Tuari Oreadia Do Idia Noho Hanaihanai be mai Anina, A?
TUARI oreadia ese taunimanima momo herea idia hamasea bona taunimanima edia moale idia hadikaia. Unai dainai taunimanima haida idia laloa, ‘Taunimanima ese tanobada hegegemadai noho namo negana idia havaraia diba bena tuari oreadia idia kokia diba, a?’ Hari nega tamona taunimanima momo idia hamasea tuari kohudia ese mauri gaudia ibounai idia hamasea ore diba dainai, unai henanadai ena haere ita abia haraga be gau badana. Tuari oreadia be lasi tanobadana do ia vara momokani diba, a?
Guna idia vara haheitalai momo ese idia hamomokania bese idauidau idia hetura namonamo neganai ia ese abidadama heheni karana ia havaraia, bona unai amo tuari kohudia edia namba hamaragia karana ia vara diba. Hegeregere, Canada bona United States edia hetura karana dainai lagani 150 lalonai edia 5,000 kilomita hetoana gabuna be tuari oreadia ese idia naria lasi. Norway bona Sweden danu be unai bamona, bona bese momo ma haida danu. Bese iboudiai idia lalo-tamona neganai, tuari oreadia be lasi tanobadana idia havaraia diba, a? Tanobada Ibounai Tuarina Ginigunana lalonai idia vara kara dika rohoroho murinai, guna bamona lasi momo herea ese unai lalohadai idia abia dae.
Lagani 1918 ai maino idia karaia neganai, Versailles maino pepana amo idia ura idia havaraia gauna ta be “dala ia kehoa bese iboudiai ese tuari kohudia edia namba do idia hamaragia totona.” Murina laganidia ai, momo ese hepapahuahu amo tuari hadokoa karana (pacifism) idia inai henia. Unai lalohadai idia abia dae taudia haida idia gwau bese ta dekenai tuari ia vara be kara dika rohorohona momokani, bona ena dika be lusi karana ena hisihisi ia hanaia. Unai lalohadai idia dadaraia taudia be unai idia abia dae lasi, idia gwau lagani handred momo lalonai, gabu momo ai Iuda taudia be edia inai taudia idia heai henia lasi, to edia bese hadikaia ore totona kara dika rohorohodia idia vara loulou. Africa taudia danu be dala lasi America dekenai igui hesiai taudia bamona idia abidia lao taudia idia heai henia totona, to lagani handred momo lalonai idia kara dika henidia.
To, Tanobada Ibounai Tuarina Iharuana ia vara neganai, hepapahuahu amo tuari hadokoa karana idia inai henia taudia idia gwau bese idia gimaia be namo. Unai dainai Tanobada Ibounai Tuarina Iharuana murinai United Nations idia haginia neganai, tuari kohudia edia namba hamaragia karana idia laloa momo lasi, to hepapahuahu koua totona bese idauidau idia gaukara hebou karana idia laloa momo. Memba besedia idia laloa unai noho namo ese bese do ia hagoadadia tuari kohudia edia namba idia hamaragia totona.
Hekwakwanai ma ta ia hedinarai goevagoeva. Bese ta be ena noho namo totona tuari kohudia ia haboua neganai, ena dekena besena be ia gari. Unai kara dainai tuari kohudia haboua helulu karana ia vara. To vanegai sibona, bese badadia huanai hetura karana ia namo dainai unai ese tuari kohudia edia namba hamaragia karana ena helaro ia hagoadaia. To, unai nega amo, Gulf War bona guna idia gwauraia Yugoslavia tanona ai idia vara hekwakwanai ese momo edia helaro tuari kohudia edia namba hamaragia karana dekenai ia makohia. Lagani ima bamona gunanai, Time magasin ia gwau: “Ena be cold war ia ore, to tanobada be gabu namona lasi to gabu dikana momokani ai ia lao.”
