Mai Edia Anina Bada Ariadia Israela Taudia Edia Sivarai Lalonai
“Lagani ta lalonai emui tatau ibounai be nega toi Lohiabada, emui Dirava ena vairanai do idia haboua, ia dekenai do idia tomadiho henia, ia ese ia abia hidi tomadiho gabuna dekenai. . . . Tau ta ta ibounai ese harihari gauna ta Lohiabada dekenai do idia henia.”—DEUTERONOMI 16:16, 17.
1. Baibel negadiai idia karaia ariadia be edena bamona ita gwauraia diba?
ARIA ta oi laloa neganai, dahaka oi laloa? Idaunegai aria haida lalonai, idia inuinu kekero bona matabodaga karadia idia karaia. Hari inai negai idia karaia aria haida lalonai unai ia vara danu. To Dirava ese Israela dekenai ia henia Taravatu ia gwauraia ariadia be idau. Idia be moale negadia, to danu ita gwau diba idia be Dirava “tomadiho henia dinadia.”—Levitiko 23:2.
2. (a) Lagani ta ta nega toi Israela tatau be edena hahegani idia badinaia be namo? (b) Deuteronomi 16:16 ai, inai hereva “aria” ena anina be dahaka?
2 Israela abidadama tatau—nega momo edia ruma bese taudia ese idia bamodia—be Ierusalema, ‘Iehova ese ia abia hidi gabuna’ dekenai idia lao neganai, moale idia davaria bona aria badadia toi dekenai harihari gaudia momo idia henia. (Deuteronomi 16:16, 17) Buka ta ladana Old Testament Word Studies ia gwau Deuteronomi 16:16 ai, Heberu gado herevana idia hahanaia “aria” ena anina be “moale bada negana . . . ia lalonai, Dirava ena hahenamo idia abia negadia be boubou bona aniani hebou karadia amo idia moalelaia.”a
Aria Badadia Edia Anina
3. Lagani ta ta idia karaia ariadia toi dainai, edena hahenamo idia laloa?
3 Israela taudia be biru taudia dainai, Dirava ese medu amo ia hanamodia be gau badana. Mose ena Taravatu ena aria badadia toi idia karaia negadia be March o April ai bali idia haboua negana, May ai uiti idia haboua negana, bona October ai uma ena anina oredia idia haboua negana. Unai be moale bada negadia, bona medu ia henia bona tano namona ia karaia Tauna idia tanikiu henia negadia. To unai aria edia anina be unai sibona lasi.—Deuteronomi 11:11-14.
4. Edena kara badana dainai aria ginigunana idia moalelaia?
4 Aria ginigunana be idaunegai Baibel kalenda ena hua ginigunana ai idia karaia, Nisan 15 amo ela bona 21 ai, hari unai be March ena dokona eiava April ena matamana ai. Unai idia gwauraia Hatubua Lasi Paraoa Ariana, bona Nisan 14 ena Pasova murinai maoromaoro idia karaia dainai, ena ladana ta be “Pasova ena aria.” (Luka 2:41; Levitiko 23:5, 6) Unai aria dainai, Israela taudia ese Aigupito dekenai idia abia hisihisi amo Dirava ese ia hamauridia karana idia laloa lou, bona unai hatubua lasi paraoa idia gwauraia “hisihisi ena toana gauna.” (Deuteronomi 16:3) Idia laloatao Aigupito idia rakatania haraga dainai, nega be lasi edia paraoa dekenai hatubua muramura idia atoa bona idia naria ela bona muramura ese paraoa ia hatubua. (Esodo 12:34) Unai aria negana lalonai, Israela taudia edia ruma dekenai hatubua paraoa ta do ia noho lasi. Unai aria idia badinaia taudia ibounai, idau bese taudia danu, edia huanai bema ta ese hatubua paraoa ia ania, ena davana be mase.—Esodo 12:19.
