Ritaea Negana—Tiokratik Gaukara Habadaia Iduarana Ia Kehoa, A?
RITAEA negana—taunimanima momo idia laloa hekwarahi daudau negana ena iduara ia koua bamona unai. Lagani momo lalodiai idia bisi bada herea, sediual aukana idia badinaia murinai, momo idia laloa idia ritaea negana ese laga-ani bona ura kwalimu mauri dalana ena iduarana do ia kehoa bamona. To nega haida, unai iduara idia vareai bona edia mauri hesikulaia bona anina lasi hemami idia davaria sibona. Moale karadia sibona ese gaukara ia havaraia hemami, mai anina gaukara karaia hemamina, ia havaraia lasi.
Iehova ena Witness taudia dekenai, ritaea negana be “iduara badana ia kehoa vadaeni, bona hari be gaukara badana bona mai anina ena nega namona.” (1 Korinto 16:9) Ena be ta ia buruka ia lao dainai hekwarahi idauidau do ia davaria bona gau haida do ia karaia diba lasi, to buruka taudia haida idia davaria Iehova ena heduru dainai edia hesiai gaukara idia habadaia diba. Mani Netherlands dekenai idia noho buruka Keristani taudia haida edia ekspiriens oi laloa. Lagani 1995 ai, painia taudia (ful-taim Basileia harorolaia taudia) 1,223 amo, painia taudia 269 edia mauri lagani be 50 eiava 50 idia hanaia. Inai 269 amo, painia 81 edia mauri lagani be 65 eiava 65 idia hanaia.
Idia haida be painia gaukara idia karaia diba badina guna moni gaukara dekenai idia bisi hegeregerena idia bisi noho. (Filipi 3:16 itaia.) Ia ritaea vadaeni Keristani tauna ta ladana Karel ia gwau: “Guna, moni gaukara lau karaia neganai, dabai 7:30 ai gaukara lau hamatamaia. Egu penseni lau abia neganai, lau laloa unai sediual do lau badinaia. Dabai 7 okaloka, tereini idia atoa gabuna vairanai, magasin gaukara lau karaia.”
Kwalimu ena ki be oi palani namonamo guna. (Aonega Herevadia 21:5) Unai hegeregerena, haida be moni idia atoa painia gaukara idia hamatamaia totona. Ma haida be edia moni idia naria namonamo bona pat-taim gaukara idia karaia. Theodore bona Ann mani oi laloa. Idia headava neganai painia gaukara idia karaia diba ela bona famili ena maduna dainai idia doko. To edia painia urana ia do noho! Edia natudia kekeni idia tubu daekau neganai, hanaihanai idia hagoadadia painia gaukara idia tahua totona. To anina bada gauna be Theodore bona Ann ese haheitalai namona idia hahedinaraia, nega momo heduru painia gaukara idia karaia. Edia kekeni idia bada neganai, edia haroro gaukara idia habadaia totona, edia moni gaukara idia hamaragia.
Edia kekeni be ful-taim hesiai gaukara idia hamatamaia bona edia ruma idia rakatania murinai, Ann ia painia matamaia. Dina ta ai, ia ese Theodore ia hagoadaia iena moni gaukara ia hadokoa. Ia gwau: “Ita ruaosi ita painia diba.” Theodore be ena biaguna ia hamaoroa dahaka do ia karaia. To ia hoa bada herea badina ena biaguna ia ura ia durua bona pat-taim gaukara ia henia toho, ia gwau: “Lau laloa oi ura emu ataiai [guba] biaguna totona ful-taim gaukara oi karaia, ani?” Hari Theodore bona Ann be painia gaukara idia moalelaia hebou.
Haida be painia gaukara idia karaia, badina be edia mauri lalonai gau ta ia vara. Buruka tauna ta bona ena adavana be edia natuna kekeni bona edia tubuna kekeni be madi idia mase murinai, idia ura edia lagani oredia idia gaukaralaia namonamo. (Hadibaia Tauna 7:2) Idia ura lasi daradoko ese edia mauri ia hadikaia, unai dainai idia be ful-taim hesiai gaukara idia hamatamaia, hari lagani 8 lalonai idia moalelaia vadaeni!
