Unai Neganai Do Oi Diba Mesia be Daika, A?

IESU KERISO be lagani toi mai kahana ta lalonai Israela taudia huanai Dirava ena Hereva ia harorolaia. To ena haroro gaukara tanobada ai be kahirakahira ia ore neganai, iena nega lalonai idia noho taudia momo ese idia abia dae lasi ia be Mesia, o Dirava ena gwauhamata “Horoa Tauna.” Dahaka dainai?

Baibel ese ita ia durua bena dahaka dainai aposetolo edia nega lalonai idia noho Iuda taudia ese Iesu idia gwauraia lasi Mesia ena badina haida ita diba. Unai badina toi ese momo idia koua dainai, Iesu be inai nega ai Mesia Pavapavana ena dagi ai ia lohia gaukarana idia gwauraia hedinarai lasi.

‘Ai Ura Toa ta Do Ai Itaia’

Aposetolo edia nega lalonai, Iuda taudia ese Mesia idia abia dae lasi ena badina ta be idia ura lasi Baibel lalonai iena Mesia dagina idia hamomokania gaudia idia abia dae. Nega ta ta ai, Iesu ena hereva idia kamonai noho taudia be ia idia hamaoroa toa ta do ia hahedinaraia, bena unai amo do ia hamomokania ia be Dirava ena amo ia mai. Haheitalai ta be, Mataio 12:38 ia gwau taravatu hadibaia taudia bona Farisea taudia haida idia gwau: “Hadibaia tauna e, ai ura be oi dekena amo toa ta do ai itaia.” Iesu be idia dekenai toa haida ia hahedinaraia vadaeni, a? Oibe, ia karaia vadaeni.

Unai neganai Iesu be hoa karadia haida ia karaia vadaeni. Ia ese ranu be uaina ai ia halaoa, ia mase noho merona ta ia hamauria, Petero ena ravana hahinena ena gorere ia hanamoa, lepera tauna ta ia hanamoa lou, marere diba lasi tauna ia hanamoa bena ia raka diba, lagani 38 lalonai ia gorere tauna ena tauanina ia hanamoa lou, tau ta ena imana dikana ia hanamoa lou, taunimanima momo be edia hisihisi goreredia amo ia ruhadia, ami ofesa ta ena hesiai tauna ia hanamoa lou, vabu ta ena natuna mero be mase amo ia hatorea isi lou, bona matakepulu bona hereva diba lasi tauna ta ia hanamoa. Unai hoa karadia be Kana, Kaperanauma, Ierusalema, bona Naina dekenai idia vara. To danu, unai bamona hoa karadia edia sivarai be Iudea ibounai lalonai bona ia badina tanodia dekenai idia kamonaia.​—⁠Ioane 2:​1-​12; 4:​46-​54; Mataio 8:​14-​17; 8:​1-4; 9:​1-8; Ioane 5:​1-9; Mataio 12:​9-​14; Mareko 3:​7-​12; Luka 7:​1-​10; 7:​11-​17; Mataio 12:⁠22.

Ia hedinarai goevagoeva, toa momo herea ese idia hamomokania Iesu be Mesia. Ena be toa momo herea taunimanima edia vairanai ia hahedinaraia, to ia idia abidadama henia lasi. Iesu be Dirava ese ia siaia herevana idia hamomokania gaudia idia itaia to Iesu be Mesia idia gwauraia lasi taudia be lauma dalanai idia matakepulu. Edia kudouna ia auka bona hereva momokani ia vareai diba lasi.​—⁠Ioane 12:​37-​41.

Iseda nega be edena bamona? Taunimanima haida idia gwau, “Egu matana dekenai lau itaia gaudia sibona do lau abia dae.” To unai be aonega karana, a? Baibel ena peroveta herevadia ese idia hahedinaraia Iesu be guba Pavapavana ai ia lao Mesia Basileiana lalonai. Ia ita itaia diba lasi dainai, namona be toa ta ese ita do ia hadibaia ia be ia lohia matamaia, bona unai ese inai nega ena oromana dikana ena dokona dinadia ia matamaia. Unai toa oi lalo-pararalaia, a?​—⁠Mataio 24:⁠3.

Baibel ese ia hahedinaraia, Keriso be Mesia Pavapavana ena dagi ai ia lohia negana ena matamana ai tuari, tano mareremarere, aniani momo lasi negadia, bona daihanai goreredia do idia bada herea. “Nega ena dokona” ai, taunimanima edia kara be ta ta sibona do idia laloa, do idia mataganigani, bona do idia boga auka lasi. (2 Timoteo 3:​1-5; Mataio 24:​6, 7; Luka 21:​10, 11) Lagani 1914 ai Mesia ia lohia matamaia be nega duahia dalana amo do ita hamomokania diba sibona lasi, to nega dokona ai kahana idauidau 20 ese unai idia hamomokania goevagoeva danu.​—⁠March 1, 1993, ena Gima Kohorona, rau 5, itaia.