5. Aria iharuana idia karaia neganai, edena hahenamo idia laloa lou, bona daidia danu be unai aria idia moalelaia?
5 Aria iharuana be pura 7 (dina 49) Nisan 16 murinai idia karaia, hua ihatoina, Sivan, ena dina namba 6 ai, hari May ena dokonai. (Levitiko 23:15, 16) Unai idia gwauraia Pura Edia Aria (Iesu ena negai, ena ladana ta be Pentekoste, ena anina Greek gado dekenai be “Namba 50”), bona lagani ta ta ai idia karaia negana be Sinai Ororo ai Israela taudia be Taravatu Gwauhamatana lalonai idia vareai negana kahirakahira. (Esodo 19:1, 2) Unai aria negana lalonai, reana kamonai Israela taudia ese edia hahenamo, Dirava ese ena bese helagana ai idia ia halaoa hahenamo badana, idia lalohadailaia. Idia be Dirava ese ia abia hidi besena dainai, gau badana be Dirava ena Taravatu idia badinaia, unai taravatu ta be ogogami taudia idia hebogahisi henia, idia danu be unai aria idia moalelaia diba totona.—Levitiko 23:22; Deuteronomi 16:10-12.
6. Aria ihatoina idia karaia neganai, Dirava ena taunimanima be edena nega idia laloa lou?
6 Lagani ta ta idia karaia aria badadia ihatoina bona ginigabena idia gwauraia Uma Ena Anina Oredia Haboua Ariana, eiava Au Raurau Ruma Maragidia Ariana. Ia be hua namba 7, Tishri, eiava Ethanim ai idia karaia, dina namba 15 amo ia lao 21 ai, hari October matamana ai. (Levitiko 23:34) Unai nega lalonai, Dirava ena taunimanima be edia ruma murimuri ai eiava edia guhi dekenai au edia rigidia bona raudia amo idia haginia ruma maragidia dekenai idia noho. Unai aria dainai idia ese edia laolao, lagani 40 lalonai Aigupito amo Gwauhamata Tanona dekenai idia lao negana, idia laloa lou. Unai nega lalonai Israela besena be idia diba Dirava idia tabekau henia be namo, dina ta ta ai mauri durua gaudia idia abia totona.—Levitiko 23:42, 43; Deuteronomi 8:15, 16.
7. Idaunegai Israela dekenai idia moalelaia ariadia ita laloa lou karana ese edena bamona ita ia durua?
7 Dirava ena idaunegai besena edia sivarai lalonai mai edia anina bada aria haida mani ita laloa. Unai ese ita do ia hagoadaia hari inai negai, badina ita idia boiria danu pura ta ta ita hebou loulou bona lagani ta ta ibounai nega toi hebouhebou badadia dekenai do ita lao.—Heberu 10:24, 25.
Davida Ena Iduhu Pavapavadia Edia Negai
8. (a) King Solomona ena negai, edena aria badana idia karaia? (b) Edena dala badana ai Au Raurau Ruma Maragidia Ariana do ia guguru negana be mai eda ura ida ita naria noho?
8 King Solomona, Davida ena natuna, ena lohia negana namona lalonai, idia ese Au Raurau Ruma Maragidia Ariana badana momokani idia karaia. Gwauhamata Tanona ena daudau gabudia amo danu “Israela taudia ibounai” idia mai Au Raurau Ruma Maragidia Ariana bona dubu hahelagaia ariana idia karaia totona. (2 Sivarai 7:8) Unai aria idia haorea murinai, King Solomona ese unai aria idia badinaia taudia ia siaia lao, bona “idia ibounai ese Solomona idia hanamoa, bona edia ruma dekenai idia lao, mai edia moale bona mai edia lalona namo danu, Lohiabada ese iena hanamoa ibounai, be iena hesiai tauna Davida, bona iena bese Israela dekenai ia hedinaraia dainai.” (1 King Taudia 8:66) Momokani unai be mai ena anina bada ariana. Hari inai negai, Dirava ena hesiai taudia ese Solomona Badana, Iesu Keriso, ena Lagani 1,000 Lohia Negana dokonai, dala badana ai Au Raurau Ruma Maragidia Ariana do ia guguru negana idia naria noho. (Apokalupo 20:3, 7-10, 14, 15) Unai negai, tanobada ena kahana ibounai idia noho taudia, idia toreisi lou taudia bona Aramagedono amo idia roho mauri taudia, be Iehova Dirava tomadiho henia karana lalonai do idia hebou mai moale ida.—Sekaraia 14:16.
