Duahia Taudia Edia Henanadai

Iesu ia gwau: “Do umui raka goada, iduara maragimaragi dekena amo do umui raka vareai. Badina be lau hamaoroa umui dekenai, taunimanima momo do idia ura raka vareai, to idia be hegeregere lasi.” (Luka 13:24) Iena hereva ena anina be dahaka, bona hari edena bamona ita badinaia diba?

Unai hereva namona do ita lalo-pararalaia namonamo diba bema unai nega ita laloa. Hua 6 idia do noho ela bona Iesu ena mase negana, dubu helaga idia hahelagaia lou ariana idia karaia neganai ia be Ierusalema dekenai ia noho. Ia gwau ia be Dirava ena mamoe naria tauna to ia hahedinaraia Iuda taudia momo be unai mamoe huanai lasi badina idia ura lasi ia idia kamonai henia. Ia gwau ia bona ena Tamana be ”tamona” neganai, Iuda taudia be nadi idia abia isi, ia idia hodoa gwauraia. Ia be Perea dekenai ia heau lao, Ioridane Sinavai unai kahana dekenai.​—⁠Ioane 10:​1-​40.

Unuseniai tau ta ese ia nanadaia: “Lohiabada e, mauri do idia abia taudia be momo, o haida sibona, a?” (Luka 13:23) Unai be henanadai namona, badina unai negai idia noho Iuda taudia idia laloa taunimanima haida sibona be hegeregere hahemauri do idia abia. Edia kara ita diba dainai, unai haida sibona idia gwauraia neganai ita lalo-parara diba idia be daidia idia laloa. To gabeai idia vara gaudia ese idia hahedinaraia edia lalohadai be kerere momokani!

Lagani rua bamona lalonai, Iesu be Iuda taudia bogaraginai ia noho, ia hadibaia, hoa karadia ia karaia, bona Basileia ena lohia taudia ai do idia lao dalana ia kehoa idia dekenai. Bena dahaka ia vara? Idia bona idia hakaudia taudia be idia hekokoroku, badina idia be Aberahamo ena bese taudia bona Dirava ena Taravatu be idia dekenai idia henia dainai. (Mataio 23:2; Ioane 8:​31-​44) Idia be Mamoe Naria Tauna Namona ena gadona idia diba lasi bona idia badinaia lasi. Unai be hegeregere idia vairanai iduara ta ia kehoa bamona, bona bema idia vareai edia ahuna badana be Basileia taudia ai do idia lao, to idia raka vareai lasi. Iuda taudia haida sibona, idia momo be sikuli maragi taudia, ese Iesu ia gwauraia hereva momokani idia kamonai, idia badinaia, bona ia idia rakatania lasi.​—⁠Luka 22:​28-​30; Ioane 7:​47-​49.

Pentekoste dinana 33 C.E. ai, unai taudia sibona be Dirava ena lauma helaga amo ia horoa diba. (Kara 2:​1-38) Idia be Iesu ese ia gwauraia dika karaia taudia lasi, unai taudia be idia dekenai ia kehoa hahenamona idia abia lasi dainai, idia taitai bona edia isena idia koria auka masemase.​—⁠Luka 13:​27, 28.

Unai dainai, aposetolo taudia edia nega lalonai, unai “momo” be Iuda taudia momo, bona tomadiho gunalaia taudia ia gwauraia badabada. Unai taudia idia gwau Dirava ena lalo-namo idia ura abia​—⁠to sibodia edia taravatu bona dala hegeregerena, Dirava ena hegeregerena lasi. To, unai “haida sibona” be idia ura momokani Basileia taudia ai idia lao dainai, idia be Keristani kongregesen ena horoa taudia ai idia lao.

Iseda nega lalonai unai siri ia guguru dalana badana mani ita laloa. Kerisendom ena dubu idauidau dekenai idia lao taudia momo herea momokani idia hadibaia, idia be guba dekenai do idia lao. To, unai lalohadai be Baibel ena hahediba herevadia maoromaorodia amo ia mai lasi. Idia be guna Iuda taudia hegeregerena, idia ura Dirava ena lalo-namo be sibodia edia dala hegeregerena ai do idia abia.