Idia Ura Tanobada Hegegemadai “Pulisi Tauna” Idia Abia
Unai kara idia itaia taudia momo idia gwau, taunimanima ibounai ia gimaia diba gavamani tamona mai ena siahu bada tuari oreana ese taunimanima ia lohiaia be namo. United Nations oreana bona mai edia siahu bada tuari orea tanodia ese unai idia karaia diba lasi dainai, haida idia laloa vaira negana totona helaro be lasi. To bema oi abia dae Baibel be Dirava ena Hereva, reana oi laloa Siahu Ibounai Diravana ese unai kara do ia karaia diba eiava.
Baibel ese ia gwauraia “lalokau bona maino ena Dirava” ese tuari oreadia do ia gaukaralaia hahemaoro maoromaoro ia havaraia totona, a? Bema oibe, edena tuari oreana do ia gaukaralaia? Inai nega ena tuari oreadia momo idia gwau Dirava ese idia ia durua, to momokani idia be Dirava ena ura idia karaia, a? Eiava Dirava be mai ena dala idauna amo tanobada ena hekwakwanai do ia hadokoa bona maino bona noho namo do ia mailaia, a?—2 Korinto 13:11.
Gwau-edeede ginigunana ia vara neganai, Siahu Ibounai Diravana ese Adamu bona Heva be Eden amo ia luludia bona kerubi ia atoa edia giroa lou dalana idia koua totona. Iena lohia siahuna idia gwau-edeede henia karadia ibounai do ia haorea palani ia gwauraia danu. (Genese 3:15) Unai ia karaia totona Dirava ese tuari oreana ta do ia gaukaralaia, a?
Baibel ia gwau nega haida Dirava ese tuari oreadia ia gaukaralaia iena hahemaoro karana ia karaia totona. Hegeregere, Kanana tanona ena bese taudia ese animal ida idia mahuta hebou, natudia idia bouboulaia, bona dagedage bada tuari idia karaia. Dirava ia gwau do idia hadikadia ore bona Iosua ena tuari oreana ia gaukaralaia unai hahemaoro karana karaia totona. (Deuteronomi 7:1, 2) Unai hegeregerena, King Davida ena tuari oreana ese Filistia taudia dekenai Dirava ena hahemaoro karana ia karaia, unai ese Dirava ena hahemaoro karana ginigabena dekenai kara dika taudia ibounai be edena bamona do ia hadikaia ore ia hahedinaraia.
Unai tuari amo gau ta ita dibaia. Iehova ia hahedinaraia ia ese tuari oreana ta ia gaukaralaia diba taunimanima dekenai noho namo ia henia totona. Momokani, Iehova be mai ena tuari oreana idauna bona unai do ia gaukaralaia iena lohia siahuna idia gwau-edeede henia tanobada besedia do ia kara henia totona.
‘Tuari Oreadia Edia Iehova’
Baibel haida ese inai hereva ‘tuari oreadia edia Iehova’ be nega 250 mai kahana ia gaukaralaia. Unai hereva ese Dirava be aneru tuari orea bada hereana ia biagua dagina ia gwauraia. Nega ta peroveta tauna Mikaia ese King Ahaba bona King Iehosapata ia hamaorodia: “Lohiabada be iena terona dekenai ia helai lau itaia, bona guba ena aneru ibounai iena badinai idia gini noho, idiba kahanai bona lauri kahanai danu.” (1 King Taudia 22:19) Aneru edia tuari oreadia ia herevalaia unai. Iehova ese unai tuari oreadia ia gaukaralaia iena taunimanima gimadia totona. Dotana hanua be tuari taudia ese idia hagegea neganai, Elisaia ena hesiai tauna be helaro lasi lalohadaina ia abia. To, ia hagoadaia totona, Dirava ese matahanai amo ia dekenai ena lauma anerudia edia tuari oreana ia hahedinaraia. “Lohiabada ese unai hesiai tauna ena matana ia kehoa, ia itaia, ororo be lahi kariota dekenai idia honu.”—2 King Taudia 6:15-17.
