haroro neganai, hahine edia orea ta be idia murinai idia raka bona sibona edia kohu amo idia naridia. (Luka 8:​1-3) Aposetolo Paulo danu ese ena misinari gaukara idia durua harihari gaudia ia abia, bona ia ese kongregesen haida ia hagoadaia ogogami taudia be moni amo do idia durua. (2 Korinto 8:​14; Filipi 1:​3-5) Ierusalema dekenai ia noho hakaua oreana ese diba taudia idia abia hidi harihari gaudia be ogogami taudia dekenai idia henia karana idia naria totona. (Kara 6:​2-4) Ia hedinarai goevagoeva, Keristani taudia ginigunadia idia laloa tomadiho momokani be unai dala amo idia durua be hahenamo ta.

To, reana ita laloa dahaka dainai Iehova ese henia karana be ena tomadiho ena kahana ai ia halaoa. Ena badina hani mani oi laloa.

Ita Henia Ena Badina

Badina ginigunana be, Iehova ese henia karana be tomadiho momokani ena kahana ta ai ia halaoa badina unai kara amo namo do ita davaria. Ia ese Dirava ena kara namo ita laloa bada karana ia hahedinaraia badabada. Haheitalai be, bema natuna ese harihari gauna ia hoia eiava ia karaia ena tamana totona, dahaka dainai tamana do ia moale bada? Unai harihari gauna ese tamana be dala ma ta ai ia abia diba lasi gauna ia durua, a? Reana lasi. To, tamana ia moale bada badina ia itaia natuna ese laloa bada karana bona henia karana ia habadaia. Unai hegeregerena Iehova ese ita ia hagoadaia, henia karana do ita karaia bona ita karaia neganai ia moale. Unai kara amo ita hahedinaraia ena kara namo bona ena harihari bada ibounai ita dekenai be ita laloa bada. Ia be “gau namodia ibounai, bona harihari gaudia namodia momokani ibounai” henia tauna, unai dainai ia ita tanikiu henia ena badina be do idia ore lasi. (Iamesi 1:​17) Gau hereadaena be, Iehova ese iena Natuna lalokauna ia henia, ena mase ia koua lasi ita be mauri hanaihanai do ita abia totona. (Ioane 3:​16) Hanaihanai ita tanikiu henia diba, to do ia hegeregere lasi, ani?

Badina iharuana be, bema hanaihanai henia karana ita karaia, dala hereadaena dekenai Iehova bona ena Natuna, Iesu Keriso, ita tohotohoa diba. Iehova be henia karana ia hahedinaraia loulou, bona ena harihari bada ia hedinarai hanaihanai. Baibel ia hereva bamona, ia ese “mauri bona laga bona gau ibounai” ia henia ita dekenai. (Kara 17:25) Ia maoro ita ese ia ita tanikiu henia ita hahodi dainai, ita moalelaia aniani idauidau dainai, bona mauri ita moalelaia negadia dainai. (Kara 14:17) Iesu be, ena Tamana bamona, henia karana ia hahedinaraia. Mai ena ura ida sibona ia henia. Iesu ese hoa karadia ia karaia neganai, ia ese gau ta ia halusia, guna unai oi diba vadaeni, a? Nega momo Baibel ese ita ia hadibaia gorere taudia ia hanamoa neganai, ‘siahu be ia dekena amo ia lao murimuri ai.’ (Luka 6:19; 8:45, 46) Iesu ena harihari bada karana dainai, sibona ena soul, ena mauri, ia henia mase dekenai.​—Isaia 53:12.

Unai dainai ita henia neganai, herevana ia be iseda nega, iseda goada, eiava iseda kohu, to ita be Iehova ena kara ita tohotohoa bona ena kudouna ita hamoalea. (Aonega Herevadia 27:11; Efeso 5:1) Danu, ita ese Iesu Keriso be taunimanima dekenai ia henia haheitalai goevadaena ita badinaia.​—1 Petero 2:​21.

