Iehova Ena Ura Idia Karaia

Iobu ese Gini Goada Ena Ahuna Ia Abia

IOBU be hebogahisi tauna, ia ese vabu, ogogami, bona hisihisi idia davaria taudia ia durua. (Iobu 29:12-17; 31:16-21) Bena, haraga momokani, kara dika bada ia vara ia dekenai, iena kohu bona iena natudia ia haboioa, bona gorere ia davaria. Madi, inai kara namo tauna, hisihisi idia davaria taudia ia durua tauna, be dika ia davaria neganai ta ese ia durua lasi. Iena adavana danu ese ia hamaoroa “Dirava ena ladana do oi hadikaia, vadaeni oi mase!” Bona iena “turadia” Elipasa, Biledada, bona Sopara be idia hagoadaia lasi. To, mai edia koikoi ida idia gwau Iobu be ia kara dika bona unai dainai ia hisihisi be namo.​—⁠Iobu 2:​9; 4:​7, 8; 8:​5, 6; 11:​13-15.

Ena be unai hisihisi ia davaria, to Iobu be ena abidadama ia dogoatao noho. Unai dainai, gabeai Iehova ese Iobu ia hebogahisi henia bona ia hanamoa. Ia hanamoa dalana ena sivarai ese idia gini goada noho Dirava ena hesiai taudia ia hagoadaia iena nega korikorina ai idia danu do ia hanamoa.

Iehova Ia Gwau Ia be Kerere Lasi Bona Ia Hanamoa Lou

Iehova ese Elipasa, Biledada, bona Sopara ia sisiba henidia guna. Elipasa be bada dainai, ia hereva henia guna, ia gwau: “Lau be oi bona oiemu turana ruaosi dekenai lau badu, badina be lauegu sivarai umui gwauraia maoro lasi, Iobu, lauegu hesiai tauna ese ia gwauraia hegeregerena. Unai dainai, boromakau tau 7 bona mamoe tau 7 do oi abia lao Iobu dekenai. Bona umui emui boubou gauna totona inai boromakau bona mamoe do umui gabua, emui dika totona. Iobu ese umui totona do ia guriguri.” (Iobu 42:​7, 8) Unai kara ena anina mani oi laloa!

Iehova ia ura Elipasa, Biledada, bona Sopara ese boubou gauna badana do idia karaia, reana unai amo edia kara dika ena bada idia diba totona. Momokani, mai lalo-parara ida eiava lalo-parara lasi ida, idia ese Dirava idia gwauraia dika, idia gwau ia be ‘iena hesiai taudia ia abidadama henia lasi’ bona Iobu be iena abidadama ia dogoatao eiava lasi be ia laloa bada lasi. Elipasa ia gwau danu Dirava ena matana ai Iobu be anina bada lasi kaubebe ta bamona! (Iobu 4:​18, 19; 22:​2, 3) Unai dainai Iehova ia gwau: “Lauegu sivarai umui gwauraia maoro lasi”!

To unai sibona lasi. Elipasa, Biledada, bona Sopara be Iobu dekenai idia kara dika danu, badina idia hamaoroa ia sibona ese iena hekwakwanai ia havaraia. Iobu idia hereva dika henia kava bona idia hebogahisi henia lasi dainai, ia badu bona ia lalo-metau, unai dainai ia taitai, ia gwau: “Emui hereva dekena amo, badina dahaka lau umui hisihisi henia noho?” (Iobu 10:1; 19:⁠2) Unai taudia toi be Iobu dekenai edia kara dika ena boubou idia henia neganai, edia hemarai vairadia edia toana mani oi laloa!

To Iobu be edia hemarai do ia moalelaia lasi. Oibe, Iehova ese ia hamaoroa ia idia hereva dika henia taudia totona do ia guriguri. Iobu be Iehova ese ia hamaoroa hegeregerena ia kara, bona unai dainai ia hanamoa. Iehova ese iena gorere dikana ia hanamoa guna. Bena, iena tadikaka, taihu, bona tura gunadia idia mai idia hagoadaia totona, bona “idia ta ta ibounai ese moni bona golo rini Iobu dekenai idia henia.”a Bona danu, Iobu be ‘mamoe 14,000, kamelo 6,000, boromakau 1,000 bona doniki hahine 1,000’ ia abia.b Bona Iobu ena adavana danu be ia ida maino ia karaia. Gabeai, Iobu ena hahenamo be ena natudia memero 7 bona kekeni toi idia vara, bona ia mauri ela bona iena tubudia edia uru hani ia itaia.​—⁠Iobu 42:​10-17, NW.

Ita Dibaia Gaudia

Iobu be haheitalai namona inai nega lalonai idia noho Dirava ena hesiai henia taudia totona. Ia be “kerere ta lasi, bona kara maoromaoro tauna,” Iehova ese mai moale ida ia boiria “lauegu hesiai tauna.” (Iobu 1:8; 42:​7, 8) To, ita gwau lasi Iobu be goevadae tauna. Hisihisi ia davaria noho lalonai, nega ta ia hereva kerere ia gwau Dirava ese iena hisihisi ia havaraia. Ia ese Dirava ena kara taunimanima dekenai ia gwauraia dika danu. (Iobu 27:2; 30:​20, 21) Bona Dirava ena kara maoromaoro ia gwauraia lasi, to ia sibona ena kara maoromaoro ia gwauraia. (Iobu 32:⁠2) To Iobu ese Havaraia Tauna ia dadaraia lasi, bona mai manau ida Dirava ena sisiba ia abia dae. Ia gwau: “Lau herevalaia gaudia, be lau diba namonamo lasi. . . . Egu hereva gaudia ibounai dainai, lau be lau hemarai, bona harihari tano kahu bona lahi kahu danu dekenai, lauegu lalona lau giroa momokani inai.”​—⁠Iobu 42:​3, 6.

Hisihisi ita davaria neganai, reana ita danu be ia maoro lasi dalana ai ita laloa, ita hereva, eiava ita kara. (Hadibaia Tauna 7:7 itaia.) Herevana unai ia vara, bema iseda lalokau Dirava totona be ia bada, unai hekwakwanai aukadia ia koua lasi dainai, do ita gwau-edeede henia lasi o do ita badu lasi. To, do ita gini goada noho bona unai dainai dokonai hahenamo bada do ita abia. Salamo torea tauna ese Iehova ia gwauraia ia gwau: “Oi ese kara maoromaoro tauna dekenai, kara maoromaoro oi henia noho.”​—⁠Salamo 18:⁠25.

Iobu be ena gorere amo ia do namo lasi neganai, Iehova ia ura ia idia kara dika henia taudia totona do ia guriguri. Unai be haheitalai namona ita totona! Iehova ia ura ita idia kara dika henia taudia do ita gwauatao guna, bena ia ese iseda kara dika do ia gwauatao. (Mataio 6:12; Efeso 4:32) Bema dala ia noho, to ita ura lasi ma haida edia kerere ita gwauatao, momokani ita laloa Iehova ese ita do ia hebogahisi henia be maoro, a?​—⁠Mataio 18:​21-35.

Ita ibounai be nega ta ta ai hisihisi ita davaria. (2 Timoteo 3:12) To, Iobu bamona ita gini goada diba. Unai ita karaia neganai, ahuna badana do ita abia. Iamesi be inai ia torea: “Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.”​—⁠Iamesi 5:⁠11.

[Footnotes]