9-11. (a) Dahaka ia vara guna, bena mai anina bada ariana idia karaia King Hesekaia ena nega lalonai? (b) Not kahanai idia noho iduhu ten basileiana taudia ese edena bamona haheitalai idia hahedinaraia, bona edia haheitalai dainai, iseda nega lalonai dahaka ia vara be ita laloa lou?
9 Baibel ia herevalaia aria badana ma ta be King dikana Ahasa, dubu helaga ia koua bona tomadiho momokani rakatania karana dekenai Iuda taudia ia hakaua tauna, ena lohia negana murinai idia karaia. Ahasa murinai ia lohia tauna be King namona Hesekaia. Ena lohia negana ena lagani ginigunana ai, ena mauri lagani be 25 neganai, Hesekaia ese hanamoa bona hamaoromaoroa gaukara badana ia hamatamaia. Maoromaoro dubu helaga ia kehoa bona hanamoa gaukarana ia hegaegaelaia. Bena king ese not kahanai Israela ena iduhu ten dagedage basileiana ai idia noho taudia dekenai revareva ia siaia, ia boiridia mai, Pasova Ariana bona Hatubua Lasi Paraoa Ariana idia moalelaia totona. Ena be edia dekena taudia ese idia kirikirilaidia, to momo idia mai.—2 Sivarai 30:1, 10, 11, 18.
10 Unai aria be ia heau namonamo, a? Baibel ia gwau: “Israela taudia, Ierusalema dekenai idia haboua mai, ese Hatubua Lasi Paraoa Aria dina 7 lalonai idia karaia, mai edia moale bada danu. Bona Levi taudia bona hahelagaia taudia ese dina ta ta lalonai, ane dekena amo Lohiabada idia hanamoa, mai edia goada ibounai danu.” (2 Sivarai 30:21) Unai Israela taudia edia kara be haheitalai namona hari inai negai Dirava ena taunimanima dekenai, idia momo ese dagedage idia haheaukalaia bona gabu daudau amo idia mai hebouhebou dekenai idia noho totona!
11 Hegeregere, lagani 1989 ai, Poland dekenai idia karaia “Dirava Kamonai Henia” Distrik Hebouhebou toi mani oi laloa. Unai hebouhebou dekenai idia noho taudia 166,518 amo grup badadia be guna idia gwauraia Soviet Union bona Eastern Europe tanodia ma haida, unai negai gavamani ese Iehova ena Witness taudia edia gaukara idia taravatua tanodia, amo idia mai. Jehovah’s Witnesses—Proclaimers of God’s Kingdomb bukana ia gwau: “Unai hebouhebou dekenai idia noho taudia haida be nega ginigunana hebou badana dekenai idia noho, badina guna idia noho heboudia dekenai Iehova ena taunimanima 15 eiava 20 sibona idia hebou. Idia ese Steidiam dekenai idia noho taudia tausen momo idia itaia, idia ida idia guriguri hebou, bona Iehova hanamoa totona ane idia abia hebou neganai, edia kudouna be moale amo idia honu.”—Rau 279.
