Ita Noga Noho be Namo

“Sivarai Namona bese ibounai dekenai be do idia haroro henia guna. . . . To ia gini auka ela bona dokona tauna, be mauri do ia davaria.”​—MAREKO 13:​10, 13.

1. Dahaka dainai do ita haheauka bona do ita boga-auka be namo?

NAMONA be do ita haheauka​—abidadama lasi bona lalona auka taudia bogaragidiai! Lagani 1914 amo ema bona hari, taunimanima be idia dika idia lao vadaeni, Iesu ena negai hegeregerena. Hari inai negai unai dika be tanobada hegegemadai ia vara. Hari inai “nega ena dokona” ai, “metau dikadia,” aposetolo Paulo ese ia gwauraia gaudia, ese taunimanima idia hahisidia noho. ‘Kara dika taudia bona koikoi taudia ese edia kara dika bona edia koikoi idia habadaia noho.’ Momokani, “Satani ese tanobada taudia ibounai ia gunalaia noho,” bona hari ia ese tanobada ia hadikaia toho noho, nega ginigabena. To do oi boga-auka be namo! “Hisihisi badana” ta be ia mai noho, kara maoromaoro taudia do ia hamauridia ela bona hanaihanai.​—2 Timoteo 3:​1-5, 13; 1 Ioane 5:19; Apokalupo 7:​14, NW.

2. Lagani 1914 lalonai peroveta herevana ta be edena bamona ia momokani?

² Ita moale, badina be guba ai Iehova ese Lohiabada Iesu Keriso be king dagina ia henia vadaeni, bona hari ia hegaegae, taunimanima idia hahisidia taudia do ia kokia. (Apokalupo 11:15) Mesia ia mai negana ginigunana ai hegeregerena, hari inai negai danu, Daniela ena peroveta herevana badana ta ena anina ia vara. Daniela 4:​16, 17, 32 ai, ia gwau tanobada ai pavapava siahuna maorona do idia hadokoa ela bona “lagani 7” idia ore. Unai be dala badana ai ia momokani neganai, unai lagani 7 edia anina be Baibel laganidia 7, idia ta ta be ‘dina’ 360, anina ibounai be lagani 2,520.a Lagani 607 B.C.E., Babulonia ese Israela basileiana ia moimoilaia matamaia negana, amo idia hesiriu ela bona lagani 1914 C.E., unai lagani lalonai Iehova ese Iesu be King ai ia halaoa bona gwaumaoro ia henia taunimanima do ia lohiadia. Bena “idau bese edia nega” ia ore. (Luka 21:24) To tanobada besedia ese Mesia ena Basileia idia abia dae lasi.​—Salamo 2:​1-6, 10-12; 110:​1, 2.

3, 4. (a) Keriso ena nega lalonai bona murinai idia vara gaudia be iseda nega lalonai idia vara gaudia ida edena bamona ita hahegeregeredia diba? (b) Edena bamona ita henanadai be namo?

³ Unai lagani edia pura namba 70 (29-36 C.E.) be ia kahirakahira neganai, bona lagani 1914 be kahirakahira neganai danu, Dirava gari henia taudia ese Mesia ena ginidae idia naria. Bena ia ginidae! To, unai nega ruaosi ai, ia hedinarai dalana be edia helaro hegeregeredia lasi. Inai danu, unai nega ruaosi murinai nega daudau lasi ‘unai negai idia noho taudia’ dikadia be Dirava ena oda hegeregerena idia hamasedia ore.​—Mataio 24:34.

⁴ Iseda stadi herevana ginigunana lalonai, ita itaia Iesu ena negai idia noho Iuda taudia dikadia, Iesu hamasea dalana idia boiboilaia taudia, be edena bamona idia ore. Vadaeni, hari inai negai idia noho taudia dikadia, ia idia dadaraia o idia laloa lasi taudia, be edena bamona? Edena negai inai abidadama lasi taudia be edia dika davana do ia henidia?

“Umui Naria Noho”!