Badina ihatoina be, henia karana ese dabu gaudia bona mai anina gaudia ia durua bada. Momokani, ena be heduru ita henia lasi to Iehova sibona ese Basileia ena gaukara ia karaia diba, hegeregere bema ita ia gaukaralaia lasi ia ese nadi ia gaukaralaidia diba idia haroro totona. (Luka 19:40) To ia ura ita ia hanamoa dainai unai gaukara namona ita dekenai ia henia. Unai dainai Basileia gaukara durua totona iseda kohu ita henia neganai, ita moale bada badina ita diba ita be mai eda kahana namona tanobada ibounai lalonai idia karaia gaukara hereadaena dekenai.​—Mataio 24:14.

Ita diba momokani Iehova ena Witness taudia edia gaukara tanobada hegegemadai karaia totona moni be gau badana. Hesiai laganina 1995 lalonai, Society ese kahirakahira kina milioni 80 ia negea spesel painia, misinari, bona loaloa naria taudia edia haroro gaukarana lalonai ia durua totona. To, unai be moni sisina sibona bema brens opesi bona printaia gabudia idauidau tanobada hegegemadai haginia bona gaukaralaia dekenai idia negea moni ida ita hahegeregerea. To, unai ibounai idia karaia diba badina mai eda ura ida harihari gaudia ita henia dainai!

Iehova ena taunimanima momo idia laloa lasi, edia kohu be bada lasi neganai unai maduna be ma haida ese do idia huaia totona idia rakatania. Unai bamona lalohadai dainai iseda tomadiho karana ena kahana ita reaia diba. Paulo ena hereva hegeregerena, Keristani taudia Makedonia dekenai ese ‘ogogami bada’ idia hisihisilaia. To, idia noinoi harihari gaudia do idia henia diba. Bona Paulo ia gwau, idia henia gauna ese “edia goada ia hanaia”!—2 Korinto 8:1-4.

Badina ihahanina be, Iehova ese henia kara be tomadiho momokani ena kahana ta ai ia halaoa badina henia kara ese ita ia durua do ita moale. Iesu sibona ia gwau: “Henia kara ena moale be bada, abia kara ena moale be maragi.” (Kara 20:35) Iehova ese unai bamona ita ia karaia. Unai badina ma ta dainai reana ita laloa, herevana ita henia gauna ena bada be edena bamona, to unai be iseda kudouna amo ia ita laloa bada karana ida hegeregerena lasi. To ita moale diba badina be, Iehova be gau momo ia ura lasi ita amo to ita henia diba gauna sibona ia ura. Ita daradara lasi, ita henia diba gaudia bema mai moale ida ita henia, ia ese unai ia moalelaia bada!​—2 Korinto 8:​12; 9:7.

Henia Karana Ita Hahedinaraia amo Hahenamo Ita Davaria

Matamaia kahanai ita herevalaia haheitalai mani oi laloa lou, reana Sarepata ena vabu ese ia laloa diba ma tau ta ese Elia ena aniani do ia henia be namo. Unai neganai hahenamo badana ia reaia diba, ani!

Momokani, Iehova ese henia kara idia hahedinaraia taudia ia hanamoa. (Aonega Herevadia 11:25) Sarepata ena vabu ese hisihisi ia davaria lasi ena be ena aniani ginigabena ia henia. Iehova ese hoa karana amo ahuna namona ia henia. Elia ese ia gwauhamata henia hegeregerena, ena udaia gaudia amo paraoa bona dehoro idia ore lasi ela bona medu lasi negana ia ore. To unai ahuna ia hanaia gauna ia davaria danu. Ena natuna mero ia gorere bona ia mase neganai, Elia, Dirava momokani ena tauna unai, ese ia hamauria lou. Unai ese lauma dalanai unai vabu ia hagoadaia bada, ani!​—1 King Taudia 17:⁠16-​24.

Hari inai negai ita laloa lasi hoa karadia amo ita ia hanamoa. (1 Korinto 13:8) To Iehova ia gwau edia lalona ibounai ida ia idia hesiai henia taudia do ia naria. (Mataio 6:​33) Unai dainai ita be Sarepata ena vabu hegeregerena ita karaia diba, mai harihari bada ida henia karana ita karaia, bona ita diba momokani Iehova ese ita do ia naria. Unai vabu bamona, ita ese lauma hahenamo namodia ita moalelaia diba. Bema henia kara be hanaihanai ita karaia, nega ta ta ai ita karaia kava bamona lasi, ita do ia durua iseda matana do ia namo bona Basileia gaudia do ita laloa bada, Iesu ese ita ia hagoadaia hegeregerena. (Luka 11:34; 1 Korinto 16:​1, 2 itaia.) Ita ia durua danu Iehova bona Iesu kahirakahira dekenai ita lao edia gaukara hebou taudia bamona. (1 Korinto 3:9) Bona unai ese harihari bada karana, tanobada hegegemadai Iehova idia tomadiho henia taudia edia toana unai, do ia habadaia.