12. Dahaka ia vara guna, bena mai anina bada ariana idia karaia King Iosaia ena nega lalonai?
12 Hesekaia ia mase murinai, Iuda taudia ese King Manase bona Amona edia lohia henunai tomadiho koikoi idia badinaia lou. Bena king namona ma ta, matamata tauna Iosaia, ena lohia negana ia mai, bona ia ese tomadiho momokani ia haginia lou mai gari lasi ida. Ena mauri lagani be 25 neganai, Iosaia ese oda ia henia dubu helaga do idia hanamoa lou. (2 Sivarai 34:8) Unai idia karaia noho lalonai, Mose ia torea Taravatuna be dubu helaga dekenai idia davaria. Dirava ena Taravatu dekenai ia duahia gaudia ese King Iosaia ena kudouna idia hamarerea bona dala ia hegaegaelaia, taunimanima ibounai dekenai unai hereva do idia duahia totona. (2 Sivarai 34:14, 30) Bena, guna idia torea hereva hegeregerena, Pasova Ariana ia karaia. King ese unai aria totona harihari gaudia momo ia henia karana amo, haheitalai namona ia karaia. Baibel ese unai aria ia herevalaia, ia gwau: “Peroveta tauna Samuela ena nega dekena amo, Pasova Aria inai bamona ta idia karaia lasi.”—2 Sivarai 35:7, 17, 18.
13. Hesekaia bona Iosaia idia badinaia ariadia dainai, iseda nega lalonai dahaka ia vara be ita laloa lou?
13 Hesekaia bona Iosaia idia karaia tomadiho hamaoromaoroa karadia ese lagani 1914 ai, Iesu Keriso be king dagina ia abia murinai, Keristani taudia korikoridia bogaraginai ia vara tomadiho momokani haginia lou karana idia laulaulaia. Iosaia ia karaia tomadiho hamaoromaoroa karana bamona, hari inai negai ia vara tomadiho momokani haginia lou karana be Dirava ena Hereva lalonai guna idia torea herevadia hegeregerena idia karaia. Bona, Hesekaia bona Iosaia edia nega hegeregerena, hari inai nega ena haginia lou karana lalonai hebou badadia idia karaia, idia lalonai Baibel ena peroveta herevadia edia anina idia gwauraia hedinarai namo herea bona iseda nega ai Baibel ena hakaua herevadia badinaia daladia idia hahedinaraia. Unai hadibaia negadia edia moale ia habadaia gauna be unai nega lalodiai momo idia bapatiso. Hesekaia bona Iosaia edia negai idia noho helalo-kerehai Israela taudia hegeregerena, bapatiso matamata taudia ese Kerisendom bona Satani ena tanobada orena edia kara dikadia idia rakatania vadaeni. Lagani 1997 ai, taunimanima 375,000 ese bapatiso idia abia, edia Dirava, Iehova, dekenai edia mauri idia gwauhamatalaia ena toana—edia averes be dina ta ta 1,000 mai kahana bamona.
Babulonia amo Idia Giroa Murinai
14. Dahaka ia vara guna, bena lagani 537 B.C.E. ai mai anina bada ariana idia badinaia?
14 Iosaia ia mase murinai, ena bese be tomadiho koikoi karadia dikadia idia badinaia lou. Dokonai, lagani 607 B.C.E. ai, Iehova ese ena taunimanima ia panisidia bona Babulonia ena tuari taudia ia siaia, Ierusalema idia tuari henia totona. Unai hanua bona ena dubu helaga idia hadikaia, bona tano ia noho kava. Lagani 70 lalonai Iuda taudia be Babulonia dekenai idia noho. Bena Dirava ese idia helalo-kerehai Iuda taudia oredia dekenai goada ia henia, bona Gwauhamata Tanona dekenai idia giroa lou, tomadiho momokani idia haginia lou totona. Lagani 537 B.C.E. ai, hua namba 7 dekenai, guna ia moru Ierusalema hanuana dekenai idia ginidae. Edia gaukara ginigunana be boubou patana idia haginia, Taravatu gwauhamatana ese ia gwauraia hegeregerena dina ta ta edia boubou gaudia idia gabua totona. Unai murinai aria badana ma ta ena nega ia ginidae. “Bona Buka ia torea hegeregerena, Au Raurau Ruma Maragidia Aria idia karaia.”—Esera 3:1-4.