⁵ “Hisihisi bada herea” negana vairanai do idia vara gaudia ia perovetalaia murinai, Iesu be ma ia gwau: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba.” (Mataio 24:​3-36; Mareko 13:​3-32) Unai dina bona hora do ita diba guna be anina lasi. To namona be do ita gima namonamo, iseda abidadama do ita hagoadaia, bona Iehova ena gaukara do ita goadalaia​—lagani do ita duahidia lasi, unai dina do ita laloa davari totona. Ena peroveta herevana badana ena dokona ai, Iesu ia gwau: “Umui naria namonamo, umui noga noho, badina be inai gaudia idia mai nega umui diba lasi. . . . Umui naria noho . . . Inai hereva lau hamaoroa umui, taunimanima ibounai dekenai danu lau hamaoroa, lau gwau, ‘Umui naria noho.’ ” (Mareko 13:​33-37) Hari inai negai dika be tanobada ena dibura lalonai ia noho. Namona be ita noga noho!​—Roma 13:​11-13.

⁶ Inai nega dikana ena dokona be Dirava ena lauma helaga amo idia perovetalaia herevadia ita laloa be namo, to namona be ita ese danu Keriso Iesu ena dava bada boubou gauna bona unai gau dainai Iehova ese ia gwauraia gwauhamatadia namo hereadia be iseda abidadama ena badina korikori ai ita halaoa. (Heberu 6:​17-19; 9:14; 1 Petero 1:​18, 19; 2 Petero 1:​16-19) Iehova ena orea taudia idia ura bada inai nega dikana ena dokona do idia itaia, unai dainai nega haida idia ese “hisihisi badana” do ia vara negana idia gwauraia guna toho, bona unai davaria totona, lagani 1914 amo ia mauri noho uruna ena mauri laganidia idia duahia toho. To, ‘aonega ita davaria,’ uru ta ena nega be lagani hida o dina hida ita tahua dainai lasi, to badina be ‘iseda mauri ena kwadogi’ ita laloa bona Iehova ita hanamoa mai eda moale ida. (Salamo 90:12) Iesu ese ‘uru’ ia gwauraidia negadiai, unai be nega ena lata do ita hahetohoa totona lasi, to unai hereva ena anina badana be nega ta ai idia noho taudia, mai edia kara.b

⁷ Unai hegeregerena, histori ena profesa Robert Wohl be ena buka ladana The Generation of 1914 lalonai ia gwau: “Uru ta be ena matamana negana bona ena dokona negana hegeregeredia ita gwauraia lasi.” To ia gwau, Tanobada Ibounai Tuarina Ginigunana dainai “mamina idia abia momokani guna negana amo idia parara.” Ma ia gwau: “Unai tuari amo idia roho mauri taudia idia laloa August 1914 lalonai tanobada ta ia ore bena ma ta ia matamaia.” Unai be momokani! Unai lagani ena anina korikorina ia gwauraia unai. Lagani 1914 murinai, “inai negai idia noho taudia” ese tanobada idia itaia, dala dika rohorohodia amo ia senisi. Idia itaia taunimanima milioni milioni momo edia rara ese tano ia haparia. Tuari, idau besedia hamasedia ore karadia, hahegari karadia, bona taravatu utua karadia be tanobada hegegemadai idia vara. Hitolo bada, daihanai goreredia, bona matabodaga karadia ese iseda tanobada idia hadikaia. Iesu ia peroveta, ia gwau: “Umui [iena hahediba taudia] ese inai gaudia do idia vara do umui itaia, vadaeni do umui diba Dirava ena Basileia ia kahirakahira vadaeni. Momokani umui lau hamaoroa, inai nega do ia ore lasi, inai gaudia ibounai do idia vara momokani.”​—Luka 21:​31, 32.

