Hoa Karadia Sibona ese Abidadama Idia Havaraia Lasi

MOMO edia lalohadai be inai: Itaia karana amo abidadama ia vara. Haida idia gwau, bema Dirava be hoa dalanai sibona ia hahedinaraia, do idia abidadama henia. Reana unai be momokani, to unai dala amo ia vara abidadama be momokani, eiava?

Israela taudia Kora, Datana, bona Abirama mani oi laloa. Baibel ese ia hahedinaraia inai hoa gaudia mai garidia Dirava ena amo be idia ese idia itaia vadaeni: Aigupito hadikaia hisihisi 10, Israela besena edia heau mauri Davara Kakakakana lalona amo, bona Aigupito ena Farao bona ena tuari oreana hamasedia ore karana. (Esodo 7:​19-11:10; 12:29-​32; Salamo 136:15) Kora, Datana, bona Abirama ese danu Iehova ena gadona idia kamonai, Sinai Ororona dekenai guba amo ia hereva neganai. (Deuteronomi 4:​11, 12) To, unai hoa karadia idia vara murinai, nega daudau lasi unai tatau toiosi ese Iehova bona ena abia hidi hesiai taudia gwau-edeede henidia karana idia havaraia.​—Numera 16:​1-​35; Salamo 106:16-​18.

Lagani 40 bamona murinai, peroveta tauna ta ladana Balama danu ese hoa karana ta ia itaia. Ena be aneru ta ese ia hereva henia, to Dirava ena inai taudia, Moaba taudia, ia durua. Ena be unai hoa karana ia vara, to Balama ese Iehova bona Iena bese taudia hadikadia dalana ia tahua. (Numera 22:​1-35; 2 Petero 2:​15, 16) Balama be abidadama ai ia dabu, to Iuda Iskariote be abidadama dekenai ia dabu momokani. Ena be Iuda ese Iesu ia bamoa bona ena hoa karadia momo ia itaia vadaeni, to Keriso ena mase dalana ia karaia, siliva monidia 30 abia totona.​—Mataio 26:14-​16, 47-​50; 27:​3-5.

Iuda tomadiho gunalaia taudia danu idia diba Iesu ese hoa karadia momo ia karaia. Lasaro ia hatorea isi lou murinai, idia gwau: “Unai tau ese toa kara momo ia karaia.” To ia mauri lou tauna Lasaro idia itaia neganai, unai ese edia lalona ia hamanaua bena idia abidadama, a? Lasi vaitani. Idia ese Iesu bona Lasaro alaia mase dalana idia tahua!​—Ioane 11:47-​53; 12:10.

Ena be Dirava ia hereva hedinarai, to unai kara dika taudia idia abidadama lasi. Nega ta, Iesu be dubu helaga ena magu lalonai ia guriguri neganai, ia hereva hedinarai, ia gwau: “Egu Tamana e, oiemu ladana oi hanamoa!” Bena Iehova ena gadona be guba amo ia haere, ia gwau: “Lau hanamoa vadaeni, ma do lau hanamoa lou.” To unai hoa karana ese unuseniai idia noho taudia edia lalona ai abidadama ia havaraia lasi. Baibel ia gwau: “Iesu ese hoa kara momo edia vairana dekenai ia karaia, to idia be idia abidadama henia lasi ia dekenai.”​—Ioane 12:28-​30, 37; ma danu Efeso 3:​17 itaia.

Hoa Karadia ese Abidadama Idia Havaraia Lasi Ena Badina

Dahaka dainai, ena be Iesu ese hoa karadia ia karaia, to idia abidadama henia lasi? Iuda tomadiho gunalaia taudia ese Iesu idia dadaraia karana be reana oi daradaralaia, badina be ena haroro gaukarana ia hamatamaia neganai, Iuda taudia momo ese “Keriso,” Mesia unai, idia naria noho. (Luka 3:​15) To edia helaro kereredia dainai idia hekwakwanai. Dikseneri torea tauna W.E. Vine ia gwau Baibel ia tahua namonamo tauna ta ia gwau Iuda taudia edia helaro badana be Mesia ese “tanobada ai do ia hakwalimudia” bona do ia “hatagadia bada.” Unai dainai, Mesia korikorina, Nasareta tauna Iesu, politikol dagina lasi tauna, be lagani 29 C.E. ai idia bogaragidiai ia hedinarai neganai, ia idia abia dae be auka. Tomadiho gunalaia taudia be idia gari danu, Iesu ena hahediba herevadia dainai edia noho dalana do ia ore bona edia dagi badadia do idia boio garina. (Ioane 11:48) Idia abia vadaeni lalohadaidia bona edia mataganigani dainai, Iesu ena hoa karadia edia anina idia lalo-pararalaia diba lasi.