15. Lagani 537 B.C.E. ai, Babulonia amo idia giroa taudia edia gaukara badana be dahaka, bona unai hegeregerena dahaka ia vara lagani 1919 lalonai?
15 Babulonia amo idia giroa taudia dekenai gaukara bada herea ia noho—Dirava ena dubu helagana bona Ierusalema mai ena magu do idia haginia lou. Edia dekena taudia, idia mama taudia unai, ese idia dagedage henidia. Unai dubu idia haginia negana, be gau maragidia edia nega. (Sekaraia 4:10, NW) Unai be lagani 1919 ai, horoa Keristani taudia mai edia kamonai edia noho hegeregerena. Unai lagani badana ai, lauma dalanai Babulonia Badana, tanobada ibounai tomadiho koikoi basileiana, amo idia siri. Idia edia momo be tausen haida sibona bona tanobada taudia ese idia dagedage henidia. Dirava ena inai taudia ese tomadiho momokani be ia bada ia lao karana idia koua diba, a? Unai henanadai ena haere dainai, Heberu Revarevadia idia herevalaia aria ginigabedia ruaosi idia badinaia karadia ita laloa.
16. Dahaka dainai lagani 515 B.C.E. ai idia karaia ariana ta be mai anina bada?
16 Lagani 515 B.C.E. ena hua Adar ai, dubu helaga haginia lou gaukarana idia haorea, bona unai be keru ia ore murinai, Nisan ai idia karaia ariana ena nega. Baibel ia gwau: “Dina 7 lalonai idia ese mai hatubua gauna lasi paraoa idia ania, mai moale danu, badina be Lohiabada ese ia hamoaledia. Idia moale danu, badina be Lohiabada ese Asuria ena king, Parasa tauna, ena lalona ia ania, vadaeni ia ese Dirava, Israela ena Dirava, ena Dubu Helaga haginia lou gaukara dekenai ia durua.”—Esera 6:22.
17, 18. (a) Dahaka mai anina bada gaukarana be lagani 455 B.C.E. ai, idia haorea? (b) Edena dala ai unai bamona ia vara hari inai negai?
17 Lagani 60 murinai, 455 B.C.E. ai, mai anina bada gaukarana ta idia karaia haorea. Unai lagani ai, Au Raurau Ruma Maragidia Ariana idia karaia negana ese Ierusalema ena magu idia haginia ore ena nega ia makaia. Baibel ia gwau: “Babulonia ena abia mauri dekena amo idia giroa mai lou taudia ibounai ese unai au raurau ruma maragidia idia haginia, bona inai ruma maragidia lalonai idia noho. Inai bamona kara be Israela taudia idia karaia lasi, Iosua Nunu ena nega ia mai bona Esera ena nega. Bona idia ibounai, mai moale bada danu unai au raurau ruma maragidia noholaia kara idia karaia.”—Nehemia 8:17.
18 Unai be Dirava ena tomadiho momokani haginia lou karana badana dagedage negana lalonai! Hari inai nega be unai nega hegeregerena. Ena be dagedage bona badu ita davaria, to Dirava ena Basileia ena sivarai namona harorolaia gaukarana badana be tanobada ena kahana ibounai dekenai ita karaia, bona gabu ibounai dekenai Dirava ena hahemaoro sivaraidia ita gwauraia. (Mataio 24:14) Horoa taudia 144,000 ginigabedia makaia gaukarana ia ore gwauraia. Edia bamodia, “mamoe idaudia” taudia, milioni ima ia hanaia be bese idauidau amo horoa taudia oredia ida ‘orea tamona’ lalonai idia gogoa vadaeni. (Ioane 10:16; Apokalupo 7:3, 9, 10) Unai be peroveta dalana ai Au Raurau Ruma Maragidia Ariana ese ia laulaulaia karana ia guguru dalana namo hereana! Bona unai anina haboua gaukara badana be do ia noho ela bona tanobada matamatana lalonai, toreisi lou taudia bilioni momo do idia boiria, Au Raurau Ruma Maragidia Ariana badana idia moalelaia totona.—Sekaraia 14:16-19.