8. Iehova ena peroveta taudia ese edena bamona idia hahedinaraia do ita noga noho be mai anina bada?

⁸ Oibe, Mesia ena Basileia do ia kwalimu vaitani negana be kahirakahira momokani! Vadaeni, lagani do ita tahudia o uru ta ena mauri negana ena lata do ita lalohadailaia kava, ena namo be dahaka? Ena namo be lasi, lasi vaitani! Habakuku 2:3 ia hereva goevagoeva, ia gwau: “Inai lau palania kara be harihari do ia vara lasi. Unai dainai ena anina do oi torea, ia noho. To ia be nega daudau lasi lalonai do ia vara. Lau koikoi lasi. Sedira oi laloa iena mai be haraga lasi, to do oi naria noho, ia be do ia vara momokani.” Iehova ese dika davana do ia henia dinana be ia mai haraga noho.​—Ieremia 25:​31-33; Malaki 4:1.

⁹ Lagani 1914 lalonai Keriso be ena Basileia lalonai ia lohia matamaia neganai, Satani ia negea diho tanobada ai. Unai dainai “tanobada . . . madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” (Apokalupo 12:12) Momokani, bema unai nega be Satani ena lohia laganidia tausen momo ida ita hahegeregerea, ia be kwadogi. Basileia be kahirakahira, bona Iehova ese inai negai idia noho taudia dikadia edia dika davana do ia henidia negana danu be kahirakahira!​—Aonega Herevadia 3:25; 10:​24, 25.

‘Nega ta ai Idia Noho’ Bena Idia Mase Ore Taudia

¹⁰ Iesu ena hereva Mataio 24:​34, 35 ai be mani ita tahua namonamo. Ia gwau: “Umui lau hamaoroa momokani, inai nega idia noho taudia do idia mase ore lasi neganai, be inai gaudia ibounai do idia vara momokani. Guba bona tanobada do idia boio, to lauegu hereva be do ia boio lasi.” Iesu ena hereva gabedia ese idia hahedinaraia, “unai dina, unai hora gauna, ta ia diba lasi.” Mai anina bada gauna be inai: Ita ia hadibaia, inai negai idia noho taudia bogaragidiai ita idia gegea tarapudia amo do ita raka siri be namo. Iesu be ma ia gwau: “Noa ena nega bamona, Taunimanima ena Natuna do ia mai neganai, be unai bamona gaudia do idia vara. Badina be unai neganai, abata badana do ia ginidae lasi neganai, idia aniani noho, idia inuinu noho, idia headava noho, ia mai bona Noa be lagatoi dekenai ia guia dinana. Taunimanima ese idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao. Taunimanima ena Natuna do ia mai neganai danu unai bamona do ia vara.” (Mataio 24:​36-39) Iesu ese iena negai idia noho taudia be Noa ena negai idia noho taudia ida ia hahegeregeredia unai.​—Genese 6:​5, 9.

11. Mataio bona Luka ese idia hahedinaraia Iesu ese ‘uru’ rua be edena bamona ia hahegeregeredia?

¹¹ Guna aposetolo taudia be Iesu ese unai ‘uru’ ruaosi ia hahegeregeredia neganai, ena hereva idia kamonai danu. Dina haida gunanai ia be sibona ia gwauraia, ia gwau: “Taunimanima ena Natuna . . . be hisihisi momo do ia abia guna, bona inai nega taudia ese do idia ura henia lasi. Noa ena nega dekenai idia karaia bamona, Taunimanima ena Natuna ena nega be unai bamona danu do idia karaia.” (Luka 17:​24-26) Unai hegeregerena, Mataio karoa 24 bona Luka karoa 17 ese unai uru ruaosi idia hahegeregeredia. Noa ena negai “edia kara be dika momokani” taudia be Baibel ese ia gwauraidia “inai taunimanima.” Iesu ena negai Iuda taudia, tomadiho dalana maorona idia rakatania bona Iesu idia dadaraia taudia, be ia gwauraidia “inai nega idia noho taudia.”​—Genese 6:​11, 12; 7:1.