Unai bamona kara ese idia hahedinaraia Dirava ese inai nega ena tuari oreadia ia durua, a? Kerisendom ena tuari oreadia haida idia gwau idia be Dirava ena tuari oreadia. Momo ese dubu gunalaia taudia idia noia idia hanamodia totona. To nega momo Kerisendom ena tuari oreadia be ta ta idia tuari henia, orea tamona taudia idia tuari heheni. Inai nega lalonai idia vara tanobada ibounai tuari rua be sibodia idia gwauraia Keristani taudia edia tuari oreadia rua huanai ia vara. Unai be Dirava ena kara lasi. (1 Ioane 4:20) Ena be unai tuari oreadia idia gwau idia be maino totona idia heai, to tanobada lalonai maino hadikaia karadia idia hadokoa totona, Iesu be iena hahediba taudia ia hamaorodia unai bamona tuari oreadia do idia karaia, a?
Iesu be iena hahediba taudia ida uma lalonai ia guriguri noho lalonai, Iesu idia dogoatao totona mai edia tuari kohu danu idia mai taudia ese maino idia hadikaia. Hahediba tauna ta ese idia mai tauna ta be tuari kaia amo ia utua. Iesu ese unai nega ia gaukaralaia mai anina bada hakaua herevana ta ia gwauraia totona. Ia gwau: “Emu tuari kaia be ena gabu dekenai oi atoa lou, badina be tuari kaia idia iusilaia taudia ibounai, be tuari kaia dekenai do idia mase. Oi laloa lau be siahu lasi a, lauegu Tamana bema lau noia, be ia ese aneru orea 12, bona ma haida danu do ia siaia, lau dekenai durua henia totona?” Iesu be tuari orea badana ia biagua, to Petero be unai tuari orea ena tuari tauna ta lasi, bona taunimanima ma haida danu be unai orea lalonai lasi. To, Petero bona Iesu ena hahediba taudia oredia idia gwauraia “taunimanima haoda henia” taudia. (Mataio 4:19; 26:47-53) Hora haida murinai, Iesu ese Pilato dekenai unai hereva ena anina ia gwauraia hedinarai. Ia gwau: “Lauegu Basileia be inai tanobada gauna lasi. Bema lauegu Basileia be inai tanobada gauna, egu hesiai taudia be do idia tuari, Iuda taudia edia imana dekena amo lau do idia hamauria. Gau tamona, lauegu Basileia be iniseni lasi.” (Ioane 18:36) Ia be tanobada dekenai ia haginia Davida ena basileia bamona lasi, Dirava ese Iesu dekenai ia henia Basileiana be guba dekenai bona tanobada dekenai maino do ia mailaia.
Dirava Ena Tuari Oreadia Idia Lao Tuari Totona
Dirava ena tuari oreadia be kahirakahira do idia tuari. Unai tuari ia herevalaia neganai, Apokalupo bukana ese Iesu ia gwauraia “Dirava ena Hereva.” Ita duahia, ia gwau: “Guba ena tuari oreadia be ia murinai idia lao. Hosi kurokurodia latanai idia guia, bona davana bada dabuadia, goevagoeva bona kurokuro, idia karaia. Edia gunalaia tauna ena uduna dekena amo be tuari kaia ta mai matana ia duduia maoromaoro. Inai tuari kaia dekena amo ia ese tanobada bese ibounai tuari dekenai do ia halusia.” Baibel ia gwau unai tuari lalonai “tanobada ena king taudia mai edia tuari oreadia” do idia mase. Dirava idia badinaia lasi taudia dekenai, unai peroveta herevana ia gwau: “Hosi kurokurona dekenai ia guia tauna ese iena uduna dekenai tuari kaia dekena amo dagedage gauna ena tuari taudia ibounai ia alaia mase.” Satani Diabolo danu ena gaukara do idia hadokoa. Unai ese tuari oreadia be lasi tanobadana mai maino danu do ia havaraia.—Apokalupo 19:11-21; 20:1-3.