Momokani, ful-taim hesiai gaukara karaia noho totona, ta ese ena lalona ia hadaia auka be namo. Unai hegeregerena, Ernst bona ena adavana, Riek, edia natudia idia bada bona edia ruma idia rakatania murinai, painia gaukara idia hamatamataia. Nega daudau lasi murinai, guna idia gaukara hebou bisinesi tauna be Ernst dekenai gaukara namona ia henia toho. To Ernst ia gwau: “Hari biaguna namo hereana ta totona ai gaukara, bona ai ura lasi ai hadokoa!” Badina be Ernst bona ena adavana be edia “biaguna” Iehova totona idia gaukara noho, hahenamo ma haida idia ia henia. Lagani 20 lalodiai sekit naria gaukara idia karaia bona hari idia do painia noho. Edia ura gaudia dadaraia karana idia lalohisihisilaia, a? Vanegai inai idia torea: “Bema Iehova ia ura, hua toi murinai aiemai headava dinana laloatao negana namba 50 do ai moalelaia, taunimanima momo ese idia gwauraia golden anniversary. To mai momokani ida ai gwau diba painia gaukara ai hamatamaia neganai, aiemai golo lagani korikoridia idia hamatamaia.”
Momo idia davaria hesiai habadaia iduarana idia kehoa neganai, edia moale idia habadaia danu! Tadikaka ta be pura rua murinai bena lagani 65 do ia abia neganai, painia gaukara ia hamatamaia, ia gwau: “Egu mauri lalonai, hahenamo momo abia negana hereadaena be painia gaukara lau karaia laganidia 10 ai.” Tau ta bona ena adavana, lagani 7 lalonai painia gaukara idia karaia taudia, idia gwau: “Aiemai mauri laganidia bona mauri dalana dainai, dahaka gaukara ai karaia be namo? Nega momo ai bamona taudia ai itaia aiemai teritori lalonai—idia be edia ruma dekenai idia laga-ani, tauanina ia bada ia lao, idia buruka idia lao, bona edia goada ia maragi ia lao. Haroro gaukara ese ai ia durua aiemai lalona bona tauanina idia goada noho totona. Hanaihanai ai ruaosi ai hebamo heheni diba. Ai kiri hebou bona aiemai mauri ai moalelaia.”
To momokani, buruka taudia iboudiai edia goada do ia hegeregere lasi painia gaukara karaia totona. Unai bamona Keristani taudia ita hamaoroa diba Iehova ese idia karaia diba gaukarana ia laloa bada. (Mareko 12:41-44 itaia.) Hegeregere, ena tauanina ia dika taihuna ta be buruka taudia idia naria rumana dekenai ia noho bona unai ruma ia rakatania diba lasi. To hesiai habadaia iduarana ia do kehoa noho ia totona! Doketa ta ese ia nanadaia, ena nega be edena bamona ia gaukaralaia. Ia gwau: “Ia lau hamaoroa, hanaihanai egu nega be hegeregere lasi. Ia lalo-parara lasi. Ia lau hamaoroa anina bada gaudia amo egu nega lau hahonua dainai, nega be hegeregere lasi. Lau lalohisihisi lasi, to idia lalohisihisi taudia lau tahua bona Dirava ena palani taunimanima totona be dahaka lau hamaorodia.” Inai amo ena hereva ia hadokoa, ia gwau: “Kahirakahira iena mauri lagani be 80 hahinena amo gau momo do oi abia diba lasi. To mani lau totona oi guriguri, taunimanima momo be Iehova dekenai lau hakaua lao diba.”
Kahirakahira do oi ritaea, a? Reana laga-ani sibona maurina dekenai ia kehoa iduarana ese oi ia dibagania, to unai iduara be lauma dalanai hahenamo abia dalana lasi. Namona be emu mauri dalana be mai guriguri ida oi laloa. Reana Iehova ena hesiai gaukara habadaia iduarana lalonai oi vareai diba.
[Picture on page 25]
Oi ritaea neganai, reana hesiai gaukara habadaia dalana do ia kehoa