¹² Unai dainai, hari inai negai, Iesu ena peroveta herevana ena guguru negana ginigabena lalonai, anina be hari inai negai ia vara lou neganai, toana be inai hereva “inai nega idia noho taudia” ena anina be tanobada besedia, Keriso ia lou mai vadaeni toana idia itaia to idia helalo-kerehai lasi taudia. To ita Iesu ena hahediba taudia ese “inai nega idia noho taudia” edia mauri dalana ita tohotohoa lasi. Ena be ita be tanobada lalonai ita noho, to ita be tanobada ena lasi be namo, “badina inai gaudia ibounai do idia vara ena nega be ia kahirakahira vadaeni.” (Apokalupo 1:3; Ioane 17:16) Aposetolo Paulo ese ita ia sisiba henia, ia gwau: “Gau ibounai umui karaia neganai, do umui maumau lasi o hepapahuahu lasi. Unai dekena amo umui be kerere ta lasi, bona emui lalona dekenai dika ta do ia noho lasi, Dirava ena natuna taudia edia kara bamona. Bona umui be inai tanobada taudia mai edia dika bona mai edia kerere bada danu edia huanai umui noho. Umui ese idia edia huanai diari bamona do umui hedinarai, hisiu ese tanobada idia hadiaria bamona.”​—Filipi 2:​14, 15; Kolose 3:​5-10; 1 Ioane 2:​15-17.

12, 13. (a) “Inai nega idia noho taudia,” do idia mase ore taudia, be daidia? (b) “Inai tanobada taudia mai edia dika bona mai edia kerere bada danu” bogaragidiai, Iehova ena orea taudia be edena bamona idia kwalimu noho?

¹³ ‘Diari bamona ita hedinarai,’ anina be Keristani karana goevana ita hahedinaraia mo lasi, to gau badana be Iesu ena peroveta herevana ita hamomokania danu; ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Taunimanima ta lasi ese dokona do ia ginidae negana ia gwauraia guna diba, to ita diba unai haroro gaukarana be Dirava ena ura hegeregerena “tanobada ena kahana ibounai” dekenai do idia karaia guguru neganai, “inai nega idia noho taudia” dikadia do idia mase ore.​—Kara 1:8.

“Unai Dina, Unai Hora Gauna”

¹⁴ Iehova ena palani hegeregerena haroro gaukarana be tanobada hegegemadai do idia karaia guguru neganai, inai tanobada ena oromana do ia haorea ‘dinana bona horana’ do idia ginidae. Unai dina do ita diba guna be anina lasi. Unai dainai, Iesu ena kara hegeregerena, aposetolo Paulo ia sisiba, ia gwau: “Aiemai varavara taudia e, inai kara do idia vara ena nega korikori, be umui dekenai lau torea henia lasi. Badina be umui danu umui diba vadaeni, Lohiabada ena Dina be do ia mai, henaoa tauna hanuaboi neganai ia mai bamona. Inai bamona hereva, ‘Maino bona gari lasi ita noho inai,’ taunimanima idia gwauraia noho neganai, karaharaga hisihisi dika momokani bona mase do ia ginidae! Rogorogo hahine ese mara ena hisihisi ia davaria haraga bamona unai hisihisi be do ia ginidae. Bona unai taunimanima do idia roho mauri diba lasi.” Paulo ese ia gwauraia negana mani oi laloa: “Inai bamona hereva, ‘Maino bona gari lasi ita noho inai,’ taunimanima idia gwauraia noho neganai,” idia hegaegae lasi momokani neganai, Dirava ese edia davana do ia henidia haraga. Paulo ena sisiba be mai anina bada; ia gwau: “Unai dainai, namo ita mahuta lasi, haida idia mahuta bamona. To namo ita noga noho, ita laloa goada noho”!​—1 Tesalonika 5:​1-3, 6; ma 1 Tesalonika 5 siri 7-11; Kara 1:7 danu itaia.

¹⁵ Inai lalohadai matamatana bona maorona inai hereva “inai nega noho taudia” dekenai, ena anina be Aramagedono be kahirakahira lasi guna ita laloa bamona, to ia be do daudau, a? Lasi vaitani! Ena be nega ibounai ita be “unai dina, unai hora gauna” ita diba lasi, to Iehova Dirava be nega ibounai unai ia diba, bona ia senisia diba lasi. (Malaki 3:6) Momokani, tanobada be ena dokona dikana ia diho henia noho. Hari inai negai ita noga noho be mai anina bada, guna be inai bamona lasi. Iehova ese “kahirakahira do idia vara gaudia” be ia hahedinaraia vadaeni ita dekenai, bona unai dainai namona be harihari ita hegaegae momokani.​—Apokalupo 1:1; 11:18; 16:​14, 16.