[Box on page 31]

HAIDA ESE HENIA KARANA IDIA HAHEDINARAIA DALADIA

KONTRIBUSEN MONIDIA, TANOBADA IBOUNAI GAUKARA DURUA TOTONA:

Momo ese edia moni idia atoa hegaegae, maua ta ladana “Basileia Gaukarana Kontribusen Monina” lalonai do idia udaia totona. Hua ta ta iboudiai, kongregesen ese unai moni be Society ena hedikwota Brooklyn, New York dekenai, eiava ena brens opesi ta dekenai idia siaia.​—Mataio 24:14.

Taunimanima ese kontribusen monina idia siaia diba Watch Tower Bible and Tract Society of Pennsylvania, 25 Columbia Heights, Brooklyn, New York 11201-​2483 dekenai, eiava edia gabu ia naria Society ena opesi dekenai. Mai davana bada herahera gaudia eiava dava bada gaudia idaudia danu idia henia diba. Revareva ta ida idia siaidia be namo, unai revareva ai idia gwau idia be harihari gaudia.

KONTRIBUSEN MONINA MAI TARAVATUNA

Taunimanima ese moni be Watch Tower Society idia henia diba, trust fund ai do idia naria totona ela bona idia mase, to bema nega ta idia dabu, idia be mai edia gwaumaoro do idia abia lou. Bema oi ura ma hereva haida oi diba namona be Society dekenai leta oi torea ataiai ia noho adres dekenai.

PALANILAIA HENIA GAUDIA

Kontribusen moni bona mai taravatu kontribusen sibona lasi, to dala ma haida idia noho Basileia ena gaukara tanobada hegegemadai durua totona. Idia haida be inai:

Insurens: Bema ta ese life insurens ia hoia o moni be retirement fund ta ai ia atoa, Watch Tower Society ena ladana ia torea diba, bena ia mase neganai eiava ia buruka neganai unai moni do idia abia. Namona be unai bamona ia karaia tauna ese Society ia hadibaia.

Banika Akaun: Ta ena banika ena taravatu hegeregerena, dala ia karaia diba Watch Tower Society ese ena moni do idia gaukaralaia ia do mauri lalonai, eiava ia mase neganai do idia henia Society dekenai. Namona be unai bamona ia karaia tauna ese Society ia hadibaia.

Share Monina: Ta ena share monina be Watch Tower Society ia harihari henia diba, eiava dala ia karaia diba unai share be idia edia, to ato-kau monina be ia ese do ia abia.

Tano Bona Ruma: Ta be ena ruma o tano, ia hoia diba gauna, be Watch Tower Society dekenai ia henia diba harihari gauna bamona, eiava do ia noholaia diba ela bona ia mase bena Society ese do ia abia vaitani. Bema ta ia ura unai bamona do ia karaia, namona be Society ia hadibaia guna.

Wills Bona Trusts: Bema ta ena ura be ia mase neganai Watch Tower Society ese ena tano, ruma, kohu, o moni do idia abia, loea dekenai ia lao be namo, will pepana, mase murinai kohu hariharilaia gwaumaoro pepana ai, iena ura do ia torea totona. Eiava bema ena moni be trust fund ai ia noho, ia ese Society ena ladana be trust agreement pepana ai ia torea diba unai moni do idia abia totona. Tano haida ai, bema ta ese ena trust monina be tomadiho oreana ta ia henia, takisi monidia haida do ia henia lasi. Namona be will eiava trust pepana ena kopi ta be Society dekenai ia siaia.

Unai palanilaia henia gaudia idia laloa taudia bema idia ura hereva haida idia diba, namona International Bible Students Association of Papua New Guinea Inc., Box 636, Boroko N.C.D. 111, eiava Society ena opesi oiemu tano dekenai oi tore henia.