Gabeai, Dirava ese hoa dalanai ia hamomokania Iesu badinaia taudia ia lalo-namo henidia neganai, Iuda tomadiho gunalaia taudia ese unai idia abia dae lasi. Haheitalai ta be iena aposetolo taudia rua ese aena dikana ida ia vara tauna ta ena aena idia hanamoa neganai, Iuda ena kota badana taudia idia henanadai mai edia badu ida, idia gwau: “Dahaka dohore ita karaia inai taudia ruaosi dekenai? Badina be idia ruaosi be toa ta idia karaia vadaeni, inai sivarai be ia hedinarai vadaeni Ierusalema noho taudia ibounai dekenai, bona ita hunia hegeregere lasi. To inai be namo lasi taunimanima ma haida danu inai sivarai idia kamonai. Inai dainai idia ruaosi do ita hagaria, ita taravatua, Iesu ena ladana be taunimanima ta dekenai do idia hereva lou lasi.” (Kara 3:​1-8; 4:​13-​17) Momokani, unai hoa karana ese unai tatau edia lalona ai abidadama ia havaraia lasi.

Ladana bada tahua karana, hekokoroku, bona mataganigani dainai momo ese edia kudoudia idia ha-aukaia. Toana be inai hereva ena matamanai ai gwauraia taudia, Kora, Datana, bona Abirama be unai bamona. Mama, gari, bona lalohadai dikadia momo ese ma haida idia koudia. Gwau-edeede anerudia, lauma dikadia unai, danu mani oi laloa; gunaguna Dirava ena vairana idia itaia noho diba. (Mataio 18:10) Idia daradara lasi, Dirava ia mauri noho eiava. Momokani, “lauma dikadia [be] unai bamona idia abidadama, bona mai gari danu idia heudeheude noho.” (Iamesi 2:​19) To Dirava idia abidadama henia lasi.

Abidadama Momokanina Ena Anina

Abidadama be hereva ta abia dae karana sibona lasi. Abidadama ese hoa karana ta dainai ia vara lalohadaina ia hereaia. Heberu 11:1 ia gwau: “Abidadama ena anina be inai bamona: Ita daradara lasi, to ita diba momokani, Dirava amo davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.” Abidadama tauna be ena lalona ai ia diba momokani Iehova Dirava ese ena gwauhamata iboudiai do ia hamomokania. Inai danu, ita itaia lasi gau kroikoridia idia hamomokania gaudia be mai edia siahu bada dainai, unai ita gwauraia abidadama. Oibe, abidadama be hamomokania gaudia amo ia vara. Bona gunaguna, hoa karadia dainai abidadama ia vara o ia bada ia lao. Iesu ese ia karaia toadia dainai haida ese idia abia dae ia be gwauhamata Mesiana. (Mataio 8:​16, 17; Heberu 2:​2-4) Unai hegeregerena, Dirava ena lauma helaga, iena gaukara siahuna, ena harihari gaudia, hoa dalanai gorere hanamodia karana bona gado idaudia ai hereva karana unai, ese idia hamomokania Iehova ese Iuda taudia ia dadaraia vadaeni bona Keristani ekalesiana, iena Natuna, Iesu Keriso ese ia haginia oreana, ia lalo-namo henia noho.​—1 Korinto 12:​7-​11.

Lauma ena harihari gaudia ta bona hoa gauna be peroveta siahuna. Ekalesia lasi taudia ese unai hoa karana idia itaia neganai, haida ese Iehova idia tomadiho henia, idia gwau: “Momokani Dirava be umui emui huanai ia noho.” (1 Korinto 14:22-​25) To Iehova Dirava ia gwau lasi Keristani tomadihona lalonai hoa karadia do idia karaia ela bona hanaihanai. Unai hegeregerena, aposetolo Paulo ia gwau: “Peroveta hereva be do idia ore. Idau momokani gadodia danu do idia doko.” (1 Korinto 13:8) Toana be unai harihari gaudia idia ore, aposetolo taudia bona idia edia amo unai bamona harihari gaudia idia abia taudia idia mase neganai.

Unai neganai taunimanima edia abidadama ena badina ia ore, a? Lasi, badina be Paulo ia gwau: “[Dirava] ese iena noho ia hamomokania noho, iena kara namodia dekena amo, gaudia inai: Medu ia siaia diho guba dekena amo, bona aniani haboua nega namodia ia henia umui dekenai. Boga kunu ia henia umui dekenai, bona emui kudouna dekenai moale ia havaraia.” (Kara 14:17) Oibe, mai edia momokani ida unai hamomokania gaudia, ita idia gegea ahu gaudia, be edia darana bona edia lalona ai idia abia dae taudia, idia diba Iehova Dirava “ese tanobada ia karaia negana ia mai bona harihari, taunimanima idia kamonai diba Dirava ena siahu be ia doko diba lasi, bona danu idia diba ia sibona be Dirava momokani. . . . Ia karaia gaudia ibounai idia itaia vadaeni. . . . Unai dainai idia [Dirava idia gorea taudia] be dala lasi edia kerere idia hunia.”​—Roma 1:​20.