To, iseda nega lalonai, mai edia manau ida Basileia ena sivarai idia kamonai henia, Iehova dekenai edia mauri idia gwauhamatalaia, bona iena lalo-namo idia abia taudia be haida sibona. Unai kara dainai, idia be “Basileia ena taunimanima” ai idia lao. (Mataio 13:38) Unai horoa ‘taudia’ be Pentekoste 33 C.E. ai idia boiria matamaia. Iehova ena Witness taudia be nega daudau lalonai idia abia dae Iehova ese ena taunimanima ia kara henidia dalana ese ia hahedinaraia Basileia oreana boiria gaukarana badana ia ore vadaeni. Unai dainai, lagani haida sibona gunanai Baibel ena hereva momokani idia dibaia taudia idia lalo-parara tanobada paradaisona lalonai mauri hanaihanai helarona be hari momo ese idia abia diba. Unai taudia ese Keristani horoa orena taudia, edia namba ia diho noho taudia, edia helaro be guba dekenai do idia lao momokani taudia, edia momo idia hanaia momokani. Luka 13:24 be guba dekenai do idia lao lasi taudia dekenai ia guguru lasi, to unai siri ese sisiba namona ia henidia.

Iesu ese ita ia hamaoroa do ita hekwarahi bona ita raka goada neganai, ia gwau lasi ia eiava ena Tamana ese koua gaudia momo ita vairanai idia atoa. Lasi, to Luka 13:24 amo ita lalo-parara Iehova ena taravatu ese idia hegeregere lasi taudia idia koua. “Do umui raka goada” ena anina be ita hekwarahi, iseda gaukara ita habadaia. Unai dainai reana ita sibona ita henanadai, ‘Lauegu gaukara lau habadaia, a?’ Luka 13:24 be inai bamona ita gwauraia diba, ‘Namona be lau raka goada, iduara maragimaragi dekena amo do lau raka vareai, badina taunimanima momo idia ura vareai, to idia be hegeregere lasi. Unai dainai, lau raka goada momokani, a? Lau be idaunegai steidiam dekenai kwalimu ahuna abia totona iena goada ibounai ida ia gadara spot tauna bamona, a? Unai bamona spot tauna be mai ena kudouna ibounai ida ia hekwarahi, ia metairametaira lasi, o ia laga-ani lasi. Lau laga-ani, a?’

Iesu ena hereva ese idia hahedinaraia reana haida idia ura sibodia idia abia hidi negana ai eiava idia ura henia hekwarahi lasi dalana ai ‘iduara maragimaragi dekena amo idia raka vareai.’ Unai bamona lalohadai ese Witness taudia ta ta ia hakererea diba. Reana haida do idia laloa, ‘Lau be Keristani taudia goadadia haida lau diba, lagani momo lalodiai edia gaukara idia habadaia, bona ura gaudia momo idia dadaraia; to idia mase neganai, inai nega dikana ena dokona ia do ginidae lasi. Unai dainai egu hekwarahi lau hamaragia sisina, taunimanima ma haida hegeregerena do lau noho.’

Unai bamona ita laloa haraga diba, to unai be aonega lalohadaina, a? Hegeregere, aposetolo taudia be unai bamona idia laloa, a? Lasi momokani. Idia be tomadiho momokani totona edia goada ibounai idia henia​—⁠ela bona idia mase. Hegeregere, Paulo ia gwau diba: “Unai dainai Keriso ai harorolaia goada noho . . . Unai totona lau hekwarahi, bona egu goada ibounai lau gaukaralaia noho. Keriso ese inai goada bona siahu, be egu lalona dekenai ia havaraia noho.” Gabeai inai ia torea: “Inai hereva be momokani dainai, ita hekwarahi bona ita hisihisi noho. Badina be Mauri Diravana ita abidadama henia noho. Ia be taunimanima ibounai edia Hamauria Tauna, to ia be abidadama taudia edia Hamauria Tauna momokani.”​—⁠Kolose 1:​28, 29; 1 Timoteo 4:​10.

Ita diba Paulo be ena goada ibounai ia gaukaralaia karana be kara maorona momokani. Iseda lalona do ia hegeregere bema ita be Paulo hegeregerena inai bamona ita gwau diba: “Tuari namona lau tuarilaia vadaeni, lauegu heau helulu be ia ore vadaeni, bona lauegu abidadama lau karaia haorea vadaeni.” (2 Timoteo 4:⁠7) Unai dainai Iesu ena hereva Luka 13:24 dekenai hegeregerena, ita ta ta ibounai ita henanadai diba, ‘Lau be lau gaukara namonamo bona gaukara goadagoada noho, a? Danu, lau hahedinaraia goevagoeva bona hahedinaraia loulou lau ese Iesu ena sisiba, “Do umui raka goada, iduara maragimaragi dekena amo do umui raka vareai,” lau badinaia momokani, a?’