15, 16. (a) Dahaka dainai namona be do ita laloa lasi Aramagedono be do daudau, guna ita laloa bamona lasi? (b) Kahirakahira Iehova ese ena lohia siahuna be edena bamona do ia hahedinaraia goevagoeva?

¹⁶ Unai nega be ia mai kahirakahira lalonai, oi noga noho, badina be Iehova ese Satani ena orea ibounai do ia hadikaia ore negana be kahirakahira! (Ieremia 25:​29-31) Iehova ia gwau: “Unai dekena amo egu ladana ena namo herea bona egu helaga do lau hedinaraia, bona bese momo edia vairana dekenai egu kara do lau hedinaraia. Unai neganai do idia diba lau be [Iehova].” (Esekiela 38:23) ‘Iehova ena dina’ badana be kahirakahira!​—Ioela 1:15; 2:​1, 2; Amosa 5:​18-20; Sepanaia 2:​2, 3.

Kara Maoromaoro “Guba Matamata Bona Tanobada Matamata”

¹⁷ ‘Do idia vara momokani gaudia iboudiai’ be Iesu ese ia herevalaia, ia gwau: “Guba bona tanobada do idia boio, to lauegu hereva be do ia boio lasi.” (Mataio 24:​34, 35) Toana be Iesu ese “inai nega idia noho taudia” edia “guba bona tanobada” ia laloa​— lohia taudia bona idia lohiaia taudia unai. Aposetolo Petero ese unai bamona herevadia amo “harihari idia noho guba bona tanobada” ia gwauraia, ia gwau “idia noho hegaegae, ela bona Kota Badana Dinana dekenai. Unai neganai . . . Dirava idia negea taudia be do idia boio.” Ma ia gwau, “Lohiabada ena Dina be do ia ginidae, henaoa tauna ia ginidae bamona. Unai Dina dekenai, guba [gavamani unai] be nega tamona do ia ore,” bona taunimanima dikadia danu, “tanobada” bona ia lalonai idia noho gaudia dikadia unai, be do idia ore. Bena aposetolo ese ita ia sisiba henia, ia gwau: “Umui emui kara ibounai do idia helaga be namo, bona Dirava do umui badinaia namonamo. Ma Dirava ena Dina do umui naria noho, bona do ia ginidae haraga totona do umui gaukara goada noho. Unai Dina neganai lahi ese guba do ia araia ore, bona siahu badana ese guba dekenai noho hisiu, hua bona dina do ia gabua ore.” Unai murinai dahaka do ia vara? Petero ese “guba matamata bona tanobada matamata” ita ia hamaorolaia, “unai gabu dekenai be kara maoromaoro sibona do ia noho.”​—2 Petero 3:​7, 10-13.c

17, 18. (a) Iesu bona Petero edia hereva hegeregeredia, “inai nega idia noho taudia” be edena bamona do idia mase ore? (b) Dahaka dainai namona be do ita gima noho, do ita kara maoromaoro bona Dirava do ita badinaia noho totona?

¹⁸ Unai “guba matamata,” Keriso Iesu bona ia ida do idia lohia pavapavadia edia Basileia unai, ese hahenamo momo be kara maoromaoro “tanobada matamata” besena taudia do idia henidia. Oi be unai bese tauna ta ai oi lao gwauraia, a? Bema oibe, unai vaira negana namo hereana dainai oi moale be mai badina!​—Isaia 65:​17-19; Apokalupo 21:​1-5.