Ta ia diba momokani Dirava ia mauri noho bona unai ia abia dae sibona be hegeregere lasi. Paulo ia sisiba, ia gwau: “Inai tanobada taudia edia kara bamona do umui karaia lasi, to Dirava ese emui lalona do ia hagiroa, vadaeni do umui matamata, bona idau momokani. Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” (Roma 12:2) Unai do oi karaia diba dalana be, Keristani bukadia, inai magasin hegeregerena, edia heduru amo Buka Helaga do oi tahua namonamo. Dirava ena Hereva, Baibel, diba maoromaoro karana amo ia vara abidadama be ia manoka lasi bona ia maragi lasi. Dirava ena ura idia diba bona mai edia abidadama ida idia karaia noho taudia ese iena hesiai gaukara helagana idia karaia noho.​—Roma 12:1.

Ena be Idia Itaia Lasi, to Idia Abidadama Henia

Aposetolo Toma ese Iesu be mase amo ia toreisi lou herevana ia abia dae be auka. Ia gwau: “Iena imana dekenai ikoko edia bero bema lau itaia lasi, egu imana kwakikwakina be ikoko idia gwadaia gabuna dekenai bema lau atoa lasi, bona iena ohena dekenai bema egu imana lau atoa vareai lasi, lau be do lau hamomokania lasi.” Gabeai, Iesu be tauanina ta ai ia hedinarai, satauro ai ia abia berodia ia hahedinaraia gauna; bena unai hoa karana dainai Toma ese ena daradara ia hadokoa. To Iesu ia gwau: “Lau idia itaia lasi, to idia abidadama lau dekenai taudia be namo do idia davaria!”​—Ioane 20:25-​29.

Hari inai negai Iehova ena Witness taudia milioni momo edia “mauri be abidadama kara dekena amo, itaia kara dekena amo lasi.” (2 Korinto 5:7) Ena be Baibel lalonai idia gwauraia hoa karadia idia itaia lasi, to idia abia dae vaitani unai kara idia vara. Witness taudia ese Dirava bona ena Hereva idia abidadama henia. Iena lauma ena heduru amo, idia ese Baibel ena hahediba herevadia bona ena sinado badana​—Iehova Dirava ese ena guba Basileiana amo ena lohia siahuna ena maoro do ia hamomokania herevana​—idia lalo-pararalaia. (Mataio 6:​9, 10; 2 Timoteo 3:​16, 17) Unai Keristani taudia korikoridia ese Baibel ena aonega sisibana idia badinaia dainai, namo bada idia davaria. (Salamo 119:105; Isaia 48:17, 18) Idia abia dae Baibel ena peroveta herevadia ese idia hahedinaraia iseda nega be “nega ena dokona,” bona edia lalona ai idia gwau Dirava ena tanobada matamatana, ia gwauhamatalaia gauna, be kahirakahira. (2 Timoteo 3:1-5; Mataio 24:3-14; 2 Petero 3:13) Idia be mai edia moale ida ma haida idia durua Dirava idia diba totona. (Aonega Herevadia 2:​1-5) Idia diba Dirava idia tahua taudia ese ia do idia davaria dalana tamona be Buka Helaga tahua karana amo.​—Kara 17:26, 27.

Albert, hereva gunana lalonai ai sivarailaia tauhauna, be oi laloatao, a? Guriguri lalonai hoa karana ta ia noia, to gau ta ia vara lasi, bena dina haida murinai Iehova ena Witness hahinena burukana ta ese ia vadivadi henia bona Baibel gwauraia bukadia haida ia henia. Unai murinai Albert ese Baibel stadi, davana lasi gauna, ia abia dae. Baibel ena hereva ia dibaia namonamo neganai, ena lalohisihisi ia ore bona ia moale. Ia lalo-parara ia ese Dirava ia davaria vadaeni.

Buka Helaga ia gwau: “Lohiabada do umui tahua, umui do davaria diba neganai. Ia dekenai do umui noinoi, ia be do kahirakahira ia noho neganai.” (Isaia 55:6) Unai do oi karaia diba dalana be hoa karana ta Dirava ena amo naria karana amo lasi, to iena Hereva do oi dibaia maoromaoro. Unai oi karaia be namo, badina be hoa karadia sibona ese abidadama idia havaraia lasi.

[Picture on page 5]

Ena be hoa dalanai Lasaro ia hatorea isi lou, to Iesu ena inai taudia ese idia abidadama henia lasi

[Picture on page 7]

Abidadama be Baibel diba maoro karana amo ia vara