Duahia Taudia Edia Henanadai

Iehova ena Witness taudia edia lalohadai be dahaka taunimanima idia henaoa gaudia hoia karana dekenai?

Bema Keristen taudia idia diba haida ese unai kohu idia henaoa, idia diba unai kohu do idia hoia lasi be namo.

Henaohenao karana be ia dika. Dirava ena Taravatu Israel dekenai ia gwau: “Oi henaoa lasi.” (Esodo 20:15; Levitiko 19:11) Bema idia davaria ta be ia henao, ia vara gauna hegeregerena, ia henaoa gauna, be nega rua, nega hani, eiava nega ima amo davana do ia henia lou.

Idau nega amo ia mai hari, henaohenao taudia idia ura idia henaoa kohudia idia hoihoilaidia haraga moni idia abia totona bona unai kohu be idia dekenai do idia davaria lasi totona. Unai dainai, nega momo unai kohu be davana maragi dekenai idia hoihoilaidia taunimanima idia ura abidia totona. Reana unai bamona ia vara Esodo 22:1 ia gwauraia sivaraina dekenai, ia gwau: “Bema tau ta ese boromakau o mamoe ta ia henaoa, vadaeni ia alaia o ia hoia lao, ia be davana do ia henia boromakau ta ena davana be boromakau 5 do ia henia. Mamoe ta ena davana be mamoe 4 do ia henia.”

Ia laloa unai taravatu dekenai ma hereva haida idia noho dainai, Rabi tauna, Abraham Chill ia torea ia gwau: “Idia henaoa kohudia ita hoidia eiava ita abidia davana lasi be mai taravatuna, ena be idia laloa unai be henaoa gauna ta lasi. Vadaeni, nanigosi be naria tauna dekena amo do ita hoia lasi, badina reana naria tauna ia hoihoilaia bona ia ura moni ia dogoatao, to ena biaguna ia diba lasi.”​—The Mitzvot—​The Commandments and Their Rationale.

To, Dirava ena taravatu ia gwau lasi bema oi laloa ena biaguna ena moni do ia dogoatao sibona ena, unai ‘nanigosi be naria tauna dekena amo’ do ita hoia lasi, hegeregere ia ese unai nanigosi ia henaoa bamona lasi. To bema Iehova ena hesiai taudia idia diba idia hoihoilaia gauna (nanigosi eiava ma gau ta) be idia edia kohu lasi, to idia laloa idia henaoa, do idia hoia lasi be namo. Dirava ena taravatu ese ia hahedinaraia Dirava ese taunimanima edia kohu ia matauraia, to henao tauna ese taunimanima edia kohu ia henaodia. Bema tau ta ia diba ia hoia gauna be haida ese idia henaoa gauna, ita gwau lasi ia be henaohenao tauna, to unai kohu ia hoia dainai kohu ena biaguna be ena kohu ia abia lou dalana be ia auka.​—Hereva Lada-isidia 16:19; 1 Tesalonika 4:6 itaia danu.

Ita ibounai ita diba kohu idia hoia taudia​—herevana idia be ruma hahine eiava kampani taudia—​idia iboudiai idia ura davana namona dekenai kohu idia hoia. Tanobada ibounai dekenai hahine idia ura davana idia hamaragia gaudia idia hoia, nega momo idia naria ela bona unai kohu davana idia hamaragia, eiava idia lao wholesale maketi dekenai eiava davana maragi sitoa dekenai idia lao. (Hereva Lada-isidia 31:14) Ena be davana maragi tahua karana be dika lasi, to mauri ena taravatu ita utua lasi be gau badana. Nehemia ena nega lalonai, mai edia abidadama taudia be Sabati dinana dekenai gau ta idia hoia lasi, ena be davana maragi dekenai idia hoia diba, to idia hoia lasi. (Nehemia 10:31; Amos 8:​4-6 itaia danu.) Keristen taudia edia kara be unai bamona danu. Henaohenao karana idia dadaraia dainai unai ese ia durudia, bona haida idia henaoa kohu be davana maragi dekenai idia gwauraia neganai idia dadaraia diba.

Reana taunimanima idia diba sitoa tauna ta be henaoa gaudia ia hoihoilaidia. Eiava bema ta ese hehuni dalanai kohu ena davana maragi ia gwauraia, idia diba unai kohu be idia henaoa gauna ta. Taravatu karaia dalana ia gwauraia bukana ta ia gwau:

“Idia gwauraia kerere tauna ia diba daika ese idia henaoa eiava daika amo idia henaoa, eiava edena negai eiava edeseniai idia henaoa, eiava dahaka dainai idia henaoa be herevana, to bema ia diba unai gau be tau ta ese ia henaoa, vadaeni, ia be mai ena dala ia diba unai gaudia be henaoa karana amo idia mai ia dekenai, unai dainai idia gwauraia kerere diba.”

Unai dainai, namona be Keristen tauna be haida ese idia henaoa gaudia do ia hoidia lasi. Bema ia ese idia henaoa gaudia ia hoidia ia ese taravatu ia hamakohia unai. Taunimanima momo be taravatu hamakohia karana idia laloa bada lasi, bema idia laloa ta ese idia ia samania diba lasi vadaeni taravatu do idia utua. To Keristen taudia be unai bamona lasi, idia ura “gavamani do idia kamonai henia.” Taravatu idia badinaia noho neganai, idia be raskol lasi dainai gavamani be do idia samania diba lasi, bona Iehova vairanai edia lalona ena mamina be ia namo.​—Roma 13:​1, 4, 5.

Abraham, Dirava ena turana, ena lalona ena mamina be ia namo bona unai be haheitalai namona. Lota ena nega lalonai, Asia ena pavapava hani be tuari dekenai Lota ia noho gabuna edia pavapava ia halusidia, bona edia kohu idia henaodia. Abraham ese unai tuari taudia ia heau henidia, tuari henidia dekenai ia kwalimu, bona idia henaoa gaudia ia abia giroa mai. Sodom ena pavapava be Abraham dekenai ia gwau: “Oi abia kohu ibounai oi dogoatao noho” iena davana totona. To, Abraham ese biaguna korikori dekenai unai kohu ia henia, ia gwau: “Oiemu kohu ta do lau abia lasi . . . Gabeai do oi gwau, ‘Aberamo ena kohu momo be lau dekena amo ia mai’ garina.”​—Genese 14:​1-24.

Ena be edia moni bada idia dogoatao noho diba, to Keristen taudia idia ura lasi haida idia henaoa gaudia be davana maragi dekenai idia hoidia. Ieremia ia torea ia gwau: “Manu ese natuna, ia hapapadia lasi gaudia, be ia haboudia noho bamona, taga ia haboua noho, to kara maoromaoro lasi dalanai ia haboua, tauna be unai bamona.” (Ieremia 17:11) Oibe, ena be Keristen taudia idia aonega Kaisara ena taravatu henao gaudia hoia karana dekenai idia hamakohia lasi neganai, to idia ura Dirava ena hahemaoro maoromaoro taravatuna idia badinaia, unai dainai kara maoromaoro lasi henaohenao karana amo idia gini siri. David ena toretore namona ia gwau: “Kara maoromaoro tauna ena kohu maragina ese kara dika taudia momo edia kohu bada herea ia hanaia.”​—Salamo 37:16.