19. Hari ita ese dahaka hahenamo badana ita moalelaia diba?

¹⁹ Oibe, hari inai negai kara maoromaoro ‘uruna’ ta idia gogoa noho. Hari inai negai ‘hesiai tauna mai ena kamonai bona mai ena kara maoromaoro’ ia hadibadia noho, Salamo 78:​1, 4 ena hereva hegeregerena: “Egu bese taudia e, egu hadibaia hereva do umui kamonai. Egu uduna ena hereva do umui kamonai . . . , Lohiabada ena siahu karadia bona iena hoa karadia, be gabeai idia vara bese taudia dekenai do [umui] hamaoroa.” (Mataio 24:​45-47) Hari lagani lalonai, April 14 ai, tano 230 bamona dekenai, taunimanima 12,000,000 mai kahana be kongregesen 75,500 bona ma haida lalodiai idia hebou, Keriso ena mase laloa lou totona. Oi be idia bogaragidiai, a? Namona be Keriso Iesu oi abidadama henia bona ‘Iehova ena ladana oi noia hahemauri abia totona.’​—Roma 10:​10-13.

20. “Nega be kwadogi” dainai, edena bamona do ita noga noho be namo, bona iseda helaro be dahaka?

²⁰ Aposetolo Paulo ia gwau: “Nega be kwadogi.” Unai dainai, hari inai negai idia noho taudia dikadia edia badu ita haheaukalaia noho lalonai, namona be nega ibounai do ita noga noho bona Iehova ena gaukara do ita goadalaia noho. (1 Korinto 7:29; Mataio 10:22; 24:​13, 14) Namona be do ita gima noho, bona Baibel lalonai idia gwauraidia gaudia, “inai nega idia noho taudia” dekenai do idia vara gaudia, be do ita itaia namonamo. (Luka 21:​31-33) Bema inai gau amo ita roho mauri bona Taunimanima ena Natuna vairanai ita gini, Dirava ena lalo-namo dainai ita ese kwalimu ahuna, mauri hanaihanai, do ita abia diba.

[Footnotes]

Riviu Ena Henanadai:

◻ Daniela 4:​32 ia momokani dalana ita diba dainai, hari ita be edena bamona do ita “naria noho” be namo?

◻ Mataio bona Luka edia Evanelia bukadia ese “inai nega idia noho taudia” be edena bamona idia gwauraia hedinarai?

◻ “Unai dina, unai hora gauna” ita naria noho lalonai, dahaka ita itaia, bona unai dainai edena bamona do ita kara be namo?

◻ Iseda helaro be kara maoromaoro “guba matamata bona tanobada matamata” do idia vara; namona be unai ese ita ia hagoadaia, edena bamona do ita kara totona?

5. (a) Dahaka dainai Iehova ena ‘dina bona hora’ do ita diba be anina lasi? (b) Mareko ese ia torea herevana hegeregerena, Iesu ese ena peroveta herevana be dahaka sisiba namona amo ia hadokoa?

6. (a) Dahaka be iseda abidadama ena badina korikori ai do ita halaoa be namo? (b) Edena bamona ita hahedinaraia ‘iseda mauri ena kwadogi’ ita laloa? (c) Iesu ese ‘uru’ ia gwauraidia negadiai, unai hereva ena anina be dahaka?

7. Histori ena profesa ta ese ‘lagani 1914 lalonai idia noho taudia’ edena bamona ia gwauraia, bona unai ese Iesu ena peroveta herevana be edena bamona ia hamomokania?

9. Lagani 1914 amo dahaka idia vara, idia hahedinaraia nega be kwadogi?

10. Hari “inai nega idia noho taudia” be Noa ena nega ai idia noho taudia ida edena bamona idia hegeregere?

14. Iesu bona Paulo danu ese “inai kara do idia vara ena nega korikori” be edena bamona idia sisibalaia, bona unai dainai edena bamona do ita kara be namo?

[Pictures on page 17]

Hari inai negai idia noho taudia mai edia kerere bona dagedage do idia ore neganai, taunimanima edia hisihisi do ia ore

[Credit Line]

Alexandra Boulat/Sipa Press

[Credit Line]

Left and below: Luc Delahaye/Sipa Press

[Picture on page 18]

Kahirakahira bese iboudiai ese “guba matamata bona tanobada matamata” mai hairaidia do idia moalelaia