‘Moni Idia Laloa Bada’

Iuda taudia ese Iesu idia abia dae lasi ia be Mesia ena badina ma ta be kohu idia ura henia bada dainai. Kohu laloa bada karana ese idia momo ia koua dainai, Iesu ena murinai idia raka lasi. Haheitalai ta be, taunimanima momo idia diba Farisea taudia be ‘moni idia laloa bada.’ (Luka 16:14) Mani kohu momo lohiana ta, uhau ta unai, ena sivarai oi laloa; Iesu dekenai ia lao bona mauri hanaihanai abia dalana ia henanadailaia. Iesu ia haere, ia gwau: “Taravatu do oi badinaia.” Unai uhau ia gwau: “Unai ibounai be lau badinaia namonamo vadaeni, ma dahaka dohore lau karaia?” Toana be ia diba taravatu ia badinaia sibona lasi, to ma kara haida do ia karaia danu. Iesu ese ia hamaoroa: “Oiemu kohu oi lao hoia, ogogami taudia dekenai oi henia, guba ena kohu oi abia. Vadaeni lauegu murina dekenai oi raka mai.” Dala namo herea ta ia kehoa unai​—⁠Mesia ena hahediba tauna ai do ia lao! To lohia tauna be mai ena lalohisihisi ida ia raka siri. Dahaka dainai? Badina ia ese kohu tanobada ai be ia laloa bada herea to kohu guba ai be ia laloa maragi.​—⁠Mataio 19:​16-22.

Hari ia idau lasi. Ta be Mesia Pavapavana murinai ia raka momokani tauna ai ia lao ena anina be lauma gaudia do ia atoa guna; gau iboudiai, ena tanobada kohudia danu, edia vairanai do ia atoa. Kohu ia laloa bada tauna dekenai, unai be mai ena hekwarahi karana. Haheitalai ta be, misinari tauna ta mai ena adavana ida be East tanona ta ai, hahine ta dekenai Baibel idia herevalaia. Idia laloa Iehova bona ena Natuna, Iesu Keriso, edia sivarai ma haida ia ura ia diba dainai, Gima Kohorona bona Noga! magasin idia henia toho. Unai hahine be dahaka ia gwau? Inai bamona ia henanadai: “Inai magasin ese lau do ia durua moni momo do lau abia totona, a?” Unai hahine be tauanina gaudia ia laloa bada to lauma gaudia ia laloa maragi.

Unai headava taudia be uhau ta ida Baibel idia stadilaia bona ia be Kingdom Hall dekenai hebou ia lao henia matamaia. Iena tamana bona sinana ese ia idia hamaoroa, idia gwau: “Oi be emu nega oi haorea kava noho. Adorahi lalonai moni gaukara iharuana oi abia bena moni ma haida oi abia be namo.” Tama sina ese natudia idia hagoadaia, tauanina gaudia idia atoa guna to Mesia Pavapavana dibaia karana be murinai idia atoa neganai, madi, unai be dika! China taudia edia aonega herevana ta ia gwau: “Iena taga ibounai amo lohia tauna be lagani ten tausen ia hoia diba lasi.”

Momo be hari idia lalo-parara Mesia Pavapavana idia dibaia bona ia murinai idia raka neganai, moni ura henia dikadika dalana ta be lasi. Iehova ena Witness hahinena ta, guna mai ena moni bada ia karaia bisinesi, ia gwau: “Moni momo oi abia be mai moalena to ia be anina lasi. Moni ese ta ena moale ia havaraia lasi.” Hari ia be Europe dekenai, Watch Tower Society ena brens opesi ta ena Betele famili hahinena ta.

“Iuda Taudia Dekenai Idia Gari”

Iuda taudia ese Iesu idia abia dae lasi ia be Mesia ena badina ma ta be taunimanima idia gari henia dainai. Iena Mesia dagina idia gwauraia hedinarai karana ese edia ladana do ia hadikaia diba. Idia haida be unai idia karaia diba lasi. Mani Nikodemo, Iuda taudia edia kota badana ladana Sanhedrin tauna ta, oi laloa. Iesu ese ia karaia toadia bona ena hahediba herevadia ia hoalaia dainai, ia gwau: “Rabi e, ai diba oi be hadibaia tauna, Dirava dekena amo oi mai vadaeni, badina oi karaia toadia be tau ta ia karaia diba lasi, bema Dirava ese ia durua lasi neganai.” To Nikodemo be hanuaboi ai Iesu dekenai ia lao; reana Iuda taudia ese do idia itaia garina.​—⁠Ioane 3:​1, 2.

Iesu ena hereva idia kamonai taudia momo idia laloa taunimanima edia lalo-namo idia abia be gau badana to Dirava ena lalo-namo idia laloa maragi. (Ioane 5:​44) Lagani 32 C.E. ai, Iesu be Ierusalema dekenai Au Raurau Ruma Maragidia ena aria totona ia lao neganai, unuseniai “taunimanima sibodia huanai Iesu idia herevalaia metaira,” NW.Yet to be approved Ta ese Iesu ia herevalaia hedinarai lasi badina “Iuda taudia dekenai idia gari dainai.” (Ioane 7:​10-13) Iesu ese ena matana ia hanamoa tauna ta ena tamana bona sinana danu be idia ura lasi idia hereva hedinarai, unai hoa karana be Dirava ena gwaukau tauna amo ia mai. Idia danu be “Iuda taudia dekenai idia gari.”​—⁠Ioane 9:​13-23.

