Iehova be mai Ena Hebogahisi ida Ia Lohia

IDAUNEGA amo ema bona hari, lohia taudia momo ese edia siahu idia gaukaralaia neganai idia henunai idia noho taudia edia hisihisi idia laloa lasi. To, Iehova ese bese ta—Israela—ia abia hidi bona ia lohiaia mai ena hebogahisi ida, unai dala amo lohia dalana idauna ia hahedinaraia.

Israela taudia be Aigupito ai igui hesiai taudia ai idia do noho neganai, Iehova ese edia noinoi heduru abia totona ia kamonaia. “Edia hisihisi iboudiai ia hisihisilaia. . . . Ena lalokau bona ena hebogahisi ai ia ese ia hoidia lou.” (Isaia 63:⁠9, NW) Iehova ese Israela taudia ia hamauridia, hoa dalana ai aniani ia henidia, bona sibona edia tano dekenai ia hakaudia.

Unai bese dekenai ia henia taravatudia danu ese Iehova ena hebogahisi karana idia hedinarai. Israela taudia ia hamaorodia tama bona sina lasi maragidia, vabu, bona idau bese taudia do idia kara henidia mai edia hebogahisi ida. Tauanina dika taudia be dala maorona ai do idia kara namo henidia.

Taravatu ia gwau hebogahisi karana do idia hahedinaraia dabu taudia dekenai. Ogogami taudia be anina utua negana murinai ia noho aniani idia gogoa diba. Sabati laganina (lagani namba 7) lalonai abitorehai monina idia gwauatao. Iubili laganina (lagani namba 50) lalonai guna idia hoia tanodia be edia iduhu korikori dekenai idia henia lou. Buka ta Ancient Israel​—Its Life and Institutions ia gwau: “Israela lalonai, hari ita laloa hegeregerena noho mauri idauidau be idia noho lasi.” “Edia tano idia noholaia matamaia neganai, Israela taudia ibounai edia mauri dalana be hegeregere.” ​—Levitiko 25:10; Deuteronomi 15:​12-​14; 24:17-​22; 27:18.

Iehova Ena Hebogahisi Ita Tohotohoa

Dirava ena hebogahisi karana ese ena hesiai taudia ia hagoadaia. Hegeregere, gunaguna amo ema bona hari, king matamata haida be guna idia lohia taudia edia bese taudia, idia do mauri noho taudia unai, idia aladia mase. To Iehova ena hesiai tauna Davida be unai bamona ia karaia lasi. King Saulo ia mase murinai, Davida ese Mepiboseta, Saulo ena tubuna bona ena kohu ia abia tauna, ia naria. “Davida ese Ionatana ena natuna, Mepiboseta, Saulo ena tubuna, ia henia lasi Gibeona taudia dekenai.”​—2 Samuela 21:⁠7.

Taunimanima ma ta lasi ese Iesu bamona Iehova ena hebogahisi ia tohotohoa. Ena hoa karadia momo be Dirava amo ia mai hebogahisi dainai. Nega ta lepera tauna ta ia noinoi: “Bema oi ura, mani oi hanamoa lau.” Iesu ese ia hebogahisi henia bona ena imana ia atoa lepera tauna ena kopina dekenai, ia gwau: “Lau ura. Hari oi goeva.” (Mareko 1:​40-​42) Ma nega ta taunimanima momo ese Iesu ena murina dekenai idia lao. Ena be regerege be bada to Iesu be matakepulu taudia rua edia boiboi ia kamonaia, idia gwau: “ ‘Lohiabada e, Davida ena natuna e, oi bogahisihisi ai dekenai!’ . . . Iesu ese idia dekenai ia bogahisihisi, edia matana dekenai iena imana ia atoa, vadaeni nega tamona gau idia itaia diba.”​—Mataio 20:29-​34.

Taunimanima momo idia noho to unai ese Iesu ena lalona ena mamina ma haida dekenai ia hadikaia lasi. Nega ta dina haida lalonai idia aniani lasi dainai, ia gwau: “Lau bogahisihisi taunimanima dekenai.” Unai dainai hoa dalana ai ia ubudia. (Mareko 8:​1-8) Iesu be ia loaloa neganai, taunimanima ia hadibaia sibona lasi to edia dabu gaudia ia laloa danu. (Mataio 9:​35, 36) Unai bamona loaloa ta murinai, Iesu bona iena diba tahua taudia be nega lasi idia aniani totona. Baibel ena sivarai ia gwau: “Idia guia vanagi dekenai, taunimanima noho lasi gabuna dekenai idia lao. To idia lao neganai, taunimanima momo ese idia itaia. Vadaeni hanua ibounai dekena amo, aena dekenai idia heau lao, idia ginidae guna. Iesu ia ginidae, taunimanima momo ia itaia neganai ia bogahisihisi idia dekenai, badina idia be mamoe hegeregere, bona naria tauna lasi. Vadaeni, ia ese mauri sivarai momo ia hadibaia.”—Mareko 6:31-34.

