“Dina Gunadia Umui Laloaboio Lasi”​—⁠Dahaka Dainai?

“DINA gunadia umui laloatao.” Aposetolo Paulo be lagani 61 C.E. bamona ai unai sisiba ia torea, Iudea ai idia noho Heberu Keristani taudia ia tore henia neganai. (Heberu 10:​32, The New English Bible) Dahaka dainai unai hereva ia torea? Dahaka dainai aposetolo taudia edia nega ai idia noho Iehova tomadiho henia taudia be nega gunana idia laloaboio lasi be mai anina? Hari iseda nega ai danu, unai bamona sisiba ita badinaia be mai ena namo, a?

Lagani handred momo lalonai, Baibel torea taudia idia sisiba henia loulou nega gunana ita laloa lasi eiava ita laloa maragi be namo lasi. Idia dekenai guna negadia bona guna idia vara gaudia laloa noho bona laloa namonamo be gau badana. Iehova danu ia gwau: “Gunaguna idia vara gaudia do umui laloatao, bona do umui gwauraia, lau sibona be Dirava, bona do umui gwauraia hedinarai, dirava idauna ta, lau hegeregerena ta ia noho lasi.” (Isaia 46:⁠9) Namona be unai sisiba badinaia ena badina namodia toi ita herevalaia.

Ura Namona Bona Goada Ia Havaraia

Badina ginigunana be, laloatao karana ese ura namona bona goada ia havaraia diba. Paulo be Heberu kongregesen dekenai revareva ta ia torea neganai, ia be Iuda taudia edia dagedage dainai dina ta ta iboudiai edia abidadama idia tohoa taudia ia tore henia. Ia diba edia haheauka karana idia goadalaia be mai anina dainai, Paulo ia gwau: “Nega gunana do umui laloa lou be namo. Dirava ena diari umui davaria murinai, hisihisi momo umui abia, to umui gini goada.” (Heberu 10:32) Guna, unai lauma tuari lalonai idia gini goada laloa lou karana ese idia dekenai goada do ia henia, edia helulu lalonai do idia kwalimu totona. Unai hegeregerena, peroveta tauna Isaia ese inai ia torea: “Lauegu kara do umui laloaboio lasi. Lau ese lau karaia vadaeni karadia do umui laloa noho.” (Isaia 46:⁠8) Iesu Keriso ia ura Efeso kongregesen ia hagoadaia bona unai bamona gaudia idia laloa danu dainai, ia gwau: “Guna be kara namodia oi karaia, to inai kara oi rakatania, bona oi moru vadaeni. Unai dainai unai kara namodia dalana do oi laloa lou.”​—⁠Apokalupo 2:​4, 5.

Mose be Israela taudia ia hereva henia neganai, mai gari lasi Iehova badinaia karana hahedinaraia noho totona, inai sisiba herevana ia henia loulou: “Nega gunadia do umui laloa, idaunegai momokani idia vara gaudia do umui laloa.” (Deuteronomi 32:⁠7) Ena hereva Deuteronomi 7:​18 ai oi laloa: “To idia dekenai [Kanana taudia] do umui gari lasi. Lohiabada, emui Dirava, ese Farao bona Aigupito taudia ibounai dekenai ia karaia gaudia do umui laloatao.” Iehova ena hamauria karana idia laloa lou neganai, unai ese idia do ia durua Dirava ena taravatu idia badinadia noho mai abidadama ida.​—⁠Deuteronomi 5:​15; 15:⁠15.

Madi, Israela taudia be nega momo unai kara dika ta, laloaboio karana, idia karaia. Unai dainai dahaka ia vara? “Dirava ena bogahisihisi idia tohoa lou, tohoa lou, bona idia ese Israela edia Helaga Dirava idia habadua. Iena siahu bada herea be idia laloaboio. Dirava ese dagedage taudia dekena amo ia hamauridia dinana, be idia ese idia laloaboio.” (Salamo 78:​41, 42) Gabeai, Iehova ena oda idia laloaboio dainai, ia ese ia dadaraidia.​—⁠Mataio 21:​42, 43.

Salamo torea tauna be haheitalai namona ia hahedinaraia, ia gwau: “Lohiabada e, lau ese oiemu kara do lau laloa noho. Oiemu hoa karadia gunadia do lau laloa lou. Oiemu gaukara ibounai do lau laloa noho, bona oiemu siahu karadia danu do lau laloa.” (Salamo 77:​11, 12) Guna idia vara karadia namodia bona Iehova ena lalokau karadia laloa lou karana ese ita dekenai ura namona do ia havaraia, ita do ia hagoadaia, bona unai gaudia do ita laloa bada. Danu ‘dina gunadia laloaboio lasi’ karana ese hesiku mamina ia hadokoa bona ita ia ha-uraia ita gaukara noho mai abidadama bona haheauka ida.