Hari inai negai, haida idia lalo-parara Iesu be Mesia Pavapavana, guba ai ia lohia, to idia gari dainai idia gwauraia hedinarai lasi. Idia laloa ma haida ese idia matauraia karana idia haboioa lasi be gau badana. Haheitalai ta be, Germany dekenai, Witness tauna ta ida Baibel idia kikilaia tauna ta ia gwau: “Umui Witness taudia ese Baibel amo umui herevalaia gauna be momokani. To bema lau be hari dina ai Witness tauna ai lau lao, kerukeru taunimanima ibounai do idia diba. Gaukara gabuna ai, egu noho gabuna ai, bona lauegu famili ese ai bamoa noho oreana ai dahaka do idia laloa? Lau hegeregere lasi unai ibounai lau haheaukalaia totona.”

Dahaka ese taunimanima gari henia karana ia havaraia? Hekokoroku, ta ia ura bada famili bona turadia huanai ena ladana ia bada, do idia kirikirilaia bona hahemaraia garina ia gari, iboudiai amo do ia idau karana ia lalo-hekwarahilaia. Unai bamona hemami ese Iehova ena Witness taudia ida idia stadi matamaia taudia ia tohoa momokani. Haheitalai be, hahine matamatana ta be ia hoa, Iesu Keriso ena lohia henunai Mesia Basileiana ese do ia havaraia Paradaisona ena sivarai ia kamonai neganai. To ia be disko hahinena mai ena ladana badana, bona taunimanima gari henia karana ese ia koua dainai, ma haida dekenai unai helaro ia herevalaia lasi. Gabeai, goada ia abia Baibel do ia herevalaia hedinarai totona. Iena disko turadia ese ia idia dadaraia, to ena adavana bona ena tamana bona sinana idia ura kamonai. Unai hahine bona ena sinana be gabeai idia bapatiso, bona ena adavana bona tamana be Baibel idia stadilaia matamaia. Taunimanima gari henia karana ia hanaia ena ahuna namo hereana unai!

Mesia Oi Lalo-pararalaia Momokani, A?

Iesu be satauro ai ia mase noho lalonai, iena hahediba taudia haida be unuseniai. Idia lalo-parara ia be Mesia, idia perovetalaia tauna. Iuda lohia taudia idia noho danu; idia be toa ta idia do tahua noho bamona. Idia gwau: “Bema ia be Dirava ena Keriso, Dirava ena abia hidi tauna, ia be sibona do ia hamauria!” (Luka 23:35) Toa tahua karana do idia hadokoa lasi, a? Iesu be hoa karadia momo ia karaia. Unai sibona lasi, to iena vara, ena haroro gaukara, ena kota, ena mase, bona ena toreisi lou ese Heberu Revarevadia edia peroveta herevadia momo idia hagugurua.​—⁠Watchtower Bible and Tract Society of New York, Inc. ese ia halasia bukana “All Scripture Is Inspired of God and Beneficial,” rau 343-4 itaia.

Idia raka hanaia taudia ese ena Mesia dagina idia hamomokania gaudia idia dadaraia dainai, idia hereva dika henia. (Mataio 27:​39, 40) Tuari taudia ese idia sibona huanai Iesu ena dabua idia haria, bona ena lalona dabuana abia totona laki gadara idia karaia. (Ioane 19:​23, 24) Haida ese unai hamomokania gaudia idia abia dae lasi ena badina ta be taunimanima idia gari henia dainai. Mani Iosepa, Arimatea tauna, bona Iuda taudia edia Kota Badana tauna ta, oi laloa. Ia be “Iesu ena diba tahua tauna ta, to Iuda taudia dekenai ia gari dainai, iena abidadama ia hunia.” Mesia ia mase murinai, Iosepa bona Nikodemo ese Iesu ena tauanina idia hagoevaia. Unai dainai Iosepa ese taunimanima gari henia karana ia hanaia.​—⁠Ioane 19:​38-40.

Bema oi be aposetolo taudia edia nega lalonai oi noho, do oi abia dae Iesu be Mesia, a? Unai bamona oi karaia ena anina be Baibel ese ia hahedinaraia herevadia do oi abia dae, kohu ura henia lalohadaina do oi dadaraia, bona taunimanima gari henia karana ese oi do ia guia lasi. Inai dina gabediai, namona be ita ta ta be sibona ita henanadai, ‘Lau abia dae Iesu be guba ai Mesia Pavapavana, a?’ Kahirakahira ia ese tanobada ena heau dalana do ia biagua. Unai ia vara neganai, Iesu Keriso be gwauhamata Mesia Pavapavana ai ia lao idia abia dae momokani taudia huanai do oi noho, a?

[Picture on page 28]

Iesu be Mesia Pavapavana; namona be unai ia hamomokania gaudia oi laloa nege lasi

[Picture on page 31]

Nega momo Mesia ena sivarai oi dibaia totona namona be haida edia hereva dekenai do oi gari lasi