Tuari be Lasi Tanobadana Oi Laloa
Emu lalona ena matana amo tanobada be ia noho namo vaitani dainai tuari oreadia be anina lasi oi itaia diba, a? Baibel ena salamo herevana ta ia gwau: “Umui mai! Lohiabada ena gaukara do umui itaia. Tanobada dekenai hadikaia karadia momo ia karaia vadaeni. Tuari be Dirava ese ia hadokoa noho, tanobada kahana ibounai dekenai.”—Salamo 46:8, 9.
Unai be heduru badana! Taunimanima be tuari oreadia bona tuari kohudia totona moni idia henia karana amo ia ruhadia, mani oi laloa! Taunimanima ese edia goada do idia gaukaralaia taunimanima ibounai edia noho namo havaraia totona, tanobada do idia hagoevaia bona tubutubu gaudia do idia hadoa totona. Dala do ia kehoa taunimanima do idia durua momokani kohu matamatadia idia karaia totona.
Tanobada ibounai lalonai inai gwauhamata do ia guguru: “Dagedage bona heatu ena regena, be do oi kamonai lou lasi. Gau ta ese oiemu tano do ia hadikaia lou lasi.” (Isaia 60:18) Helaro lasi taudia milioni momo be tuari gabudia amo edia ruma bona kohu idia heautania bona hekwarahi amo idia honu kamepa lalonai idia noho do ia vara lasi. Nega ta lasi, bese ta ta edia tuari lalonai, taunimanima be edia lalokau taudia idia mase eiava bero idia abia dainai do idia taitai. Iehova ena guba King ese tanobada dekenai maino korikorina do ia havaraia. “King ena mauri dinadia ibounai lalonai, iena bese taudia ese kara maoromaoro do idia karaia, bona edia noho be namo, bona edia gaukara ena anina do idia abia, hua ese iena diari ia henia dinadia ibounai. Bema unai ogogami taudia, be haida ese idia dagedage henia neganai, king ese unai ogogami taudia do ia hamauria.”—Salamo 72:7, 14.
Gau namo hereana ma ta be taunimanima be inai heheni karana do idia dibaia lasi, to Dirava ena lalokau karadia idia tohotohoa taudia huanai do idia noho. Dirava ena Hereva ia gwau: “Siona, Dirava ena ororo helagana dekenai, dika ta, o hadikaia gauna ta do ia noho lasi. Badina be tanobada ibounai, be Lohiabada ena diba maoro dekena amo ia honu momokani, davara be ranu dekenai ia honu bamona.” Iehova idia diba bona idia lalokau henia taudia huanai ita noho be edena bamona? Unai buka tamona ma ia gwau: “Taunimanima ibounai ese kara maoromaoro sibona idia karaia dainai, idia ese, mai maino bona mauri namona do idia noho hanaihanai. Dirava ena taudia be do idia laloa hekwarahi lasi, bona mai hadikaia gauna ta lasi do idia noho.”—Isaia 11:9; 32:17, 18.
Baibel ena diba dekenai edia abidadama idia atoa taudia idia diba Dirava ena tuari oreadia be idia gini hegaegae vadaeni inai tanobada amo maino idia inai henia taudia ibounai idia kokia totona. Unai diba ese goada ia henidia Baibel ese ‘nega gabediai do ia vara’ gauna idia karaia totona. Unai be: “Idia ese edia tuari kaia be hama dekenai do idia makohia, bona unai makohia auri dekena amo, tano geia auri do idia karaia. Bona idia edia io ena auri danu do idia botaia palaka, au rigi utua kaia do idia halaoa. Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.”—Isaia 2:2-4.
Iehova ena Witness taudia ai idia lao vadaeni bese momo amo idia mai taudia be ‘tuari dibaia’ karana idia rakatania vadaeni. Edia abidadama be Dirava ena guba tuari oreadia dekenai idia atoa, idia do idia gimaia totona. Idia ida Baibel oi stadilaia neganai, oi danu be unai lalo-goada oi abia diba.
[Picture Credit Line on page 28]
U.S. National Archives photo