Iesu ese taunimanima ia hebogahisi henidia gorere eiava ogogami sibona dainai lasi to lauma dalana ai idia dabu dainai. Edia gunalaia taudia ese idia durudia lasi, unai dainai Iesu “ia bogahisihisi idia dekenai.” Greek herevana idia hahanaia “ia bogahisihisi” ena anina be “ena bogarau lalonai ura dikadika ena mamina ia abia.” Momokani Iesu be hebogahisi tauna!

Hebogahisi Tanobada Dikana Lalonai

Hari Iesu Keriso be Iehova ena guba Basileia ena King. Idaunegai Israela dekenai ia karaia bamona, hari inai negai Dirava ese ena taunimanima ia lohiaia mai ena hebogahisi ida. “Siahu Ibounai Lohiabada ia gwau, ‘Inai taudia be lauegu taunimanima momokani.’ ‘Bona unai Dina, lau ese kara ta do lau karaia dinana dekenai, idia be lau sibona egu. Bona lau ese idia do lau [hebogahisi henia].’ ”​—Malaki 3:⁠17.

Iehova ena hebogahisi idia ura abia taudia be ena kara idia tohotohoa be namo. Momokani, ita noholaia tanobadana lalonai, taunimanima be sibona edia mauri dalana idia laloa bada to dabu taudia durua karana idia laloa bada lasi. Nega momo siahu taudia ese gaukara taudia bona kohu hoia taudia edia namo idia laloa lasi to moni sibona idia tahua. Timoteo Iharuana 3:​1-4 lalonai, Baibel ese taunimanima edia kara hari iseda nega lalonai ia hahedinaraia goevagoeva, unai karadia ese hebogahisi karana edia lalona dekenai ia hamasea vadaeni.

To, dala ita davaria diba hebogahisi hahedinaraia totona. Heduru haida ita henia diba iseda dekena taudia dekenai, a? Ta ia gorere bona ita vadivadi henia diba, a? Idia lalo-metau taudia ita hagoadadia diba, a, inai sisiba hegeregerena: “Gari taudia do umui hagoadaia, bona manoka taudia do umui durua”?​—1 Tesalonika 5:​14.

Haida ese kerere idia karaia neganai, hebogahisi karana ese ita do ia durua do ita kara auka henidia lasi totona. Baibel ia gwau: “Heai, dagedage, bona badu do umui koua. Hereva dika, laloa dika, bona samania koikoi hereva ibounai do umui hadokoa. Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.”—Efeso 4:31, 32.

Hebogahisi ese ita ia durua siahu do ita gaukaralaia kerere lasi. Baibel ia gwau: “Unai dainai inai bamona karadia, dabua bamona do umui atoa: Bogahisihisi, durua, manau, manada bona haheauka.” (Kolose 3:12) Lalo-manau ese ita ia durua ita henunai idia gaukara taudia edia noho ita lalo-pararalaia. Ita hebogahisi ena anina be ita manau bona ita manada, ita be hametaua bona hamoalea dalana idia auka taudia lasi. Gaukara ibounai idia heau namonamo totona taunimanima ita kara henidia idia be masini ena kahana ta bamona be namo lasi. Ma danu, ruma bese lalonai mai edia hebogahisi tatau be do idia laloatao edia hahine ena tauanina be goada lasi. (1 Petero 3:⁠7) Iesu ena hebogahisi karana ita laloa namonamo karana ese unai dala iboudiai dekenai ita ia durua.

Tanobada dekenai ia noho neganai, Iesu be taunimanima ia hebogahisi henia, unai dainai ita diba momokani ia be hari bona dohore mai hebogahisi ida do ia lohia Tauna. Salamo 72 be Iesu ia perovetalaia, ia gwau: “King do oi durua, ia ese, ogogami taudia maka tamona dekenai do ia kota henidia, bona ia ese gau lasi taudia edia natudia do ia durua. Ma haida idia dagedage henidia taudia, be king ese idia do ia atoa diho. King ena basileia be mani do ia bada, davara ta dekena amo ela bona ma davara ta, Euperate Sinavai dekena amo ela bona tanobada ena dokona dekenai. Ia ese manoka taudia, bona ogogami taudia dekenai do ia bogahisihisi, bona gau lasi taudia be mase dekena amo, ia ese do ia hamauria.”—Salamo 72:4, 8, 13.

Dirava ena Hereva ia peroveta, ia gwau: “To ogogami taudia be mai maoromaoro danu, do ia kota henidia, bona manoka taudia idia hisihisi henia taudia, be ia ese do ia panisidia. . . . Ia oda neganai, kara dika taudia do idia mase.” Dagedage, uda boromadia bamona taudia dikadia ese edia kara idia haidaua ia herevalaia murinai, ia peroveta noho: “Siona, Dirava ena ororo helagana dekenai, dika ta, o hadikaia gauna ta do ia noho lasi. Badina be tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.” (Isaia 11:​4-9) Inai peroveta herevana ese ia gwauhamata momokani Iehova idia diba bona ena hebogahisi karadia idia tohotohoa taudia be tanobada hegegemadai dekenai idia noho!