Kerere Gunadia amo Diba Abia

Badina iharuana be, kerere gunadia bona edia anina dikadia ita laloaboio lasi neganai, diba ita abia. Mose be unai ia laloa neganai, Israela taudia ia sisiba henia, ia gwau: “Do umui laloaboio lasi, umui ese taunimanima noho lasi tano dekenai Lohiabada emui Dirava umui habadua. Bona Aigupito dekena amo umui raka hamatamaia dinana ia mai bona inai gabu dekenai umui ginidae, umui ese Lohiabada umui kamonai henia namonamo lasi.” (Deuteronomi 9:⁠7) Mose ia hahedinaraia Israela taudia edia gwau-edeede karana dainai, ‘Dirava ese lagani 40 lalonai taunimanima noho lasi tano dekenai idia ia hakaua.’ Dahaka dainai ia hagoadadia unai nega idia laloa lou? Idia ia hamanaua bona edia gwau-edeede karadia do idia hamaoromaoroa totona ia karaia, bena ‘Lohiabada, edia Dirava, ena Taravatu do idia badinaia, ena dala dekenai do idia raka, bona ia do idia gari henia.’ (Deuteronomi 8:​2-6) Diba idia abia ena anina be edia kerere gunadia do idia karaia lou lasi.

Toretore tauna ta ia gwau: “Aonega tauna ese guna ia dekenai idia vara gaudia amo diba ia abia, to aonega bada tauna be taunimanima ma haida dekenai idia vara gaudia amo diba ia abia.” Mose ia ura Israela taudia be edia kerere gunadia amo diba idia abia, to aposetolo Paulo ese taunimanima ma haida​—⁠Korinto kongregesen ginigunana taudia, bona ita danu​—⁠ia hamaoroa edia sivarai amo gau ta ita dibaia. Ia gwau: “Sene taudia [Israela taudia] dekenai unai bamona kara idia vara, be ita dekenai toa bamona, do ita itaia mai gari danu. Edia sivarai danu Buka Helaga lalonai idia torea vadaeni, idia ese ita do idia sisiba henia totona. Badina be tanobada ena dokona be kahirakahira negana ita noho inai.” (1 Korinto 10:11) Iesu Keriso ese idaunegai Baibel sivaraina ma ta ia laloa bona ia ura ia amo gau ta ita dibaia; ia gwau: “Lota ena adavana umui laloa.” (Luka 17:32; Genese 19:​1-​26) England ena ane torea bona diba bada tauna, Samuel Taylor Coleridge, ia gwau: “To bema taunimanima be histori amo diba idia abia, hari ia amo gau momo ita dibaia diba!”

Lalo-Manau Bona Tanikiu Henia

Badina ihatoina be, laloa lou karana ese ita dekenai Dirava idia hamoalea gaudia, hegeregere lalo-manau bona tanikiu henia karana, ia havaraia diba. Iseda tanobada ibounai lauma paradaisona ena kahana idauidau ita moalelaia neganai, namona be ena du bamona gaudia ita laloaboio lasi. Unai gaudia haida be badinaia karana, lalokau, sibona emu ura dadaraia karana, ena be dagedage ia vara to gari lasi karana, haheauka, boga auka, bona abidadama​—⁠lagani momo gunanai Keristani tadikaka bona taihu momo be tano idauidau momo dekenai idia lao haroro gaukara idia hamatamaia totona bona idia hedinarai karadia unai. Lagani 1995 Yearbook of Jehovah’s Witnesses be inai nega ai Dirava ena taunimanima dekenai ia vara sivaraina ia herevalaia neganai, Mexico ena ripoti ta danu ia kikilaia, ia gwau: “Iehova ena Witness taudia idia bamoa matamaia taudia do idia hoa bema Mexico dekenai haroro gaukara idia hamatamaia taudia edia hekwarahi ena sivarai idia kamonai. Hari idia manadalaia paradaisona ai lauma aniani be bada herea, bona unuseniai be Dirava idia gari henia taudia handred tausen momo bona Dirava hesiai henia gaukarana ia heau namonamo.”

Nega momo unai dala idia lailaia taudia be mai edia bamoa taudia lasi ida idia gaukara eiava daudau gabuna ai grup maragina ta dekenai idia gaukara. Basileia ena sivarai idia harorolaia noho neganai, sibona idia noho hemami, dabu, bona Iehova idia badinaia noho karana idia tohoa karadia idia haheaukalaia. Ena be unai hesiai taudia gunadia momo idia mase vadaeni, to ita moale Iehova ese edia abidadama hesiai gaukara ia laloaboio lasi! Aposetolo Paulo ese unai ia hamomokania, ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi.” (Heberu 6:​10) Bema Iehova ese edia gaukara ia laloaboio lasi bona ia laloa bada noho, namona be mai tanikiu bada ida unai bamona ita karaia, ani?

Hereva momokani idia dibaia matamaia taudia be unai sivarai haida idia itaia diba Jehovah’s Witnesses​​—⁠Proclaimers of God’s Kingdom bukana ai.a Danu, bema iseda famili eiava Keristani kongregesen lalonai nega daudau Iehova idia hesiai henia tadikaka o taihu burukadia idia noho, namona be Deuteronomi 32:7 ena sisiba ita badinaia: “Nega gunadia do umui laloa, idaunegai momokani idia vara gaudia do umui laloa. Emui tamana taudia do umui nanadaia, idia ese unai kara gunadia do idia hadibaia. Tau badadia do umui nanadaia, idia ese dahaka idia vara vadaeni gaudia, be do idia hamaoroa umui dekenai.”

Oibe, Dirava badinaia kara gunadia ita laloa lou neganai, ita ia ha-uraia iseda Keristani hesiai gaukara do ita karaia noho mai iseda moale ida. Danu, sivarai gunadia amo anina bada gaudia ita dibaia be namo. Bona Dirava ia hanamoa lauma paradaisona ita laloa namonamo neganai, iseda lalo-manau bona tanikiu henia karadia ia hagoadaia. Momokani, “dina gunadia umui laloatao” be namo.

[Footnotes]