Aposetolo Taudia Edia Negai
19 Ita diba momokani Baibel ia herevalaia aria badadia momokani be Dirava ena Natuna, Iesu Keriso, ia vareai ariadia. Hegeregere, lagani 32 C.E. ai, Iesu be Au Raurau Ruma Maragidia Ariana dekenai ia noho mani oi laloa. Unai aria ena nega ia gaukaralaia, mai anina bada hereva momokanidia ia hadibaia totona, bona Heberu Revarevadia edia hereva amo ena hahediba herevadia ia hamomokania. (Ioane 7:2, 14, 37-39) Unai aria negana lalonai, hanaihanai dubu ena ariara gabuna dekenai lamepa badadia hani idia ha-araia. Unai dainai hanuaboi momokani ai, idia karaia aria karadia idia moalelaia. Toana be, Iesu ese unai lamepa badadia ia laloa bona ia gwau: “Lau be tanobada ena diari. Lauegu murina dekenai do ia raka tauna be dibura lalonai do ia loaloa lasi, to mauri ena diari do ia abia.”—Ioane 8:12.
20. Dahaka dainai lagani 33 C.E. ena Pasova ia idau?
20 Bena mai anina bada laganina 33 C.E. ena Pasova bona Hatubua Lasi Paraoa Ariana idia karaia. Unai Pasova dinana ai, Iesu ena inai taudia ese ia idia hamasea bona dala badana ai Pasova ena Mamoe ai ia lao, “tanobada ena dika kokia” totona ia mase. (Ioane 1:29; 1 Korinto 5:7) Dina toi murinai, Nisan 16 ai, Dirava ese Iesu ia hatorea isi lou bona mase diba lasi laumana ai ia halaoa. Unai nega tamona ai bali ena anina ginigunadia idia bouboulaia, Taravatu ese ia gwauraia hegeregerena. Unai hegeregerena, Lohiabada Iesu Keriso, ia toreisi lou tauna, be ‘toreisi lou taudia ia gunalaia’ tauna ai ia lao.—1 Korinto 15:20.
21. Dahaka ia vara Pentekoste 33 C.E. ai?
21 Lagani 33 C.E. ena Pentekoste be aria badana momokani. Unai dina ai, Iuda taudia bona Iuda tomadiho idia abia dae taudia momo be Ierusalema dekenai idia hebou, edia bogaraginai be Iesu ena hahediba taudia 120. Unai aria idia karaia noho lalonai, Lohiabada Iesu Keriso, ia toreisi lou tauna, ese unai taunimanima 120 latanai Dirava ena lauma helaga ia bubua. (Kara 1:15; 2:1-4, 33) Unai dala ai, Iesu ese idia ia horoa bona ia karaia gwauhamata matamatana amo Dirava ena bese matamatana ai idia lao. Unai aria negana lalonai, Iuda taudia edia hahelaga tauna badana ese uiti ena anina ginigunadia amo idia karaia hatubua paraoa rua be Dirava dekenai ia bouboulaia. (Levitiko 23:15-17) Unai hatubua paraoa rua ese 144,000 goevadae lasi taudia, Iesu ese Dirava totona ia hoidia ‘Basileia ta bona Dirava ena hahelagaia taudia’ ai do idia lao bona tanobada idia lohiaia taudia unai, idia laulaulaia. (Apokalupo 5:9, 10; 14:1, 3) Unai taudia, guba dekenai do idia lohia taudia, be goevadae lasi taudia edia kahana rua, Iuda taudia bona Idau Bese taudia, amo idia mai be unai hatubua paraoa rua ese idia laulaulaia diba danu.
22. (a) Dahaka dainai Keristani taudia ese Taravatu gwauhamatana ia gwauraia ariadia idia badinaia lasi? (b) Murina herevana lalonai, dahaka do ita lalohadailaia?
