Basileia Haroro Ripoti

Dirava Ena Ladana Ia Hadikaia Herevana Idia Kokia

DIRAVA ena Hereva, Baibel, ia gwau: “To Dirava idia diba lasi taudia edia vairanai, kara namodia do umui karaia. Momokani, hari idia ese umui idia gwauraia kerere noho. To bema emui kara namodia idia itaia neganai, idia ese Dirava do idia hanamoa, Keriso do ia giroa mai dinana dekenai.” (1 Petero 2:​12) Unai dainai, Keristani taudia momokanidia idia hekwarahi kara namodia idia karaia noho totona, badina be idia ura lasi Iehova ena ladana idia hadikaia.

Zambia ena daudau gabuna ta, ladana Senanga dekenai, sikuli ena tisa tauna ta ena reidio be ta ese ena ruma amo ia henaoa. Iehova ena Witnes taudia be unai gabu dekenai idia haroro dainai, tisa ia gwau idia ese idia henaoa. Ia ese pulisi dekenai unai kara ia ripotilaia, ia gwau Witnes taudia ese iena reidio idia henaoa. Witnes taudia be iena ruma dekenai idia lao ia hamomokania totona, foloa ai ia davaria pepapepa ta ia hahedinaraia. To, pulisi taudia ese iena hereva idia abia dae lasi. Idia hamaoroa iena ruma dekenai ia giroa bona unai kara ia tahua namonamo.

Unai henaohenao negana lalonai, tisa ena gabu ai idia haroro Witnes taudia be elda oreana ese idia hagoadaia tisa dekenai idia lao unai idia herevalaia totona. Tadikaka haida be tisa dekenai idia lao bona idia hereva henia, idia gwau idia ura bada Iehova ena ladana ia hadikaia herevana idia kokia. Edia herevahereva lalonai, idia hamaoroa iena ruma lalonai tau matamata ta idia davaria bona pepapepa ta idia henia ia dekenai. Unai tauna ena toana idia herevalaia neganai, tisa be unai tau ia diba. Momokani, idia be dubu tamona taudia. Tisa ese unai tau matamata ia hereva henia, to ia gwau ia karaia lasi. Bena tisa ese unai tau matamata ena tama sina dekenai unai kara ia herevalaia bona ruma dekenai ia giroa. Hora ta ia do ore lasi lalonai, tau matamata ena sinana ese ena natuna ia henaoa reidio ia abia giroa.

Tisa ena mamina ia dika dainai, elda oreana ia hereva henia bona ia noinoi iena dika idia gwauatao totona, badina be idia ia samania koikoi. Elda taudia ese iena sori herevana idia abia dae, to idia noia ia davaria gaudia be taunimanima vairanai do ia gwauraia hedinarai, bena ibounai do idia diba Witnes taudia ese reidio idia henaoa lasi. Hadibaia herevana be sikuli dekenai ia gwauraia, unai dainai Iehova ena ladana ia hadikaia herevana idia kokia. Iehova ena Witnes taudia be unai gabu dekenai haroro gaukarana idia karaia noho diba.

[Maps/Picture on page 19]

(For fully formatted text, see publication)

AFRICA

Zambia

[Credit Line]

Mountain High Maps® Copyright © 1997 Digital Wisdom, Inc.