22 Pentekoste 33 C.E. ai, unai gwauhamata matamatana ia matamaia neganai, Dirava ena matana ai gwauhamata Taravatuna gunana ena anina ia ore. (2 Korinto 3:14; Heberu 9:15; 10:16) To ita gwau lasi horoa Keristani taudia be mai edia taravatu lasi. Idia be Iesu Keriso ese ia hadibaia taravatuna, Dirava ena amo ia mai gauna, henunai idia noho bona edia kudouna ai unai taravatu idia torea. (Galatia 6:2) Unai dainai, lagani ta ta idia karaia aria badadia toiosi, Taravatu gwauhamatana ese ia gwauraia gaudia, be Keristani taudia ese idia badinadia lasi. (Kolose 2:16, 17) To, Keriso be tanobada ai ia do mai lasi negana lalonai Dirava ena hesiai taudia ese edia aria bona tomadiho heboudia ma haida idia laloa karana amo, gau momo ita dibaia diba. Murina herevana lalonai, haida edia haheitalai do ita lalohadailaia, idia ese ita do idia durua bona do ita lalo-parara hanaihanai Keristani heboudia dekenai ita lao be gau badana.
[Footnotes]
a Watchtower Bible and Tract Society of New York, Inc. ia halasia Insight on the Scriptures bukana Volium 1, rau 820, rau ena laurina kahana, paragraf 1 bona 3, hereva kwarana “Festival” henuna herevadia itaia danu.
b Watchtower Bible and Tract Society of New York, Inc. ese ia halasia.
Riviu Henanadai
◻ Israela taudia edia aria badadia toi edia anina be dahaka?
◻ Hesekaia bona Iosaia edia negai idia karaia ariadia ese dahaka kara badana idia hahedinaraia?
◻ Lagani 455 B.C.E. ai dahaka mai anina bada gaukarana idia karaia haorea, bona dahaka dainai unai ese ita ia hagoadaia?
◻ Dahaka dainai lagani 33 C.E. ai idia karaia Pasova bona Pentekoste be idau?
19. Dahaka dainai lagani 32 C.E. ai idia karaia Au Raurau Ruma Maragidia Ariana be idau?
[Box on page 12]
ARIA AMO ITA DIBAIA GAUDIA HARI INAI NEGAI
Namona be Iesu ena kara dika kokia boubouna amo hanaihanai namo do idia abia taudia ibounai be Hatubua Lasi Paraoa Ariana ese ia laulaulaia gauna idia badinaia. Dala badana ai horoa Keristani taudia ese unai aria idia moalelaia, badina Iesu ena mauri davalaia boubouna dainai inai tanobada dikana bona kara dika ena igui amo idia roho mauri. (Galatia 1:4; Kolose 1:13, 14) Unai aria korikorina be dina seven lalonai idia karaia—Baibel lalonai unai namba ese lauma dalanai kahana ibounai idia guguru karana ia laulaulaia. Unai aria ese ia laulaulaia ariana ena nega be horoa Keristani taudia edia kongregesen be tanobada dekenai ia noho negana ibounai bona namona be mai edia “laloa goevagoeva bona hereva momokani” ida unai aria do idia badinaia. Ena anina be nega ibounai idia naria namonamo hatubua muramura bamona gaudia ese idia hadikadia garina. Baibel lalonai hatubua muramura ese hahediba hereva koikoidia, kara koikoi, bona kara dika ia laulaulaia. Namona be Iehova idia tomadiho henia taudia momokanidia idia hahedinaraia unai bamona hatubua muramura idia inai henia, ia ese idia sibona edia mauri bona Keristani kongregesen ia hamiroa garina.—1 Korinto 5:6-8; Mataio 16:6, 12.
[Picture on page 9]
Lagani ta ta idia haboua guna bali ena kahana ta idia bouboulaia Nisan 16 ai, Iesu ia toreisi lou dinana unai
[Picture on page 10]
Iesu be sibona ia gwauraia “tanobada ena diari” neganai, reana aria lalonai idia ha-araia lamepa badadia ia laloa